Ka Lahui Hawaii, Volume II, Number 36, 31 August 1876 — Page 1
KA LAHUI HAWAII.
"Ua mau ke Ea o ka Aina i ka Pono."
BUKE II.} HONOLULU, POAHA, AUGATE 31 , 1876. {HELU 36.
NO NA OLELO HOOLAHA.
E lawe ana keia pepa i na Olelo Hoolaha a na makamaka, e like me ke kupono, a e lawa pono ai hoi me ka hoohaiki ole i ka huina o na kolamu kukulu manao, no ka uku haahaa.
O kela a me keia makamaka e makemake ana e hoolaha, e hele mai ma ke keena a e hui pu me ka Luna Hooponopono.
Aole e paiia kekahi Olelo Hoolaha ke ole e hookaa mua ia ka auhau.
Eia kekahi, ke noiia aku nei na makamaka e hoouna mau mai i na mea hou; mai hooloihi loa i na palapala; e hai pololei mai i na manao me ke kuawili ole, a e kakau mai me na hua moakaka.
H. H. PALEKA,
Luna Hooponopono.
KA NUPEPA KA LAHUI HAWAII.
Paiia ma kela Poaha me keia Poaha.
H. H. PALEKA, Luna Hooponopono.
He pepa i hoopukaia i kela me keia hebedoma no na Ohana a me na Ekalesia o Hawaii; he mea kokua i ka noho pono ana o na ohana, ka maluhia o kanaka, a me na pomaikai kino a uhane o ka Lahui Hawaii. "Aole paonioni; aole haanui; aole hikiwawe ka huhu; aole noonoo ino."
O na Kumumanao a pau, na Nu Hou o kela me keia ano, na Mare, Hanau, Make, e kakau mai i ka Luna Hooponopono, a e paiia no ke kupono.
Aole e aeia ka pilikino, ke kuamuamu, ka hoino, a me ka huhu, a ua makemakeia ka hoohoihoi, hoolana manao, hoonaauao, a me ka hoopono.
He $1.75 ka auhau o keia pepa no ka makahiki, a he $1.00 no ka hapa makahiki.
E hookaa mua ia ka auhau o ka pepa mamua o ka loaa ana i kekahi mea makemake e lawe.
PAPA, PAPA.
AIA MA KAHI O
LEWE RS & DICKSON
(O LUI MA.)
KE KAHUA KAHIKO MA
Alanui Papu a me Alanui Moi
E LOAA AI NA
PAPA NOUAIKI o kela a me keia ano.
NA PAPA NANI
A PAA NO KE KUKULU ANA I NA HALE.
Na Pani Puka,
Na Puka Aniani,
Na Olepelepe,
Na Pou, na O-a,
Na Papa hele,
Na Papa Ku,
Na Papa Moe.
Na Pili o na ano a pau!
NA PEPA HOONANI,
Na PENA o na wai a pau
Na Kui mai ka nui a ka makalii,
Na Ami-puka,
Na Ami-puka Aniani,
Na Ami o na ano a pau,
NA AILA PENA,
NA AILA HOOMALOO,
NA AILA o na ano a pau.
NA VANIKI
Na mea HOOHINUHINU o na ano a pau.
Na Balaki o kela a me keia ano.
A KE HAI IA AKU NEI KA LONO i na makamaka a pau, ua makaukau keia mau hoa o oukou e hoolawa aku ma na mea a pau e pili ana ma ka laua oihana
—NO KA—
UKU HAAHAA LOA!
like me ka mea e holo ana mawaena o LAUA a me ka MEA KUAI.
E hele mai! E na makamaka!
A e lawa no hoi ko oukou makemake me ka oluolu
1] a me ka maikai.
C. H. DICKEY, (Kale Kika,)
LOIO!
A he Luna Kepa i apono ia e ke Aupuni no ka Apana o Makawao, Maui Hikina.
E HELE NUI mai ka poe a pau i loohia ia me na pilikia pili Kanawai o ka "Ua-ukiu" nei, a no ko oukou makamaka oiaio no e kokua a e hooikaika e hoopau i na pilikia ma na ano a pau o ke Kanawai. 17-1y
G. W. WEST!
HALE HANA KAA HOLO LEALEA ME na kaa hali ukana. E hana ia no ho na kaa nahaha no ka uku oluolu. E kapiliia no kapuai lio, no ka uku kupono. Ma ka hale hana mua o Mr. Benfield, ma ke Alanui Alii 1-1y
S. B. DOLE.
LOIO a he Alakai ma na mea pili Kanawai. Ua makaukau oia e pale i na hihia imua o na Aha Hookolokolo a pau o keia Aupuni, me ke kakau ana i na Palapala Pili Kanawai, ma ka olelo Hawaii a ma ka olelo Beritania. 1 1y
J. PORTER GREEN,
"KEIKI O KAUAUKIUKIU."
HE LOIO! A HE KOKUA OIAIO!
E HELE MAI NA MAKAMAKA A PAU I o'u nei, a na'u no e kokua ia oukou imua o ka Aha Hoomalu a me ka Aha Kiekie me ka uku haahaa makepono loa. Me na oki mare, a me ka hooponopono ana i ka waiwai o ka poe make, he eleu loa ka hana. Aia ko'u keena hana ma Alanui Kalepa kokoke i ke keena o ka Lunakanawai Aeko. E hamama mau ana ka puka, e hele nui mai i pau ka pilikia. 1-1y
WIL DER & Co.,
(WAILA MA.)
AIA MA KE KIHI O
ALANUI PAPU me MOIWAHINE!
Ua hoolako mau ia me ke kuai ana aku i na
Papa me na lako Kukulu hale
O NA ANO A PAU.
NA PANI PUKA!
PUKAANIANI,
OLEPELEPE,
LAKA,
AMI-LIILII,
AMI-LOLOA
PENA o na ano a pau,
AILA PENA,
VANIKI, &c.
Na Balak Pena me Puna,
Na Pepa Hale me na Lipine Pepa.
Aniani, Paakai, &c.
O na mea a pau maluna ae e kuai makepono loa ia aku no ke DALA KUIKE 1-1y
Conquer in His Name.
Crown of Life. p. 21.
1
Mai hoohui me Satana,
Me na hoa auwana'e;
Mai kulou la a hoomana
I ka poe i onou mai.
Cho. —E ka Haku, e hoolohe
I ka pule a makou,
E kokua i lanakila
Ma ka inoa mana Ou.
2
Ma ke aloha o Iesu la,
Ke 'Lii nui maluna'e,
E paa ai a hee aku la
Koonei poe kue mai.
Cho. —E ka Haku, e hoolohe, &c.
3
Aia a paio me ka make,
Ke 'lii weliweli e,
Hina no i kona mana,
Me ka lanakila nae.
Cho. —E ka Haku, e hoolohe, &c.
4
Lanakila a memele,
Make au, ua ola nae!
Pau kou mana, e ka make,
Ola au a mau loa'e.
Cho. —E ka Haku, e hoolohe, &c.
ELINA KE KOA
HE KANAKA OPIO
PUUWAI WAIPAHE!
KA PALEKAUA LIONA HOI O KONA MAU LA
KE PUKONAKONA O KONA LAHUI, A O
KA OI WELINA HOPO O KONA
MAU ENEMI.
Mokuna VIII—Helu 32.
I KA PANE ana 'ku o Elina i keia mau huaolelo, ua ano pioo mai la ke kaikamahine opio, a kau mai la kona mau maka hauliuli i hoopuluia e na waimaka maluna o Elina, a pane hou mai la me ka leo i hoike mai i ke aloha oiaio.
"Ina mahope iho o ka malama hiipoi ana i kou aloha e ke koa a keia puuwai, e iini nei mahope iho hoi o ka hoike oiaio ana 'ku nei i ke aloha, e hoonele ia mai ana wau me ke aloha o ka ipo, a o ke aloha kuahine ke haawiia mai, alaila, ke hauoli nei no au i ka lawe ana ia aloha, oiai, ua hiki ole ia oe ke haawi mai i ka'u mea i noi haahaa aku nei. Mamua o ko'u nele loa ana i ke aloha mai ia oe mai, ke hauoli nei au i ka lawe ana mai i ke aloha kuahine, a e malama no au me ka hiipoi mau ana."
Kau ae la na lima o ua opio nei i kona mau maka, a hookuu mai la na ipuka waimaka i ka ukana e hoopulu i kona mau papalina. Ua hookaumaha kana hana i ko Elina ma puuwai, a ua ane hiki ole hoi ia laua nei ke hoomanawanui.
"E pau kou ano hoolauwili ana i ka noonoo maikai i haawi ia mai ia oe, a e kau aku kou mau maka imua me ka lana o ka manao; aia malalo o ke alakai aloha ana a na lani, e loaa mai ana ka pomaikai o kou hehi hou ana i ke one o ka aina hanau, a e hui pu hou hoi me kou mau makua a me ka lehulehu makamaka," pela o Elina i pane aku ai.
Aole no laua nei i hooloihi wale i ka manawa kupono, aka, ua koi ikaika aku la i ua kaikamahine nei e hele aku lakou ma kahi a ka waapa e kipa mai ai. Oiai lakou nei e hoomakaukau ana no ka puolo ana i na pono o ua kaikamahine nei, hiki ana ke kii ia lakou.
"Ua hooko ia kau kauoha e ka haku alii, a ke kali nei ka waapa me ko makou makaukau e hooko aku i kau mau kauoha."
"E hele pu aku kakou ano, e pani paa ia na ipuka o ke ana, e kau aku kakou maluna o ka Zelina a e holo aku e iki i ke aumoku."
Ua hooko ia kana mau kauoha, a he manawa pokole mahope iho, ua hehi hou aku la o Elina maluna o ka papahele o kona kuna. Aole no hoi i liuliu, ua kau ae la na pea a e niau malie aku ana lakou nei i ka moana. Ua paa na powa i ka hao, a e hookuu ia ana lakou e holoholo ma ka oneki i kela la a me keia la, no ka hooluolu ana ia lakou iho, me ke kiai paa ia no nae. O ka puka hao o ke ana, ua paa iho la ia elike me ke kuhikuhi ana a ke kaikamahine.
He mau la ko lakou nei holo huli ana no ke aumoku kaua, a i kekahi kakahiaka, ua halawai aku la lakou me kekahi moku. I ke kokoke ana mai no o ua moku nei, ua holo mai la ke kapena a kau iluna o ka Zelina, a me kona mau hiohiona i hele a pihoihoi, ua holo koke mai la imua o Elina, a pane mai la me ka leo nui haalulu.
"E ke Kapena o ke aumoku kaua o ke Alii Rikeke, ano he ukana ka'u e manao nei e waiho aku imua ou, a he ukana kaumaha no hoi."
"E hai mai! A mai lohi!" wahi a Elina.
"Ua halawai aku kau mau kauwa nei me na powa ma ka po o ka la inehinei, a ua hoouka kaua iho la me ka hahana mawaena o kou mau aumoku a me ko na powa. Ua ikaika a hoomanawanui kou mau koa, oiai, ua palua a pakolu ia ka heluna o ko na powa mamua o ko makou, a i ka waenakonu o ka po, aia hoi, ua hoomaka mai la ka nawaliwali o kou mau luina, a ua haule iho la he mau pio malalo o ka lima o na powa. Ua lawe pio ia na luina a me na aliimoku, a ua paa pu me na moku. Ua nui pakela ka poino a me ka make o na enemi, a aole no i mahuahua. Ua ku aku na koa me ka hopo ole a me kaikaika, aka, ua hiki ole nae ke hoomau aku, no ka nui loa o ko lakou mau heluna. Aia lakou i keia la malalo o ka mana o keia poe enemi, a ke hoomainoino ia la me ka weliweli. Ua pakele mai au no ka holo loa o ko'u moku, a ua kaa malalo o ka pouli o ka po, ua imi hele mai la ia oe, a hiki i ka loaa ana o keia pomaikai o ka hui pu ana me oe e ke alii!" Me ke ano e a haalulu o ka leo o keia Kapena i kamailio mai ai ia Elina.
Ua ano puiwa o Elina no keia lono, kauoha aku la e kauia na pea a pau o ke kuna, a e ukali mai ka moku o ke Kapena mahope o lakou, me ka noho no o ua Kapena nei me lakou, a e kuhikuhi i kahi o keia pilikia. Ia la a po a ao ae, kalewa lakou nei ma ka aoao hikina o kekahi wahi mokupuni. Ike aku la lakou nei i na kia moku lehulehu e kuku mai ana, maluna ae o ka aina. Aole o lakou nei ike ia mai e ko uka poe, no ka mea, ua hala malalo o ka malu o ka aina, a o ke kia wale no hoi o na moku ka lakou nei e ike aku.
Hui ae la na luina o ka moku hou a me ko ka Zelina, kau iho la maluna o na waapa, me ka makaukau me na pono kaua, a holo aku la i uka, mahope aku o na pali. I ko lakou pae ana aku i ka aina, ua hoomoana iho la no ke kali ana a po ia la. I ka po ana iho, ua pii aku lakou nei maluna aku o na pali a hiki ma kela aoao, me ka malie loa keia hana ana. Ua ike o Elina ua loohia ia kona mau koa i ka poino, a aia mawaena o ka make a me ke ola e pakele ai lakou. Ua noonoo nui oia i kahi e pakele ai, aka, aole wahi e hiki ai, o ka hele wale aku no ka pono a kau aku maluna o na enemi me ka hoopuiwa. Me ka maalea loa lakou nei i iho aku ai. Nana aku la lakou nei i ka honua olalo, e kuku ana na hale lole o na enemi, e mo-ku mai ana na moku, a ua paulehia ia na mea a pau i ka hiamoe, koe wale no na kiai.
Ua kuhikuhi aku la o Elina i kona mau koa i ke ano o ka hana ana, a me ke ano o ka hoomakaukau ana no ka hui me na enemi. He umi mau kiai o na enemi e kiai a puni ke kahua hoomoana, a ua wae ae la o Elina he ewalu o kona mau koa a me Egemona i hui pu ia aku me ia, e holo aku me ka nihi, a oiai na kiai e nanea ana, e hou aku i ka pahi ma ko lakou mau umauma, me ka hikiwawe, i hiki ole ai ia lakou ke hooho ae a lohe mai ai na enemi. A i ka wa e pau ai ia mea, alaila, e hele aku e wehe i na kupee o na pio, a ke pau lakou i ka lanakila, alaila, o ka manawa ia e hoao ai e lawe pio i na enemi.
Pela iho la na kuhikuhi ana a Elina i kona mau koa. I ka makaukau ana o na mea a pau, a i ka hiki ana hoi i na hora liilii o ka liula aumoe, ua haawi aku la o Elina i ke kauoha ia Egemona me na koa i wae ia, a me ka nihi ano like me ka popoki, ua hele malie aku la lakou i kahi a na kiai e kua na. Ua pauhia loa ia i ka hiamoe ka hapanui o na powa, a no ke ano maluhiluhi o na kiai, ua ano molowa lakou, a aole loa i lohe iki mai i ko lakou nei mau kapuai, oiai, ua oleloia, o na kiai o na powa, he poe lohe o na pepeiao, a he ike ko lakou mau maka.
He po anoano ia, a ano hauliuli ko na ao o ka lewa e hoholo ana ma o a maanei o na paia o luna. Me he la ua hoomaopopo no i ka haina o na hana o ia po, a e kanikau ana no ia mea. No ka mea, i ka wa a ka hapanui o na powa e moeuhane ana no ka hauoli no ka loaa ana o ka lanakila ia lakou, aia hoi, ke nihi kolo mai la ka lima hala ole o ke koa Elina me kona mau ukali tiga, a halawai mai la ke puanuanu o ka lakou mau makakila he umi me na puuwai o na kiai he umi. Aole loa he leo, a aole hoi kekahi mea i lohe ia, aka, me ka malie loa keia hana i hookoia e Elina a me kona mau ukali. Haule aku la keia mau kiai, he mau kanaka koa wiwo ole i ka honua, ua hala aku la ka hanu, ua puanuanu ke kino, a ua pau ko lakou kiai ana ma keia ao. Ua hanu aku la na iliohae o ke aupuni Beritania ia lakou, a e like me ka aihue, ua hoonele ia lakou me na kukui hoomalamalama kino o keia noho ana. Ua lana ae la ko Elina manao no ka lanakila, oiai, o na kiai no ka mea makau, a hala lakou, ua pale ae la kaua, o ka lanakila no ka hopena, aka, me ka maalea no nae e hana ai.
(Aole i pau.)
Ahaolelo Kau Kanawai
o ke Aupuni Hawaii
Ka Moolelo o na hana o ke Kau o
ka M. H. 1876.
LA HANA 82.—Poakolu, Augate 9.
Halawai ka Ahaolelo e like me ka mau.
Hoike mai ke komite pai, ua pai ia ka bila e hoakaka ai i ke ano a e hoomaopopo ai i ke ano o na palapala kii a me na palapala e pili ana i na ahahookolokolo.
Heluhelu mua mai o Mr Mahoe he bila e hooponopono ana i ka oihana leta, a e hoonoho ana i na Luna Makai i mau luna leta ma na apana. Ma ke noi ua kapae ia na rula, a heluhelu alua ia ka bila ma ke poo. Waiho ia i ke komite wae, Green, Mahoe, Kakela-opio, Nakaleka, Kaiue.
Heluhelu mai o Mr Kalaukoa he olelo hooholo e ninau ana i ke Kuhina Kalaiaina, he oiaio anei, ma ka la Sabati e holoi nei na paaho i ko lakou mau lole. Hoole ia.
NA HANA O KA LA.
Heluhelu akolu ia ka bila e hoololi ai i ka pauku 1 & 3, o ke kanawai i apono ia, ma ka la 22 o Iune 1868, e pili ana i ka pepehi a me ke kuai ana i na pipi. Hooholoia.
Heluhelu akolu ia ka hoololi i manao ia no ka pauku 20 o ke Kumukanawai e papa ana i na lunakanawai, aole e koho ia i lunamakaainana iloko o ka Ahaolelo. Hoihoi hou ia e kakau poepoe.
Heluhelu alua ia ka bila e hoonoho ana i kauka lapaau ma Kalawao. Waiho ia i ke komite wae, Barenaba, Aholo, Halstead, Wana, a me Waila.
Heluhelu alua ia ka bila e hoololi ai i ka pauku 3, o ka mokuna 50 o ke kanawai karaima, e pili ana i na palapala bila. Waiho ia ka bila me ka hoololi no ke kakau poepoe a e heluhelu akolu ia ma ka Poaono.
Heluhelu alua ia ka bila e hoololi ai i ke kanawai e pili ana i ka auhau holoholona, i aponoia ma ka makahiki 1870. Oiai e noonoo ia ana, ua hoomaha ka Hale ma ka hora 12.
Halawai hou ka Hale ma ka hora 1 o ka auina la. Mahope o ka noonoo ia ana ua hoopanee ia ka bila. Eia ka poe e makemake ana e hoemi i ka auhau o ka lio i hapalua dala, Martin, Aholo, Kanealii, Kamauoha, Pilipo, Kauai, Birch, Naili, Halstead, Helekunihi, Kalaukoa, Aiwohi, Nawahi, Halemanu, Nakaleka, Mahelona, hui ia he 16. Eia ka poe makemake ole ana e hoemi ia keia auhau, Kaiue, Barenaba, Waterhouse, Nahaku, a me Naukana, hui me 12 alii, like me 17.
BILA HAAWINA.
Noonoo ia ka Bila Haawina imua o ke komite o ka Hale. Noho o Mr Pilipo ma ka noho lunahoomalu.
Noi ke Kuhina o ko na aina e, e hapai ia ka noonoo ana no ka haawina.
Na alanui a me na alahaka no na mokupuni a pau. Mahope o ka hoopaapaa ia ana, ua hoihoi hou ke Kuhina o ko na aina e, i kana noi i noi mai ai. Hapai ia ka noonoo ana no ka Oihana Kinai Ahi o Honolulu 10,000
Noi o Mr Kanealii 8,000, a na ka poe waiwai o Honolulu nei e uku i ka hapalua o keia haawina,
Hooholoia 8,000
Mahele olelo a me unuhi, 300
Hooholoia 300
Na lilo no ka oihana wai 5,000
Noi o Hon Green 3,200 Hooholoia.
Hooholo mokumahu pili aina 10,000 "
Mokumahu Pele, na lilo no ka holoholo ana, 8,000
Oiai e noonoo ia ana, ua hoopau ia ke komite me ke noi aku i ka Hale e like me na mea i hoike ia maluna. Aponoia.
Hoopanee ka Hale.
LA HANA 83.—Poaha, Augate 10.
Halawai ka Ahaolelo e like me ka mau.
Hoike mai ke komite pai, ua pai ia ka bila e hooponopono ana i ka lawe ana mai a me ke kuai ana aku i ka opiuma, a me ka bila e hooponopono ai no ka mahele ana i ka wai ma na ahupuaa, o Waihee, Waiehu, Wailuku, a me Waikapu.
Hoike mai ke komite no ka noonoo ana i ka haawina o na alanui a me na alahaka o na mokupuni a pau e noi mai ana penei e hoonohonoho ai:
Na alanui a me na alahaka o Hawaii 7,000
" " " " Mokupuni o Maui, Molokai a ma Lanai 6,000
Na alanui me na alahaka o Oahu 5,000
" " " " Kauai 2,000
Huina nui o ka haawina $20,000
Waiho ia ma ka papa
NA HANA O KA LA.
Heluhelu alua ia ka bila e hoohoihoi ana i ka hooulu ana i ka lahui Hawaii ma ka haawi ana i na metala hoohanohano no na makua i hanau nui i na keiki.
Waiho ia i ke komite o ka Hale. Noho o Mr Barenaba ma ka noho lunahoomalu no ke komite. Noonoo pakahi ia na pauku. Oiai e noonoo ia ana, ua hoomaha ke komite ma ka hora 12.
Halawai hou ke komite ma ka hora 1 auina la, mahope o ka ninau ia ana, ua waiho ia i ke komite wae. Hoopau ia ke komite o ka Hale, ua waiho ia i ke komite wae. Aponoia. Eia na lala o ke komite, Aholo, Kalaukoa, Lilikalani, Wana, Kamauoha.
BILA HAAWINA.
Noonoo ia ka Bila Haawina imua o ke komite o ka Hale, Mr. Kauai ma ka noho.
Noi o Mr Nahaku e hapai hou ia ka noonoo ana no ka oihana kinai ahi o Honolulu. Hooleia.
Noi ke Kuhina Kalaiaina e hapai hou ia ka noonoo ana no ka hoike a ke komite wae e pili ana no ka haawina o na alanui a me na alahaka no na mokupuni a pau. Hooholoia.
Noi o Mr Kalaukoa, e mahelehele ia ma na apana auhau kela haawina keia haawina. Mahope o ka noonoo ia ana, ua hooholoia, penei keia haawina:
Na alanui & na alahaka o Oahu 6,000 hooholoia " " " Kauai.
Mokumahu Pele na lilo no ka hooholo ana 8,000
Noi o Mr Nahaku 6,000
" Barenaba 7,000
Hooholoia 7,090
Hana hou ana i ka mokumahu Pele 5,000
Noi o Mr Mahoe 4,000
" Kalaukoa e kapae
Hooholoia 5,000
Na heleuma me na mouo. Hooh. 2,000
Eli ana i ke awa o Honolulu 5,000
Noi o Mr. Helekunihi e kapae.
" Birch e pakui mai i mau huaolelo, a e heluhelu ia keia haawina penei: Eli ana i ke awa o Honolulu (aole nae e hoolilo ia no kekahi hana e ae) 5,000
Noi o Mr Aholo 3,000
Mahope o ka hoopaapaa ia ana, ua hoike mai o Mr Mahoe, ua hookaawale ia no i keia kau Ahaolelo he 1,000, no keia haawina, aole nae i eli ia ke awa. Aka, ua hoolilo wale aku no na Kuhina i ke dala, no kekahi mau hana okoa, a aole i eli ia ke awa, pela ka lakou mea i hoike imua o keia Hale i ka ninau ia ana, ua hooholo ia he 5,000. Eia ka poe i hooholo loa i kela haawina, Gay, Halemanu, Waterhouse, Nahaku, Preston, Kaina, hui me 15 alii, like me 21. Eia ka poe hoole, Aholo, Kahuila, Kaiue, Kanealii, Kamauoha, Pilipo, Lilikalani, Birch, Naili, Halstead, Helekunihi, Barenaba, Kalaukoa, Aiwohi, Nawahi, Mahoe, Wana, Naukana, Nakaleka, Mahelona, hui ia he 20 wale na poe aloha i ka lahui, ma keia haawina, me ka manao e hoemi mai i keia haawina.
Hana hou ana i na uapo 10,000
Noi o Mr Aholo e waiho i ke komite wae.
Hooholoia e waiho i ke komite wae.
Hale lamalama no Honolulu 1,500
Noi o Mr Nawahi 1,000
" Pilipo 1,200
" Barenaba e kapae.
Hooholoia 1,500
Hana hou ana i ka hale lamalama ma Honolulu 800
Noi o Mr Kalaukoa e kapae
" Mahoe 600
Hooholoia 800
Hale lamalama o Lahaina 500 hoo.
" " " Hilo 400
Noi o Mr Kaina 500
" Pilipo e paku mahope i na haawina no na hale kukui a pau. Aole e hoo-
lilo ia no kekahi hana e ae.
Noi o Mr Birch 300
Hooholoia 400
Hale lamalama ma Kawaihae, hooholo ia 300.
Noi o Mr Preston e hapai hou ia ka noonoo ana no ka haawina no na lilo o ka hooholo ana o ka mokumahu Pele, i hooholoia iho nei. Hooholoia a ua waiho ia i ke komite wae.
Hoopau ia ke komite me ke noi aku i ka Hale, ua noonoo ia kekahi mau haawina. Aponoia.
Hoike mai ka Peresidena i na lala o ke komite wae no ka noonoo ana no ka haawina no ka hana hou ana i na uapo, Aholo, Halstead, Birch, Waterhouse, Moehonua, a me Ake. A o ke komite wae no ka noonoo ana i ka haawina no ka hooholo ana i ka mokumahu Pele, Preston, Walker, Kauai, Barenaba, a me Waila.
Hoopanee ka Hale.
LA HANA 84.—Poalima Augate 11.
Halawai ka Ahaolelo e like me ka mau.
Heluhelu mua mai o Mr Preston he bila e hooponopono ai i na hana ma ka lawelawe ana i na hihia karaima. Waiho ia e pai no ka heluhelu alua.
Hoolaha mai o Mr Preston, he mau bila e hoololi ai i na pauku 1106 a me 1144 o ke kanawai kivila, a e hoopau ia ai ka haawina 51 o ka mokuna 49 o ke kanawai kivila.
NA HANA O KA LA.
Heluhelu alua ia ka bila e hooponopono ai i ka hoopae ana mai i ka opiuma, a me na wahi oia mau mea. Waiho ia i ke komite wae, Kaai, Kakela-opio, Gay, Green, a me Mahelona.
Heluhelu alua ia ka bila e hoololi ai i ka pauku 500 o ke kanawai kivila, e pili ana no ka ohi ana i na auhau. Waiho ia no ke kakau poepoe, a e heluhelu akolu ia ma ka Poalua e hiki mai ana.
Heluhelu alua ia ka bila e hoololi ai i na pauku 483 a me 484 o ke kanawai kivila, e pili ana no ka auhau o na waiwai lewa. Waiho ia ma ka papa a maopopo ka lohe ia mai no na mea o ke kuikahi.
Heluhelu alua ia ka bila e hookapu ana i ka pepehi ana i na manu oo, iiwi, mamo, a me akakane, iloko o keia aupuni. Waiho ia no ke kakau poepoe a e heluhelu akolu ia ma ka Poalua.
Heluhelu akolu ia ka bila e hoololi ai i ka pauku 393 o ke kanawai kivila, e pili ana no ka lawaia ana. Waiho ia i ke komite wae, Halstead, Birch, Aholo, Kakela-opio, a me Kauai.
Heluhelu alua ia ka hoololi no ka pauku 61 o ke Kumukanawai. Hooholo ia no ke kakau poepoe, a e heluhelu akolu ia ma ka Poaono. Hoomaha ka Hale.
Halawai hou ka Hale ma ka hora 1.
BILA HAAWINA.
Noonoo ia Bila Haawina imua ke komite o ka Hale. Noho o Mr. Kamauoha ma ka noho lunahoomalu.
Hana hou ana i na hale aupuni 15,000
Noi o Mr Pilipo waiho i ke komite wae.
" Aholo 8,000
" Kanealii 5,000
Hooholoia e waiho i na komite wae.
Pa a me ka lanai no ka hale aupuni hou. 6,000
Noi ke Kuhina o ko na aina e, e mahele i mau haawina okoa no kela me keia.
Noi o Mr Aholo e waiho i ke komite wae.
" Mahelona 4,000 hoihoi hou
" Pilipo 3,000 "
" Kaai 2,000
" Nakaleka e kapae.
Hooholoia 2,00
Noi o Mr. Nahaku no ka makeke o Lahaina 4,000
Noi o Mr Kauai 1,000
" Helekunihi 1,000
Hooholoia 2,000
Noi o Mr Birch no ka makeke kuai ia o Wailuku 1,500
Noi o Mr Mahoe 1,200 Hooholoia.
" Kaina no ka makeke kuai ia o Hilo 1,200 Hooholoia.
Hoohoihoi mahiai a me hoopae lima hana. 65,000
Oiai e noonoo ia ana, ua hoopau ia ke komite, me ka hoopanee ia o ka apono ana i ka hoike.
Hoopanee ka Hale.
LA HANA 85—Poaono Augate 12.
Halawai ka Ahaolelo e like me ka mau.
Hoike hoapono mai ke komite wae i waiho ia aku ai e noonoo i ka bila e hoakea ana i na aha apana a hoomalu e hookolokolo i na karaima hoowalewale e moekolohe. Aponoia.
Hoike kue mai ke komite wae i waiho ia aku ai e noonoo i ka bila e hoololi ai i ka pauku 174 o ke kivila. Waiho ia ma ka papa.
Heluhelu mua mai ka Loio Kuhina i ka bila e hoololi ai i ka pauku 168 a hoopau loa i na pauku 171 a me 182 o ke kivila. Waiho ia no ka heluhelu alua.
NA HANA O KA LA.
Heluhelu akolu ia ka hoololi o ka pauku 20 o ke Kumukanawai a hooholo loa ia. O Nahaku a me Naukana wale no na mea hoole.
Heluhelu akolu ia ka bila e hoololi ai i ka pauku 913 o ke kivila a hooholo loa ai.
Heluhelu akolu ia ka bila e hoololi ai i ka pauku 3 mokuna 50 o ke kanawai karaima a hooholo loa ia.
Heluhelu akolu ia ka bila e hoololi ai i ka pauku 237 o ke kivila a e hoopau i ke kanawai i apono ia i Augate 23, 1862 a apono hou ia i Augate 3, 1874 a hooholo loa ia.
Heluhelu alua ia ka bila e hoololi ai i na pauku 1 a me 4 a e hoopau loa i ka pauku 2 mokuna 48 o ke karaima a waiho ia i ke komite wae, Aholo, Nahaku, Martin, Mahelona, a me Kaai.
Hoopanee.