Ka Lahui Hawaii, Volume III, Number 9, 1 March 1877 — Page 4
KA NUPEPA KA LAHUI HAWAII.
HONOLULU, MARAKI 1, 1877.
KOMI TE HOOPONOPONO NO KEIA AOAO.
LAIKI MAKUA, MRS. KELA A. GILIMANA,
M RS. ELENA MAKALE, MRS. C. C. COLEMANA.
The beautiful River.
(Ka muliwai maikai)
1. Shall we gather at the river
Whe re bright angel feet have trod;
Wi th its crystal tide forever
Flowing by the throne of God?
Cho. — Yes, we'll gather at the river,
The beautiful, the beautiful river,
Gather with the saints at the river,
That flows by the throne of God.
2. On the margin of the river,
Wa shing up its silver spray,
We will walk and worship ever,
All the happy golden day.
Cho — Yes, we'll gather at the river, &c.
3. Ere we reach the shining river,
La y we every burden down;
Grace our spirit will deliver,
An d provide a robe and crown.
Cho. — Yes, we'll gather at the river &c.
4. At the smiling of the river,
Mi rror of the Savior's face,
Saints whom death will never sever,
Li ft their song of saving grace.
Cho. — Yes, we'll gather at the river, &c.
5. Soon we'll reach the silver river,
Soon our pilgrimage will cease;
Soon our happy hearts will quiver
Wi th the melody of peace.
Cho. — Yes, we'll gather at the river, &c.
No ko ke Akua wahi e noho ai.
Ninau aku la kekahi kanaka i kekahi haumana Kula Sabati penei:
Ea, e ke keiki, e hiki anei ia oe ke hoike mai ia'u i kahi i noho ai ke Akua?
Pane mai la ke keiki, Ae; aole oia e noho iloko o ka naau o ka poe hewa.
No ka pule.
I mai la kekahi haumana uuku i kana kumu penei:
E ke kumu, ehia la pule ana i ka la? Ke manao nei au i ekolu pule ana, pela ko'u makemake.
Ninau aku la ke kumu, no keaha la kou makemake ana pela?
Pane mai la ke keiki, no ka mea, pela no o Daniela, ekolu ana pule ana i ka la hookahi.
Pane mai la ka lua o na keiki, pehea o Davida, ehiku ana pule ana i ka la hookahi.
I mai la hoi ke kolu o na keiki, Heaha ko Iesu manao? Eia no ia, he pono ka pule mau, aole e hoonawaliwali.
E na kamalii, he wahi manao ka'u ia oukou, e pule i ke Akua, mai haalele i ka pule, no ka mea, he Makua aloha ko kakou a he nui kona mana. E hookokoke aku oukou iaia, a hookokoke mai no ia ia oukou.
KA ELA KUMUMANAO.
NO KE KAUOHA HOU.
"HE KAUOHA HOU KA'U E HAAWI AKU NEI IA OUKOU, E ALOHA KEKAHI I KEKAHI.—IOANE XIII; XXXIV."
MOKUNA V.
"E nana iho paha ilalo la," wahi a Wili, a pii aku la iluna o ka pa me ka hoopili ana aku o kona mau maka i kekahi wahi puka uuku ma ke poo o kekahi pou laau. "He keu o ka nani! He keu ka palupalu maikai me ka pahee, a he keu no hoi ka uuku. E nana mai paha olua la!"
"Alia hoi ha kou poo mai ia Ela ae," wahi a Bland, a kulai naaupo aku la oia iaia. "Pehea e hiki ai ia olua ke nana like iloko o kena wahi puka me he puka wili puaa la?"
"Owau hoi ke nana! heaha?" i kahea aku ai o Lile.
"He wahi punana manu," wahi a Ela, "ua hana punana kekahi wahi manu ai-laiki malaila i kela haule lau aku nei. Aole e Bland, mai kulai naaupo oe ia Wili pela, mamuli oia haule a eha.
"Kainoa hoi he makemake olua e ike, eia nae, oia wale no kana e manao!" wahi a Bland me ke okalakala.
Ua hiki no e Bland, wahi o Ela i pane aku ai me ka oluolu; ua ike no au. Ua loaa mua no ia Helena i kela haule lau aku nei a hoike mai la ia'u.
Ae, wahi a Helena; i ku ae ai ia iluna me ka eleu. Na'u kena punana. Mai hoopapa oe e Wili. Hele ma kahi e!
Aole au e hoopoino e Helena, wahi a Wili, aka, ua nalohia iho la kona mau manao no ka Lile mau hana i ike ia aku. E onioni like ana ko laua mau poo e kokoke aku i ka pou me ka hooikaika ana o kekahi me kekahi, me he kikiao makani ikaika la e hoomaka ana e pa, oiai ko Ela leo i lohe ia aku e laua, me he malino ana la a ka aila maluna o ka wai.
Auhea oukou! he keu a ka moe malie o na manu keiki e moe la iloko o ka punana. Aole he kowa kaawale iloko o kela pou e kuee ai lakou, he wahi kaawale anei kahi.
He wahi kaawale no nae kahi no ke kuee ma Okalana, wahi a Helena, me kona mau ano nanaina hana kamalei; me ka emi hope ana aku ona, i komo mai ai ko Lile poo mawaena ona a me ka pou.
Nana like ae la o Wili laua o Bland iluna me ka akaaka, no keia hana hakaka ma kahi kokoke; a o Lile, aole ona ike lea i kahi o ka manu makuahine i noho ai.
Hu ro! wahi a Bland, e nana ana i ka halulu o ke kapuai o na lio me ka lele koke ana iho mailuna iho o ka pa, aia o Frank Edmund maluna o kona wahi lio keiki eleele. Ua hiki paha iaia ke lele, ka! eo paha iaia o Gyp ke holo, a holo aku la ia e halawai pu me kona hoa'loha maikai me Frank. A hahai pu aku la o Wili.
Nolaila, e Helena, ua manao anei oe he keena kaawale kekahi ma Okalana ma ka hooulu hakaka ana, wahi a Ela me ka leo akahai, me ke kau ana aku o kona lima iluna o ka poohiwi o Helena, a hookokoke mai la iaia i ona la.
Ae, wahi a Helena, me ka hoomakue ana iho o kona mau kuemaka, a puai koke mai la ka ula. Ke hana nei no hoi kakou, ina he keena a me ka ole.
Aole he keena no kakou e hana mau ai, wahi a Ela me ke ano aka. Aole he mea oi aku o ka mehameha anoano ma keia ao mamua o ke kuee; na papalina enaena me na leo nui ana a me na olelo kalakala, ina e lanakila ole oe, o ka waimaka me ka hauoli ole ke loaa ana ia oe, a i lanakila oe, e hauoli ana oe me ka olioli. Aole loa au i hauoli no kekahi mea a'u i paio ai.
Paio no ka oe e Ela, wahi a Helena me ka hookau ana aku i kona mau wahi lehelehe iluna o ka lima akahai i hoopa mai ai i kona papalina. Ina owau la a he maikaiano ku i ka maikai—elike la me oe, ina la ua hauoli mau au.
E Helena, mai la mai i kekahi mea kino lepo i hoohalike no kou maikai ole ana, wahi a Ela me ka leo haahaa. Ua olelo mai o Iehova, aole loa i hemolele na mea a pau, aole loa hookahi. E nana aku oe ia Iesu wale no, oia ka hoailona o na pono a pau i piha hoi i ke aloha, a oia ka mea nana e haawi mai nei i na pomaikai a pau.
Hoomaka mai la o Helena e ike poliuliu i kahi i waiho ai o kona mau hewa ponoi. Ua hooikaika oia e hoopono iaia iho. Ua au oia ma o a maanei e hookumu i kona pono wale iho no, a ua ike oia i ka waiwai ole oia hooikaika ana e kukulu hookahi maluna iho o na wai hohonu o ka hoowalewale.
Na ka leo o Lile i hoohikilele mai, a hoopau ae la o Ela i kana mau huaolelo e kamailio ana oiai e hoolohe malie ia ana e Helena. Auwe, e Ela e, wahi a Lile, i hoopuoho mai ai me ke ano hoopuiwa, ua haule aku nei kuu komo ilalo iloko o ka punana manu! Heaha ka'u e hana ai?
Aole e hiki ia oe ke nao iho? wahi a Ela, me ka hiki ole iaia ke kau-a mai i ka mino aka ana aku no keia hana maalea a Lile i hana ai.
Aole e hiki ia'u, wahi a Lile, me ka hoikeike pu ana mai i na wahi lima i poholehole me ka ula ma o kona manao iho e hooikaika i kimo iloko o ka puka.
Pehea i haule ai e Lile? Ke ike la no anei oe?
E Lile! e hoao oe e lawe i kuu punana manu? wahi a Helena i ninau mai ai, a hulili koke mai la kona mau maka me ke ano huhu, ma kona ike ana aku i ko Lile maka ano kolohe ana e hana ana me ka anehe e lawe ae i ka punana. Aka, na ka Ela mau olelo i ka-ua mai iaia; ua mumule iho la ia, me ka noonoo ana me ka ehaeha, Auwe, e hiki anei ia'u ke hoomanao aole e huhu hikiwawe!
Pane malie aku la o Ela, ke manao nei au, o kahi lede uuku a papa, he haawina kona no na punana manu i keia la, a oia ka mea nana e ao mai iaia e waiho malie ia lakou.
Aka nae, ua hele ka manu, wahi a Lile me ke ano kaumaha, a ua makemake wale no au i ka punana.
Malia i keia makahiki ae, e manao hou mai no na manui ka punana e Lile, wahi a Ela.
Aole; aole o lakou makemake e noho iloko o na punana ua kahiko.
E kiola aku no lakou i ka mea kahiko iwaho ke makemake lakou e hana hou i punana iloko o keia puka, oia ka Lile pane ana me ka hoihoi.
E hana hou anei? wahi a Ela me ka aka. Aole au i hoomaopopo ia mea e Lile. Oi ana, malia o hemo ia'u ke komo. Ua maopopo loa ia oe ua haule iloko o keia pou?
Ae! he hiki no ia oe ke ike iho. No ke poholoholo i kuu lima, o ka haule aku nei no ia. Nana iho paha oe la.
Nana iho la o Ela ilalo iloko o kahi puka pouli uuku e hamama ae ana, e hiki ole ai i kahua kukui ke haule iloko, a mahope o kona halo ana no kekahi manawa a maa aku kona mau maka i ka pouli, ike iho la ia i kekahi mau wahi wawae liilii e waiho ana malalo o ua pou la i uhiia me ka hulu pahee o na manu opio, a me ko lakou wahi moe nolunolu, a iloko olaila kahi i waiho ai ke komo o Lile e anapanapa mai ana me he hoku la; ka hua makamae hookahi i waiho iloko o ka punana manu.
Ae, ua ike au. Ua ulu mai anei ka noonoo ia oe no ka nene me na hua gula, aole anei e Lile? Mai uwe oe. Ua maopopo ia'u e hemo ana no, wahi a Ela me ka hoihoi. Ua manao au o ke kumu o kuu huipa holo lio oia ka mea e hiki ai.
Pehea e Ela? wahi a Helena, oiai oia e hoomaka ana e hoomaopopo iho i ka loaa o ke komo hoopakalaki.
Ka, ua ike anei oe i keia iwi palaoa poo iliohae ma ke kumu o kuu huipa? Na kona mau pepeiao e ohiki aku malalo ae o ke komo; a malia, o komo iho ke komo a lewalewa ilaila. A me ia au e hapai mai ai iluna nei me ke akahele loa a—haule hou aku la ka hoi, ua h iki hoi iluna nei la, wahi a Ela, me ka akaaka ana i ka palemo ana aku o ke komo mai ka ihu kii aku o ka iliohae, a haule hou aku la ilalo i ka punana.
Ua hiki no e Lile, e hooikaika no au a hiki i ka loaa ana e Lile. Hooikaika iho la ia me ke alualu hele ana i ke komo mai kekahi aoao o ka punana a i kekahi, aole anei oe e manao iho, aole keia puka he wahi ano nui maoli, ina aole ka punana manu maanei?
Ae, pela no; wahi a Lile.
E loaa anei ia oe ka manao e nana iho ilalo, ina aole he wahi punana manu nani malaila.
Aole loa, e Ela, aole e loaa iau ka manao.
Ua loaa nae ia oe he pomaikai nui ma ka ike ana i kahi hooluolu o na wahi manu liilii ? Luliluli iho la ko Lile poo me ka nana pohaohao aku iaia, me he mau mea ano kupanaha la ka hopena o keia hana e hiki aku ai.
A ke manao nei au ua loaa ia oe ka pomaikai ma ko waiho ana no pela maanei, i loaa ai ia haawina like i kekahi poe e aku ma ka ike ana. A ma kahi o keia mau mea a pau e Lile, aia kekahi kumu maikai loa, aole i hoopuka ia.
Na Helena ka punana, a ua ike oe aole ia i makemake e hoopapa ia. He manao kupono ole ia o kou pokii, a he uhaki ana ia i kela kauoha hou a'u i hai aku ai ai oe. Ina he mea hiki i kuu Lile ka malama ana ia kauoha. He mea ia e hoohauoli mau ai ia oe, pela ko'u manao.
Nana mai la o Lile me ke ano kaumaha a me ka hilahila, aka nae, ua hamau loa iho la ia. E haka pono ana na keiki i ka Ela mau hana me ka nui o ka hoihoi.
Ua kaulona like mai la lakou iaia me ka manao e akakuu iki mai ana ia, no ka mea, ia Ela e kamailio ana, aole he wahi olelo i akakuu iho, aka, me he la, ua kokoke mai ka manawa e hoomaka ai ka hoike ana, a he mea kupono ole hoi ka waiho ana iho i ke komo iloko o ka punana a hiki i ka pau ana oia hana.
(Aole i pat).
KA ELEPANI I HOOPAI I KONA KAHU.
Ina e hoolaka pono ia ka elepani me ka malama pono ia, e pipili loa aku no lakou i ko lakou mau kahu me ka hoolohe i ka lakou mau kauoha, me he wahi keiki uuku la.
I kekahi manawa, he poe hana ino loa na kahu o lakou, aole me ka lawelawe kupono ana a hana oluolu aku i ka elepani, aka, e hahau ana me ka houhou ana i na mea oioi ia lakou.
I kekahi la, ua hanaia kekahi elepani ma Inia e kona kahu, e like me kela maluna ae; a i ka loaa ana he manawa no ka elepani e hopu ai i kona kahu, lalau iho la ia iaia me kona nuku loihi a holo aku la i ka muliwai e kokoke mai ana. Mahope iho o kona lumai ana i ke kahu no elua a ekolu manawa iloko o ka wai, waiho malie iho la ka elepani iaia ilalo ma ka maloo, a nana iho la, me he la e i iho ana, "E malama pono ia oe iho ma keia mua aku, o lumai hou ia oe e a'u!"
He holoholona ike keia me ka hoomaopopo i kona mau hoa'loha i oi aku mamua o ka ilio.
Aia kekahi kanaka i hana i kekahi hewa, a ua manao oia e kau ia ana ka uku hoopai maluna ona; a i ka loaa ana iaia o ka pakele, ua holo aku oia me ka elepani i mea nana e kokua iaia ma ke pale ana aku i ke kau ana mai o ka hoopai maluna o na; a aole loa he mea i a-a e hookokoke aku i ona la.
MAI AKAAKA OE I KA HEWA.—Aole pono ia oe e akaaka i ka hewa, ina e ike aku oe i kekahi hana hewa, mai hoapono aku: Ua palapala ia e Solomona, "Akaaka ka poe lapuwale i ka hewa."
Ka la hiki mai. Ka ino ma ka moana.
He pinepine ko Iesu kau ana ma ka moku me kana mau haumana. He moku no hoi ko Petero nona ponoi, a pela no o Ioane, ua makemake nui lakou e haawi aku ia Iesu i na moku o lakou.
I kekahi manawa, maluna lakou o ka moku a pau, a pa mai la ka makani me ka ikaika, a kupikipikio ae la ke kai iluna a ilalo, a pii mai la iluna o ka moku. Hopohopo iho la na haumana o pau lakou i ka make.
Ua pauhia ia o Iesu e ka hiamoe, a e moe ana ia iluna o kahi moe. O ka leo halulu o ka makani a me ke kai, aole loa ia i hoala ia.
Holo aku la kana mau haumana i ona la, a i aku la, "E ke Kumu, aole anei ou manao no makou ? E waiho anei oe ia makou e make ?''
Alaila, ala ae la o Ie su, a olelo aku la i ka makani, " E ka makani, e malie." Oki koke iho la ka pa ana a ka makani, a malino maikai iho la ke kai.
Olelo aku o Iesu i kana poe haumana, "No ke aha oukou i hopohopo ai ? .No he aha oukou i manaoio ole ai na'u oukou e malama?"
Ua ike no o Iesu, ua luaiele ia lakou e na ale a me ka makani, a nana no e hoopakele ia lakou, oiai oia ua pauhia ia e ka hiamoe. I ae la na haumana kekahi i kekahi, "O Iesu oia ke Keiki a ke Akua; no ka mea, ua hoolohe mai na wai a me ka makani iaia."
KA PULE NO KA HAU.
Hele aku la kekahi wahi kaikamahine waiho i ka paani i ka wa hou o ka haule ana iho o ka hau, a i kona hoi ana mai iloko o ka hale, i aku la ia i kona mama, E mama, ua hiki ole ia'u ke umi iho i ka pule ia'u iwaho aku nei i ka paani.
Heaha kau mea i pule ai, e kuu keiki ?
Ua pule aku nei au i ka pule no ka hau, e mama, ka mea hoi a'u i ao ai ma ke Kula Sabati.
Ka pule no ka hau! Heaha ia mea, e kuu keiki ? Ka inoa hoi, oia kana i pane mai ai, O kela pule maikai iloko o ka Baibala, e mama, ua maopopo ia oe, "E holoi ia'u, i keokeo ai au e like me ka hau."
NO CHRISTOPHER COLUMBUS.
Aole i eha haneri makahiki i hala aku nei, mai ka loaa ana o ka aina puni ole o Amerika. O na kupuna o ka poe kanaka i kapaia i keia wa ka poe Amerika, e noho ana lakou ma Europa ; a he uuku loa ko lakou hoomaopopo ana no ka honua.
Manao iho la lakou, he mea uuku loa la ka houna. Aole hoi i hele makaikai na kanaka o ia wa e like me ko keia wa, ma ka aina a me ke kai. Aole he mau ala kaa ahi a me na mokuahi ma na kapakai komohana o Europa a me Aferika kahi o ka moana Atelanika.
O ka poe i holo ma na moku, aole la-i hele a nalowale ka aina mai ia lakou aku. Aole he moku i holo ma ka moana akea, a aole no hoi he mea i ike heaha aku la na mea o mua.
Ua ike ia ma ia manawa, he uuku wale iho no ka malamalama o ka pono ma ia hapa o ka honua. Oiai o Asia kahi i noho ai ko kakou mau kupuna o Adamu laua o Ewa, kahi hoi o Mose, Davida a me Solomona i noho ai. Kahi hoi i hanau ai ka Hoola. Ua ike nui ia o Asia e ko kakou mau kupuna ; a o ka aoao akau wale no o Aferika kai kipa ia e na moku ma ia wa.
He nui wale ka poe i manao ia manawa, he palahalaha ka honua, aka, he poe kakaikahi ka poe i manao he poepoe ka honua. O Christophur Columbus kekahi o ua poe la.
Ua hanau ia oia ma Genoa, Italia. I kona wa opiopio he luina oia. Ua hooikaika nui oia ma ka huli ana, a ua lilo oia i kanaka naauao loa; ua hoopaa oia i kona maneo he poe ka honua, a ua hiki i na moku ke holo a puni.
Makemake nui iho la ia e hoao, i ka wa o na moku e holo ana i Inia iloko o ia mau la; holo aku la lakou ma ka aoao hema o Aferika, a ua makemake nui oia e holo i Inia ma ka aoao komohana.
J. M. C.
(Aole i pau.)
Na mea hou o Koolaupoko, Oahu.
E KA LAHUI HAWAII ; Aloha oe:—
Ina la mamua o ka Apana o Koolaupoko nei, he kuanea a he kohu ole no hoi i ka nana iho, aka, i keia au hou, he keu aku o ka lako pono i na mea a pau, e oluolu ai ke kino. Ma Kaneohe ponoi iho, ua lako pono, 1 halekuai lole no ka hui o Chulana & Co, 2 halekuai bipi, 1 no Mr. Poka, a 1 no Mr. W. E. Pii Esq. Lunakanawai o keia apana, ua pau ka makapehu ia o keia wahi, aole pela mamua, kaukai aku ka pono i ke kaona o Honolulu, aka i keia wa, ua pau ia mau pilikia, ua unu ia mai e na keiki lalawai o keia wahi a kokoke, he palupalu a momona na io bipi, a he keu o ka holo o keia mau halekuai bipi, ua like loa me ke kulanakauhale alii ka holo o keia mau hale. 1 hale inu kope, no ke keiki o ka aina pua, Mr. Alana pake, ua oi aku ka maikai o ke kope a me ke ki o keia hale, mamua o na hale e ae o keia apana, ua ane like no ka maikai o kolaila kope, a me ke ki, me ko ke kaona o Honolulu, nolaila, ua nui ka pomaikai, a pau ka pilikia o keia apana.
Eia hoi kekahi, ma keia apana no ua pau loa na aina loi o keia wahi, i ka hoolimalima ia e na keiki o ka aina pua, a ke huli nei lakou no ka pomaikai o keia au hou, pau ka manao a me ke pue ana i ke anu o keia mau kakahiaka, oiai, ka makani malua kii wai e lawe mai ana i na ea huihui mai Alika mai. A pela no hoi na keiki kanu ko, ke maumau nei ka niniu poahi ana a na huilahao o na nau hoomaloo ko, a ke hana 'la ka mikini i kana hana, nolaila, aole paha he makahiki huli waiwai e ae e like me keia. A nolaila, ua nui a lawa iho ka'u wahi ukana maluna ou i ole ai oe e kunukunu a kuihi. Me ke aloha waianuhea i ka LAHUI HAWAII a me na work boys o kou keena hoomalamalama.
F. R. KAHAO.
Kaneohe Plnt., Ian 22, 1877.
KA LIO.—I ko'u wa e ike ai i kekahi lio hulupala maikai, ua hoomanao mau au no Pomp; o ko kakou lio i ko'u wa uuku—He lio nui maikai a ikaika, aka, he akahai me ka oluolu. Ua makemake oia i ka paani.
HAAWINA KULA SABATI.
HELU 10.—SABATI, MAR. 11.
KUMUHANA. Ka laweia'na o Elia iluna.
PAUKU BAIBALA, II Na LIii 2:1—12.
A I ke kokoke e lawe aku o Iehova ia Elia i ka lani ma ka puahiohio, hele pu aku la o Elia me Elisai mai Gilegala aku.
2 I aku la o Elia ia Elisai, Ke nonoi aku nei au ia oe, e noho oe ia nei ; no ka mea, ua hoouna o Iehova ia'u i Betela. I mai la o Elisai, Ma ke ola o Iehova, a ma ke ola o kou uhane, aole au e haalele ia oe. A hele pu laua i Betela.
3 A hele mai na haumana a ka poe kaula ma Betela io Elisai la, i mai la ia ia, Ua ike anei oe e lawe auanei o Iehova i keia la i kou haku mai kou poo aku? I mai la ia, Ae, ua ike au; e hamau oukou.
4 I aku la o Elia ia ia, e Elisai e, ke nonoi aku nei au ia oe, e noho oe maanei; no ka mea, ua hoouna mai o Iehova ia,u i Ieriko. I mai la kela, Ma ke ola o Iehova a me ke ola o kou uhane, aole au e haalele ia oe. A hele pu laua i Ieriko.
5 A hele mai la na haumana a ka poe kaula ma Ieriko io Elisai la, i mai la ia ia, Ua ike anei oe, e lawe auanei o Iehova i keia la i kou haku mai kou poo aku? I aku la kela. Ae ua ike au; e hamau oukou.
6 I aku la o Elia ia ia, ke nonoi aku nei au ia oe, e noho oe maanei; no ka mea ua hoouna mai o Iehova ia'u i Ioredane. I mai la kela, Ma ke ola o Iehova a me ke ola o kou uhane, aole au e haalele ia oe. A hele aku la laua a elua.
7 A hele aku la na kanaka he kanalima no na haumana a ka poe kaula, a ku mai ma kahi loihi aku; a ku no laua a elua ma Ioredane.
8 A lawe aku la o Elia i kona aahu, a opiopi iho la, a hahau iho la i ka wai, a hookaawaleia'e la ia, ma o a ma o; a hele aku laua a elua i kela kapa ma ka aina maloo.
9 A hiki aku la laua ma kela aoao, i aku la o Elia ia Elisai, E nonoi mai oe i ka mea a'u e hana aku ai nou, mamua o kuu lawe ia'na mai ou aeu la. I mai la o Elisai, Ke nonoi aku nei au ia oe, i papalua o kou uhane maluna o'u.
10 I aku la ia, He mea paakiki kau i noi mai nei; ina e ike oe ia'u i kuu laweia'na mai ou aku la, pela e hanaia mai ai nou, aka i ole, aole e hanaia mai.
11 A i ko laua hele ana'ku, e kamailio pu ana, aia hoi, he halekaa ahi, a me na lio ahi, a hookaawaleia laua a elua, a pii ae la a Elia iloko o ka puahiohio i ka lani.
12 Ike aku la o Elisai, auwe aku la. E kuu makua, e kuu makua, o ka halekaa o ka Iseraela, a me na hoohololio ona! Aole ia i ike hou aku ia ia, a lalau ikaika iho la i kona aahu, a nahae ia ia i na apana elua.
Pauku Gula. "Hele pu ae la Enoka me ke Akua, aole ia i make; no kamea, na ke Akua ia i lawe aku." Kin. 5:24.
Mele—Him. 378, 8 Leo.
1
Aole wahi paa maanei,
Nolaila ko ke ao uwe;
U ole nae ka mea maikai,
He maha kona maluna'e.
4
Aole wahi paa maanei;
E imi i kauhale e,
Ziona ia, Iesu ke Lii,
Kauhale ao, a mau loa'e.
Pule i launa pu kakou me ke Akua, a noho makaukau no ka lani.
Na Ninau a na Kumu.
Ma kela pule, ua ikeia ka make ana o Nabota ma ka waha o na hoike wahahee elua, a lawe Ahaba i kona malawaina nona iho. Ia ia e komo ana iloko o ia mala, halawai pu Elia me ia ma ke kauoha a ke Akua, a hai aku i keia mau olelo weliweli, 21:19. A pane aku Ahaba, a pane mai Elia pehea? Pauku 20—24. Ma ka mihi ana o Ahaba, pehea ka olelo ahonui a ke Akua ia ia? Pauku 27—29. Ke kaua nona na hana i make ai Ahaba. Mok. 22. No keaha keia kaua? me wai hoi? Owai ka i ae e kokua ia Ahaba P. 1—4. Owai na kaula ma ko Ahaba aoao? Owai ke kaula ma ko Iehosapata aoao? p 5—9. Pehea ka wanana ana a na kaula wahahee? p 6, 11, 12. Pehea ke kaula o Iehova? p. 19—23. Owai ka aoao i lanakila? p 34—38. Make Ahaba, owai kona pani? p 40. Pehea ka loihi o kona alii ana? I Na Lii 16:29. Ke ano, &c o Ahazia p 51—53.
2 Na Lii I; Ke kipi ana o ka Moaba, ka haule ana o Ahazia, ka hoopii ana i ke akua wahahee, ka olelo ana a Elia no ka make ana o Ahazia, ka huhu ana o ke alii a kiiia'ku o Elia, ka make ana o na kanalima elua i ke ahi ma ke kauoha a Elia, a pakele ke kolu o na kanalima, ka make ana o Ahazia, a lilo Iehorama i pani nona. E heluhelu na haumana i keia mokuna a pau.
Mok. 2. p. 1 Heaha ka mea i kokoke? a hele pu Elia me wai? maihea aku? Aia Gilegala ma ka akau aku o Betela. Ilaila kekahi kula kaula.
P 2. Noi aku Elia ia Elisai e aha? A pehea ko Elisai pane ana? Aaha laua?
P 3. Owai ka i hele mai a hui me Elisai? A ninau lakou ia ia, ua aha oia? A pane oia pehea?
P 4. Aha Elia ia Elisai? a pane oia pehea? a aha pu?
P 5. Heaha ka ninau a keia poe kaula hou ia Elisai? A pane oia pehea? He kula kaula hoi ma Ieriko.
P 6. Noi hou Elia ia Elisai e aha? A pane oia pehea? A aha iho la laua?
P 7. Owai ka i hele a ku ma kahi loihi aku? No keaha? nohea lakou? A ku Elia me Elisai mahea? ua hele keia poe he 50 ma kahi kiekie e ike i ke hookaawale ia'na o Elia mai Elisai aku.
P 8. Heaha ka Elia i hana'i me kona aahu? Ua like ia me ke aha a Mose i hana'i me kona kookoo? Puk. 15:21. Pehea hoi ka wai o Ioredane? Ua hanaia anei pela mamua? Iosua 3:16. A hele pehea laua a elua?
P 9. Heaha ka Elia i olelo maikai aku ai ia Elisai? a pane mai oia pehea? Heaha ke ano o keia noi? Noi Elisai e hoohalikeia oia me Elia i mahuahua ka mana, na hana mana, hana maikai. E haawi nui mai oe i kou mana, kou ano maikai ia'u.
P 10. A pane mai Elia pehea? E ko ana anei ka Elia olelo?
P 11. I ko laua hele pu ana heaha ka i ikeia? a ma ke aha i laweia'ku ai Elia iluna?
P 12. Heaha ka Elisai olelo? I ke hou anei oia ia Elia? I ka manawa hea i ike hou ia'i Elia ma ka honua nei? Ma ke aha i hoike ai Elisai i kona kaumaha? Owai ka i pii make ole aku i ka lani mamua? Owai ka i make a ala hou a pii ola aku i ka lani mahope?
Mele—Him. 363 8—6. Leo.
1
Ua olioli kuu naau,
E ake e hele e,
E imi au i hale mau
No kuu uhane nei.
3
E pii e noho pomaikai
Maluna ma ke ao;
Malaila wau la e maha'i,
Ma ke alo o Iesu.
Na Ninau a ke Kahu.
Na makua. Ma ke aha i loaa'i ka mala waina o Nabota ia Ahaba? Heaha ka Elia olelo hooweliweli ia Ahaba? Ua mihi anei Ahaba? Mihi pono anei ? Ehia makahiki i hala a make Ahaba, a aha na ilio i kona koko ? Ko anei ka wanana a Elia ? Owai ke pani o Ahaba ? He al i aha oAhazia? Ia ia e mai ana heaha ka hana kupanaha a Elia i hana'i i ka poe i kii aku ia ia? A make Ahazia, owai kona pani hakahaka?
Na keiki. Hai mai i na alii o ka Iseraela mai Iereboama mai, 1 Iereboama, 2 Nadaba, 3 Baasa, 4 Ela, 5 Zimeri 6 Omeri, 7 Ahaba, Ahasia, 8 Iorama. Owai Baalazebuba? Ke akua o na nalo, he akua kii no Ekerona ma Pilesitia. Owai ia ma ke Kauoha Hou? ka Diabalo. Owai ke lii i hoopii ia ia no kona mai? Ahazia. Make Ahazia alii Iorama, ua ahaia Elia? Owai ka i ike i ko El a pii ana'ku i ka lani? maloko o ke aha kona pii ana'ku? Kupanaha ea?
Ke kula a pau. Ehia hoonoho ana o Elia ia Elisai? Ua ae anei Elisai e noho? no ke aha ka ae ole? Ehia kula kaula? mahea? mahea? Nui anei na haumana? Heaha ke noi maikai o Elisai? Heaha ke noi maikai o Solomona? Owai na haumana elua i noi ia Iesu i kekahi mea pono ole? Owai hoi ka i makemake e noi aku i haule mai ke ahi e hoopau i kekahi poe, a hoahewaia?
Mele.—Him. 369. Pii i ka mauna ia Pirega. 2 pauku.
Pule i makaukau e pii a noho pu me Elia.
Haawina no Mar. 18. 2 Na Lii 2:13—25