Ka Lahui Hawaii, Volume III, Number 14, 5 April 1877 — Page 3

Page PDF (1.26 MB)

NA ANOAI.

          E holo kaapuni ana ke Kilauea ia Hawaii i keia Poakahi ae.

          Ua manaoia e ku mai ana ka mokumahu Australia i keia la mai Kapalakiko mai.

          Maloko o keia pule e holo aku ai ke Kakauleta o ka Papa Hawaii no ka mokupuni o lalo.

          I keia ahiahi Poaono ae ka manawa e halawai ai ka Ahahui Poola. Nolaila, ua makemakeia na hoa a pau a me ke koena e akoakoa mai i ka hora 6 me ka hapa.  WM. K. AWIHI.
Kakauolelo.

          Ma ka Poakahi nei i au hou aku ai ke Kilauea ma kana huakai mau no na ale kuehuehu o na awa ma ka hikina, mahope iho o ka loaa ana iaia o kekahi mau pahonohono hou ia ana iho nei o kona wahi aahu.

          Ua ike iho makou maloko o ka nupepa Hoa'loha o keia mahina i ke kii o ke Kia Hoomanao o Kapena Kuke ma Kaawaloa. Ua kahaia keia kii e ka lima mikioi Hawaii, oia hoi o James Auld, iluna o ka laau e paiia no ma Honolulu nei.

          Ma ka Poaha i hala iho nei i hooko ia'i ka manele hope loaia ana o ke kino make o ke 'Lii C. Kanaina a waiho ma ka Hale Ilina o ka Moi Lunalilo ma Kawaiahao. Ua ukaliia ka huakai e ke kaoo loihi e like me ka hoonohonoho ana a ka papa kuhikuhi.

          Ua loaa mai ia makou ka palapala a Piko o Honolulu nei, e hookuu ana iaia mai ka noho lala ana no ka Hui Poola, no ke kumu ua kapae na lala i kekahi rula maa mau mawaena o lakou no na kino make. E paiia ia palapala ke loaa ka wa pono.

          O kela mau puaa eleele elua ma kahi o Lemona ma Kalihi i hoolaha ia'i ma ka pepa o ka la 15 o Maraki i hala, o ka pololei, hookahi puaa eleele a hookahi puaa kikokiko. E hele ae me ia ka mea puaa e kukakuka ai i keia mau la, mai poina o hala ka wa pono, a lilo loa.

          Ua loaa mai la he lono mai na makamaka o ka makani apaapaa o Kawaihae, e pili ana no ka make ana o Hon. George Washington Delaware Halemanu, kekahi hoa o ka Ahaolelo o ka 1876. O ka ekolu keia o na Lunamakaainana i halulu aku la.

          Ua manaoia, ma keia Poaono iho e ku mai ai ka "Hekuawa Base Ball Club" mai Wailuku mai maluna o ke Kilauea. O keia no ka Hui Kinipopo i kali loihi ia iho nei, a akahi no a hoea mai; pela na lono i lohe ia mai ma keia ku ana mai nei a Moi.

Ma ka Poakahi nei i ku mai ai kekahi kuna uuku ma ka inoa Kekauluohi mai Kapalakiko mai, no ka Hui o Alani me Robisana keia wahi moku, he wahi waa pailata oia, ua like ka nui me Moi Keiki, a ua manaoia e holo mau ana oia mawaena o Honolulu me Kahului.

          Ma keia mau la iho nei, ua haawi ae ka Ona o ka mahi raiki o Waiono, Punaluu, maloko o kana olelo hoolaha pili kulanakauhale i makana kiekie, $400.00, e haawi i ka mea nana e hoike mai ka poe nana i ho-a kela ahi mauele nana i moni iho ka hale wili raiki a me na mea a pau.

          I keia mau la e kunewa nei, ke ike maopopo ia'ku nei, he oi paha keia a ka Makalii la wela nui wale. No ka mea, iloko no o keia mau la pokole ke nana'ku, ua hele a
          "Moa unounoo Puna i ke akuawahine,
          Moa makali ka ohia o Moeawakea,
          Lohi mai ka papa ale ka pahoehoe."

          Ma na la o ka pule i hala ae nei, ua pau i ke ahi ka hale wili raiki ma Waiono, Punaluu, Oahu, a me ka hale wiliko o Keaahala, Koolau ae nei. He mau poino ulia wale keia. Aka, ua ili iho la nae maluna o na hokua o na Ona nona ia mau waiwai ka haawi luuluu o ka minamina, no ke poho wale o na luhi no kela moewaa i moeuhane ole ia.

          Ma ka Poakahi nei ka noho ana o ka Aha Hookolokolo Kiekie ma Aliiolani Hale ma Honolulu. O kekahi hihia i laweia mai imua o ka Aha ma ia la, oia ka hihia o ke 'lii kue ia Kumukahi (makai mamua), no ke apuka wahi a ka palapala hoopii. Hookuuia. Ka Loio Kuhina no ke aupuni, a o J. K. Unauna no ke pale.

          He nui wale na makua a me na keiki e kipa mau mai nei ma ko makou keena, me ka ninau mai i na Kumumua no ka lakou mau keiki. Ua hemahema ka Papa Hoonaauao i keia wa no ka nele. O ke keena paha o ka Papa Hawaii kai makaukau no kekahi ano Kumumua ina e pahola ia mai ana ke noi no keia wa nele o na kula, e aho ia, mamua o ko ke keiki hele ana'ku i ke kula, a o na manamanalima a me ka papa laau o na noho ka buke.

          E nana'e e na makamaka i ka hoolaha a ka Hawaii Ponoi imihana pomaikai, oia o John Malii. E kipa ae, a a e kokua ia kakou, oia hoi ka ike ana o Hawaii ia Hawaii hooikaika.

          I na po mahina aku nei i hala, ua menemene makou i na olelo pelapela a kela makuahine i pane ai i kekahi wahi keiki mawaho iho o na alanui Hotele a me Rikeke.

          O ke kumumanao e pili ana i ka "Ka lua Gula a lua Dala o Hawaii nei," ua hookauluaia a keia pule ae, a pela me na manao e ae o na makamaka, ua kupalaka hou kakou, i ka nui o na manao.

          Ua ike iho makou i ka hana mikioi ia ana o ke pai a me ka humu ia ana o ka buke hoike a ka Luna Dute Awa o kakou, ma ko makou Halepai wale no i hana ia'i ia mau mea, he keu ka maalahi, holo ka hana.

          Ma ka la 9 o Maraki i hala aku nei, ma Honolua, Kaanapali, Maui, ua pau i ke ahi ka hale pili o Nawahine w., oiai oia e noho ana ma Lahaina. O ke kumu i pau ai, ua loaa kekahi ahikoe i kekahi moopuna ana, a ua hele a mawaho ho-a, e ole e ike e ia, ina ua pau loa i ka a ia. Aohe i nui na poino o keia hale, mamuli o ka nui kokua ia. E malama, a mai waiho hemahema i na ahikoe, o nui ka pilikia.

          Ma ke ahiahi o ka la Sabati iho nei, Apr. 1, ma Kapalama-uka, Honolulu, ua hanau mai o Kaaiohia, he keikikane na Kaolulo k. me Kapoula w. O ka 17 ia o ka laua mau keiki, he 10 keikikane a 7 kaikamahine. Mailoko mai o keia heluna, ua make 3 keikikane a me 1 kaikamahine, a he 13 i koe e ola nei. Ua hiki hoi paha, o ka makemake ka hoi ia o ko kakou Moi ka ulu o kona lahui ma o kakou la.

Moolelo o ka Ahahui Euanelio o Hawaii Akau.

Halawai ka Ahahui Euanelio o Hawaii Akau ma Iole, Kohala Akau, Hawaii, ma ka la 7, 8 o Maraki, makahiki 1877, e like me ka hoopanee ana o ka halawai ma Eleio, Hamakua, ma ka malama o Sept., makahiki 1876. Ka Lunahoomalu mua ma ka noho. Hoomaka ia na hana me ka himeni a me ka pule a ka Lunahoomalu.
Hoomaopopoia na lala o ka aha i hiki mai, eia na Kahu a me na Elele.
Ekalei sa  Kahu  Elele
Hamakua H.  Rev. S. Kaaua  Waiohinu
" W.  " J. Bikanele  Kamalimali
" K.  " " "  W. A. Mio
Waimea   ———  D. Waiamau
Kohala H.  " S. Aiwohi  D. Kilakau
" K.  " S. C. Luhiau  Kekuewa
" A.  " E. Bond  Z. Kalai
Kohoia na Luna o ka aha ma ka balota ana. Kohoia o Z. Kalai i Lunahoomalu, a o S. Aiwohi i Kakauolelo.
Kohoia hoi o S. Kaaua, E. Bond a me W. A. Mio i Komite Imihana, a o J. Bikanele, Waiohinu a me D. Kilakau i Komite Imihaawina.
Malama ka aha i ka hapalua hora haipule.
Hoike mai ke Komite Imihana i na hana o ka aha penei:
1 Hapalua hora haipule.
2 Hoike o na Ekalesia.
3 Heluhelu Haawina.
4 Palapala Hoopii.
5 Kula Kaikamahine.
6 Na Kula Sabati.
7 Ke aupuni o ke Akua ma Hawaii nei ma neia hope aku.
8 No ka Papa Hawaii, kona nele i ka mea e holo ai kana Oihana Kuwaho a Kuloko.
9 Na Elele no ka Ahahui nui ma Honolulu.
10 Na mea nana e hoike i ko keia aha a me na ekalesia i ka halawai nui ma Honolulu.
11 Kahi e halawai hou aku ai keia aha.
Hapai ka aha i ke kumuhana 2, "ka hoike o na Ekalesia."
Hoike mai o S. Kaaua no ka ekalesia o Hamakua Hikina.
Hoike mai o J. Bikanele no ka ekalesia o Hamakua Waena a me Hamakua Komohana.
Hoike mai ke Kakauolelo no ka ekalesia o Waimea.
Hoike mai o S. Aiwohi no ka ekalesia o Kohala Hema.
Hoike mai o S. C. Luhiau no ka ekalesia o Kohala Komohana.
Hoike mai o E. Bond no ka ekalesia o Kohala Akau.
Kumuhana 3, "heluhelu haawina."
Heluhelu mai o J. Bikanele i kona haawina, ma 2 Timoteo 4:2.
Heluhelu mai o S. C. Luhiau i kona haawina. "He like anei ka mihi Euanelio me ka mihi kanawai?"
Heluhelu mai ke Kakauolelo i ka haawina a Rev. L. Lyons ma Roma 16:17, 18. Hooholo ka aha e paiia ma ka nupepa LAHUI HAWAII keia haawina.
Heluhelu mai o S. Aiwohi i kona haawina ma Hoikeana 1:7.
Heluhelu mai o E. Bond i kona haawina. "Ke ano o ka Oihana a Levi a
me na mohai." Hooholo ka aha e paiia keia haawina ma ka nupepa LAHUI HAWAII.
Kukakuka ka aha no ke kumuhana 5 "no ke Kula Kaikamahine."
Hoike nui mai o E. Bond a me J. Bikanele no na mea e pili ana i keia kula.
Koho ka hale ia J. Bikanele, S. Kaaua, E. Bond, W. A. Mio a me D. Waiamau i Komite e noonoo no keia Kula Kaikamahine.
Nonoi mal o J. Bikanele i ka aha e lilo o S. Aiwohi i mea nana e noi aku i na ekalesia ma ka mokupuni o Hawaii, i kokua ole mai i dala i ola ai keia kula. Hooholoia.
Ma keia wahi, e ike mai na ekale sia aole i kokua mai i kela Kula Kaikamahine, e kokua koke mai i ola ai keia kula o kakou e na ekalesia ma ka mokupuni o Hawaii, a he pono loa hoi i na Ahahui ekolu o ka mokupuni Hawaii e ala like mai a paipai ikaika i ko lakou mau ekalesia.
Kumuhana 6, "na Kula Sabati." Na na Kahu me na Elele i hoike mai i ko lakou mau kula Sabati. Ua mau a holo no ia hana.
Kumuhana 7, "ke aupuni o ke Akua ma Hawaii nei ma neia hope aku." Ua kuka a ua kamailio nui ia keia mea.
Kumuhana 8, "kahi e halawai hou aku ai keia aha." Kuka ka aha i keia, a hooholo penei: Aia a hoopanee keia aha, e halawai hou oia ma Waipio ma ka Poakolu mua o Sepatemaba, M. H. 1877.
Kumuhana 9, "ka Papa Hawaii, kona nele i ka mea ole e holo ai kana Oihana Kuwaho a Kuloko."
Wehewehe nui mai o E. Bond, J. Bikanele a me kekahi poe e ae i keia. He nui na kane i makemake i keia oihana, aka, o na wahine ka mea makemake ole a kanalua.
Kumuhana 10, "i mau Elele i ka Ahahui nui ma Honolulu i ka malama o Iune."
Koho ka aha ia W. A. Mio a me William Kapaona, a o Waiohinu a me J. W. Kamaka ko laua mau hope.
Hooholoia.—E lilo o Waiohinu i mea nana e hoike imua o ka Ahahui nui na Honolulu no ka Aha Euanelio o Hawaii Akau, a o J. Bikanele no na ekalesia.
Noi mai o E. Bond e hoomaha ka aha apopo hora 10. Hooholoia.
Poaha, la hana elua, maraki 8.
Halawai hou ka aha e like me ka hoopanee ana, malama ka aha i ka hapalua hora haipule.
Heluheluia ka moolelo o ka aha a aponoia.
Kuka iho la ka aha no ke kahu o ka ekalesia o Kohala Hema, no kona haalele ka i kona kihapai, aole nae i haalele ke kahu. Hooholo iho la ka aha e hoi hou ke kahu e noho pu me ka ekalesia.
Hoike mai ke Komite i kohoia e noonoo no ke Kula Kaikamahine.
Noonoo ka aha i keia hoike a ke Komi te.
Ua maopopo, ua haiki ka hale Kula Kaikamahine e noho nei, a hiki ole i kekahi mau haumana e aku ke komo mai, nolaila,
Hooholoia.—Ma neia hope aku, ina e ikeia he mea e pono ai keia kula, oia, i akea a lawa hoi ia no ka poe makemake e komo mai, e pono no i ka agena ke kukulu i wahi hale hou e pono ai, a na keia aha no e imi i na dala kupono i ko lakou hapa iloko o keia hana, ina nae he mea oluolu i na Ahahui elua e ae o keia mokupuni e ae like i keia manao.
Hoomaha ka aha a ka hora 1. Hoi hou mai ka aha ma ka hora 1 e like me ka hoopanee ana.
Hoomakaia na hana me ka himeni a me ka pule a Kamalimali.
Hoike mai ke Komite Imihaawina i na haawina no ka halawai hou aku, penei:
1 Ka Moolelo Kula Sabati.
Rev. L. Lyons.
2 Ka Ouli o ka Manawa e hele nei.
Rev. E. Bond.
3 Ua pau anei ka manao ka Olelo a ke Akua, i huli nui ole ai na kanaka i ka pono i keia manawa?
Rev. S. Kaaua.
4 E wehewehe ia Mataio 19:19.
Rev. S. C. Luhiau.
5 O ke aha ka Ekalesia?
Rev. S. Aiwohi.
6 E wehewehe ia 2 Koreneto 5:20.
Rev. J. Bikanele.
7 E wehewehe ia Mataio 11:11.
Z. Kalai.
8 Pono anei ke kapaeia ka hoahanau mai ka ekalesia aku, no ka hihia hoopa oleia ma ke kanawai? D. Waiamau.
Hoopaneeia ka halawai a halawai hou ma Waipio, Sept. 5, M. H. 1877.
Hoopauia ka halawai me ka himeni a me ka pule a W. A. Mio, a me ka pule hookuu a Rev. E. Bond.
S. AIWOHI. Kakauolelo.
Kohala Hema, H., Mar. 9, 1877.

O KUU MAKUA UA HALA.

E KA LAHUI HAWAII; Aloha oe:—
          Me ka manao i piha i ka walohia a'u e hai aku nei imua o ka lehulehu; no ka lawe ana aku o ke Akua kiekie loa ia Rev. B. W. Parker, ka Makua hoi o keia kino lepo, a me ka uhane pu.
          Ma ka la 23 o keia mahina i ka ho ra 9 A. M., ua kii mai la ka mea nana mai ka uhane ola, a ua lawe aku. Owau no ka mea i ike i kona wa i haalele iho ai i keia noho ana. He mea kaumaha ka ike ana iho i ka helehelena o ka mea nana i hoomomoa i ke aloha iloko o ka puuwai o keia kino. I ko'u nana ana aku i ka wahine, a me kana keiki, a me na kaikamahine, ua hele a haki-kaikoo ka manawa, nakulu oa ka pili paa a ka houpo, helelei hiolo ka pua o ka waimaka, me he makamaka 'la no ka ua o Hilo, ka hele no a kipa i Hanakahi, a kahi no la a ke aloha i hiki ai, hiki mai ana i o'u nei, hookahi no luahi a ke aloha o na waimaka. He oiaio, he 44 makahiki ana i noho ai ma Hawaii nei, ma Kaneohe ka hapanui o kona mau la, ua nui na uhane ana i hoohuli ai ma ke ola ma ia wahi, a ua noho loihi oia ma Honolulu nei no kekahi mau makahiki, a ua noho oia ma ke kula hoopololei ma Keoneula, ua nui ke aloha o ko laila mau haumana iaia, a iloko o keia mau makahiki i kaa hope aku nei, he Peresidena oia no ke kula kahunapule, ua nui ke aloha o na haumana nona e noho nei.
          Iaia ma Kaneohe, he eha ana mau haumana e noho Kahunapule nei, elua i ko na aina e, a elua i Hawaii nei. O Rev. J. N. Paikuli o Waikane, o Rev. S. Waiwaiole o Waimanalo, Rev. B. W. Kapu, Rev. R. Maka i Maikonisia, aole o lakou wale no kana i hoohuli ai ma ia wahi, aka, o na uhane he lehulehu a pau o Honolulu nei, noho oia he Peresidena no ke Kula Kahunapule.
          Ke lawelawe mai nei ka hapanui o kona mau haumana ma na kihapai, o S. W. Makaike, no Kona-waena, S. Puuohau, no Pukaana, Rev. J. N. Kamoku, no ka paia ala i ka hala o Puna, S. K. Kauwe, no Honuaula, P. Keaupuni, no Olowalu i Maui, Rev. S. Paulo, i Halawa, Molokai, R. Puiki, i Waioli i Kauai, .J. W. P. Kahalewai, i Waianae, J. S. Kalana, no Ewa, a hookahi haumana i ko na aina e, o S. W. Kekuewa, ma ka Pae Aina o Makala, o ka mea hoi e kakau nei, malalo ia o kana keiki e lawelawe nei Rev. H. H. Parker o Kawaiahao, aole o lakou wale no, aka, o keia mau haumana o ke kula e noho nei, no lakou keia mau inoa, S. P. K. Nawaa o ka lai o Ehu, S. Anapu o na wai eha, S. U. Kapahi o ka moku koolau o Hina, D. K. Pa o Puna kai nehe i ka uluhala, E. S. Timoteo a me D. W. Kaawa o ka makani apaapaa, pua ilima nenee i ke kula manienie o Kohala, ka aina haaheo o o'u mau kupuna, aole o keia poe wale no, aka, o ka lehulehu a pau i lohe i kana mau haiolelo ma Kawaiahao a me Kaumakapili.
          He nui ko'u aloha nona e noho nei, aole owau wale, aka, o na haumana o ke kula pu kekahi, ua moe oia ma kahi moe, olelo ae oia i kana keiki, me keia mau huaolelo, "Iloko o Iesu ke ola."
          He nui kona aloha i keia lahui kanaka, ua nui kana poe i ao ai, a i hoohuli ai hoi. Pela ma Sol. 11:30. hapa hope, "O ka mea hoohuli i na uhane, oia ke akamai." Kona ake nei e kukulu i na kanaka Hawaii iluna, aole ona makemake e hoohiolo i ke kulana o na kanaka Hawaii. Ua nui ko'u aloha ma ka haiolelo ana a kana keiki, "mai hookuli i ke ao a na kumu," he oiaio, o ke ano mau o na kanaka Hawaii, aia a momona hoomaka mai no e keehi, eia ka'u, e hoolohe i ka leo o na kumu, ina ua elemakule, mai pakike, mai hoowahawaha i ke ao ana a na makua, mai hoala i na manao paio, mai imi hala wale me ka manao huhu, o loaa auanei kakou e paio ana me ke Akua.
          Aole he kumu elike me kona ano, he oluolu, he akahai ma na mea a pau, o na haumana ka hoike no keia. Ua komo mai au i ke kula ma ka la 22 o Dek. 1873. Ua noho hana au me ia no ka hapalua makahiki, aole oia haawi ia'u i ke koena o na mea ai, aka, i na mea hou wale no, he haawi i ke kapa me ke aloha pu, he aloha i ke kanaka, o ka eha keia o na makahiki o'u o ka noho ana malalo o kana ao ana.
          Hele aku nei kana keiki i Bosetona, noho iho nei maua, pilikia au i kekahi mau hooponopono ana o ka ekalesia, holo aku i ona la kuhikuhi mai kela i ke alanui e hiki ai, me neia, a me keia, ua pau ia pilikia, o kana olelo mau ia'u, "e hoomanawanui oe i ka hana a ka Haku, ina oe e lawe i keia hana, e halawai ana oe me na hookuina he lehulehu; o ka hoomanawanui ka mea e pono ai." He oiaio ia olelo ana, o keia mau olelo a nui aku ana, aole e pau ke hai aku. Owai la ke keiki i aloha ole i ka hana a kona makua elike me keia? Aole. Kupanaha ke ano kanaka elike me keia ke ao ana, a ku mai a keehi iho i kona mea nana i ao. "Pomaikai ka poe make, ke make iloko o ka Haku," Hoik. 14.:13. Ua kii mai ka makua, ua pau kana hana ma keia honua; ua lana ka manao o ka poe haipule, e komo no i kela ao. Elike me ka Paulo, "Ina i wawahi ia ko makou hale kino lepo, o ka halelewa, e loaa auanei ia makou ka hale na ke Akua, he hale hana ole ia e na lima, ua mau loa iloko o ka lani." II Kor. 5:1. Nolaila, maluna o kana wahine, a me kana mau keiki ke aloha, a na ke Akua e malama ia lakou.  J. K. JOSEPH.
Kawaiahao, Ma r. 31, 1877.

          Ma ke ahiahi Poakahi nei, ua hooili ia'ku maluna o ke kuna Kamaile ke kino kupapau o Kiliona Kauai, ke keiki a J. Kauai o Waimea, Kauai. Ua make ua keiki la ma Kapalama ae nei, mahope o ke kaa mai ana.

JOHN MALII.
(KEONI MALII.)
MEA HANA LAKO TINI a hana PAIPU WAI.

Alanui Beritania, mawaena o ka luakini Kaumakapili a me Alanui Nuuanu. O na ano hana a pau i waiho ia'ku iaia e hana koke ia no. E hana hou ia no na Paipu Wai, a e hoopau ia na pilikia. E hanaia no na Pahu Kupapau Piula me ka noeau.  14  1t.

OLELO HOOLAHA.

UA KAPU loa ka hele wale ana o na holoholona a pau maluna o ka lihi o MAULUKIKEPA maloko o ka pa pohaku o Kuilei a me Maulukikepa, ma Kamoiliili, Oahu. Ua lilo loa ia'u ia wahi malalo o ka ke aupuni hoolilo ana me ke keakea ole ia. E hoolohe na mea a pau i keia, o hoopii ia e a'u. Koe nae na wahi i kuai ia aku.
14   2t  K. KAMAKAUILA.
Kamoiliili, Mar. 30, 1877.

NUHOU MAIKAI!
UA LOAA MAI
ENELANI, FARANI A ME AMERIKA MAI!

He nui wale na mea nani e hoohihi ai ka manao.
E LAA NA
Noho Berekane, Noho Mareka, Noho Italia, a me na lako a pau e pili ana i na Noho Paniolo.
NA TINI AILA MAHU!
Na Aila Pena a me na Pena o na ano a pau.
Ma wahi waiho mea ai, e like me na Pa, Pola, Pakeke Poi, Pola Poi, a me na laau o na ano a pau.
Na mea Mahiai,
Na Oo, na Koi, na Kui o na ano a pau.
NA KAULA HE NUI WALE KE ANO.
NA HAO O KELA A ME KEIA ANO HE NUI WALE.
Kuaina, Kuaina Upena, Na Upena, a me na ano Kuaina he makena wale.
Na Makau Lawaia o kela a me keia ano.
NA PU KAUPOOHIWI NANI A MAIKAI, Ka Pauda, Lu, Kukaepele-pu.
NA AHI-KOE o na ano LEHULEHU
Na Lole o na ano a pau,
EMI KE KUIKE.
Ahina Belekane o na ano a pau, na Kalakoa Lilina, na lole e ae he nui, na Alapia, Pahoehoe, a me na mea Silika o na ano he nui, pau ole ke helu aku, na Palule, Kuka, Puliki, Lolewawae, na Kamaa kane, wahine a me keiki, Na Wai hoope kino e moani ai, na Waiala kela loa o ke ala huihui he nui wale ke ano. Na Bakeke laau a hao, Na Kapu o na ano he nui. Na Paakai hoohu maikai, a me na mea he nui e hiki ai ke kaana maikai ia. E kipa mai a luana ma kahi o Walakahauki ma ka Uapo.
J. T. WATERHOUSE.
Honolulu, Mar. 20, 1877.  [12  3ms.]

KUMUKUAI HAAHAA LOA!
KE AU O KA MANAWA KUPONO!

Ke hai aku nei o Messrs. Grrunwald a me Schutte i ka lono imua o ka lehulehu.
E waiho akea ia'ku ana no ke kuai, na Pono Waiwai Aahu o na ano a pau a laua, i pakele mai ke ahi o ke Sabati iho nei.
E hoomaka ana mai, a mahope aku o
KEIA POAONO AE, MARAKI 24.
Ma ka hale i noho ia iho nei e Mr. McCorriston, Alanui Papu, elua puka mauka o ka hale kauka o Ailuene Strehz. O ka hapanui oia mau no ka maikai, aka, e kuai ia'ku ana ma ke ano waiwai poino.
NO KE KUMUKUAI I HOEMI LOA IA.
A e haawi ana hoi he manawa maikai no ka loaa ana.
O NA MEA MAKEPONO LOA!
(799 4t 802)  12   4t

HE PAPA KUHIKUHI MANAWA HOLO
O KA
Mokuahi Hawaii
KILAUEA!
KAPENA MARCHANT!

Ape rila 9—Poakahi, 5 p. m. . . . . . Kaapuni ia Hawaii
Ape rila 16—Poakahi, 5 p. m. . . . . . Kawaihae
Ku ana ma Honolulu i ke ahiahi Poaha.
Ape rila 20—Poalima, 5 p. m. . . . . . Nawiliwili
Ku ana ma Honolulu i ke kakahiaka la Sabati.
Ape rila 24—Poakahi, 5 p. m. . . . . . Hilo
Ape rila 30—Poakahi, 5 p. m. . . . . . Kaapuni ia Hawaii.
Mei 7—Poakahi, 5 p. m. . . . . . Hilo
Mei 14—Poakahi, 5 p. m. . . . . . Kona
Mei 21—Poakahi, 5 p. m. . . . . . Hilo
Iune 1—Poalima, 5 p. m. . . . . . Nawiliwili
Ku ana ma Honolulu i ke kakahiaka la Sabati.
Iune 4—Poakahi, 5 p. m. . . . . . Kaapuni ia Hawaii
Iune 11—Poakahi, 5 p. m. . . . . . Hilo
Iune 18—Poakahi, 5 p. m. . . . . . Kona
Iune 25—Poakahi, 5 p. m. . . . . . Hilo
I KA HOLO ANA MA KONA, O HOOPULOA KA PALENA.
Ma na huakai a pau a Kilauea e hoi mai ai mai Hawaii mai, aole e haalele ana ia Kawaihae a hiki i ka hora 10, a mahope iho paha; Makena, e like me ka mea i hoolaha wahaia; Maalaea a hiki i ka hora 7 a. m. a mahope iho.
Uku Eemoku mai Honolulu aku.
A hiki i Kaunakakai pela maluna mai . . . . . $5.00
" Lahaina, " " . . . . . 6.00
" Maalaea, " " . . . . . 7.00
" Makena, " " . . . . . 8.00
" Mahukona, " " . . . . . 10.00
" Kawaihae, " " . . . . . 10.00
" Kailua, " " . . . . . 10.00
" Kaawaloa, " " . . . . . 10.00
" Hilo, " " . . . . . 12.50
" Kau, " " . . . . . 15.50
Uku kaapuni ia Hawaii . . . . . 22.00
A hiki i na awa o Kauai . . . . . 8.00
Uku kaapuni ia Kauai, . . . . . 12.00
Uku ohua Hawaii oneki, . . . . . 2.00
Aole aie no na uku ohua.
Ma ka Hale Oihana e loaa'i na palapala.
Aole keena o hope e lilo, aia wale no a kaa mua mai ka uku moku. Aole e ili ka hewa no na paiki, ukana a puolo paha, ke ole e kakauia ka loaa ana mai.
E hookaaia ka uku ukana i ka wa e noiia aku ai.
SAMUEL G. WILDER (Waila,)
A gena.
Keena ma ka Hale Kuai Papa o Waila ma, kihi o Alanui Papu a me Moiwahine.  14  3ms.

OLELO HOOLAHA.

OWAU o ka mea nona ka inoa malalo iho nei, ke hai aku nei au ma ke akea, ua loaa ia'u kekahi wahi eke dala, ekolu dala ($3.00) maloko a me kekahi mea e iho, a o ka mea nona keia mau dala e kii koke mai, me ka uku pu mai i ko'u lilo no ka hoolaha ana.  J. W. IOSIA.
Kuloloia, Honolulu, Apr. 2, 1877.  14  1t*

PILI LAAU HALE

Ma kahi o Walakahauki e loaa ai na Pili Laau Hale makepono loa i keia manawa. Nolaila, e wiki mai oukou o pau e. A malaila no hoi e loaa ai na mea nani a pau loa, o na waihooluu like ole i keia mau la kuai manuahi.  14  1m.  J. T. WATERHOUSE.

CECIL BROWN,

Loio a he Kokua ma ke Kanawai
A HE AGENA NO KA HOOIAIO ANA I NA Palapala no ka mokupuni o Oahu.
Helu 8 Alanui Kaahumanu, Honolulu, H. P. A.
763   1y

WILLIAM R. CASTLE.
(Kakela Opio.)
LOIO!

MA NA ANO HANA PILI KANAWAI A pau, e lawelawe koke ia me ka hikiwawe. Na Palapala Sila a me na Palapala pili aina o na ano a pau, e hoomakaukau ia no.
Keena hana, ma ke kihi o Alanui Kaahumanu a me Kalepa, Honolulu.  (786 1y)  [51]

NO KE KUAI!
KE KUNA KEONIANA.

I makaukau me na mea a pau.
No ka hoomaopopo pono ana, e ninau ia  CHAS. LONG.
[8 3ms.]  (Kale Lona.)

OLELO HOOLAHA.

E ike auanei na kanaka a pau o kela a me keia ano, ke papa a ke hookapu loa ia aku nei lakou, aole e hele wale a komohewa maluna o kuu Aina o Maunawili, ma Kailua, Koolaupoko, Oahu. Koe wale no nae i ka poe e loaa aku ana ke kuleana mai kuu Luna aku. O na poe a pau e hoolohe ole ana i keia Olelo Hoolaha, ke loaa aku i kuu Luna maluna o ua Aina nei, e hoouku aku no ia Elua Dala no ka mea hookahi, a ina aole e uku mai, e hoopiiia no ma ke Kanawai. E lilo keia i Kanawai no ua Aina nei mai keia la 20 aku o Maraki, 1877.
12   4t.  (799 4ts 802)  MARIA A. BOYD.

OLELO HOOLAHA.

E ike auanei na kanaka a pau o kela a me keia ano, ke papa ia aku nei lakou a pau loa, aole e hookuu wale i ko lakou mau holoholona maloko o kuu Pa Aina ma Kaohao, Kailua, Koolaupoko, Oahu. A ina e loaa aku i kuu Luna kekahi holoholona a kekahi poe maloko o ua Pa Aina nei, e hoouku ia aku no $2 no ke poo hookahi, a ina aole e uku mai, e hoopaa ia ma ka Pa Aupuni.  MARIA A. BOYD.
Ma raki 20, 1877.  (799 4ts 802)  12 4t.

HOOLAHA LUNAHOOPONOPONO
WAIWAI KUIKAWA

AOLE E HOOKAA ia na bila aie o ka Mea Kiekie Charles Kanaina, aia wale no ma ke uai aku, me ka loaa mua o ke kauoha a me ka apono ana o ka mea nona ka inoa malalo iho; a aole aie i ka mea i oleloia e uku ia ia hai koe wale no ka mea nona ka inoa malalo, a hiki i ka wa a ka Aha e kauoha hou mai ai.
WILLIAM C. PARKE.
Lunahooponopono Waiwai Kuikawa o ka Mea Kiekie Charles Kanaina i make.  783 1m 801
Keena Ilamuku, Aliiolani Hale, Honolulu Mar. 14, 1877.

E IKE IA KAKOU HOOKANAKA!
E LULU LIMA ALOHA!!
ME KO OUKOU MAKAMAKA!!
L. ASEU.

UA HOI MAI NEI AU MAI KO'U KIEI ana aku nei i kuu Aina Kulaiwi. Ano, ke ku aku nei au me ka makaukau mau e lawelawe a e kuai makepono loa me oukou e na makamaka o ka Ua Kukalahale, i na Lole Nu Hou loa o kela a me keia ano, mai ko na Lede, Keonimana a me ko na Kamalei. I pau ai kuhihewa, e naue mai ma ko'u Halekuai, ma ke kihi ma Ewa o na Alanui Moi a me Nuuanu.  [8 6m.]

NU HOU! ANOAI HOU!
LOHE HOU!
WEHE HAMAMA HOOHIALAAI ANA.
HE MAU LOLE AAHU HOU AKAHI NO A WEHEIA!

O ka'u mau pono aahu, akahi no a hiki mai, mai Europa a me na mokuaina o ka Hema.
E hele mai hookahi, e hele mai a pau, a e ike a Kuai no ke Kumukuai Hookahi, e like me ko'u kuai ana'ku mai ka mea hana mai no ke dala kuike.
Na Lole Hou o na ano a pau, no na Iwa o ka aoao Palupalu.
Na Lole no na Lede, na Lole no na Kaikamahine, na Lole no na Kamalii.
Na Lole Kalakoa, a me na Ula Palani Hou Loa.
Na aahu no na Keonimana, na aahu no na Kanaka Ui Opio, na Kamaa Buti a me na Kamaa Haahaa na Papale a me na Papale Kapu.
E hele mai hookahi, e hele mai no a pau loa, ma kahi o
S. MAGNIN, ALANUI NUUANU.
E MALAMA A HOOMAU NO AU I KA'U RULA O EKOLU MAHINA.
Mai puni i ka pelo a ka poe malihini mawaena o kakou nei.
E hele  mai a pau loa a e ike mamua o ke kuai ana'ku ma kahi e.
S. MAGNIN, ALANUI NUUANU.
Kokoke i Alanui Moi, ma Waikiki o ka Hale pohaku kuai pa o na Borabora.  12  tf.

WIL DER & Co.,
(WAILA MA.)

AIA MA KE KIHI O
ALANUI PAPU me MOIWAHINE.
Ua hoolako mau ia me ke kuai ana aku i na
Papa me na Lako Kukulu Hale
O NA A PAU.
NA PANI PUKA!
PUKA ANIANI.
OLEPELEPE,
LAKA,
AMI LIILII,
AMI LOLOA.
PENA o na ano a pau,
AILA PENA,
VANIKI, &c.
Ma Balaki Pena me Puna,
Na Pepa Hale me na Lipine Pepa.
Aniani, Paakai, &c.
O na mea a pau maluna'e, e kuai makepono loa ia'ku no ke Dala Kuike.  [3—1y.]