Ka Lahui Hawaii, Volume II, Number 19, 4 May 1876 — Page 4
Na Ekalesia o Kawaiahao a me Kaumakapili.
Halawai kakahiaka, la Sabati .... hora 10½
Halawai po ..... hora 7½
Halawai Apana auina la ..... hora 3½
Kula Sabati ..... hora 9½
NA HAAWINA KULA SABATI.
[HOOPONOPONOIA E REV. L. LAIANA.]
Ka Hapaha Elua.—
HELU 8—SABATI, MEI. 21, 1876.
KA LAUNA KARISTIANO.
Oihana 4 ; 23—37.
23 A kuuia mai la laua, hele mai la laua i ko laua poe, hai mai la i na mea a pau a ka poe kahuna nui a me ka poe kahiko i olelo mai ai ia laua.
24 A lohe mai la lakou, hookiekie lokahi ae la ko lakou leo i ke Akua, i aku la, E ka Haku, o oe ko ke Akua nana i hana ka lani, a me ka honua, a me ke kai, a me na mea a pau oloko.
25 Ua olelo mai no oe ma ka waha o Davida, o kau kauwa, No ke aha la e kupikipikio ai ko na aina e, a me na kanaka hoi i noonoo al i na mea lapuwale ?
26 Ku ae la iluna na alii o ka honua, a hoakoakoa no hoi na luna e kue aku i ka Haku, a i kona Mesia.
27 No ka mea, he oiaio no, ua akoakoa mai nei ma keia kulanakauhale, o Herode a me Ponetio Pilato, me ko na aina e, a me na kanaka o ka Iseraela, me ke kue i kau keiki hoano ia Iesu i ka mea au i poni ai.
28 E hana hoi i na mea a kou lima a me kou naau i manao mua ai e hana ia mai.
29 Ano hoi, e ka Haku, e nana mai oe i ka lakou olelo hooweliweli ; a e haawi mai i kau mau kauwa nei e hai aku i kau olelo me ka wiwo ole ;
30 I ka hohola ana mai i kou lima, e hoola mai, a i hanaia hoi a me na mea kupanaha, ma ka inoa o kau Keiki Hemolele o Iesu.
31 A pau ka lakou pule ana, naeuue ae ae la kahi a lakou i akoakoa ai ; a ua piha lakou i ka Uhane Hemolele, a hai aku la lakou i ka olelo a ke Akua me ka wiwo ole.
32 A o ka poe o lakou i manaoio aku hookahi o lakou naau, hookahi hoi manao, aole hoi i olelo kekahi, nona wale no kekahi waiwai ana i malama ai; no ka mea, hui puia ko lakou a pau.
33 Me ka mana nui i hoike mai ai na lunaolelo i ke ala hou ana o ka Haku o Iesu ; a loaa iho la ia lakou a pau ka hoomaikai nui ia.
34 Aole hoi i nele kekahi o lakou, no ka mea, o ka poe mea aina, a me ka poe mea hale, kuai lilo aku la lakou, a lawe mai la lakou i ke kala o na mea a lakou i kuai ai.
35 A waiho iho la ma na wawae o ka poe lunaolelo ; a haawi aku la lakou i kela kanaka keia kanaka, e like me kona he mahema .
36 A o Iose ka mea i kapaia o Barenaba, (eia hoi ke ano ma ka hoohalike ana o ke keiki a ka hooluolu,) he mamo na Levi no ka aina i Kupero.
37 He aina no kona, a kuai lilo aku la a lawe mai la i ke kala a waiho iho la ma na wawe o na lunaolelo.
Pauku hoopaa, pauku 32.
Mele. Him. 355. 8—6. Leo—
Aloha e na hoahanau—pauku 1 me 2.
Pule i loaa ka manao like, launa pu, kuikahi, a pela'ku.
———:o:———
Na Ninau Wehewehe, Hoopili.
P. 23 I ka hookuuia ana o Petero ma, hele laua i owa la? I kekahi poe hoahanau e noho kokoke ana. A hai aku i ke aha? I ka hana a ka aha, i ka hopu ia'na hookolokoloia ana, papa hooweliwelia'na, i ka huli nui ana o kanaka ; a pela'ku.
P. 24 I ka lohe ana o na hoa hookiekie lokahi i ko lakou leo i ke Akua. Heaha ka hapa mua a ka lakou pule? Pehea ka Iesu ao ana ke pule ? E ko makou makua iloko o ka lani, &c. Akahi no anei kakou a lohe i ke ano o ka pule a Iesu? Mahea ka pule mua i hoopukaia?
P. 25 Nohea mai kahi hapa o ka lakou pule? Helule 2: 1. Heahal ka ninau malaila? Owai na aina e me na kanaka? Pehea ka pili ana o ia pauku i keia Aha hookolokolo i hooweliweli ia Petero ma? A no ke aha ke kupikipikio ana a noonoo ia ka mea lapuwale? No ka lanikila ana o ka olelo a Iesu ma ka waha o Petero ma. He mea lapuwale nae ka noonoo ana, he mana ole, e hookahuliia ana. Hiki ole ke keakea i ka mana o Iesu.
P. 26—28 Owai ka i ku a hoakoakoa e kue ia Iesu ka Mesia ke 'Li o keia ao? Owai na lii? na kanaka e? ka poe Iseraela e huipu e pepehi ia Iesu? E hana hoi iaia i na mea a ke Akua i manao mua ai e hanaia? Ina i manao ke Akua e hanaia pela ia Iesu a hookoia kona manao, hewa ole anei ka poe nana i hooko? Aole paha, aole i manao lakou, e hooko ana lakou i ko ke Akua manao, o ko lakou manao ponoi no ia e pepehi ia Iesu. Ua huhu loa lakou iaia. Ua pepehi iaia me ka huhu loa. Ua hoollo nae ke Akua ia hana ino ana ia Iesu i mea e pono ai kanaka.
P. 29, 30 Heaha ka hapa hope o ka lakou pue? E nana me ke pale aku, me ka hoolilo i ka lakou olelo hooweliweli i mea ole, a e haawi mai na haumana i ka wiwo ole, i ka mana e hoola'i, e hana'i i na hana kupaianaha ma ka inoa owai? Auhea ka Amene o keia pule? He amene ko kekahi pule, he amene ole ko kekahi. Aole he mea nui ka amene.
P. 31 A pau ia pule, heaha mahope? He olai paha, he mea hoala, hoeueu, hoomaopopo i ka mana o ka pule. A piha iho la ka lakou i ke aha ? A hai aku i ka Iesu olelo me ke aha? Ua loaa mai no ka Uhane a nui ma ka la Penetekota. A loaa hou mai no, a pela mau a hiki i keia manawa.
P. 32 Hai paanaau mai i keia pauku. Nani ka mana o ka Uhane, ka hua keia na ka Uhane, ke aloha, ka lokahi, ke kuikahi, ka noho like.
P. 33 Me ke aha ka hoike ana o na lunaolelo i ke ala hou ana o Iesu? A heaha ka i loaa ia lakou?
P. 34—37 Aole i aha kekahi? No ke aha ka nele? Heaha ke ano o keia kuai ana? Kuai anei i na mea a pau loa, a hana e like me ka Iesu kauoha i kela kanaka waiwai ma Mat. 19:21? Ua kuai paha kekahi poe pela, a o kekahi poe, ua kuai aku i kekahi hapa o na aina, a o na hale a a waiho i na lunaolelo i mea e pono ai ka poe hemahema. A koe kekahi no lakou ponoi. Hiki no ke hana pela. Oih. 5:4.
Owai keia kanaka maikai i kuai i kona aina, a waiho i ka loaa ma na wawae o na lunaolelo i mea i ka poe hemahema? Elua ona inoa, owai, owai? Heaha ke ano o ka inoa hope? He mamo oia nawai? Nohea hoi? Mahea Kupero? He lala paha oia no kela poe he 70 ma Luka 10:1. A lilo oia mahope i hoahele nowai? Malama ua hele laua i ke kula hookahi?
Ke kula a pau. Heaha na manaopili?
1 E hui pu na hoahanau a hai aku a hai mai na hana a lakou i hana'i no Iesu, a me na pilikia i loa mai ma ka hana ana.
2 E pule, a hoomaikai i ke Akua no kona kokua ana, a i hoolilo oia i na olelo hooweliweli a na enemi i mea ole, a i haawi ia mai ka wiwo ole imua o na enemi.
3 Ma ka pule like a ikaika e piha ai na haipule i ka Uhane Hemelele, a e huli mai ai ka poe mawaho.
4 Na hua i maopopo ai ka huli io ma ka pono, ka launa aloha, ke kuikahi, ke kokua ana i ka hemahema—ke kuai ana aku i ka waiwai, i na hale, i na aina, i na holoholona a hoohui pu i ka loaa ma ka puuwai hookahi no ka poe nele, no na hana misionari. Ke hana nei kakou pela, aka, ua hapa paha. E hoomahuahua ka pono.
Mele. Him. 357. 6—8. Leo.
He poe hoe hoahanau, &c. (P. 3 & 4)
Pule i hiki nui mai ka Uhane, e hoala, e hoolauna, e hookuikahi.
Haawina no Mei 28; Oihana 5:1—11.
He Moolelo Baibala.
[HAKUIA E REV. C. B. ANERU.]
HELU 7.
Auhea oukou kuu poe opio, a me ka poe imi naauao? Ke paipai nei au ia oukou e huli nui i ka Mok. 10. o Kinohi. Malaila i kakau ia ka Mole, ke Kumu, a me na lala mua o ka moolelo o kela a me keia lahui o ka houna. Mai loko ae o ko laila mau inoa mua loa o Noa me kana mau keiki, a me kana poe moopuna, ua manamana ae ke kuauhau o na lahui, a hiki aku i na welealau a pau o ka honua,—a hiki mal i ko Hawaii nei no hoi. Aole nae manao i ka mea nana mai ka Baibala e hoomohala ae i na kuauhau, a hoomoakaka mai i na moolelo lehulehu.
Hookahi wale no mea nui i hai ia mai, i pili like i na mamo o Noa ma, e mahuahua ana mahope o Kekaiakahinalii. Hookahi no lehelehe, hookahi hoi olelo a lakou a pau loa. I ko lakou hele ana mai ka hikina mai, loaa ia lakou kahi papu ma ka aina o Sinara, a noho iho la lakou ilaila. Aia no ia papu ma ka aina i kapa ia o Sinara, (Shinar) e pili ana i ka Muliwai o Eupareta.
Olelo ae la kekahi kanaka i kona hoa. Ina kakou e hana i na pohaku ula, (unihapa) e kahu a moa loa. O ka lakou mau puna, no ua mau pohaku ula la, he bitumena.
Olelo hou ae la lakou. Ina kakou e hana i kulanakauhale no kakou, a me ka hale pakui, e kiekie ae kona welau i ka lani, a e hookaulana ae i ko kakou inoa, o hoopuehu ia aku kakou maluna o ka honua a pau.
Iho mai la o Iehova ilalo e nana i ke kulanakauhale a me ka hale pakui a na keiki a kanaka i hana ai. I iho la o Iehova. Aia hoi, hookahi no poe kanaka, hookahi hoi o lakou lehelehe, eia ka lakou e hoomaka nei e hana, a mahope aku, aohe mea keakea ia lakou ke hana i na mea a pau a lakou i manao ai. Ina kakou e iho iho kakou, a malaila e hookahuli ai i ka lakou olelo, i hoomaopopo ole ai lakou i ka olelo a kekahi. Pela o Iehova i hoopuehu aku ai ia lakou maluna o ka honua a pau, a oki iho la ka lakou hana ana i ua kulanakauhale la.
No ko lakou kuee i ka Iehova kauoha, e hoolaha ae a piha ka honua, nolaila kona huhu a hoopuehu aku ia lakou. No ia mea, ua kapa ia ka inoa o ia wahi, o Babela, (oia hoi, Kahuli.) Aka, o kekahi moopuna a Hama, o Nimeroda ka inoa, ka hiapo a Kuza, ka Hama hanau mua, he kanaka koa loa hoi keia Nimeroda, (Kin. mok X, na pauku 8, 9, 10.) oia ka i hooalii ia ia iho, (o ke alii mua hoi a kakou i lohe ai ma ka honua nei,) a hoomaka no i kona aupuni ma kela aina papu o Sinara, a mahope iho, hoolilo no oia ia kulanakauhale o Babela i poo aupuni nona.
Pau na kanaka i ka hoopuehuia mai Babela aku, a kau liilii aku ka nui, waiho no ka Baibala i ka moolelo o ia lahui aku a ia lahui aku, a hahai i keia lala o Sema, ka lua o ka Noa mau keiki. Penei ko lakou kuauhau.—
I ka makahikk 100 o ko Sema ola ana; hanau iho la kana keiki o Arepakada i elua makahiki mahope o Kekaiakahinalii.
M.H. M.H.
Arepakada a ia Sala 35, kona ola okoa —
Sala a ia Ebera 30, " " " 433
Ebera a ia Pelega 34, " " " 464
Pelega a ia Reu 30, " " " 239
Reu a ia Seruga 32, " " " 239
Seruga a ia Nahora 30, " " " 230
Nahora a ia Terah 29, " " " 148
Terah a ia Aberama 70, " " " 205
Kekaiakahinalii a
ia Aberama 292.
E houluulu 292 me 1656 mai a Adamu a i Kekaiakahinalii, a loaa ia kakou, 1948 makahiki, mai ia Adamu a ia Aberama.
Ua kapa ia ko Aberama mamo, ma o Isaaka kana keiki, he poe Hebera, (Hebrews) mamuli o Ebera, ka ha o ka hanauna mai Sema ae.
I ka makahiki 101 mahope o Kekaiakahinalii, hanau ka Ebera keiki o Pelega i ka Makahiki o Iehova i hoopuehu i ka poe kukulu i ke kulanakauhale o Babela, (E nana i ka mok. X, p., 25 o Kinohi.)
Ina kakou e hoohalke ma keia, a me ka papa kuauhau mai ia Adamu a ia Noa, e ike no kakou e ola ana o Adamu i ka wa o Metusala. Ua launa pu no hoi o Metusala me Sema, a ua ola pu o Sema me Aberahama a me kana keiki o Isaaka. Nolaila, ekolu wale no mea e hai waha i keia moolelo mai ia Adamu a ia Isaaka, a elima a eono paha mau mea mai Adamu a ia Mose, ka mea nana i haku mai ia moolelo mai kinohi mai. (Aole i pau.)
Moolelo o ka Ahahui Euanelio o Oahu.
Halawai ka Ahahui Euanelio o ka Mokupuni o Oahu ma Kaumakapili, Aperila la 11, hora 10 A. M., 1876.
Kohoia o Rev. S. Paaluhi i Lunahoomalu no ka manawa, a o W. H. Nailipelapela i Kakauolelo.
Eia na Kahu me na Elele i hiki mai:
Kihapai. Kahu. Elele.
Kawaiahao Rev. H. H. Pareka W. H. Nailipelapela
Kaumakapili Rev. M. Kuaea J. Alapai
Kalihi me M. Rev. S. Paaluhi Z. S. K. Paaluhi
Ewa Kaalauahi
Waianae Rev. A Kaoliko
Waialua Rev. J. N. Paikuli
Kahuku Rev. J. Kekahuna
Hauula
Kahana Rev. D. Kekiokalani Kauwa
Waikane L. Puuweuweu
Kaneohe Rev. J. Manuela J. P. Kamai
Waimanalo Rev. S. Waiwaiole Nailima
Wailupe Kawai
Na Lala, Rev. J. F. Pogue, Rev. B. W. Pareka, Rev. L. Kamika, Rev. D. Baldwin, P. Naone.
Koho ka aha ia Rev. M. Kuaea i Lunahoomalu, Rev. S. Paaluhi i Kakauolelo. Koho ka Lunahoomalu i Komite Imihana, J. F. Pogue, W. H. Nailipelapela, J. Alapai.
Malamaia he manawa haipule pokole.
Hoike hapa mai ke komite Imihana.
1 Hapalua hora haipule i ka hoomaka ana.
2 Hoike Kihapai.
3 Hoike Komite i kohoia ma kekahi halawai i hala.
4 Na Palapala Hoopii.
5 Koho i Komite Hoike Kihapai i ka Ahahui Euanelio o Hawaii i ka malama o Iune.
6 Koho i Komite Hoike Ahahui Euanelio o Oahu nei i ka malama o Iune.
7 Koho i mau Elele no ka halawai o ka Aha Euanelio o Hawaii.
8 Na mea i malama i na ekalesia kahu ole.
9 Ina i kaheaia kekahi kahunapule i kahu no kekahi ekalesia, aole nae i hoonoho ia kela e ka Aha Mokupuni no kahi ekalesia, he kahu anei oia no ia ekalesia?
10 Ina i hoonohoia e kekahi Aha Mokupuni, he kahu no kahi ekalesia, a haalele oia i kona noho kahu ana me ka ae ole o ka aha nona ka hoonoho ana iaia i kahu, pehea la kela kahu? 11 La o ka Haku.
12 Pehea la ka noho ana o na kahunapule kahu ole ma keia mokupuni.
13 Kula Kahunapule.
14 Heluhelu Kumumanao.
Ua hoaponoia e ka aha ka hoike a ke komite.
Ma ke noi a J. F. Pogue e hoopaneeia keia aha a halawai hou mai i ka hora 2 P. M. Pule o M. Kuaea.
Halawai hou mai ka aha i ka hora i hoopaneeia, pule o W. H. Nailipelapela.
Hapai ka aha no ke kumumanao 2. No na hoike kihapai.
Heluhelu mai o M. Kuaea i ka hoike kihapai no ka ekalesia o Kaumakapili.
Heluhelu mai o S. Paaluhi i ka hoike kihapai no ka ekalesia o Kalihi me Moanalua.
Heluhelu mai o J. Kekahuna i ka hoike kihapai no ka ekalesia o Kahuku.
Heluhelu mai o D. Kekiokalani i ka hoike kihapai no ka ekalesia o Kahana.
Heluhelu mai o S. Waiwaiole, ke kahu ku i ka wa i ka hoike kihapai no ka ekalesia o Waikane.
Heluhelu mai o J. Manuela i ka hoike kihapai no ka ekalesia o Kaneohe.
Heluhelu mai o S. Waiwaiole i ka hoike kihapai no ka ekalesia o Waimanalo.
Heluhelu mai o Kawai i ka hoike kihapai o ka ekalesia o Wailupe.
Hapaiia ke kumuhana 3. Ka hoike a ke komite i kohoia ma kekahi halawai i hala.
Heluhelu mai o M. Kuaea i ka hoike a ia komite. Hapai ka aha ma ka noonoo ana i na pauku o ke kumukanawai o keia aha, ma ka heluhelu ana mai a ke kakauolelo.
Pauku I. E kapaia ka inoa o keia Aha, Ka Ahahui Euanelio o Oahu.
Pauku II. O na Lala o keia Aha, oia na Makua Misionari, na Kahunapule Euanelio e lawelawe ana i ka Oihana Kahunapule ma kekahi Ekalesia Euanelio o Oahu nei, me na Haiolelo o ia ano, a me na Elele pakahi i hoounaia mai e na ekalesia o Oahu nei.
Pauku III. O na Lala o keia Aha, he Lunahoomalu a me ke Kakauolelo i koho ia i kela a me keia halawai ana o ka Aha ma ka o lima ana. E noho laua a kohoia na luna hou.
Pauku IV. O ka hana a keia Aha, oia ka imi ana i na mea e ulu ai ka pono, ka maluhia a me ke kuikahi iwaena o na Ekalesia Euanelio o Oahu nei. Eia kekahi, o ka hookumu ana i na Ekalesia hou. Ka haawi ana a me ka hoopau ana i na Palapala Haiolelo. Ka hookuu ana, a hoonoho ana i Kahu Ekalesia, a me ka hookuu, a hoopau ana, me ka paipai i kela a me keia hana maikai.
Pauku V. Elua halawai ana o keia Aha i ka Makahiki, i ka Malama o Aperila, a i ka Malama o Okatoba. Na ka Lunahoomalu e hoolaha e mai ma na Nupepa Hawaii, i hookahi Malama mamua mai o ka Malama e halawai ai, ka la a me ka hora e halawai ai.
Pauku VI. E hiki no ke hoololiia keia Kumukanawai, ke ae na hapakolu elua o na lala ma kekahi halawai ana o keia Aha, ke hoike e ia mai he hoololi, i ka halawai ana o keia Aha mamua ae.
Hooholoia e ka Aha, a ua lilo i Kumukanawai no keia Aha.
Heluhelu mai ke kakauolelo i na rula o keia Aha i kakau mua ia.
Hapai ka aha i ke kumuhana 4. No na Palapala Hoopii.
Heluhelu mai ke kakauolelo he palapala hoopii, e hoopau i ko Rev. J. Manuela noho kahunapule ana, mai a Makea mai.
Lawe ka aha a noonoo i ka palapala hoopi, ma ke koho ana a ka lunahoomalu i komite.
Eia na lala o ia komite, J. F. Pogue, L. Puuweuweu, J. Alapai. Na lakou e noonoo a waiho mai i keia aha.
Hapai ka aha i ke kumuhana 5. Kohoia i komite hoike kihapai i ka Ahahui Euanelio o Hawaii i ka malama o Iune.
Hooholo ka aha na ka lunahoomalu e koho ia komite, o S. Waiwaiole ka mea i kohoia.
Hapai ka aha i ke kumuhana 6. Koho i komite hoike Ahahui Euanelio o Oahu nei i ka malama o Iune.
Hooholo ka aha na ka lunahoomalu e koho i komite, o S. Paaluhi ka mea i kohoia.
Hapai ka aha i ke kumuhana 7. Koho i mau elele no ka halawai o ka malama o Iune, i ka Ahahui Euanelio o ko Hawaii nei Paeaina.
Hooholo ka aha na ka lunahoomalu e koho i na elele.
W. H. Nailipelapela no Kawaiahao, Kalauao no Kaumakapili, J. P. Kamai no Kaneohe, Hailama no Ewa.
Ma ke noi a J. Alapai e hoopaneeia keia aha a halawai hou i ka hora 9 A. M. o ka la apopo. Pule o J. Alapai.
Lahana 2, Poakolu, Aperila 12.
Halawai hou ka aha i ka hora 9 A. M. Lunahoomalu ma ka noho.
Malamaia ka hapalua hora haipule.
Heluhelu mai ke kakauolelo i ka moolelo o ka la mua, me na hooponopono, a hooholoia.
Koho ka lunahoomalu i ke komite Imihaawina, S. Waiwaiole, J. Manuela.
Hooholo ka aha, e malamaia ka haiao a ka lunahoomalu mua o ka halawai i hala ma Kaumakapili i ka hora 7½ o keia ahiahi.
Heluhelu mai o M. Kuaea, ke kahu ku i ka wa no ka hoike kihapai no ka ekalesia o Ewa.
Hooholo keia aha, e paipai aku ia Welewele, e kakau palapala aku i ka Ahahui Euanelio o Hawaii Akau, a loaa mai kona palapala hookuu, e hui me keia aha, a e waiho aku ia palapala hoouu i na kumu e ae ia oia e komo i ke Kula Kahunapule.
Heluhelu mai o A. Kaoliko i ka hoike kihapai o ka ekalesia o Waianae.
Heluhelu mai D. Kekiokalani, ke kahu ku i ka wa i ka hoike kihapai o ka ekalesia o Hauula.
Hapai ka aha i ke kumuhana 8. Na mea i malama i na ekalesia kahu ole.
Ua kamailio nui ka aha no ka ekalesia o Waikane; a ua hooholo ka aha e lilo o M. Kuaea i komite e hele aku e hooponopono i ka ekalesia o Waikane, me ke kuka ana me lakou i kahu ku i ka wa no lakou.
Hooholo ka aha e hoomau aku i ko M. Kuaea noho kahu ku i ka wa ana no ka ekalesia o Ewa.
Ma ke noi a J. Kekahuna, e hoomaha keia aha a halawai hou i ka hora 1 P. M. Pule o L. Kamika.
Halawai hou ka aha i ka hora i hoopaneeia. Pule o Kawai.
Hooholo ka aha, e hoomau aku i ko D. Kekiokalani noho kahu ku i ka wa ana no ka ekalesia o Hauula. A e paipai aku hoi oia, me ka manao nona ia kihapai.
Hooholo ka aha, e lilo o M. Kuaea i komite e hele aku e hooponopono i ka ekalesia o Hauula.
Hooholo ka aha, e hoomau aku i ko H. H. Pareka noho kahu ku i ka wa ana no ka ekalesia o Wailupe.
Hapai ka aha i ke kumuhana 9. Ina i kaheaia kekahi kahunapule i kahu no kekahi ekalesia, aole nae kela i hoonohoia e ka Aha Mokupuni i kahu no kahi ekalesia, he kahu anei oia no ia ekalesia ?
Ua kamailio nui ka aha, aohe mea i hooholoia.
Hapai ka aha i ke kumuhana 10. Ina e hoonohoia e kekahi Aha Mokupuni he kahu no kahi ekalesia, a haalele ia i kona noho kahu ana, me ka ae ole o ka aha nona ka hoonoho ana iaia i kahu, pehea la kela kahu ?
Ua like ka manao o ka aha, e hoahewa i ke kahu i haalele i kona ekalesia, me ka ae ole o ka aha nana ia i hoonoho aku.
Hapai ka aha i ke kumuhana 11. Ka la o ka Haku.
Ua kamailio ka aha i keia kumuhana, a ua hooholo e hoopanee a hiki i ka la apopo.
Heluhelu mai o H. H. Pareka i ka hoike kihapai o ka ekalesia o Kawaiahao.
Hapai ka aha i ke kumuhana 12. Pehea la ka noho ana o na kahunapule kahu ole o keia mokupuni ?
Ma ke noi a H. H. Pareka, e hoopanee keia aha a halawai hou i ka hora 1½ P. M. Pule o H. H. Pareka.
Halawai hou ka aha i ka hora 1½ P. M. no ka hoolohe ana i ka haiao a J. N. Paikuli.
Lahana 3, Poaha, Aperila 13.
Halawai hou i ka hora 9 A. M. Lunahoomalu ma ka noho.
Malamaia ka hapalua hora haipule.
Heluhelu mai ke kakauolelo i ka moolelo o ka la i hala, a aponoia.
Noonoo ka aha i ka hoike a ke komite i ka palapala hoopii e hoopau i ko J. Manuela noho kahunapule ana, ma ka heluhelu ana mai o J. Alapai kekahi lala o ia komite, ua haule ia palapala hoopii.
Eia ka hoike a ke komite:
Ua halawai kino pu aku ko oukou komite me Makea, ua kuka pu, a ua hooholo oia e hoihoi aku i kana hoopi, a ua hoopau wale, wahi ana i ko oukou komite."
Nolaila, eia ka manao o ko oukou komite, e hoihoi aku i keia palapala hoopii i ka mea nana ka hoopi, a ua hoapono ka aha e like me ka na komite.
Heluhelu mai ke kakauolelo he palapala hoopi na S. Kalua, ka puuku o ka ekalesia o Wailupe ia D. Kekiokalani, no na dala i laweia e ia.
Hoike mai o D. Kekiokalani, ua hoihoi oia i kekahi hapa o ia dala i ka Puuku o ka Papa Hawaii, a no ka hapa i koe, ua aie ka ekalesia iaia.
Ma ke noi a J. F. Pogue, e hoopanee keia palapala hoopi a ka hora 2 P. M.
Heluhelu mai o J. N. Paikuli i ka hoike kihapai o ka ekalesia o Waialua.
Ma ke noi e hoomaha keia aha a hui hou i ka hora 1½ P. M. Pule ka lunahoomalu.
Halawai hou ka aha i ka hora i hoopanee ia. Pule o Kawai.
Heluhelu mai ke kakauolelo i ka palapala hoopii a S. Kalua ia D. Kekiokalani.
Ua kamailio nui ka aha i keia mea.
He olelo hooholo ka H. H. Pareka, e kohoia i komite no ia palapala hoopii e pili ana ia D. Kekiokalani, ua kokua ia a ua kamailio loihi ia.
Ma ke noi a J. F. Pogue, e hoopanee keia hana a ka la apopo.
Hapai ka aha i ke kumuhana 11. Ka la o ka Haku.
Heluhelu mai o J. F. Pogue he mau olelo hooholo.
1 Hooholoia.—Ke noiia aku nei o M. Kuaea, e hoomakaukau i mau manao no ka la o ka Haku, a e paiia aku ua manao la ma ko kakou nupepa LAHUI HAWAII.
2 Hooholoia.—Ke paipai aku nei keia aha i na kahu ekalesia pakahi o na ekalesia malalo iho o keia aha. E hai aku i wahi haiolelo no ka la o ka Haku, ma ke Sabati hope loa o Mei, oia ka la 28.
3 Hooholoia.—Ke paipai aku nei keia aha, e makaala na luna ekalesia a me na hoahanau a pau, e imi lakou i na mea e maluhia ai ka la o ka Haku, a ke Akua i hoolilo ai i la hoano, a na keia aupuni i hoolilo i la kapu.
Lawe ka aha e noonoo pakahi i na olelo hooholo.
Ua hooholo ka aha, e hookomo iho ia J. F. Pogue ma kahi o M. Kuaea e pili ana i ka olelo hooholo mua. Aponoia.
Ua hooholo loa ia na olelo hooholo hope elua e ka aha.
Heluhelu mai o J. F. Pogue he olelo hooholo hou.
No ka mea, he nui wale na wawa i lohe ia i o a ia nei no ka ekalesia o Moanalua a me Kalihi. Nolaila, ke noi aku nei keia aha e koho ae i ka makua Rev. L. Kamika, Rev. J. N. Paikuli e hele aku malaila e imi ai i ka oiaio, a me ka ole o keia wawa, a e hoike piha mai i keia aha ma ka halawai ma ka malama o Okatoba, e hoohui mai ia J. F. Pogue me na inoa mua elua. Aponoia.
Hoopanee keia aha a halawai hou i ka hora 9 A. M. Pule o B. W. Pareka.
Lahana 4, Poalima, Aperila 14.
Halawai hou ka aha i ka hora 9 A. M. Lunahoomalu ma ka noho.
Malamaia ka hapalua hora haipule.
Heluhelu mai ke kakauolelo i ka moolelo o ka la i hala, me na hooponopono, a aponoia.
Lawe ka aha a noonoo i ka olelo hooholo a H. H. Pareka e waiho ia ma ka lima o kekahi komite, no ka palapala hoopii e pili ana ia D. Kekiokalani.
A ua kamailio loihi ia me na olelo ikaika.
Ninau ka lunahoomalu i ka aha, a ua haule.
Noi mai o J. F. Pogue, e kakauia na ae me na hoole no keia ninau. Ninauia a ua haule. Noi hou no oia e hoopanee loa ka aha i ka noonoo ana no keia hihia; kamailio loihi ia, a haule.
Noi mai o H. H. Pareka, e hoihoi ia keia hihia na ka ekalesia o Wailupe e hooponopono me D. Kekiokalani, a me ko lakou kahu ku i ka wa.
Kamailio nui ia, ninauia, a ua haule.
Ma ke noi a J. N. Paikuli, e hoihoi aku o D. Kekiokalani i na dala he 15.25 i ka ekalesia o Wailupe.
Hapai ka aha i ke kumuhana 13. No ke Kula Kahunapule.
Ua kamailio mai kekahi mau kumu no ke ano o ia kula.
Ma ke noi a J. F. Pogue, e hoomaha keia aha a hui hou i ka hora 1 P. M. Pule o L. Kamika.
Halawai hou ka aha i ka hora i hoopanee ia. Pule o S. Paaluhi.
Noi mai o S. Waiwaiole, e hapai hou ka aha e noonoo i ke kumukanawai, hooholo ia. Oia hoi keia, e hookomo iho i ka malama o Okatoba ma kahi o ka malama o Novemaba, a e halawai i ka malama o Aperila.
O ka olelo hooholo a J. F. Pogue e pili ana i na lohe i wawa ia no ka ekalesia o Moanalua me Kalihi, a e hoike piha mai ke komite i ka malama o Okatoba, aole i ka malama o Novemaba.
E like me ka olelo hooholo o nehinei.
Hapai ka Aha i ke Kumuhana, 14. Heluhelu Kumumanao.
Heluhelu mai o J. Manuela, i kona Haawina. Heaha ka hana a na Ekalesia no ka poe ilihune?
Heluhelu mai o S. Waiwaiole i kona haawina. Heaha ka laau lapaau e ola ai, a e pau ai ka palaka o na Ekalesia?
Heluhelu mai o D. Kekiokalani i kona haawi. No keaha i loaa nui ole ai ka Uhane Hemolele maluna o na Ekalesia Oahu nei?
Heluhelu mai o J. N. Paikuli i kona haawina. Pehea ke aloha ana o na kahuhipa i ka lakou mau hipa?
Heluhelu mai o J. Kekahuna i kona haawina. Pehea la e ulu ai ka ikaika o ke kahunapule i ka hana a kona poo?
Heluhelu mai o L. Kamika i kona haawina. O ka hoopaakiki hea o ka naau o ke kanaka, ka ke Akua i hoonaukiuki ai, i hoike ia ma Halelu 98:5.
Noi mai o W. H. Nailipelapela laua o Kawai, e hookuu aku ka aha ia laua a hooholoia.
Heluhelu mai o S. Paaluhi i kona haawina. Heaha ka mea nui a maopopo ma ka mokuna I o Kekahuna?
Heluhelu mai o J. F. Pokue i kona haawina. E wehewehe i ka pauku ma Mataio 24:15.
Heluhelu mai o J. Welewele i ka haawina o ka Ekalesia o Ewa. He mea hooulu Lahui io anei ka Ekalesia Kristiano oiaio?
Heluhelu mai o S. Waiwaiole, he olelo hooholo. No ka mea, ma ka hoomaopopo ana a keia aha i ka hoopii a S. Kalua, Puuku mua o ka ekalesia o Wailupe, kue ia D. Kekiokalani no ka hookaa ole mai i na dala he 15.25, ana i aie ai. Ua maopopo no hoi ua aie ka ekalesia o Wailupe ia D. Kekiokalani, he $15.00, a nolaila, e hooholoia.
Ke paipai nei keia aha i ka ekalesia o Wailupe e hookaa koke i ko lakou aie ia D. Kekiokalani.
Heluhelu mai o S. Waiwaiole he komite imi haawina.
1 Ina i kahea ia kekahi kahunapule i Kahu no kekahi ekalesia, a hele oia a noho ma ia ekalesia, aole nae i hoonoho ia e ka aha o kahi ana i noho ai, he kahu anei oia no ka ekalesia ana i noho iho ai, aole anei? Rev. S. Kekahuna.
2 O ka pule a ka Haku ma ka Mala o Getesemene. E ko'u Makua e lawe aku i keia kiaha mai o'u aku nei, heaha la ia kiaha i hoike ia ma Mataio 26:39. Rev. J. Manuela.
3 O ka pule ikaika a ke kanaka pono e lanakila nui ia, heaha la ka ikaika kupono o ka pule i lanakila nui ai ke kanaka pono? Rev. S. Paaluhi.
4 Heaha la ke ano o kela olelo i hoikeia ma ka hapa hope o ka pauku ma Oihana 1:12. He hele maoli ana no anei i ka la Sabati aole anei? Rev. M. Kuaea.
5 O ka mare ana o kekahi Kahu mare, a mau kahu paha, i kekahi mau mare a mau mare paha, a loaa kekahi keakea a mau keakea paha iloko o ka wa e mare ia ana e ke kahu mare, kauo paha, hina, ua mana anei a ku paha i ka maikai o ia mare ana? Rev. D. Kekiokalani.
6 Heaha la na hana kupono a na ekalesia e hana ai i mea e loaa nui mai ai ka Uhane Hemolele elike me na aina haole mai nei ma keia makahiki ae nei. Rev. J. N. Paikuli.
7 He pono anei i ke kahunapule, e hooemi i kona ikaika no ka hana a ka Haku, ina e loaa kekahi mea e hookuia mai ana ia ia, a mau mea keakea paha iloko o kona wa e noho kahu ana. Rev. S. Waiwaiole.
8 E wehewehe i ka pauku ma Hoikeana 11:4. Rev. H. H. Pareka.
9 Heaha la ka hana kupono a ka aha e noonoo ai no na ekalesia kahu ole, o ka hoomau anei ia mau ekalesia ma ka malama kahu ku i ka wa ana, a o ka imi aku i kahu noho paa anei? Rev. B. W. Pareka.
10 Heaha la ka hana kupono a ke kahu ekalesia e hana ai i mea e ola ai oia, a me kona ohana, ke hanai pono ole ia mai oia e ka ekalesia? Rev. L. Kamika.
"Hooholo ka aha e apono aku i ka hoike a ke Komite. Imi haawina."
Komite pai moolelo. H. H. Pareka, S. Paaluhi.
Olelo hooholo.—Ke mahalo aku nei keia Aha i ka ekalesia o Kaumakapili, no ko lakou malama maikai ana mai ma na mea e oluolu ai ke ola kino o na hoa o keia Aha.
Ina e hookuuia keia Aha, e halawai hou aku ma Waialua, i ka Poalua, la 2 o Okatoba, 1876.
Heluhelu mai ke kakauolelo i ka moolelo a hoaponoia.
Pule ka Lunahoomalu, Rev. M. Kuaea.
S. PAALUHI. Kakauolelo.