Ka Lahui Hawaii, Volume II, Number 28, 6 July 1876 — Page 3
Ahaolelo Kau Kanawai
o ke Aupuni Hawaii
Ka Moolelo o na hana o ke Kau o
ka M. H. 1876.
LA HANA 48—Poakolu, Iune, 28.
Halawai ka hale i ka hora 10 A. M. Hon. Mr. Rhodes ma ka noho. Pule ka Rev. M. Kuaea.
Heluheluia ka moolelo o ka la i hala, a ma ke noi, ua aponoia.
Heluhelu mua mai ka Hon. Mr. Aholo he bila e hoololi ai i ka pauku 57 o ke kanawai kivila. Waihoia no ka heluhelu elua ana.
Heluhelu mua mai ka Hon. Mr. Kanealii he bila e hoololi ai i ka pauku 57 o ke kanawai kivila, e hooemi ana i ka laikini halekuai i ka $2 no kela a me keia $200 kumu waiwai, a i ka $10 no kela a me keia $1,000 kumu waiwai. Waihoia no ka heluhelu elua ana.
Hoolaha mai ka Hon. Mr. Naili he bila e hoololi ai i na pauku 118, 119 a me 120 o ke kanawai kivila i hoololiia a i aponoia i Iune 22, 1868.
Heluhelu mua mai ka Hon. Mr. Kanealii he bila e hoololi ai ka pauku 174 o ke kanawai kivila. Waihoia no ka heluhelu elua ana.
Waiho mai ka Hon. Mr. Pilipo he olelo hooholo, e hoolakoia mai keia hale me 5 paona hau i na la a pau e noho ai ka hale.
Hoololiia mai i 10 paona. Ninauia a hoolo ia ka olelo hooholo.
Waiho mai ka Hon. Mr. Barenaba he olelo hooholo, e hoalako mai ka makai o ka hale me na pooleta he 100 elua keneta pakahi i na hoa.
Hoololiia mai i 50. Hooholoia ka hoololi.
NA HANA O KA LA.
Ka heluhelu elua ana i ka bila e laikini ai i na Hui Panihakahaka a me na Agena e uku i laikini $250 o ka makahiki. Waiho ia i ke Komite Wae Walker, Isenberg, Kaai, Green a me Waterhouse.
Ka heluhelu elua ana i ka bila e hoololi ai i ka pauku 233 o ke kanawai kivila. Ua hooholoia ka bila e kakau poepoe me ka hoololi a ke Komite o na Ahahookolokolo i waiho mai ai.
Hoomaha ka hale i ka hora 12 M., a ua hoomaka oou i ka hora 1 P. M.
Ka heluhelu elua ana i ka bila kanawai e hoopau loa ana i ka hapa hope o ka pauku 2 o ka mokuna 34 o ke kanawai karaima, e pili ana i ka hoopai maluna o na kanaka ona, a me ka noonoo ana i ka hoike a ke Komite Wae ma ia kanawai. Hooholoia me kekahi mau hoololi e kakau poepoe.
Ka heluhelu elua ana i ke kanawai hooulu lahui. Hoopanee loa ia.
Ka heluhelu elua ana i ke kanawai e hoololi ai i ka pauku 7 o ke kanawai i apono ia i ka la 18 o Feb., 1859, e pili ana i na pa aina. Hoopanee loa ia.
Ka heluhelu elua ana i ke kanawai e hoopau loa ai i ke kanawai hookamakama. Waihoia i ke Komite Wae, Birch, Kaai, Aalemanu, Kanealii a me Ake.
Noi mai ka Hon. Mr. Pilipo e hapai houia ka noonoo ana i ke kanawai e hoololi ai i ka pauku 1 o ka mokuna 41 ke kanawai karaima, e pili ana i ka haawi waiona i na kanaka Hawaii i hooholoia inehinei. Ua hooleia.
Ka heluhelu elua ana i ke kanawai e hoololi ai i ka pauku 2 o ka mokuna 10 o ke kanawai karaima, e pili ana i ka hoopaahao hewa. Hoopanee loa ia.
Ka heluhelu elua ana i ka hoololi i manao ia o ka pauku 45 o ke Kumukanawai e koho okoa i na 'lii a e koho okoa i na Lunamakaainana e noho ana maloko o ka Ahaolelo. Hoopanee loa ia.
Ka heluhelu elua ana i ke kanawai e hooponopono a e hoolawa ai i na ano lapaau me na laau. Waihoia i ke Komite Wae.
Hoopanee ka hale.
LA HANA 49.—Poaha, Iune 29.
Halawai ka Hale ma ka hora 1 A. M.
Olelo mai ke alii Kakela, ua hai mai ia ia ka lunahoomalu o ke komite o na hana o ka la 4 o Iulai, e makaukau ana ke kahua ahaaina ma ka hora 2:30 P. M. o kela la, nolaila, ua kono ia na hoa e hiki e ae malaila mamua o ka hora 3 P. M.
Hoike mai ke komite wae i waiho ia aku ai e noonoo i ka bila e hooulu ai i ka lahui ma ke kukulu ana i ona mau halemai ma na apana kiaaina pakahi, e waiho ma ka papa a noonoo pu me ka bila a ke alii Kapena i hookomo mai ai.
Heluhelu mua mai o Mr. Nahaku he bila e kau ai i auhau maluna o ke kopaa e lawe ia aku ana iwaho. Hoihoi hou ia.
Hoolaha mai o Mr. Preston e lawe mai ana ia he ehiku mau bila, a ua heluhelu ia mai ma na poo.
Waiho mai o Mr. Birch he olelo hooholo aole e hilinai keia hale i na hana a ka Papa Hoonaauao. Haule.
Waiho mai o Mr. Helekunihi he olelo hooholo o na buke kanawai a pau i hoolako ia mai nei i na hoa oiai e noho hana ana, e lilo loa ia lakou mahope o ka hookuu ana o ka Ahaolelo. Hooholoia.
Waiho mai ke alii Kaai he olelo hooholo e kauoha ia ke Kuhina Kalaiaina, e pai maloko o ka nupepa "Kuokoa" i na haole a pau i hoolilo ia i kupa Hawaii me ka hoike i ka inoa o na aina i hele mai ai, a oia mau lilo malalo o na lilo o keia Ahaolelo, me ka hoolaha pu
ma ka nupepa "Hawaiian Gazette," a me na haole i hanau ia ma Hawaii nei. Hooholoia.
Hoolaha mai o Mr. Birch he bila e hoololi ana i ka aha apana o Wailuku i aha hoomalu.
Heluhelu mua mai o Mr. Halstead he bila e hookaawale ai i kauka lapaau no Kalawao. Waiho ia no ka heluhelu alua.
Heluhelu mau hou mai ia he bila e hoopau loa ai i ke kanawai i apono ia i Dec. 31, 1864. Waiho ia no ka heluhelu alua.
Hoolaha mai o Mr. Halstead he bila e hoololi ai i na pauku 48, 50 mokuna 55 o ke karaima.
Hoolaha mai Mr. Naili i keia mau bila: e hoololi ai i na pauku 432, 433, o ke kivila a e hoololi i ka pauku 434 o ke kivila i hooholo ia ai a apono ia i Iune 24, 1868.
NA HANA O KA LA.
Heluhelu alua ia ka bila e hoololi ana i ka paku 42 o ke kumukanawai, e hoemi ana i elua wale no Kuhina. Hoopanee loa ia.
Heluhelu alua ia ka bila e hookomo ai i na hana lima ike iloko o Lahainaluna. Hoopanee loa ia.
Heluhelu alua ia ka bila e auhau ai i 50 keneta no ke $100 no kela a me keia luna aupuni e loaa ana he $300 o ka makahiki, a no ka poe mawaho ae e auhau ia i 50 keneta no ka $100 mai ka loaa makahiki aku $500. Waiho ia ma ka papa.
Heluhelu alua ia ka bila e hoololi ai i ka pauku 18 mokuna 86 o ke karaima. Ma ke noi a ka Loio Kuhina e hoopanee loa, ua hooholoia.
Heluhelu alua ia ka bila kauoha ana i ke Kuhina Kalaiaina, e haawi i laikini no ka poe mahiko. Ma ke noi e waiho i ke komite wae, a o ke Kuhina Waiwai ka lunahoomalu. Hooholoia.
Heluhelu alua ia ma ke poe ka bila kanawai e hoololi ana i na pauku 20, 17, 19 21 o ka mokuna 41 o ke karaima, a ua nonoi ia mai e waiho ia i ke komite wae. Hooholoia.
Heluhelu alua ia ka bila kanawai e hoololi ai i ka pauku 9 mokuna 7 o ke kanawai hoopai karaima. Noi ia mai e hoopanee loa. Hooholoia.
Heluhelu alua ia ka bila kanawai e hoihoi mai i na mai lepera o Kalawao, Kalaupapa ma ko lakou wahi ponoi. Noi ia mai, e waiho ma ka papa a hoike mai ke komite wae i holo ai i Molokai e ike i na mai. Ae ia.
Heluhelu alua ana i ka bila e hooponopono ia ai na olelo ae like mawaena o na haku a me na kauwa. Noi ia mai e haawi ia i ke komite o hila kanawai o keia ano. Ae ia.
Hoopanee ia a ka hora 1 o ka la apopo.
Pane ia M. Nakuaau.
HE ANO PUUWAI ELEELE.
E KA LAHUI HAWAII ; Aloha oe:—
E oluolu ke ahonui o kou Lunahooponopono e ae mai ia makou e pane aku ia M. Nakuaau. Aia ma ke Kuokoa ka la 17 o Iune ; ua ike iho makou i na olelo a ke kanaka i hoopiha i kona naau me na olelo pelapela, awaawa, e hiki ole ai ke mahalo a hilinaiia aku e ka poe maikai, a i hoohenehene iaia iho, me ka mohai ae i kona kulna malalo o ko na holoholona.
Ke i mai nei kela, "He hana puuwai eleele anei ke kakau ana oia poe i ka palapala hoopii kue ia A. P. Kalaukoa, a waiho aku imua o ka Ahaolelo, e ko ai ko lakou hoohuoi, a e nele ai paha?" A ke hai aku nei makou ia oe, aole he ano hoohuoi ko oukou, aka he ake oi, a lilo ka noho o ka Hon. A. P. K., no oukou, a ko iho hoi paha ko mea i hele ai e kakau, ua haule hoi paha ko enemi, o A. P. K., a noho ae hoi paha ko imi loaa, ko huli ia, huli ai, huli awa au e kuai nei; a kani ka aka iki a ua kanaka ua ko ka mea i lili ai.
Ke hoike aku nei makou ma ka oiaio, o oe ponoi no ka mea i hele ae e kakau ma ka uapo, a me kou mau hoa, me na ano huna i ke poo manao, a lalau ae he mea okoa. Ua wahahee anei makou ma keia mea? Aole! aole loa! Aka, o kou aa ana mai nei e hoole wahahee imua o ke akea, he mea ia e kanalua mai ai kou mau hoa'loha nou, a ano e ko lakou noonoo.
Ke i hou mai nei kela, "He oiaio aole no e pane mai ana ka poe naauao io o ka aina, aka, o ka poe wale no i hokae ia na maka i ka nanahu." A he! a pehea hoi ua kanaka? I hokae ia anei ou maka i ukali mai ai oe e pane mahope o ka makou? No kou lele e wale ana mai, me ko poina i ke ano naauao io o oukou. Ma ia mea he pio oiaio loa oe na makou. Aole makou e like me oe, ka noho hoopilimeaai aku malalo o na Ona nona ka Halekuai Awa, me kou manao mai loko mai kou ola o ka puawa, a me ka haaheo wale iho no me he ano Loio la, me na paa lole maikai, me he Ona Miliona.
Auhea oe e ko makou hoaaloha, e ku oe a nana mai i keia; O ke kanaka maikai e like paha me oe, he naauao, he hoopono; aohe oia e noho ma ke kua awa, aole hoi ma kahi ano pili ia mea, no ka mea, oia no kekahi mea nana e hoemi i kona lahui iho. Ua ike anei oe i ke aloha i kou mau hoaaloha? Aole anei hoa puuwai eleele oe?
Ua olelo hookano mai oe, "haueka na maka nanahu." Aole makou e eha no ia, no ka mea, o ke ano no ia o ko makou kulana, he ake hana, he lepo, he hokae na maka, aohe molowa, a noho hoopilimeaai aku malalo o hai e like pu me kou ano, ka loaa o kou ola mailoko mai o kekahi mea e make nei ka lahui.
E ka makamaka, o ka lou au i olelo mai ai no ko makou mau ihu, ua kupono loa ia lou no kou ihu; a o ka papaa keleawe au i olelo mai ai no makou, he kupono loa ia i mau pani no ko halekuai awa, i ole ai e komo malu ka iole inu awa, a poho ou haku. Ke noi nei makou ia oe, e oluolu kou ike kanawai kiekie e lawe aku a e hooko ike kanawai kiekie e lawe aku a e hooko nou iho i keia mau kuhikuhi. No ka mea, ua hoopuka wale oe i na huaolelo i kupono ole i kou ano, a i hoohaahaa ia oe.
A o makou ka poe Poo la, aole loa makou e hilahila no kau mau olelo pelapela, aka, ua hauoli loa makou, no ka mea, ua loaa ia makou he wa e ao aku ia oe; a no ia mea e ke hoa e, he poe paahana makou e imi ana i ko makou ola, a me ke ola o ko makou mau ohana ma ka ikaika o ko makou mau lima. Aka, o oe, he lima nawaliwali, a e ole ke keiki lalawai o Apua, D. K., ola ai kau wahine a me kou ohana. Aohe nae a makou hooni ae, oiai, ua lanakila mau makou; aka i hoao hou mai oe e hou ia makou, e pale aku no makou me he mea paani la, me ke kahi pu aku i ko poo me ka pahi umiumi a pau ko lauoho, kahi o na Uku e holo ahiu ana. Me ka mahalo.
Na makou na NA POO-LA
Uapo Mokuahi, Kou, Iune 19, 1876.
HE LUNAKANAWAI PAEWAEWA.
E KA-LAHUI HAWAII ; Aloha oe :—
E hai aku kou ahonui i keia wahi mea hou. Aia ma Lanai kekahi Lunakanawai Apana, ua hanaia kekahi hihia e kupono ai ka hoopai ia, a oia hoi keia: Ua wawahiia ka hale o Kalunaino, (w.,) e na lima aloha ole o kekahi mau kanaka eha. Ua hoopii aku la o Kalunaino (w.,) imua o S. Kahoohalahala, no ka wawahi ia o kona hale. Ma ka wa nae i kukuluia ai na hoike o Kalunaino i oleloia, ua kipakuia aku la ua poe wawahi hale nei, oia hoi ka poe i komo ai iloko. Ua olelo mai o Kahoohalahala, e uku lakou iaia i umi dala pakahi, a ina lakou e kanalua, alaila kukulu ia ka Aha. Ia manawa i maka'u ai na poe la, a ua uku mai la lakou, a pau wale iho la no, aole i weheia ka Aha.
Aole oia wale no, aka, o ka poe ona kekahi; aohe he hopu iki ia e na makai, no ka mea, he inu pu no o S. Kahoohalahala i ka mea ona. Pela anei ka pono no ke kanaka i uku pono ia e ke Aupuni e hookopono i ka maluhia? He mea kupono anei i na luna aupuni o keia ano e hoomau ia ma ka oihana? Ke manao nei au, aole kupono iki, no ka mea, ano hoopilimeaai kona mahope o kanaka, a penei e akaka ai keia: Ua hiki mai i Lanai nei o Mr. S. Kupihea, me kona manao e moe ma kahi o ua lunakanawai nei, aohe nae e hiki, no ka mea, aohe hale, aohe ipukai, aohe umeke. Ua kana'ho aku la oia a moe ma ka hale o Kapahupiula (k.,) a pela i hoohala ia ai ka maluhi o ke keonimana malihini. Aole au i kakau aku i keia ma kekahi ano e ae, aka, ma ko'u kuluma mau i kana mau hana ano ole. Me ka mahalo, aloha no.
W. M. KAIPOLAUAE.
[Aole no makou i kui lima pu aku e mahalo i na poe o ia ano, no ka mea, ua olelo ka Baibala, "O ke Kaupaona Hoopunipuni, he mea Hoopailua na Iehova." He mea maa mau keia mawaena o kekahi poe; ina e loaa ana kahi oihana, o ke kiekie koke ae la no ia o ka naau.
Kokua aloha ia ke kaikamahine pau ahi.
E KA LAHUI HAWAII ; Aloha oe:—
Ma ke awakea o ka Poaono o ka la 10 o Iune, ua hiki kino ae ka elemakule poohina P. Kanoa ke Kiaaina o Kauai ma ke awawa o Pauoa, e huli ana i kahi o ua kaikamahine pau ahi i hoolahaia e S. W. K. ma ka LAHUI HAWAII. A i kona ninaninau ana i kamaaina oia wahi, ua kuhikuhi pono aku lakou iaia ; hele aku la ia a loaa ke kupunakane o ua kaikamahine pau ahi, haawi aku la ia i kona aloha piha, a lulu lima aloha iho la laua ia manawa a hoi 'ku la i ka hale.
Ia laua i hiki ai i ka hale, haawi aku la o Gov. P. Kanoa i ke aloha i ke kaikamahine makapo i pau i ke ahi, a pela no hoi ke kaikamahine i haawi mai ai i kona aloha piha ia Kanoa, he mau minute pokole mahope iho, hoopuka aku la ke Kiaaina elemakue i keia mau huaolelo imua o ke kupunakane a me ke kaikamahine pau ahi, "He nui ke kaumaha a me kuu aloha i keia mau kaikamahine i pau i ke ahi, i kuu ike ana iho i ka hoolaha maloko o ka nupepa LAHUI HAWAII i ka hana mainoino a ke ahi, nolaila, ua hu mai ko'u aloha a nui, a ua noonoo au i ka mea pono a'u e hana 'ku ai no keia kaikamahine popilikia, oia hoi, e hele au e huli a loaa ua kaikamahine pau ahi nei, alaila haawi aku i wahi kokua nana no kona pilikia; a oia ke kumu o ko'u hiki kino ana mai nei i keia wahi, a ke ike nei au ua ko ka mea i hoolahaia mamua aku nei; nolaila, ke haawi aku nei au i keia mau dala elima ia oe e ke kaikamahine popilikia ma ke ano he makana, he kokua keia na'u ia oe no kou pilikia; a ke olelo aku nei au ia oe e malama pono i kou kino," "E mahaloia kou lokomaikai piha," wahi a ke kaikamahine pau ahi.
Ua loihi no ka manawa o ko lakou kamakamailio ana no keia pilikia i ili iho maluna o keia ohana; mamua ae o ko P. Kanoa haalele ana i ka home o ka mea pau ahi, ua haawi aku la oia i keia olelo paipai, "Ke kauoha aku nei au ia oe e Kepola, e pule aku oe i ke Akua a e manaoio aku Iaia me kou naau a pau, a nana no e hoopau i kou mau pilikia, aloha olua."
Ua noi mai o Kealoha ke kupunakane o ka mea pauahi i ka mea nona keia pulima, e hoike aku ma ke akea i ko laua mahalo piha ia P. Kanoa, no kona kokua ana i ka mea i poino; i ike mai na mea a pau e noho ana mai Hawaii a hiki i Niihau i ka hana lokomaikai a ke Kiaaina o Kauai, a owau kekahi e mahalo nei i ka hana maikai a keia poohina, ua hooko oia i ke kauoha a ka Buke Hemolele e kokua aku i ka poe i loohia i na pilikia. Nolaila, he mea pono ia kakou e kokua i na pilikia e like me keia. E ike ia kaua io Hawaii Ponoi.
W. L. BEKU.
Make i Walohia.
M R. LUNAHOOPONOPONO; Aloha oe:—
Ke noi aku nei au i kou ahonui e ae mai i ka'u wahi puolo e hookomo iho ma kahi kaawale o ka kakou nupepa; Ma ka la 10 o Iune, o keia 1876, ma Kawaiahao; ua oluolu i ko ke Akua lokomaikai ka poloai ana mai i ka uhane kinowailua o Kupa Maila (k.,) e hele aku e launa mamuli o Kona manao. Ua kaa oia iloko o kekahi mai nana i hooma-ilo i kona kino no na la loihi; a lele aku la kona aho ma ka la i oleloia ae la maluna. Ua noho oia ma ka Oihana Koa ku mau no na Kamehameha Eha a me Alima; a oiai oia ma ia hana; ua ikeia kona eleu a me ka makaala ma kana hana; a ua paulele ia oia e na kapena, na alii koa e ae; a pela pu no mea ua mau Lani la i hala; na keia mai i kona mai iaia e waiho i ka oihana, a e imi i ke ola kino mawaho ina e hiki, aka, aole nae he loaa. O Maihi i Kona Akau, Hawaii kona onehanau. He 6 makahiki ko maua noho maluhia ma ka mare. He 30 ka nui o kona mau makahiki; he oluolu kona ano a he hookipa i ka malihini kipa wale i ko maua home. A ua mahaloia mai oia e kekahi poe no kona heahea. A he mea ehaeha nae no'u ka laweia ana aku o ko'u kokoolua; ua haalele iho oia mahope nei he makuahine, he kaikuahine, he lehulehu, a me a'u hoi kana wahine mare, i poe nana e kumakena aku ma keia ao; a no ia mea, ua haku iho la au i wahi kanaenae aloha nona, a penei no ia:
He kanikau aloha keia nou e Maila,
Kuu kane mai ka huikau o Honolulu,
Mai na leo haanui o ka Makeke kuai ia,
Mai ka pa anoano eehia o Halealii,
Mai ka malu hale nui o Halekoa,
Mai ka leo hoonui hana o na Lutanela,
Aloha ia hale weliweli o na alii,
Aloha no hoi ia wahi a kaua e noho ai,
Kuu kane mai ka ai haaheo o ua hale la,
He bele ka mea nana e poloai mai e hele,
Wehe mai nei oe i ka kaua pili kaawale,
Kaawale ko kaua nonoho pu ana—e,
Auwe no hoi kuu kane—e,
Kuu kumakena ia oe—a!
Kuu kane mai ka piina loa ana o Mana,
Mai ke one akeke o Manamana,
Mai ka piina ikiiki la e Puowaina,
Aloha ia Batari a kaua e noho ai,
E hooko ai i ka leo hooluhi o na kapena,
Aloha wale ia wahi a kaua e pili ai,
Kanaaho a kaua i ke ahe a ka makani,
Kuu kane mai ka ua lanipili o ke kaona,
I pili wale ia no e kaua o Honolulu,
Kuu kane mai ka uluaoa o Kou
Mai na kapakai o Ulakua au e hele ai,
Kuu kane mai ke ehu kai o Mamala,
Mai ke kai o ehuehu o Kaiwi,
Kuu kane mai na lae makawalu i ke kai,
Mai na pea halii lua o Moi i ka moana,
Mai ke kai oolea la o Pailolo,
Kuu kane mai na ale paio lua o Nounou,
Aloha ko leo i ka ninau ana mai.
I ka ui ana e owai la hoi nei wahi?
Aohe no ia he kane he makua no—e,
Auwe kuu kane hoi—e!
Kuu manaonao ia oe—a!
Kuu kane mai ke one ku a kii o Kahului,
Mai na wai mahelelua o Kanaha i ke kula,
Mai ke one paku kapa o Kaa—e,
E pue aku ana e puka iwaho o Waiamoi,
Hoomaha a kaua i ka luna o Wawaau,
Kahi e ike aku ai i ko kaua home,
Kuu kane i ke kula anoano o Hoolaohua,
Aloha ia wahi a kaua e noho ai,
E huli aku ai na alo nana ia Kaoa,
Kuu kane mai ke one loa o Paia,
Mai na wai a wili kai o Mamao—e,
Mamao oe kaawale mai a'u aku,
Kuu kane mai ka ia eli one o Hulaia,
Mai ka ia uhai lo-loa o Paia ke hele,
Mai ka ia a umeume lima i ka hiu ka oi,
Kuu kane mai ka makani anu he Ukiu,
Mai na nalu poipu o Haliimaile,
Ke wa la ka leo o ke kai i kukui o Apuni,
Ua punihia au i ko aloha e,
Auwe kuu kane hoi e,
Kuu paumako hoi ia oe—e,
Kuu kane mai ke kula loa o Puuokamalii,
Aloha ia wahi a kaua e hoholo ai,
E nana aku ai i ka ai pala iluna o ka laau,
E hoolaau mai ana ko aloha ia'u,
Aloha ke kane ka hoa kuka o na hana lima,
Kuu kane mai ka ua huli Kauhikoa mai,
Aloha ko leo i ka i mai e hoi kaua,
Hohohoi a kaua i hala mai o Hauna-ka,
Aloha ia wahi a kaua e holoholo ai,
E pi-pi-pili ai kaua ia kaha loa e,
Aloha kukui Poahaaha o Maliko i ka la,
Auwe no hoi kuu kane e,
Kuu minamina pau ole ia oe—e!
MA RY KAUHANE MAILA.
(Aole i pau.)
Kawaiahao, Honolulu, Iulai 5, 1876.
He wahi mea hou.
E KA LAHUI HAWAII E; Aloha oe:—
He wahi mea hou iki ka'u e waiho aku nei ma kou papakonane, a na kou ahonui hoi e lawe aku e hoike imua o na onohi he lehulehu o kou poe heluhelu e noho nei a puni ka aina.
Pakele mai pau i ke ahi.—Ma ka la 21 o ka malama i hala, ua pakele mahunehune iho la o Kaipo w. e noho nei ma Halehaku, Hamakualoa, Maui, i ke ahi, penei ke kumu :—I ke ahiahi poeleele o ua la nei, e noho ana ua Kaipo nei me kana keiki uuku nona paha na makahiki eono, a me kana moopuna uuku nona paha na la aole i oi aku mamua o ekolu malama, ia wa no e hehee ae ana ka ipukukui piula a hanini aku la ka aila honua iluna o ka moena, a o ka manawa koke no ia a ke ahi i holapu ae ai, a ike nae ua Kaipo nei i ka a ana o ke ahi, e lele aku ana ia e kinai, aka, o ka wa ia a ke ahi i lalau mai ai i kona aahu e komo ana, a lapalapa ae la ke ahi ma kona alo, a mamuli o kona hooikaika ana e uhae i kona lole, pela ia i pau hapa ai i ke ahi, aka, eia oia ke waiho nei iloko o na ehaeha a ke ahi i hooili mai ai maluna ona, no ka mea, ua pau o mua o kona alo mai luna a lalo, a he mea manaonao ke ike aku. I ka manawa nae a ke ahi e lapalapa ana, uwe ae la ke keiki uuku, a holo mai la kekahi kanaka, a mamuli o kona komo kino ana e uhi me ke kihei, pela i pio ai ke ahi, a pakele ai na hale he lehulehu e kuku ana.
E makaala e ka lehulehu, mai hookomo i ka aila mahu iloko o ka ipukukui piula, i hanaia no ka aila kohola, aila niu, o hahai mai auanei ka poino e like me keia.
He umi dala.—He wahi elemakule i make kahiko aku nei, ua umi ae nei paha malama i hala, o Kulani Hauani kona inoa, a ua make kauoha ole oia, mamuli o ka loaa ana i kekahi mai kuhewa ano e. O keia elemakule, he kalai waa kana hana, a pela i manaoia ai he nui ke dala ma kona waihona, aka, aohe mea i ike i kana wahi i waiho ai, nolaila, hele aku nei o Kapule Moeanu i kekahi kahuna hoomanamana, o Poha kona inoa, e ninau aku ina he dala io, a e hiki paha iaia ke kuhikuhi mai i kahi i waiho ai ; olelo mai ua Poha nei, "he dala io no, aka, penei oe e hana aku ai, e lawe oe i puaa hiwa, i moa, awa, a kalua i ka puaa a me ka moa ma ke kahua o ka hale o ka mea i make," (o ka hale o ka mea i make, ua wawahiia, a o ke kahu wale no koe e waiho nei, a ma keia kahua e kalua ai ka puaa.) Aole i emo ua lako pono na mea i kauohaia mai no ka piha i ka olioli i ka loaa o ke dala, lawe ia iho la a ke kahua o ka hale e like me ke kuhikuhi, a kalua ia ka puaa me ka moa mama hoi ka awa a ku i na apu, hoomaka ua Kapule nei e kalokalo i na akua a pau, a me kona aumakua, a ia oe hoi e Kulani e hoike mai i ko dala ia'u, a pau keia hana, hoonuu like kela a me keia mea o lakou, me ka hoomaikai ae i na akua ma na apu awa a lakou, a pau keia ai ana, hele aku la ua Kapule nei ma kahi i kuhikuhi ia mai ai e Poha, oia hoi elua anana mai ka puka komo aku o ka hale, e eli iho la a ahoe loa a o ke dala, a noke aku la i ka eli i o a ia nei, a ekolu no dala i loaa, oia hoi, n e o neo.
Ea, aole anei he hilahila o keia Poha i kona hoike hoopunipuni aku i kona hoakanaka, a o oe no hoi kahi e keia Kapule puni wale, a pau hewa ko puaa i kaluaia, poho maoli. Me ka mahalo.
C. C. WILSON.
Hamakualoa, Iune 29 1876.
KA MALAMAIA ANA O KA LA 11 O IUNE
Ma Waimea, Hawaii.
Elike me ke kauoha, no ka haule ana o ka la 11 o Iune ma ka la Sabati, ua laweia ka Poakahi, la 12 i la e hoomanao ai no ka mea nana i na-i keia mau mokupuni.
Ua paniia na puka o na hale aupuni. Ua manaoia e akoakoa ana na kanaka, na kamaaina, na malihini, na makua, na keiki ma kahi kupono, a e naue ano koa me na h ae, na pahu, na ohe, a komo iloko o ka luakini i hoonani e ia mamua no ka la hoike makahiki. Aka, no ka ua, ua hooko ole ia ia manao. Ua komo huakai nae, a ua lawe wahi ia na pahu iloko.
NA HANA.
1 Mele—"E ola ka Moi i ke Akua."
2 Pule hoomaikai i ke Akua, no na pono i loaa noloko mai o ke au o Kamehameha I.
3 Mele hou me na pahu, na ohe.
4 Haiolelo—"Na hana kaulana a Kamehameha I." Ia J. W. Laahiwa, kokuaia e D. Palau.
5 Mele me ka hookani ana i na pahu, na ohe.
6 Haiolelo—"Na kanawai o Kamehameha I." Ia J. Keoahu, kokuaia e kekahi poe e ae.
7 Mele me na pahu, me ka paikau i na koa liilii o Waiokoloa. Mahalo nuiia.
8 Haiolelo—"Na makai, na luna &c. o Kamehameha I. Ia Z. Paakiki, kokuaia e kekahi mea e.
9 Mele—"Marching through Geogia," me na pahu &c.
10 Haiolelo—"Na mea i lanakila ai o Kamehameha I." Ia S. H. Mahuka Esq.
11 Mele—"Iemi Boka," me na pahu, ohe, kila, &c. Nui ka mahalo ana.
12 Ka manao o ke kahunapule a me ka pule hookuu.
Maikai no na hana a pau. Uuku nae na kanaka. HAWAII.
HE AHA MELE HAUOLI!
E malamala ana he Anaina Mele e kekahi mau Pua Opio Hawaii, malalo o ke alakai ana a ka manu leo kani o ka Ua Kukalahale nei, o
MI SS AKANEKI AYLETT,
Ma ka po o ka POAHA IULAI 6, 1876,
ma ka hora 8 P. M., maloko o ke
KEENA BAFUMA HALE,
ALANUI HOTELE.
E haawiia ana na leo kani hoene lea, i awili ia me na iniki olu o na keiki puuwai waipahe. E naue ae ! E naue nui! He $1.00 ka uku o na noho mamua, a he 50 keneta ko na noho mahope.
E loaa no na palapala komo ma na hale kuai buke o Wini a me Taramu, a i ka puka kekahi 2t.
E Makaala!
Ke haawi ia'ku nei ka lono i na Lala a pau o ka Hui Hoole Waiona "Queen Emma," Helu 2, aole e malamaia ana ko lakou Halawai mau ma keia Poakahi ae, la 3 o Iulai, aka, e hoopanee ana a hiki i ka Poakahi la 10 o Iulai, maloko o ka Hale Hui Hou, ma ke Alanui Papu, maluna o ka Hale Pohaku o C. E. Williams.
Ma ke kauoha.
WAL TER HILL.
Kakauolelo.
Honolulu, Iune 28, 1876. 27 2
J. W. CROWELL,
(KEONI KOLOWELA).
AIA ma Alanui Moi, ma nae iho o ka Hale Kahi Umiumi. Malaila e loaa ai ko oukou hoa'loha, me na kiaha Waimomona o na ano a pau, i awiliia me ke anu huihui o ka hau iniki o ka uka iu o Nuuanu. E naue ae a ike maka iaia, he makamaka oiaio. 19-1y
OLELO HOOLAHA.
I KA POE a pau e makemake ana i na Pila a me na Ogana no na Halepule a no na hale e ae. Hookahi wale no ano Ogana maikai loa, oia na Pila i hanaia e BURDETT. He kaulana loa kana mau Pila no ka maikai o ka leo a no ka ikaika no hoi, a no ka loaa ana no hoi o na ano leo a pau.
Kumukuai.
Mai ke $50 a i ke $1,000, e like me ke ano o ka Pila i makemake ia. E ninau ia D. D. BALWIN ma Lahainaluna. Oia ka Agena no ka Paeaina o Hawaii. [23. 2m.]
PAPA, PAPA.
AIA MA KAHI O
LEWE RS & DICKSON
(O LUI MA.)
KE KAHUA KAHIKO MA
Alanui Papu a me Alanui Moi
E LOAA AI NA
PAPA NOUAIKI o kela a me keia ano.
NA PAPA NANI
A PAA NO KE KUKULU ANA I NA HALE.
Na Pani Puka,
Na Puka Aniani,
Na Olepelepe,
Na Pou, na O-a,
Na Papa hele,
Na Papa Ku,
Na Papa Moe.
Na Pili o na ano a pau!
NA PEPA HOONANI,
Na PENA o na wai a pau
Na Kui mai ka nui a ka makalii,
Na Ami-puka,
Na Ami-puka Aniani,
Na Ami o na ano a pau,
NA AILA PENA,
NA AILA HOOMALOO,
NA AILA o na ano a pau.
NA VANIKI
Na mea HOOHINUHINU o na ano a pau.
Na Balaki o kela a me keia ano.
A KE HAI IA AKU NEI KA LONO i na makamaka a pau, ua makaukau keia mau hoa o oukou e hoolawa aku ma na mea a pau e pili ana ma ka laua oihana
—NO KA—
UKU HAAHAA LOA!
like me ka mea e holo ana mawaena o LAUA a me ka MEA KUAI.
E hele mai! E na makamaka!
A e lawa no hoi ko oukou makemake me ka oluolu 1 T a me ka maikai.
E LOAA NO I KA POE E MAKEMAKE I NA
INIKA KAKAU,
PENI, PEPA,
WAHI-LE TA,
BUKE,
MA KAHI O
TARAMU.
Manae iho o Kini Hana Wa ti.
KAHI HOI E LOAA AI IA OUKOU
NA BUKE!
Oia hoi na nupepa i humuia, a e kuniia ka inoa mawaho o ka buke, a ka mea makemake ana, eia no ma kahi o
TARAMU.
KAHI E LOAA AI KO OUKOU MAU
Papa Kuni Inoa!
No ke kuni ana i na Lole,
Na INIKA a me na BALATI,
—NO KA—
$1.50 NO KE KUNI KELEAWE,
2.00 NO KE KUNI DALA.
EIA MALALO IHO NA OLELO KUHIKUHI.
NO KA LAWELAWE ANA I KA
Inika kohu mau a Thos. G. Thrum,
HE INIKA KEIA E HOAILONA AI NA LOLE KEOKEO.
[E kawili mua ia ka inika, alaila e hookulu iho hookahi kulu maluna o kahi apana aniani, e hooma-u pono ia ka peni hulu; hoomoe iho ka papa inoa maluna o ka lole i hoomaemae maikai ia; pena iho me ka wikiwiki a ike ia ke kohu ma kahi aoao; alaila iho ma ia aoao me ka alana lole i wela kupono, a i ole ia e hoopili aku i ke aniani uwahi o ke kukui mahu; alaila kaulai aku i ka la i mau hora. Ina e hooko pono ia keia mau rula, o ke kohu mau no ia o ka inika. O ka holoi mua ana o ka lole mahope o ke kau ana o ka Inika me ka wai wela me ke kopa, aole me ka wai koekoe. E holoi maikai ia ka papa inoa me ka peni hulu, a waiho aku.
Malaila no e uku ia ai na uku kiekie e like me ka nui oh na makahiki o na poo leta Hawaii o na ano a pau, mai kahiko mai a i keia manawa, o na poo i pau ko lakou waiwai ma na leta. ( 1y) TARAMU.