Ka Lahui Hawaii, Volume II, Number 10, 2 March 1876 — Page 1
KA LAHUI HAWAII.
"Ua mau ke Ea o ka Aina i ka Pono."
BUKE II.} HONOLULU, POAHA MARAKI 2, 1876. HELU 10.
KA NUPEPA KA LAHUI HAWAII.
Paiia ma kela Poaha me keia Poaha.
H. H. PALEKA, Luna Hooponopono.
He pepa i hoopukaia i kela me keia hebedoma no na Ohana a me na Ekalesia o Hawaii; he mea kokua i ka noho pono ana o na ohana, ka maluhia o kanaka, a me na pomaikai kino a uhane o ka Lahui Hawaii. "Aole paonioni; aole haanui; aole hikiwawe ka huhu; aole noonoo ino."
O na Kumumanao a pau, na Nu Hou o kela me keia ano, na Mare, Hanau, Make, e kakau mai i ka Luna Hooponopono, a e paiia no ke kupono.
Aole e aeia ka pilikino, ke kuamuamu, ka hoino, a me ka huhu, a ua makemakeia ka hoohoihoi, hoolana manao, hoonaauao, a me ka hoopono.
He $1.75 ka auhau o keia pepa no ka makahiki, a he $1.00 no ka hapa makahiki.
E hookaa mua ia ka auhau o ka pepa mamua o ka loaa ana i kekahi mea makemake e lawe.
NO NA OLELO HOOLAHA.
E lawe ana keia pepa i na Olelo Hoolaha a na makamaka, e like me ke kupono, a e lawa pono ai hoi me ka hoohaiki ole i ka huina o na kolamu kukulu manao, no ka uku haahaa.
O kela a me keia makamaka e makemake ana e hoolaha, e hele mai ma ke keena a e hui pu me ka Luna Hooponopono.
Aole e paiia kekahi Olelo Hoolaha ke ole e hookaa mua ia ka auhau.
Eia kekahi, ke noiia aku nei na makamaka e hoouna mau mai i na mea hou; mai hooloihi loa i na palapala; e hai pololei mai i na manao me ke kuawili ole, a e kakau mai me na hua moakaka.
H. H. PALEKA,
Luna Hooponopono.
PAPA, PAPA.
AIA MA KAHI O
LEWERS & DICKSON
(O LUI MA.)
KE KAHUA KAHIKO MA
Alanui Papu a me Alanui Moi
E LOAA AI NA
PAPA NOUAIKI o kela a me kaia ano.
NA PAPA NANI
A PAA NO KE KUKULU ANA I NA HALE.
Na Pani Puka,
Na Puka Aniani,
Na Olepelepe,
Na Pou, na O-a,
Na Papa hele,
Na Papa Ku,
Na Papa Moe.
Na Pili o na ano a pau!
NA PEPA HOONANI,
Na PENA o na wai a pau.
Na Kui mai ke nui a ka makalii,
Na Ami-puka,
Na Ami-puka Aniani,
Na Ami o na ano a pau.
NA AILA PENA,
NA AILA HOOMALOO,
NA AILA o na ano a pau.
NA VANIKI
Na mea HOOHINUHINU o na ano a pau.
Na Balaki o kela ano keia ano.
A KE HAI IA'KU NEI KA LONO i na makamaka a pau, ua makaukau keia mau Hoa o oukou e hoolawa aku ma na mea a pau e pili ana ma ka laua oihana no ka
UKU HAAHAA LOA!
E like me ka mea e holo ana mawaena o
LAUA a me ka MEA KUAI.
E hele mai! E na makamaka!
A e lawa no hoi ko oukou makemake me ka oluolu
1] a me ka maikai [3m
E LOAA NO I KA POE E
MAKEMAKE I NA
INIKA KAKAU,
PENI, PEPA,
WAHI-LETA,
BUKE,
MA KAHI O
TARAMU.
Manae iho o Kini Hana Wati.
KAHI HOI E LOAA AI IA OUKOU
NA BUKE!
Oia hoi na nupepa i humuia, a e kuniia ka inoa mawaho o ka buke, a ka mea makemake ana, eia no ma kahi o
TARAMU.
KAHI E LOAA AI KO OUKOU MAU
Papa Kuni Inoa!
No ke kuni ana i na Lole,
Na INIKA a me na BALATI,
NO KA
$1.50 NO KE KUNI KELEAWE,
2.00 NO KE KUNI DALA.
MA KAHI O
TARAMU.
NA KII a me na LAKO MAKANA
Paani hoohauoli no na Kamalii.
Na HAE LIILII,
No ka HOONANI ana.
MA KAHI O
1-3m TARAMU.
Bright and Morning Star.
Crown of Life, p. 65.
1 He malihini au la,
Ke nauwe meha nei,
He ala pii a mauna,
He ala pouli e.
Mai loko o ka pouli
He lama ma o ae,
E kuhi ana iluna,
Ka hoku ao lailai.
Cho —Ia Hoku Ao lailai, ua ike au
Maluna me ka nani,
Olino oia no'u.
2 Ua hele au a luhi,
He ala loa no,
Koo nae kekahi ia'u la,
A kai i kuu luuluu.
A oia kuu Ie su la,
Ia lama ma o ae,
He lama kau a nani,
Ka Hoku Ao lailai.
C ho—Ia Hoku Ao lailai, &c.
3 Aole po kuu lama,
Aole pouli ae,
Ke hele a loihi,
Kau oia maluna 'e
Hoolana, a hauoli!
He lama ma o ae,
Ke kuhi mau iluna,
Ka Hoku Ao lailai.
Cho —Ia Hoku Ao lailai, ua ike au
Maluna me ka nani,
Olino oia no'u.
HAWAII.
ELINA KE KOA
HE KANAKA OPIO
PUUWAI WAIPAHE!
KA PALEKAUA LIONA HOI O KONA MAU LA
KE PUKONAKONA O KONA LAHUI, A O
KA OI WELINA HOPO O KONA
MAU ENEMI.
MOKUNA II—Helu 9.
MALUNA ae o na mea a pau, e ke koa mai haalele mai oe ia'u, e pono e lawe pu aku oe ia'u a waiho ma kekahi wahi, i hiki ai ia'u ke huli hoi i ka home o ko'u mau makua. Ua lawe aihue ia mai au mai ka malu hale mai o ko'u one hanau, ua haalele aku i na makua iloko o ke kaumaha nui o ko'u naau, a ua hoao hoi e imi i kahi e pakele ai, aole e hiki; me he 'la ua kau mai la na lani i ka pilikia maluna o'u, a ua hiki ole ia'u ke kokua ia'u iho. Nolaila, ke noi hou aku nei au i kou lokomaikai a me kou ahonui, e lawe aku oe ia'u ma kau huakai huli hoi i ka home, a na ke Akua e hoopomaikai mai ia oe," wahi a Emeline.
"O ka hui ana aku me ka poe powa o ka moana a haulehia iloko o kekahi kaua hahana ke kumu o ko'u makemake ana e waiho ia oe mahope nei, no ka mea, aole i ike ia aku ko kakou hui ana me lakou, a anoi paha o loohia ia ka Zelina e ka pilikia, a haule pu me oe iloko o ia pilikia. Aka, e like me kau noi, aole no au e hoole aku, a e kau aku no hoi au i ko'u manaolana ma na alakai aloha ana a ke Akua," wahi a Elina.
Ua makemake ole o Emeline i keia haalele ia ona mahope nei, a ua hooikaika aku e hoopau i ka manao o Elina e haalele iaia mahope ; aka, ua maopopo no ia Elina ke ano o ka moana, no ka mea, ua lehulehu wale na moku powa, a e halawai aku ana no lakou me kekahi mau moku powa, a e hakaka ana lakou, a ina paha e poino ko lakou moku, o ka poino pu ana no ia me Emeline; nolaila, ua paa loa ko Elina manao e waiho oia mahape.
"He nui ko'u makemake e pakele oe mai na poino o ka noho ana malalo o ka poe kipi, a no ia mea, ua manao au he mea pono ia ke noho a huli hoi mai au, no ka mea, ua maopopo no ia'u e halawai aku ana makou me na moku powa, a e hoouka kaua aku ana makou, a aole o'u makemake e hooipuwa ia kou puuwai mamuli o ka ike ana aku i na mea weliweli, oiai he luku a he oki aku oki mai ka hana o ka poe paio ; a ina paha makou e loohia ia e ka pilikia, alaila, e pilikia pu ana me oe," wahi a Elina.
"O ko'u makemake; ina e kau mai kekahi pilikia maluna o oukou, ka poe hoi nana i hoopakele ia'u mai na poino a ka poe powa, e pilikia pu no kakou a pau. E ke koa opio ! E noho anei au me ka maalahi, a o oukou hoi e hele aku ma ka moana e halawai pu ai me na poino ? Aole loa wau e apono aku ia manao ; no ka mea, ua pakele au ia oukou, a he mea pono e poino pu kakou ina e kau mai ana ia mea maluna o kakou," wahi a Emeline i pane aku ai me ke ano hoalohaloha.
Ia laua mei e kamailio ana, aia hoi, ua hele mai la o Egemona a pane mai la. "No ka hiki ole ia'u ke hoomanawanui ma ka hoolohe ana i kau mau kauoha e ka haku, nolaila, ua holo mai nei au. Ke noke mai la ka poe powa i ka nuku me ka hoopuka ana i na olelo ino awahia, e kapa mai ana ia kaua a me ko kakou Moi, he poe puaa ka, a ua ala mai ko'u inaina me ka manao e hoopai aku ia lakou, aka, ua hoomanao koke au i kau mau kauoha, a ua kaohi mai au i ka'u pahi, mai pau nae lakou i ka make."
"Mai hoolohe aku i ka lakou e kuu hoa, no ka mea, he walaau wale iho no me ka waiwai ole. Ua ike no oe aohe o lakou ikaika i koe, oiai, ua paa lakou i ka hauhoa ia me ke kaula, a ua nele hoi lakou me ka ikaika e hiki ai ke paio mai me kaua, nolaila, mai hoolohe aku oe," wahi a Elina.
Ia laua e kamailio ana, ua hoohikilele ia ae la ko laua hauli i ka poha o ka leo o ka pu kuniahi, a wawalo hele ae la a puni ua hale nei. "Heaha keia?'' wahi a Egemona me ka leo ane pihoihoi i ninau ae ai.
"He pu, a me he la o ka leo hooho kela a kekahi o na pu kuniahi o ke Zelina , e hai mai ana ua hai mai oia," i pane aku ai o Elina.
Kauoha aku la ia ia Egemona e pii aku iluna loa o ua hale nei, a e nana aku a ina o ka Zelina io kela, alaila e kau aku i ka hoailona e like me ka mea i hai ia aku ia lakou. O keia kauoha ua hooko koke ia, a ua hoomaopopo koke aku no hoi o Egemona o ka Zelina no kela moku, a ua kau aku la i ka hoailona.
Hooiho pololei mai la ua moku nei i ka ike ana mai i ka hoailona, a he hora paha mahope iho, ua ku mai la a holo mai la ka waapa i uka o ka aina. I ka pili ana mai, holo mama mai la ka malamamoku imua o Elina, a mamua o kona haawi ana mai i ke aloha a me ka ninau ana i ke ano o ko laua pakele ana, ua pane koke mai la i ka i ana mai me ke ano pihoihoi:
"E ka haku opio, ua hele aku au me ka manao e makai aku i na moku a kakou i lawe pio ai a waiho aku ai malalo o ka malama ana o kekahi o ko kakou mau luina, a ua nalo nae. Aole kela mau moku, a aole no hoi he kanaka hookahi malaila, nolaila, ua huli hoi koke mai au me ka awiwi e hai aku ia oe."
"Alia oe e hele ino loa, aka, me ke akahele e pane ai me ka haawi ana i na noonoo akahele i hiki ai ke ukali aku mahope o ko lakou meheu. He mea maopopo, ua lawe pio hou ia lakou e na powa, a ua pau paha lakou i ka pepehiia. E hoi hou oe iluna o ka moku, a e hoomakaukau no ka holo ana, no ka mea, ua pio iho nei ia maua na powa nona keia hale, a ke noho nei lakou malalo o ko maua malu, a ua makemake au e lawe aku ia lakou maluna o ka Zelina a hoea imua o ka Moi Rikeke, a nana no e haawi mai i ka hoopai kupono ana i manao ai e kau maluna o na powa o keia moana.
Ua ane kahaha ka malamamoku i kona lohe ana i keia mea, a huli aku la ia me ka hauoli piha no ka hooko ana i ke kauoha a Elina.
Mokuna III.
I ke kakahiaka nui o kekahi la, i ka wa a na kukuna la e pii ae ana a kiei mahope o na puu hauliuli o ka aina; e pa kolonahe mai ana hoi ka makani kehau huihui, o ka wa ia a ke kuna Zelina i haalele aku ai i ka aina, a hoomaka aku la kona ihu e eku i ke kai loa o ka moana e waiho ana mawaena o ua aina nei a me na kapakai o ke aupuni Beritania. Iloko o ka hooikaika nui o Emeline e holo pu aku oia me Elina ma, aole nae i ae aku o Elina, no ka mea, ua paa kona manao e kaua aku ana ia me na powa, a aole loa ona makemake e kau aku i na poino maluna o Emeline.
E ku ana ua Emeline nei ma kapakai me ka uwe ana, oiai, mamuli o kona hoopakele ia ana mai ka noho ana malalo o na powa, ua komo iho la kona aloha no Elina a me kona mau hoa; a ku aku la ia me ke kau pono o kona mau maka maluna o na hiohiona o ua Zelina nei a hiki i ka nalo ana aku i ka mamao.
(Aole i pau.)
KA HALE KAKELA BELOISA.
HE NANEA
NO NA AU I HALA.
HELU 6.
A KOMO aku la ua mau kanaka nei i hoohui ano e ia iloko o ka hale hookipa, a pii aku la ma ke alapii a hiki i ko laua komo ana iloko o kekahi keena o ka hale maluna ae. Ia laua i noho iho ai, i aku la o Heneri. "E kuu makamaka, ano, ua hoohuiia kaua he mau hoahanau. E hai mai oe i kou inoa, a ina he mea hiki ia'u ke kokua aku ia oe ma kekahi manawa e hiki mai ana, me kuu puuwai a pau ke a-a nei au e kokua nou a no kou inoa a hiki i ka wa e hookaawale ia aku ai mai keia honua."
"Ua ike ia au e na kanaka o keia wahi a pau ma ka inoa o Anederea Savage. Ke manao nei au e kapa mai ana lakou i ko'u inoa o Anederea Hipa ma keia hope aku."
Aole e hiki ia Heneri ke uumi i kona aka no keia olelo a ke kamaaina. Ua aka iho la ia me ka lo'u ana no kekahi manawa, me ka i aku: "Aole pela, aole e hiki ke kapaia mai ia inoa ia oe. He mea hohe wale a he palupalu ka hipa, aole i kupono e kapaia mai oe ma ia inoa. Ua hakaka oe me ke koa, a me ka wiwo ole no hoi, aka, no ke au o ka pono i lilo ai ka pomaikai o ka hakaka ana ma ko'u aoao; a pela i eo ai ia'u."
"He oiaio ia e ka makamaka, he oiaio kau ; aka, e hai mai oe i kou inoa, oiai ua hai aku nei au i ko'u inoa."
"O Heneri De Lavalete ko'u inoa." wahi a ka malihini. "He Lutanela au noloko o ka puali koa o ka Moi. Ua haalele aku au ia hana, a e huli ana au i hana na'u i loaa ka pomaikai."
"Alaila, e loaa koke ana ia oe me kou ike ole," wahi a Anederea Savage. "Ua loaa koke ia oe he hoaaloha maikai me kekahi o na kanaka waiwai loa o keia aoao o Farani."
"A! ooe anei kau e olelo nei e kuu makamaka?" i ninau aku ai o Heneri.
Hene iho la ka aka a Anederea me ke kui iho i ka pakaukau.
"Ina owau!" wahi ana, "maoli kela! Ua like ko'u nele me kekahi ilio kawau. Aohe a'u wahi hapaumi i hookoeia no ko'u waihona, i ka wa e loaa ai ka'u dala, o ka wa no ia e auhee koke aku ai lakou. No ka Iudaio ka'u e olelo nei, no Beni Iseraela a me kana kaikamahine me Esetera."
"A pehea e loaa ai ia'u ka pomaikai malaila?" i ninau aku ai o Heneri. "I ko'u manao, ua aneane au e hiki aku i ko'u hopena no laua mamua o ka loaa ana he wahi pomaikai kekahi mai a laua mai.''
"Aole pela," i pane mai ai o Anederea. "O Beni I seraela, he kanaka ia e hoopoina ole ana i kana olelo. Ua lohe au i kona olelo ana e hele aku oe i ona la ; ina oe e hooko aku i kana noi—he pono e hele e hoao i ike."
"Aole," wahi a Heneri, "aole loa au e hele aku i ona la ; he mea ia e manao ia mai ai e hele aku ana au e nonoi i uku no ko'u kokua ana mahope ona. Aole pela e ka makamaka Anederea ; e inu, e ai, a e hauoli kaua ; aka, no ka hele ana aku e nonoi i na kokua ana mai ka makamaka Iudaio mai, aole loa au e hana ana pela, e Anederea."
Pela laua i nanea ai, a i luana ai hoi, a hiki wale i ka wa i hana io mai ai ka noe oluna. Ke welo aku nei ka la i ka ilikai, a i ka wa i hehi mai ai ka pouli, a uiuiki mai la na kukui o ke kauhale nani o Anegera, ia wa i hele aku ai ka malihini e makaikai i na alanui o ke kulanakauhale.
I ko ia nei hiki ana aku i ka makete, kahi ona i hakaka ai me Anederea, he kakaikahi wale no na kanaka i koe iho, a no ke ano kahihio o ua poe la i ka waina, aole lakou i hoomaopopo mai iaia nei, ka mea nana ka hana kaulana i hana ia ma ia wahi i ke ao.
Ina he hele makaala ko ua malihini nei nona iho, ina paha ua ike oia i kekahi mea e hakilo mai ana ma kona mau meheu ; no ka mea, ma kana mau wahi a pau e hele ana, aia malaila i ukali aku ai kekahi mea kino e aahu ana i ke koloka loihi mailuna a lalo, a ma ka ia nei wahi hoi e ku iho ai, ua ku iho la ua mea la me ka pee ae ma kahi e ike ole ia mai ai, aka, no ko ia nei hooikaika ia ana mai e ke ehu waina, aole keia i manao ae no kela a me keia mahope mai ona, hookahi ana mea makaala, o na mea e hiki mai ana imua o kona alo.
Ma na hiohiona o ka mea e ukali nei mahope ona, me he la aole oia he elele no kekahi mea ino. A i ka wa i huli hoi ae ai o Heneri i ka Hotele ana i haalele aku ai, ua ike ia aku la ua kino eleele la e uhai loloa ana iaia a hiki wale i ke komo ana iloko o ka Hotele.
* * * *
I ka wa i ala ae ai o Heneri i kakahiakanui o kekahi la ae, ua haalele mai la ke poniuniu o ka waina i kona lolo, a ua mama maikai kona manao. Hoomanao ae la ia no na mea i hanaia i ka la i hala, a me kona hakaha ana, ia wa i akaaka iho ai oia nona iho, me ka puana ae i keia mau mapuna olelo:
"A! E Pauline! Nani ka mamao o ke kowa mawaena o kaua. Ina paha oe e ike ana, eia wau iloko o ka Hotele nani loa o Anegera nei, me na wahi dala he iwakalua wale no i kona pakeke, noloko mai o ke ewalu haneri dala i haalele mai iaia, heaha la kau e olelo mai ai ia'u? Ke maka-e mai nei ka pomaikai ia'u, aka, heaha ka hewa, pela no au e na-i aku ai a hiki i ka hopena. A ha! Heaha keia?"
Pela i puiwa koke ai kona manao, i ka ike ana he leta ke waiho ana iluna o ka papakaukau ma ka aoao o kona moe. O ka lima kakau mawaho o ua leta nei, he lima wahine. No ko ia nei haohao nui, ua wehe ae la ia a nana iho la i na olelo o loko. He pokole wale no, a penei ka heluhelu ana.
"Ina e kipa ae ka malihini i kokua ai i ka Iudaio a me ke kaikamahine ma ka makete, ma ka hale i kuhikuhi ia aku iaia, ua hoohanohano nui ia mai laua e kona lokomaikai."
Nalu iho la o Heneri iloko ona. Hiki hou mai la na hoomanao ana no ka Anederea mau olelo. He oiaio anei ua loaa iaia ka mole o ka pomaikai?
"Heaha la hoi?" wahi ana, "e hele aku ana au; a ina e hiki io aku au ilaila, aole loa au e nonoi iki aku i wahi uku no ko'u kokua ana."
I ke awakea ponoi o ua la nei, ike ia aku la ka malihini e kapio ana i kona alahele a hiki i ka puka o ka hale o ka Iudaio.
He hale nui eehia i ka nana aku, me he paia la no kekahi pahale kahiko. He kiekie no hoi me na hale kui ae maluna iho, a paapu na puka aniani i ka lepo, a me ka punawelewele.
I ka nana aku, me he la aole ia he hale no ke kanaka waiwai, aka, ua maopopo nae ia ia nei ke ano o na Iudaio, he poe huna i ko lakou waiwai, a no ko ia nei hilinai i na olelo a Anederea, nolaila, ua komo loa aku oia iloko a hiki i ka papa kuai ekaeka o Beni Iseraela.
I ka ike ana mai o ka Iudaio elemakule, ua pu-a mai la na ouli o ka hauoli ma kona mau helehelena, malia paha no kona hoomanao ana ae oia nei kona mea i aie ai i kona ola a me ko kana kaikamahine. Pane mai la ia. "A! aole i hilahila ke Karistiano i ka hele ana mai e ike i ka Iudaio. E ukali mai anei oe mahope o'u?"
Iaia i puana ae ai pela, ku ae la ia iluna a alakai aku la ia ia nei iloko o ke keena maloko aku o ke keena hana, kahi a Esetera e noho ana.
I ka wa i komo aku ai ke kanaka opio Karistiano, ia wa i ku ae ai o Esetera iluna e haawi mai i ke aloha no ia nei. I aku la o Heneri. "Ke nonoi aku nei au i ka ui, e noho iho ma kou wahi. Aohe i kupono i ke kaikamahine opio e hooluhi wale iaia iho imua o kekahi kanaka aea wale e like me a'u."
"Aole pela," i pane mai ai o Esetera, "ooe ko'u mea nana i hoopakele," me ka puili paa mai i ko ia nei lima; "kuu hoaaloha wiwo ole,—a o ko'u kaikunane, nolaila, o ka mea pono ia'u e hana aku ai, e haawi aku au i ko'u aloha a me na hoomaikai ana."
Ua aneane keia e poholo pu iloko o ia mau huaolelo waipahe, aohe ana huaolelo kupono e panai aku ai, o ke aloha wale aku no. Alakai aku la kela ia ia nei a hiki i kekahi noho, hoonoho iho la. Nana mai la ka makua Iudaio ia laua nei me ka waiolu o loko, a ma kona mau papalina kahiko i hohola ae ai na mino aka o ka hauoli.
"Ae, oia no," wahi a ka makua i pane mai ai, oiai oia ua noho iho la ma kekahi noho e kokoke ana i kona hoaaloha hou, a me he la hoi, ua hooholo mua laua i na ano o ka hana ana mai pela ia ia nei. "Ia oe i aie nui ai maua i na mea a pau; ke nonoi aku nei au ia oe e hoike mai ia'u i kou moolelo a pau loa me ka huna ole i kekahi mea uuku, i mea e hiki ai ia'u ke nana no kou wa e hiki mai ana."
Me ke ano hikilele i hakapono aku ai o Heneri i ua Iudaio la. I kinohi, ua ane pilipu keia, a me ka ohilahila, i awili pu ia me ka ukiuki; aka, i kona ike ana aku i na hiona o ke aloha ma na helehelena o ka Iudaio, ua pane aku la keia:
"He noi kupanaha kau i ko'u manao, aka, e hoike aku no au i ka pane i kupono no kau noi e like me ka pololei i ka mea i anoiia. He moolelo kupanaha ko'u, a me ka ahiu."
Hahai aku la keia i kona ano a me kona moolelo mai kinohi mai a hiki i ko lakou halawai pu ana;—kona pakela ana mai ka make mai—ka lilo e ana o kona puuwai, a me na poino e ae i loohia iaia.
Hoolohe pono mai la laua i ka ia nei olelo me ka hiaai, a hiki i ko ia nei wa i hai aku ai i kona aloha no Pauline, ia wa i ano e ae ai ko laua mau helehelena, me ka hoopuiwa ia, aka, aole i pane mai, hoolohe malie wale mai la no a hiki i ke oki ana o ka ia nei olelo ana. Aole no hoi keia i huna i ka hoike aku no ko Pauline aloha iaia, a me kona paulele nui mamuli ona, me ka hiki ole e kuaiia kona puuwai i kekahi mea e aku.
Ia ia nei i hoomaha iho ai, pane mai la o Beni Iseraela; "Ua pono, e lilo oe i hoaaloha maikai loa no maua. Ooe ka mea nana i hoopakele ko maua hanohano a me ko maua ola. Ina aole he hookae o kou manao no'u, na'u no e hoopiha aku i kou waihona dala me ka moni."
"Aole o'u manao hookahi," i pane aku ai keia, "ke loaa kekahi hana kupono e hila hila ole ai au. O ke dala ko'u makemake nui, i hiki ai ia'u ke hoi hou aku e lawe ia Pauline i wahine mare."
Oiai keia e olelo ana pela, kulou iho la o Esetera ilalo a olelo mai la, "He mea maikai ke aloha ana, e like me kou aloha ia Pauline, aka, ua paa anei kou manao aohe mea nana e hoololi ae i kona aloha?"
"Ae, ua paa, a he oiaio kona aloha," wahi a Heneri. "Aole loa he wa i keakea ia mai ai ko'u manao e ke kanalua no kona aloha ia'u. Aole loa, he oiaio oia e like me ke kupaa o ka la."
"Ma kau olelo ana, he pono ia maua e manaoio aku," i pane mai ai o Beni Iseraela. "E kuu keiki, he nui ka'u hana, aole i hiki pono i kuu wa elemakule nei ke malama i na hana a pau. Ina he makemake kou e kokua mai ia'u, e haawi no au i uku makahiki maikai nou. Aole oia wale, e hoomanao oe no keia olelo paa, e nana mau no au i ka mea e lilo ai oe he kanaka kuonoono no hope aku."
No kekahi manawa i kuka iho ai o Heneri me ka noonoo pono ana. O kona ohana, he enemi nui loa na Iudaio no lakou. He Lutanela hoi oia noloko o ka puali kaua o ke alii i kahi wa, a i keia wa hoi, e lilo ana ka he kokua no ka Iudaio kalepa. Aka hoi, aole ona hookae no ka hana pono. O ke dala i loaa pono mai ma na hana maikai, he waiwai maikai ia.
He aneane hapalua hora i hala ae kona noonoo ana, akahi no oia a hoopuka aku i kona ae; a iloko hoi o ka 1 hora mahope iho, ua komo ae la ia e lawelawe i na mea huna o kana oihana. Panee emoole ae la na manawa, oiai oia e laulana ana me ka oluolu ma ia wahi hou. Ua lawa kona mau hemahema a pau ma ka hale o Beni Iseraela.
Aole ana hana nui, aole ma ke ano kauwa; a oiai e hoonanea mau ia ana kona manawa me na mapuna leo nahenahe mai a Esetera mai, aole he wa i komo aihue mai ai ke kaumaha iloko o kona manao. O kana hana, o ke kali ma ka papa kuai i ka poe hele mai e aie dala, a e moraki i ua Iudaio waiwai nui la, eia nae, aia iloko o ko lakou naau he hookae a me ka hoowahawaha iaia. O ko ia nei kulana, me he keiki la a kekahi ona waiwai nui, no ka mea, ua oi ae ka nani o kona mau kapa komo mamua o kona wa malalo o ka oihana kaua.
(Aole i pau.)