Ka Lahui Hawaii, Volume II, Number 29, 13 July 1876 — Page 4
Na Ekalesia o Kawaiahao a me Kaumakapili.
Halawai Kakahiaka, la Sabati ..... hora 10½
Halawai po ..... hora 7½
Halawai Apana auina la ..... 3½
Kula Sabati ..... hora 9½
HAAWINA KULA SABATI
[HOOPONOPONOIA E REV. L. LAIANA.]
Ka Hapaha Ekolu.
HELU 4—SABATI, IULAI 23, 1876.
Kumuhana.—KA HOOLAA ANA I KA LUAKINI.
Pauku Baibala.—I Na'Lii 8; 5—21.
5 A o Solomona ke alii, a o ke anaina a pau o ka Iseraela i akoakoa mai i ona la, me ia pu lakou imua o ka pahuberita, e kaumaha ana i na hipa a me na bipi kauo, aole i haiia aole e hiki ke heluia no ka lehulehu.
6 A na na kahuna i hookomo i ka pahu berita o Iehowa i kona wahi, i kahi i olelo ia o ka hale, o kahi hoano loa, malalo ae o na eheu o na keruba.
7 No ka mea, ua hohola na keruba i na eheu elua maluna o kahi o ka pahuberita, a uhi iho la na keruba i ka pahuberita, a me kona mau laau auamo maluna ae.
8 Unuhi ae la lakou i na laau auamo, i ikeia na poo o na laau auamo mai ka mea hoano mai ma ka mua o kahi e olelo ai ; aole laua i ikeia mawaho mai, a malaila no laua a hiki i keia la.
9 Aohe mea maloko o ka pahuberita, o na papa pohaku elua wale no a Mose i hahao ai ilaila ma Horeba, kahi i hana'i o Iehova i ka berita me na mamo a Iseraela i ko lakou puka ana mai, mai ka aina mai o Aigupita.
10 Eia kekahi, i ka puka ana mai o na kahuna mailoko mai o kahi hoano, piha ae la i ke ao ka hale o Iehova ;
11 Aole i hiki i na kahuna ke ku e lawelawe, no ke ao ; no ka mea, ua piha ko Iehova hale i ka nani o Iehova.
12 ¶ Alaila olelo ae la Solomona, Ua olelo mai o Iehova e noho oia iloko o ka pouli loa.
13 Ua hana io ae nei no wau i hale e noho ai nou, kahi kuonoono nou e noho mau loa'i.
14 Haliu mai la ke alii i kona maka ; a hoomaikai mai i ke anaina a pau o ka Iseraela, e ku ana no hoi ke anaina a pau o ka Iseraela ;
15 I aku la hoi oia, E hooomaikaiia'ku o Iehova ke Akua o ka Iseraela, ka mea nana i olelo mai me kona waha ia Davida i o'u makuakane, a ua hooko mai nei me kona lima, i ka i ana mai,
16 Mai ka la mai i lawe mai ai au i ko'u poe kanaka ka Iseraela mailoko mai o Aigupita, aole au i koho ae i kulanakauhale no loko mai o na ohana a pau o ka Iseraela e kukulu i ka hale e noho ai ko'u inoa maloko ; aka, ua koho no au ia Davida i luna no ko'u lahuikanaka Iseraela.
17 A iloko iho no o ka naau o Davida ko'u makuakake ka manao e kukulu i ka hale no ka inoa o Iehova ke Akua o ka Iseraela.
18 A olelo mai la hoi o Iehova ia Davida ko'u makuakane, No ka mea, maloko aku no o kou naau e kukulu i hale no ko'u inoa, he pono oe i kou manao ana pela iloko ou.
19 Aka, aole e kukulu mai i ka hale: o kau keiki nae, ka mea e puka mai, mailoko mai o kou mau puhaka, oia ke kukulu mai i ka hale no ko'u inoa.
20 A ua hooko mai nei no Iehova i ka olelo ana i olelo mai ai, a ua ku ae nei au ma kahi o Davida ko'u makuakane, a ke noho nei au ma ka noho alii o ka Iseraela e like me ka Iehova olelo hoopomaikai, a ua kukulu ae nei au i ka hale no ka inoa o Iehova ke Akua o ka Iseraela.
21 A hana aku no wau i wahi no ka pahuberita, maloko olaila ka berita o Iehova ana i hana'i me ko makou mau kupuna, i kona lawe ana mai ia lakou mailoko mai o ka aina o Aigupita.
Pauku hoopaa, p. 15.
Mele—Him. 59. 6—8. Leo.
1
E mele i ke 'Lii,
Na leo, na naau,
I kona aloha e,
Me kona mana pu.
Hoolaha nui oli ae
I kona lokomaikai.
2
E komo oli mai
I kona hale nei,
Na ia la i hana'e
Kakou a hanai mai—
A ma na aina, ma na kai,
E holo kona kanawai.
Pule no na luakini e hoolaaia 'na a no na anaina hoomana, a no na Kula Sabati.
———:o:———
Na ninau a na kumu.
Ma ka haawina o kela Sabati, ua ikeia ka makaukau o ka luakini no ka hoolaaia ana. Heaha na hana mahope iho? 1 Ka hoakoakoa ana o Solomona i na lunakahiko, na poo ohana, na haku, &c. ma Ierusalema. 2 Ka lawe ana i ka pahuberita mai Ziona a Moria. 3 Ka hoomakaukau ana no ka malama i ka ahaaina kauhalelewa. Ma ka malama ehia ia? Owai ka inoa o ia malama? Pehea ka loihi? Heaha hoi ka hana? Oihanakahuna 23: 34—43. 2 Oihana'lii 7; 8.
P 5. Heaha ka hana? Heaha na mea hiki ole ke heluia?
P 6. Mahea kahi hoano loa? Heaha kai hookomoia ilaila? Malalo ae o ke aha?
Nawai i hookomo ? No ke aha? 2Sam. 16; 17. Puk. 26; 33, 34.
P 7. Na ke aha i hohola i na eheu, a uhi i ka pahuberita me kona mau laau auamo ?
P 8. Heaha ka hana i na laau auamo? I ikeia ke aha? Mai hea mai? Mahea i ike oleia'i ? Malaila na auamo a hiki ihea ? Heaha ke ano ?
P 9. Heaha ka iloko o ka pahuberita? Puk. 25; 21. Kan. 10; 2. Heb. 9; 4. Mahea i hana mua ia'i? Puk. 34; 27, 28. 40; 20. Kau 4; 12.
P 10, 11. Piha ka hale i ka aha? I ka manawa hea ? He ao aha keia ? Puk. 40 ; 34, 35. Heaha ka nani o Iehova ?
P 12, 13. Heaha ka Solomona i olelo ai ? Mahea ia olelo a Iehova? Oihk, 16; 2. Halelu 18; 11. 97; 2. Heaha kana i hana'i no Iehova? Ua hooko pau loa ia anei?
P 14—21. Hai mai i na mea iloko o keia mau pauku?
1 Ko Solomona hoomaikai ana i ke aha? E aha ana lakou ?
2 Kona hai ana i na olelo a ke Akua i hoopuka mai ai no ka hale ona ; heaha ia mau olelo ?
No wai ka manao mua e kukulu i hale no Iehova? No ke aha i ae ole ia'i ia Davida e hana i hale ? Nawai e hana ? Ua hookoia anei ia olelo? Heaha ka Solomona i hana'i ?
Mele—Him. 407. 8—7 Lee.
1
Nani loa kou kauhale,
E Iehova kuu Moi,
Iini wale kuu uhane,
Me ke 'Lii e noho ai.
2
Pomaikai kou mau haipule
Ma kou hale malu nei,
Nui ko lakou mahalo
I kou lokomaikai mai.
Na Ninau a ke Kahu.
Na makua.—Owai ka ahaaina nui ma ka malama ehiku? Owai kona inoa? Pehea ka loihi ? Heaha hoi ke ano ? E hoomakaukau ana o Solomona e aha ma ia mau la ? Ma ka hana aha i ikaika loa'i o Solomona?
Na keiki.-—He alii aha o Solomona ? He alii naauao loa. He alii hoomana ia Iehova, a ikaika loa i ka hana ana i luakini nani loa nona. Owai ka poe kupono ke kapa ia he poe mamo nana ? Na keiki naaupo anei ? A hoomana ole ia Iehova ? A hoowahawaha i ka luakini ? A haalele pinepine i na halawai? Heaha kai lawaia a waihoia iloko o kahi hoano loa o ka luakini ? Heaha maloko o ka pahuberita ? Ehia papa kanawai ? Ke kanawai ehia kai pili ia oukou ? Mahea ko oukou pahuberita? Ua paa anei na kanawai he umi iloko ?
Ke Kula a pau—He alii aloha o Solomona, minamina anei oia i ke dala, i ke gula he nui wale i lilo i ka luakini ? Kapa anei oia ia Iehova he Akua puni dala, hoopau wale i ke dala ma ka luakini, &c. ? Ua ikeia anei kekahi alii e kapa ana i ko kakou Akua, he Akua hoopau dala ma na luakini ? Pono anei ia kakou ke minamina i ke dala i lilo i na luakini, i na kokua mahinahou, &c.?
Mele.—Him. 404. 8 Leo.
1
He pono no kakou maanei
Me Iesu pu e noho ai,
A lilo ko kakou naau
I luakini nona mau.
2
E komo mai, e Iesu e,
Iloko o ka hale nei ;
E noho mai a launa pu
I pomaikai mau ai makou.
Pule a hookuu aku.
Haawina no Iulai 30. I Na'Lii 8 ; 23—30.
Hoike makahiki o na Kula o Kohala Hema, Hawaii ma ka la 6 o Iune, 1876.
Ehiku no ka nui o na kula maoli, hookahi kula haole. No ka nui o ka ua ma Kawaihae uka, aole hiki mai ia kula ma ia la.
1 Ua akoakoa na kula ma ka pa o ka hale kula o Waikoloa, ma ka hora 8 a oi o ke kakahiaka. Naue like lakou ma ke ano koa me na hae, na pahu kani, na ohe. O na koa liilii o ke kula o Waikoloa kai hele mamua. Komo no iloko o Imiola. Ua hoonaniia a nani loa ka luakini. Ua hana ia awai loa a laula, a ma ka paia o ke kala o uka, ua kakauia mo na hua nui a nani i na pua, penei : Makahiki Ceneturia—1876.
2 Ua hoomakaia ka hana maloko ma ke mele ana o ko Waikoloa kula i ke mele i kapaia 1876, ma Song King ka leo.
"Ala 'e, e na koa, he wa oli nei,
E kau i na bana, na bana lai e,
Hookani na oli a kupinai ae
Mai nei a na mauna, a hoi hou mai.
Cho. Kau, e kau i na bana, e nee Hal.
Aloha na hoa, a hauoli pu."
3 Ka pule hoomaikai ana ia Iehova, ia S. H. Mahuka.
4 Mele—"Ring out sweet Bells."
"Hookanl i na bele e,
No keia hui ana, &c."
Ia Waikoloa.
He mau mele e ae i kekahi mau kula.
5 Ka heluhelu ana mai o ka papa I o ke Kumumua ma ka olelo maoli, a ma ka olelo haole, me ke mele ana i na mele e pili ana, oia hoi,
"On a Christmas morning,"
"Get up early,"
"Charming little valley." &c.
Ma na olelo elua.
6 Helu Kamalii, Helu Naau, Arimatika, mai ka papa I a hala loa ilalo i na pokii, ma na olelo elua, me ke mele ana i na mele e pili ana ilaila, oia hoi,
"Merry Songsters,"
"Our May shout,"
"Come to Dinner,"
"Song of the Brook,"
"Chikadee." &c.
Ma na olelo elua.
7 Ka Buke Honua me ka Palapala Aina, mai ka poe nui a i ka poe uuku, mai Hawaii a puni ka honua, me ka mele ana i na mele e pili ana ilaila, oia hoi: "Persevere" kui i ka hao, boys. "My Dog Dash," Nani kuu ilio, e.
8 Kakau lima me na buke i kakauia. Mele.—Annie of the Vale.
9 Olelo Kike.
Mele.—Upide, &c.
10 Haiolelo.
Mele.—Marehing Song, I na koa liilii o Waikoloa.
O ka paikau ana o na koa keiki mamua i alakaiia e kekahi keiki i kapaia ke kapena. Akamai loa lakou, a ma ke mele ana, ua kokua ia e na pahu kani me na ohe. Nui ka mahaloia.
11 Heluhelu kumu manao, me ka hai i na pauku paanaau &c.
12 Na mele kike o kela me keia kula, oia hoi, "Be kind to one another" "Autumn Winds" "Pastiny Whispers" "Pasting Song" "Home from the Picnic." He mele no ke kuikahi panailike me ka hoohui i na hae elua, kekahi.
13 Ka hoike ana o na komite i ko lakou manao pakahi no na mea i hoikeia.
14 Ka manao paipai o ka Papa kula.
15 Mele hope, "Festal Song."
Pule hookuu, i ka lunakula.
Ua piha ka luakini i na makua a me ka poe makaikai, a ua piha lakou i ka mahalo a me ka olioli.
Ua hooholo na komite o ke kula i oi ma ka mele ana a me kekahi mau mea e ae, oia o Waikoloa. Aka, ua mahaloia na kula a pau.
Ikaika no na kumu i ke ao ana.
Ikaika na haumana i ka imi ana.
Ke kumu o ke oi ana o Waikoloa ma ke mele ana, oia ka pili kokoke ana kahi o ka Haku Mele, kahi i nui ai na buke mele. HAWAII.
Na W. P. R. ia G. W. Pilipo.
E KA LAHUI HAWAII; Aloha oe:—
Mamua o ko'u hoomaka ana e pane ia Hon. Mr. G. W. Pilipo no kana mau olelo, he makemake au e hoomaikai piha aku iaia no ka hauoli nui i loaa ia'u ma ka heluhelu ana i kana olelo pane, a me na kumu pale ano ole ana i waiho mai nei imua o ka lehulehu no ka'u mau olelo iaia.
Ua hoomaka koke kona okupe a hina ilalo ma ka paregarapa mua o kana olelo pane. Ke olelo mai nei oia i kuu hana i kuu inoa, a ma ia mea he hohe wale ka ko'u ano a he makau hoi iaia. He moeuhane paha ko ka makamaka. Oia no kai makau wale, ua kau oia i kona inoa ma kana leta i na haku ona o o Kona Akau o G. W. P., a owau hoi ma ka'u pane iaia no kana huaolelo a me kana leta hookamani a pai ia ia iho i mua o na kanaka o Kona Akau, ua kakau au i na hua kumu o k'ou inoa oia o W. P. R. Nolaila, ua lilo he mea kue ano ole ka Pilipo i olelo mai nei no ia mea. Ua manao oia he makau wale ka wau iaia a no ia kumu kuu huna i ko'u inoa piha ; oia kona kuhihewa a me ke kiekie o kona pai iaia iho. Owai o Pilipo, a heaha hoi oia ? heaha ka'u kumu e makau ai iaia ? A no kana hoohalahala mai i kuu inoa, ke i aku nei au e ike oe ia'u mai ka piko o kuu poo a ka manea o kuu wawae, a e haawi au ia oe i kuu inoa piha. E na ana ko makemake no ia mea. Ma ka lua o kona mau poo manao, ke i mai nei o Pilipo, "O kau olelo ana no na mea pili i ka haunaele o ka la 10 o Eeberuari, 1873, ua manao oe owau kekahi o na mea i lawelawe i na hana o ia la," a ke kuhikuhi mai nei ua hoa nei o'u i hele ka wau e ninau i ka poe o lakou ia "Diabolo, a i kana mau lehulehu daimonio," a ina ka e hiki i ko'u haakei ke pii a i ka lani i mua o ka Mea Luaole, aole no e loaa ka hoike nana e hooia mai i kona hewa ma ka paipai ana i na hana kanawai ole o Feb. 12, 1886. Eia ka'u ia oe e Pilipo, o Diabolo a me kona mau hoa, e waiho no ia i mau hoike nou, no ka mea, ua maa oe i ke kikoo iwaena oia poe i mau hoike nana e ku hoike no kau mau hana eleele, a no kou maa i ke kikoo mau ia lakou, nolaila oe i kuhi koke ai ia'u e hele ilaila. A no ka manao paha e lalau koke ae au i na hoike e hewa ai oe, nolaila, kuhi oe ia'u i ka lani i kahi au i ike ole ai. Ua oki no o Diabolo ma nou, a aole no hoi au e hele loa i ka lani aka, eia koke no ma kuu home nei e loaa ai ia'u o Lutela Kekoanui ma a me na hoike lehulehu nana e hoopili paa i ka hewa ia oe, nau no i alakai hewa, a nau i hookele hawawa i kou mau hoahanau naaupo, a komo lakou la i ka pilikia, a o oe hoi, no kou maalea ano pupule, (aole no kou akamai) ua pakele oe; a ua hoi aku i ka lai o Ehu ka ipo, me na hale i ka pupua.
O ke kolu o kou manao e pili ana i ke kahua oiaio o ke kue ana o ko kaua mau manao, a me ko kaua ike no ke ano o ka pauku 43 o ke Kumukanawai E ninau au ia oe i ke ano, a me ke kumu o ko na Kuhina noho ana iwaena o na 'Lii elike me ia i hoakakaia ma ka Pauku 43 a elike hoi me kau i heluhelu ai ma ka hapa hoi o ia Pauku, elike me kan ike iho ma kau heluhelu ana ia mea ma ka kaua olelo makuahine ? E noho wale no anei na Kuhina, aole e koho a e kamailio paha ma na ninau a me na mea e hoopaapaa ia ana imua o ka Hale Ahaolelo? No ka mea, wahi au, aia wale no kaua ma na olelo maoli o ke Kumukanawai e pono ai, aole mawaho ae. Ina e ae ia kau wehewehe ana i ke ano o ka Pauku 43, alaila, e noho na Kuhina iwaena o na 'lii me he mau kii leo ole la, aole e hiki ia lakou e kamailio, no ka mea, aole i hoakaka ua pauku la ia mea. A ina oia ke ano o ia Pauku, alaila, ua kue maoli ia i ko ke kanaka noonoo maikai ana, a ma ia kue ana e hele hewa loa ai ka aoao au e ku nei, no ka mea, ke i mai nei ka Pauku 13 o ka Mokuna III o ke kanawai kivila penei: "I ka wehewehe ana i na huaolelo pohihihi iloko o kekahi kanawai, e kulaia na ano lapuwale i loaa ma ka imi ana i kona ano oiaio." Ina pela ka wehewehe ana o ke ano o na kanawai, alaila, ua kiola ia ka manao e noho kii leo ole na Kuhina iloko o ka Hale Ahaolelo.
Ma ka pauku 14 o ke kanawai kivila, ua apono ia ka'u i olelo ai no ka lawe ana mai i na hana maa mau i mea e kokua ai i ka wehewehe ana i ke ano o kekahi kanawai, a ua kokua mai no ka Pauku 12 na mea a'u i olelo mua ai. E imi ia ka manao maoli o ka Moi Kamehameha V, ka mea nana i haawi mai i ke Kumukanawai, ke kahua o ko kaua hoopaapaa a me ka like ole o ko kaua manao. No na mea e pili ana i ka'u i olelo ai no ka Pauku 45, ke i aku nei au ia oe, nau no i ahewa ia oe iho. Ua olelo oe ma kau leta i na makaainana o Kona Akau, ina e holo pono kau olelo hooholo e ae ana e koho kaawale na 'Lii, a e koho kaawale na Lunamakaainana, alaila, wahi au, "ua like ia me na hale elua" a nolaila, ua olelo au ia oe ina ua like ia me na hale elua, alaila, ua kue maopopo ia I ka makemake a me ka manao o ka pauku 45 o ke Kumukanawai au e uhaki mau nei. Ua i mai oe, aole oe e mihi no kau olelo hooholo. Aole no ka hewa ole ou ke kumu o ia mihi ole ana, aka, no kou hoopaakiki wale iho no mamuli o ka hoopukapuka akamai a me kou hukiia e kou manao kaena ia oe iho. Pela no ka "Mano kuli, he ma ia ka hala." Ke olelo nei oe, ua piha inaina au ia oe, aole o'u inaina ia oe, aka, he hoowahawaha ko'u i ke kanaka e hoao mau ana e hoala i na hana makuahana i kuu aina makuahine. No ka mea, ke hoao nei oe e alakai i ka poe naaupo, aole no he kanaka ike e puni i kau alakai hewa, e manao iho, o ka Moi a me kona mau Kuhina, me he la, he poe enemi no ka lahui, a he poe e makemake ana e hana mai i na mea ino i na kanaka o keia Paemoku. Oiai, ua maopopo o ko ka Moi makemake, a me kona mau hoa kuka o kona mau Kuhina, oia no ka imi nui ana i ka pomaikai no ka Lahui. O ka waiwai o na kanaka oia no ka waiwai o ke aupuni, a ua ike no ka Moi i ka olelo ka au e ko kaua aina makuahine, " I ALII KE ALII I KE KANAKA," a ina oia ka oiaio, alaila, heaha la ke kumu, heaha ka pomaikai, a heaha hoi ka mea nana e huki i ka Makua o ka Lahui e hana mai i na mea e poino ai kona mau pokii, o na makaainana? O na poino a me na pilikia au i koho wale ai, he mau mea i hakuia e kou lolo maalea i ka imihala, aole he mau pilikia oiaio.
Ke olelo mai nei oe i kuu hana ino i kuu mau hoa o ka pilikia hookahi no. Ua ko ka makemake, a ua holo mai ke Komite o ka Hale Ahaolelo ma Kalawao nei, a ua halawai me a'u he alo a he alo, he maka a he maka, he helehena maka'u anei ko'u ia oe ? Owai oe e ka hookiekie ? A heaha la oe e Pilipo e ae ole ai au e paio ia oe, a e hoike hoi i ke ao holookoa i kau mau hana lalau naaupo? I ka'u nana aku, me he mea la no ke kiekie loa no kou huki ia e kou manao kaena ia oe iho, nolaila, ua manao iho paha oe aole e puka ka la ma ka hikina, a e hukiia ilalo ma ke komohana, ina aole oe? Pela ka nana ana i ke kiekie o kou hooio. Ua maopopo o oe kai huhu ia'u, a ua hoike oe i kou ano hana paewaewa mau. Ua hooholo e oe i ka hewa no'u, mamuli o ka hoopii hoopunipuni a ka poe lili ia'u; ina oe he kanaka naauao, alaila, e kali oe a lohe ia ka olelo a ka aoao hoopii a me ka mea pale, alaila, e hoopuka ia ka olelo hooholo a ka Lunakanawai hana pono me ka maikai. O oe, he malihini ka hana pono ia oe, a o kou mau hoa e hooipo ai oia ka lalau a me ka huhewa, no ka maopopo no ia oe, ua hala ole au ma ma na mea i hoopiia no'u e ka poe lili, nolaila, ua maka'u oe i ka ae aku i ke noi a ka Noiau o Lanikaula Hon. J. Nakaleka. Ua makemake oia e ninauia na Mai e noho ana imua o ke komite.
O ka poe i hana ino ia e a'u e ku kaawela, a o ka poe hoi i hana ino ole ia e a'u e ku kaawale. Ua kokua anei oe i kela manao? Aole! Aole! Aole loa! No keaha? No ka mea, ua maka'u oe o hui mai na hanere mai e noho ana i ka oiaio, aole loa i hana ino ka Luna, aka, ua hana oia i ka hana ku i ke aloha, a ku hoi i ke karistiano oiaio. O na hoike wale no i ninauia, oia no na hoa o ka poe e kapa ana ia lakou iho ke Komite 13 o makou nei. O B. Kaahaihanu, a me Kanealii, a heaha ka laua i hoike ai, a me kekahi mai Lepera e ae o Mapela ka inoa. Ua olelo lakou o lakou na poe i kokua ia Kahalekahiki, a na nalo ai pilau i hoolewa ai i kela la aku nei, a ua hele mai ia'u e noi i kekahi mau mea ana (S. N. K.) i pilikia ai, a ua loaa aku no, aole i hoi nele, a me ka loaa pu aku o kahi kenikeni i haawi ia e ka naau aloha wale o ka mea au e hoino nei. Owai la na ilio nahu malu nana e hoao nei e hana ino mai ia'u me na olelo hakuepa imua o ko oukou Hale Hanohano? O kekahi o lakou, he kanaka na'u i hoopaa i ka halepaahao no ke kue i ka rnla o ka Papa Ola, a na'u i kipaku mai loko aku o ka hale kuai no ia hewa no, he kanaka i hoao e lawe mai iloko o keia aina, he elua mau kaikamahine opiopio he mau wahine manuahi nana, a ua ae mai no imua o oukou ia mea. Ua makemake oia e lawe i kela mau pua opiopio a e kanu aku i kana anoano hakumakuma e kauo pu ia laua iloko o ka mai ino aai ino nana e kauo nei i ko kaua Lahui i ka make, a no kuu kue ana i kona hana ana i keia hana pono ole, a ke kanawai a me ka pono i papa ai, nolaila, ua wela ia kona lili, a me kona inaina no'u, a ua hana i na hana imi hala no'u a ua hiolo ia mau hana no ka oiaio ole anu ka hoopunipuni o ke kahua i ku ai.
Ua malama au ua kanaka lokoino la a ua ai i kuu ai maikai, a me na kupalu mona a ko'u lolo i imi ai i pono no'u. E hoike mai no ua hanele kanaka ewalu e noho nei ia mea, a o kana i uku mai ai ia'u ua ike oe. Aole no au i hoahewa a hoino aku iaia no ia mea, me ia no kona ino, ke hele mau mai nei oia i kuu hale, a ke uhi nei no na eheu o kuu halaulani iaia me ka oluolu, me ka hamama mau o ka umeke a me ka ipukai. He hoike anei keia no ka lokoino? Ke manao nei au he hoike pii ole ia no kuu naau aloha a me kuu lokomaikai. Me ia no kana ino. Lili ua poe hoa la ou no kuu kaa lio, a me ke kuonoono o ko'u noho ana; o kuu kaa lio, no'u no ia, o ka hua no ia o ka'u i imi ai "me ka hou o ko'u lae, a me ka ike o ko'u lolo," a ina paha e oluolu au e hoomoe i alanui kaamahu mai Kalaupapa a ka wai o Naikolu, i mea hoolealea no'u, heaha ka lakou ilaila? O ka lili a ia poe, he opala.
No kau kapa ia'u he hoopilimeaai, ke hoole nei au i ka oiaio oia mea ma ka i ana, Aole au i noi i ka oihana a'u e noho nei, aole i hoolimalima, a aole i pelu kuu mau alii, imua o na Kuhina a imua paha o ka Peresidena o ka Papa Ola, aka, ua haawiia mai ia'u no ko lakau hilinai i ko'u ike a me ko'u makaukau a o ka hoike oia mea, oia no ka mahalo i hoikeia no'u e ka Papa Ola, ma ka lakou hoike o ka makahiki 1874, imua o ka Ahaolelo, a pela no hoi ka hoike i mua o ko oukou hale Hanohano i keia Kau. He uku hanohano no ia no ko'u luhi a me ko'u ikaika, a me ko'u hana pono. O ka mahalo a ka poe kiekie oia ano, he mea no ia e hauoli pono ai kuu naau, me ka haaheo. O ka mahalo mai a na kuewa a me ka poe lopa, he hoohauoli paha ia ia oe, ia'u nei, he opala ia. A keia pule ae e pena ai au i ko kii a e lawe mai i na elemakule a me na luahine karistiano o Kaumakapili, i mau hoahele pokole nou no kekahi mau hora. A ma ia wa no hoi e pane ai au ia oe me ka hoike maopopo aku o ka iini pau ole a kou naau, oia no ka uhaki i ke Kumukanawai o ka aina. E nana iki iho oe i kou koi ana i kekahi mai pake e pee malalo o ke kanawai e hookuu ia a e hoi maluna o "Kilauea" ma ka la 24 o Iune, 1876. Malalo ka o ka mana e haawi ia e ka olelo hooholo nana oe i hoouna mai i Molokai nei. No kou huhewa a me ko'u ike ole, ua poino ia oe na olelo a ka hapa hope o ka pauku 31 o ke Kumukanawai, e olelo ana, "Aole no e paa na kanawai i hooholoia e ka Hale Ahaolelo, aia kakau ka Moi i kona inoa." A nolaila, heaha ka mana o kekahi olelo hooholo a ka Hale Ahaolelo e hana ai, ina ia olelo hooholo i kue maopopo i kekahi mea a ke kanawai o ka aina i kauoha ai? No kou naaupo, a me ka piha kiekie o ka naau, nolaila, ua huhewa oe, a ua hoaa hele i Molokai nei, me ke hakua ole e ku ai ma na hokua o ke kanawai. Ano la, e kuu au ia oe e Pilipo no keia wa, a e hai aku i ka mea e ko ai ko makemake, oia hoi o kuu inoa piha, eia no ia: Bila Auwana kekahi inoa a kanaka e kapa ai ia'u. O ko'u inoa maoli nae, Me ke aloha
WILLIAM PILIPO RAGSDALE.
Halaulani, Molokai, Iune 27, 1876.
HE MOOLELO
—NO—
Tamai Ionakana Iakekona,
Ka Puhi Olali o ka aoao Hema
KE TIGA INU-KOKO O KE AU KAUA
HULIAMAHI O AMERIKA HUIPUIA.
[Unuhiia e Lutanela Robert Hoapili.]
[Ua unuhi ia mai keia moolelo mai ka olelo haole mai, a i ka olelo Hawaii, me ka mikioi, a me ke akahe loa, no ka pomaikai o ka poe a pau e lawe ana i ka LAHUI HAWAII; i mea e ike pono ai lakou i na hana kaulana a koa hoi a ka mea nona ka inoa kaulana i kapaia ma na hoouka kaua a pau: STONEWALL JACKSON, a i ole ia, o ka "Puhi Olali o ka Hema.]
Kona hanau ana, kona mau makua, a me kana mau hana koa mua ma Mekiko.
Ua hanauia o Tamaki Ionakana Iakekona, ma ka la 21 o Ianuari, M. H. 1824, ma Kalakaboka, ma ka mahele aina o Harikona i Vireginia.
O kona mau kupuna, ua hanau ia ma Enelani, a ua holo mai a noho malihini ma ke komohana o ka mokuaina o Vireginia. O Edewada Iakekona ke kupunakane, he Aan-aina oia no ka mahele aina o Luika, no kekahi manawa loihi, a he mea hoi i ike nui ia iloko o ka Ahaolelo.
O kana keiki, o Ionakana Iakekona, ka makuakane o ka mea nona keia moolelo, ua noho oia ma Kalakaboka; malaila oia i ao ai i ke kanawai me kona hoahanau Lunakanawai John G. Iakekona, a ua loaa hoi iaia ka ike, a me ka makaukau nui, a ua loaa pu hoi he inoa maikai ma na mea pili kanawai, a malaila oia i mare ai me Miss. Neal, ke kaikamahine a Thomas Neal o ka apana aina o Wuda.
Ua hookuewaia oia, ma ka lilo ana o kona mau waiwai i ka bona ia no kona mau hoa'loha, a ma ia mea, ua auhee aku na kuonoonoo i loaa iaia mamua, a noho iho la oia me ka pilikia. Ua make oia i ka M. H. 1827, a nele iho la kana mau keiki i ka hooilina ole. Eha ka nui o kana mau keiki e noho ana, 2 keikikane, 2 kaikamahine. A o Tamaki Ionakana Iakekona, ka mea nona keia moolelo, oia no ka mea opiopio loa o lakou, he 3 ka nui o kona mau makahiki ia wa, a haalele ia iho la oia iloko o na la opiopio wale o kona ola ana e ao ai i na popilikia inea o keia noho ana. Aloha wale.
Aka, me neia mau haawina i loaa iaia iloko o kona mau la opio, ua hoohua mai oia i na hua me he kumu laau la i kanuia ma kahi o na lepo momona, a ua ono ka hua o ke kumu laau i ka ai ana.
O ke kanaka opiopio nona keia moolelo ua hoomaka mai kona kulana e pii ma kona ano hoopono, a ano puni waiwai ole. (Pela hoi, ua ikeia ka laau ma kona hua.) Aole hoi oia i like me na opio e ae ka uhauha wale i ko lakou manawa ma na lealea ano ole, aka, ua hoomanawanui no oia ma ka hooikaika e imi pololei i mea e hapai ai i kona inoa, a lilo i mea kaulana.
Mahope iho o ka make ana o kona mau makua, ua hoi aku oia me ke kaikaina o kona makuakane, ma ka apana aina o Lewis, a noho iho la me ka ohana o kona mau kupuna, a i ke one hanau hoi o kona makuakane, malaila oia i noho a hiki i ka 17 o kona mau makahiki.
Ua lawelawe oia ma ka Oihana Mahiai iloko o ke Kau, a hele hoi i ke Kula iloko o ka Hooilo no na mahina ekolu. Ma ia mea, ua loaa iaia na ike mua o ka naauao, ua houluulu oia i na naauao a pau i loaa iaia. Mahope mai, i kona noho ana i ke Kula ma West Point, a me na ike i loaa iaia ma ke Kula Koa i Vireginia. O kana mau hana maa mau, a hiki mai i keia wa a kakou e kamailio nei nona, he mea ku i ka mahaloia a me ka noiau; ua hoouuia mai oia me ka maikai mailoko mai o ke Kula Koa ana i noho ai me ka lawa pono i na ike a pau ana i ao ai ma ke Kula Koa o Vireginia.
Ua kokua oia i ke kaikaina o kona makuakane ma ka malama ana i ka mahinaai, ua loaa koke hoi iaia he inoa kiekie ma ka hooikaika ana, ma kona naauao a me kona hoopono a pololei.
Nui ka mahalo ia o ka mea nona keia moolelo e na mea a pau o kahi a lakou e noho ana, no na mea a pau a lakou i ike ai no ka ohana o Iakekona, a ua haawi mai la lakou iaia i na kokua a pau, no ka waele ana i na pilikia e kiki mai ana imua ona i keia ola ana; me ko lakou ake pu hoi e ike mai iaia iloko o kona noho ana hanohano a kuokoa ana.
Ua hooiaio ia mai keia mau hana lokomaikai a ua ikeia hoi iloko o ka 16 o kona mau makahiki, ua koho ia oia i Makai no ka apana aina o Luika, ka hana hoi ana i lawelawe mikioi ai, a hooko pono ai me ka ewaewa ole a me ka ahewa ole ia mai. O na hilinai a pau a ua makai opio nei, aia no ia maluna o na mea kaua, ma ke ano he Oihana.
Ua akaka i ka mea nona keia moolelo ua holomua oia ma na mea pili i ka Oihana Koa. Iloko o ka 17 o kona mau makahiki, ua hele wawae oia i ke Kulanakouhale o Wasinetona me ka makau ole, e kohoia mai e lilo i Aliikoa, ina e hiki ana. Ua keakea ia mai keia mea ana i manao ai e kekahi o kona mau hoa Loio, Aka, ua komo no nae oia ma ke ano he aliikoa, i ka makahiki 1842. A ma ka malama o Iulai, o ka makahiki 1846, ua hookiekie ia ae la kona kulana, ma ke ano he Lutanela 2, a ua kauoha kokeia mai e hoike nona iho i kona makaukau ma ka oihana koa iloko o ke au o ke kaua kuloko me Mekiko, malalo o na alakai ana a General Tela kona Alihikaua.
(Aole i pau.)