Ka Lahui Hawaii, Volume II, Number 51, 14 December 1876 — He mau rula no ke kakau ana i ka nupepa. [ARTICLE]

He mau rula no ke kakau ana i ka nupepa.

I na makemake o kakou nei i na nupepa, e hoomaopopo oukou, he hana luhi no ka poe pai ke hooponopono ana i na hana kue a me na lauwili o ka oukou kakau ana. Nolaila, e pono e nana i keia mau rula a hoomaopopo iho, a malaila e hoopokole ia ai ka luhi o ka poe pai nupepa. Rula 1. - E kakau me ka inika eleele maluna o na pepa keokeo i rula akea kuponoia. Rula 2. - Aole pono e kakau mai kela a keia kihi o ka pepa, aka, e waiho i kahi iniha paha ma ka hema o ka pepa me ke kakau ole ia oia wahi. Rula 3. - Aole e kakau i ka aoao elua o ka pepa au e kakau ana, aka, e waiho wale ia aoao, a ma ka aoao ekolu e kakau hou aku ai, e helu ana ia aoao, o ka aoao elua. Rula 4.- E kakau i ka helu o na aoao a pau i kakauia e oe, i ole e hukau a pohihihi. Rula 5.- E kakau me ka lima maikai, moakaka lea, haukae ole. Rula 6. E maopopo na hopuna olelo a pau. Rula 7. - Ina kakau hewa oe, aole pono e holoi ia mau hua me ka lima, aka, e kaha ae me ka inika o ka peni. Rula 8.- No na hua italia, e kaha i hookahi kaha malalo, no na hua liilii, i elua kaha, a no na hua nunui i ekolu kaha. Rula 9.- Aole pono e kakau pokole i na hua i maopopo ole i ka poe pai. Rula 10.- A paa na mea a pau au i makemake ai e kakau, e heluhelu hou i maopopo ka pono a me ka ole. Rula 11.- Aole pono e kakau i kou inoa ma na inoa kapakapa. O keia ka pau o na rula i maopopo ia'u, ua koe no kahi. Aole no paha oukou e kapa mai ana ia'u he oi ma keia mea o ke kakau ana i na nupepa, a i ole, he "paa rula," aka ua hooikaika au e unuhi mailoko mai o kekahi buke haole, no ka pomaikai o kakou. Ina no ua koe kahi mau rula hou aku, huai pau ia mai, i maemae na hana o ka 1877 e hiki mai ana. Me ka mahalo i ka Lunahooponopono ame na keiki alele huametala. GEO. B. WAHINEALOHA Lahaina, Maui, Dec. 4, I876.