Ka Lahui Hawaii, Volume III, Number 15, 12 April 1877 — Page 4
KA NUPEPA KA LAHUI HAWAII.
HONOLULU, APERILA 12, 1877.
KOMI TE HOOPONOPONO NO KEIA AOAO.
LAIKI MAKUA, MRS. KELA A. GILIMANA,
M RS. ELENA MAKALE, MRS. C. C. COLEMANA.
THE OLD OLD STORY.
1. Tell me the ole, old, story,
O f unseen things above;
O f Jesus and His glory,
O f Jesus and His love,
Tell me the story simple,
A s to a little child;
For I am weak and weary,
An d helpless, and defiled.
Cho. Tell me the old, old story,
Tell me the old, old story,
Tell me the old, old story,
O f Jesus and His love.
2. Tell me the story slowly,
That I may take it in —
That wonderful Redemption,
God's remedy for sin!
Tell me the story often,
For I forget so soon!
The "early dew" of morning
Thus passed away at noon!
Cho. Tell me the old, old story, etc.
3. Tell me the story softly,
Wi th earnest tones and grave;
Remember I'm the sinner
Whom Jesus came to save
Tell me the story always,
I f you would really be,
In any time of trouble,
A comforter to me
Cho. Tell me the old, old story, etc.
4 Tell me the same old story,
When you have cause to fear
That this world's empty glory
I s costing, me too dear.
Yes, and when that world's glory
I s dawning on my sould,
Tell me the old, old story, —
" Christ Jesus makes thee whole."
Cho. Tell me the old, old story, etc.
Mr. Moo dy.
Aia i keia kahunapule kaulana, oia o Mr. Moody, kekahi Baibala ana i lawe hele ai ma kana mau wahi a pau i hele ai no iwakalua makahiki i hala'e nei. Ua maka ia ma na aoao a pau me ka inika ulaula a me ka penikala. O ka mea maa loa ia iaia, aole e haule ka Baibala maloko o kona pakeke i kela a me keia manawa. I keia manawa, ke malama nei oia i na halawai haipule ma Bosetona me ka makemake nui ia a me ka mahalo ia, imua o na anaina nui he mau tausani.
Ka Manao Hewa.
O ka manao hewa, ua oi aku kona awahua a me ka ehaeha, mamua o ka eha a me ka weliweli o ke tiga a me ka liona ; no ka mea, he mea hiki wale no ia kakou ke hookaalo ae mai na holohoholona hihiu ae, aka, o ka manao ino, e loaa ana no kona kulana ma na wahi a pau. O ke kiaha i piha, aole loa e hiki ke hoonui hou ia'ku ka mea o loko, no ka mea, ua piha, ua haale, a ke hoao ia e hoonui hou aku, e hanini ana. E hoomau i ka hoopiha pono ana i kou poo a me kou puuwai me ka manao pono a me ka maikai, i loaa ole ai i kahi kaawale no ka manao hewa e komo aku ai.
Na Makua Hana Epa.
O kekahi mea minamina nui i ike mau ia mawaena o ka lahui Hawaii nei, oia no ka hana ia o na hana hoomanamana a kahuna hoopunipuni mawaena o na keiki opiopio. E hele ana keia poe ma o a maanei o ka aina, a e puni wale mai ana no kekahi poe, a i ka wa e hoomaka ai lakou i ka lakou mau hana epa, o na keiki pu no kekahi e noho pu, a e kokua ma na hana. E like me ka puni ana o na makua i keia mea, pela no na keiki, a e like hoi me ko lakou ulu ana'e a mahuahua ae ko lakou mau la o ka noho ana ma keia ano, pela no e mau ai keia mea iloko o lakou e ulu ai, a hiki i ke oo ana o ke kino, a e oo pu ana no me keia mau mea.
E kamailio mau ana na makua ma na mea lapuwale o keia ano, e hai ana i ka lakou mau keiki no na akua mano, na unihi pili, a pela wale aku, a o ke kanu ana no ia ia mau mea iloko o lakou. O keia kekahi o na anoano lapuwale loa, a ke kamailio nei makou no ka pomaikai o na makua, na keiki a me na mea no a pau, e hoopau i keia mau hana.
Ke noi nei makou i na makua, e ao aku i ka lakou mau keiki, a i na keiki hoi e hoomanao mau, "hookahi wale no Akua," a aole ona lua. Ua lawa no ke ao ia ana o Hawaii no keia mea, a me he mea la, "aole" hookahi o Hawaii nei e hoole mai ana i keia, aka, he mau kahaha nae ka hoomaopopo mau ana, he mea kaumaha ka ike ana aku, a he mea minamina hoi ka lohe mau, no na hana hoopunipuni a hoomanamana a kahuna Hawaii, a me ka hopena kaniuhu o ka poe puni mau ia mau mea.
Ia oukou e na keiki, na mamo opio o keia aupuni e kaukai aku nei no keia hope aku, o keia leo no oukou, o keia mau kalokalo ana aia mamuli o oukou, a e like me ke aloha makua a ke Akua "oiaio hookahi" i hoohua'i iloko o ko makou mau puuwai, pela makou e poloai aku nei, e kapae ae i na hana hoopunipuni a keia poe. E pani i ko oukou mau pepeiao, a e huli ae mai ke ala o ka poino a me ke pohopoho, a i ke ala o ka lanakila a me ka maalahi.
ALOHA KE KEIKI.
I kekahi la maikai ma ke kulanakauhale hanohano o ka pae moku Hawaii, oia hoi o Honolulu, i ka wa a ka omaka malamalama o ka la lilelile i kiei iho ana maluna o na puu hauliuli o Nuuanu, a pahola loa ae maluna o Puowaina, a hoike ia ka kani o keia wahi kulanakauhale nani a kamahao o ka Pakipika; oia ka manawa a kekahi wahi keiki Hawaii uuku i ala ae ai mai kona wahi moe, me ka hoihoi, a mahope iho o kona holoi ana i kona mau maka a me ka hoomaemae kupono ana, kii aku la ia i kana buke heluhelu, a hoomaka e hoopaanaau i na haawina no ke kula, a kana kumu hoi i haawi mai iaia no ia la.
Ua hauoli nui keia wahi keiki i ka hoomanao ae, he la kula ia, a ua ake nui e hoopaanaau i kana mau haawina; aka, ala mai la nae kona makuakane, a me ka leo kalakala a me na huaolelo kupono ole, kauoha mai la iaia e iho i kai o Ulakoheo, e kuai i pupu awa. Alawa ae la na maka o ke keiki iluna me he ia e pane ae ana, "ua papa mai ka'u kumu aole au e kuai ia mea, aole hoi e hoopa aku ko'u mau lima, a pehea la ko'u makuakane e manao nei e hana au i ka mea a ke kumu i ao mai ia'u mai hana?"
He kanaka puni awa kona makuakane, ua hele a pau kona kino i ka mahunaia, a inoino na helehelena, a no ke ano hoolohilohi o ua wahi keiki nei, ua lalau iho la ka makuakane i kekahi laau nui, a hahau mai la me ke kauoha mai e hele koke i awa nona. Ua makau ia i ka uhai i ka olelo ao a kana kumu, a ua makau hoi i na hana aloha ole a kona makuakane; a no ka nui o ka eha, i ka pepehi ia, nolalia hele 'ku la ia e kuai awa, e like me ke kauoha a kona makuakane.
E na makamaka, heaha la ka hopena o kela keiki ? Mai ia kakahiaka mai, ua hoomaka kona hoopa ana i ka awa, a i keia la, ua lilo oia i kanaka puni awa. O kona kino ua lilo he kauwa na ka hopena oia mea ino, a o kona noonoo ua huli mahope o na alakai ana a ia mea. O kana wahi loaa aole loa e koe ana, no ka mea, ua pau kona manaolana no na mea e ae a pau, koe ka awa. Ke loaa mai kahi loaa, o ka awa aku la no ka hopena, a nele ke kino i ka aahu, nele i ka home, a nele i ka ai. He mikiala oia i ka la o kona mau makahiki opiopio; ua ike ke kumukula i kona eleu ma ka imi naauao ana, a ua kau kona mau manaolana maluna ona no nona iho, no kona mau makua, a no ka lahui ; ua ike ia he alanui palahalaha ko keia keiki e ulu ae ai me ka naauao, a lilo i kanaka kaulana, hoopono, a i Kristiano oiaio, aka, o kona mau manaolana, ua hoolilo ia i mea ole e keia makuakane. Aloha wale keia keiki, a minamina ino ka hana a keia makua. Mai hoohalike kakou me ia; a e pono na keiki e hoomanao i keia wahi keiki, a hai aku i na makua ke makemake ia lakou e hele aku e kuai awa.
MAI KA MAKUAHINE MAI.
Aole i liuliu loa'e nei ka manawa i hala hope, ua kipa aku la au ma kekahi home Hawaii; a mamua o ko'u hehi ana 'ku ma ka lanai, aia hoi, ua halawai mai la ko'u mau oukaihu me kekahi ea pelapela, a ua ano hookuemi hope ia mai la au. He hale i lawa pono me na puka a me na puka aniani, a anoai paha ua hiki wale no ke hoolawaia me ka ea maalahi o ka punawai maemae hoola kino o ke Akua; aka, ua paniia na puka a me na puka aniani, e hoopiha pu ana hoi ia loko me ke ea kaumaha o ka pelapela. Mamua pono o ka ipuka, ua hoahuia na opala lepo; a e kuku koke ana no na kumulaau loloa ma ka ipuka, a pani aku la i ka malamalama o ka la, a kau aku aku la i na hiona anoano, me he la he ana. O ka ohana o ua hale nei, ua mai ia mamuli o keia mea, a aole laau nana e hoopau ia mau omaimai ke noho maloko o ka hale o ia ano. Aole no me "ka pule a me ka malie" e hoohoihoi ia'i na home o ia ano. O na home hauoli, aole e nele ana i na hana noha iho. Na ka makuakane o ka home e hoolana, aka, na ka makuahine e hoohauoli. Aole no i manaoia o na hale nui a nani, oia wale no na home, aole pela, aka, ina no he wahi hale uuku i malama mikioi ia me ka maemae, ma ke piha mau i ka ea maikai, he hiki ke hoopiha ia me ke ola maikai, ka noho'na maluhia a me ka hauoli. (Aole i pau.)
FIRST FOOTSTEPS
IN THE
WAY OF KNOWLEDGE.
E nana pu kakou i keia kii maikai! He makuahine me na kamalii ona: I wahi lakou. E nana ka maikai o kela wahi! Nani na pua, ma keia aoao, kela aoao. Owai kela wahine? O Mrs. Aloha, kona inoa. Maikai kona maka. Ke noho nei ma ka noho, me ka bebe. O Willie ka inoa o ke keiki uuku—No kona uwe, lawe kona makuahine iaia mawaho i oluolu, i ka nana na pua, ua loaa i ka noho malie. Nolaila kahea ka makuahine o Mele, laua me Keli, e hele mai; ua makemake oia e ao ia laua. Aia la! ke heluhelu nei oia noloko o kona buke. Nana na keiki alua i ka maka o ko laua makuahine, me he mea la, e ai ana i na manao puka ana mai.
Ua maa o Mrs Kealoha e ao i kona mau kamalii. Hoomaka oia i ke kakahiaka, i ka manawa e holoi ai ia lakou a komo kapa, a ao ia lakou me ka maemae o ke kino, a me ke waiho pono i ko lakou kapa. Kamailio oluolu a pau ia hana, a ma ke aloha i ka Makua Nui, a me ka pule iaia. A pela no a piha ka la. Waiwai loa kela kamalii i ka makuahine maikai!
E! Mrs. Aloha! Aole anei e luhi oe i keia ao mau ana i na kamalii ou? Hoolohe kakou iaia. "Aole! Pomaikai au i ka haawi ana mai o ke Akua i keia hana ia'u He hana oluolu! Olioli! Auhea anei ka olioli e like me ka ka makuahine e ao nei i kona mau kamalii?" "Aloha ino na makuahine hiki ole ke noho pu me na pokii ona, a alakai ia lakou ma ke Alanui o ka Pono. J. M. C.
No Christophur Columbus.
MAHELE V.
Ia oukou e o'u mau makamaka, ke hoike ia'ku nei keia mau mea e pili ana ia Dalumbus, aole ma ke ano he kaao lealea, aole! aka, he (history) moolelo. E ninau mau ana paha oukou i ke ano o ka huaolelo history. Oia no ka inoa o na buke e hai oiaio ana i na moolelo o na kanaka kaulana, a me na lahui o na au i hala aku. O kekahi mau history, he kahiko loa; he mau tausani makahiki ke kahiko. O ko Columbus au, aole i aui na makahiki eha haneri. Ma keia mau buke history, ua nui ka waiwai i loaa ia kakou, oiai, he mau kuhikuhi ana a he mau ao ana ma kekahi mau mea o ke ano noho'na o ka manawa kahiko.
Nolaila, e ukali kakou i keia poe huli aina. No ka loaa ole ana i na kanaka o Columbus ke alii nui ana i hoouna aku ai ia lakou e huli, ua holo aku la na moku no ka imi ana i ka mokupuni nui o ke gula, i Bohio. Ua hoao lakou e holo aku ma ke kukulu hikina, aka, ua pa mai la ka makani mamua me ka ikaika nolaila, ua ku na moku ma kahi e kokoke ana i kekahi awa kumoku nui, a kapa iho la ka Adimarala, o Prine's Port. Maanei kahi a Columbus i kakau ai maloko o kana buke hoomanao no na mea e pili ana i ka nani o ka hiona o ka aina. Ilaila no lakou i ke Sabati, a i ke kakahiaka Poakahi, ua holo mai la, e kau ana ka ihu i ka hikina, me ka inoino no nae o ka makani.
E hoomanao iho oukou, o Alonzo Pinzon ke kapena o ka Pinta; ua lohe nui loa oia no ke gula, a holo hookahi aku kona moku e imi ana a loaa ka mokupuni gula o Bohio. Ua kau aku o Columbus i na hoailona iaia e huli hoi mai, aka, ua paa kona manao i ke gula nona iho, a ua hoolohe ole mai la i ka makemake o Columbus. O ka Pinta ka moku oi o ka holo o na moku ekolu, a he mea makehewa ka ukali ana'ku mahope no ka hoihoi mai.
Koe iho la elua wale no moku malalo o ka Adimarala; a ua nui ka ino o ka moana, nolaila, ua manao iho la oia e hoi aku i Cuba. Aole no i kawa loa kona kaawale mai laila mai, aka, ike aku la nae ia he aina ma kona hikina hema, nolaila, ua holo aku la no laila. Loaa'ku la iaia he mokupuni nui a nani no hoi, ana i ike mua ole ai. O na laau a me na hiona o ka aina, ua like loa me Sepania, a no ia mea, ua kapa iho la ia i ka inoa o Hispaniola; nona hoi ka inoa e kapaia nei i keia manawa o Hayti. Malalo iki iho kona nui o Cuba, a he lehulehu na kanaka malaila, a ua mahi nui lakou i ka aina. Ua lele aku la o Columbus iuka, a lawe ae la i ka aina malalo o ka inoa o Sepania.
Hele aku la kekahi poe o na luina ma o a maanei o ka aina no ka makaikai ana, a ike aku la lakou i na kanaka o ka aina e holo ana a pee mai ia lakou aku me ke ano makau a kahaha; no ia mea, ua alualu aku la lakou, a paa aku la kekahi wahine opiopio, a lawe aku la lakou iaia imua o Columbus. Hookipa maikai mai la oia iaia me ka oluolu, makana aku la i na mea nani a maikai, a hookuu hou aku la e hoi iwaena o kona mau hoa lahui ponoi, i ukali ia'ku e kekahi mau Ilikini maheleolelo ekolu. Ua akamai, a maalea keia hana a Columbus; oiai, ua maopopo no iaia, e hoi aku ana keia wahine opio a hai aku imua o kona mau hoa i na hana i pahola ia'ku imua ona, a he kumu ia e hoopauia'i ko lakou makau, a e loaa'i hoi ka manao maikai mai ia lakou mai. I ka hiki ana iwaena o kamaaina o ka aina, hai aku la na Ilikina maheleolelo ia lakou, mai lakou mai o na ao o ka lewa keia poe haole ka iho ana mai, a e hele kaapuni ana i ka honua no ka haawi ana'ku i na makana nani i na kanaka.
I ko lakou lohe ana i keia mau mea, ua pau mai la lakou imua o na malihini he mau tausani: elua a oi ka huina, me ke kau ana i ko lakou mau lima maluna o na poo, o ka hoike ana mai hoi ia i ko lakou aloha a me ka manao makai i na malihini. Haawi mai la lakou i na poloai ana e hele aku i ko lakou mau wahi noho, a haawi mai la i na mea ai o na ano a pau i makemakeia. He poe maikai a oluolu lakou, a ua hoike mai i ka oluolu o ko lakou noho'na, me ke aloha i kahi a me kahi. Ua kapa lakou i ko lakou mau alii he Cociques.
Ke Alaula—Ko Iesu hai mua ana i kona make.
O na mea a pau i ike ole ia, a me na hiona o na mea e hoea mai ana, ua maopopo wale no ia Iesu, a ua ike no oia, aole i kawa loa ka manawa, a e make ana oia.
Ua hai mua aku ia i kana mau mea huna i kana mau haumana; a ua lawe aku ia lakou ma kahi mehameha, a pane aku la. "Aole i kawa loa ka manawa, a e haalele iho no au ia oukou; e lawe aku ana ka poe hewa ia'u, a e hauhoa me ke kaula; e hoeha mai ana ia'u, e henehene mai ana ia'u; a e makia aku ana ia'u maluna o ke kea; aka, e hoomanao oukou, aole e liuliu, e ola hou mai ana au."
Aole e hiki i na haumana ke hoomanawanui i ka hoolohe aku i ka Iesu olelo mai pela, kaumaha lakou no kona olelo mai e make ana oia, no ka mea, ua kuni paa ia ko lakou aloha nui nona. A no ko lakou ano pihoihoi a paumako, ua pane aku la o Peter, "Aole oe e make;" aka, ua pane mai la o Iesu, "E make au, i ola ai kanaka, a i oluolu ai ko'u Makua." Ua makemake kona Makua e make ia, a aole loa e ae o Iesu e hookuli aku.
Ma ke kulanakauhale nui nona ka inoa o Ierusalema, aia malaila kahi i noho ai ka hapa nui o ka poe i makemake e pepehi ia Iesu; a ua hele pinepine aku no hoi o Iesu ilaila, a ua malama i na halawai haipule.
Heaha la ko lakou kumu o ka makemake ana e pepehi ia Iesu ? No ka mea, ua hai aku oia ia lakou i ko lakou hewa. I kekahi manawa, ua kamailio aku la oia imua o lakou no ko lakou pono iho, "Aole o oukou aloha i ke
Akua, ko'u Makua, aka, he hookano a hookiekie oukou. Ua makemake oukou e pepehi ia'u. He poe hoopunipuni oukou. He poe hana ino a aloha ole oukou i ka poe ilihune. Ua hoomaikai oukou ia oukou iho ma ke ano hookamani, a i ko oukou wa e pule ai, e manao ana oukou no kekahi mea e ae. Ua piha ko oukou mau puuwai me na manao ino. O oukou na keiki a Satana."
Ua makemake nui o Iesu e hoohuli ae ia lakou mai ka noho haumia a hewa ana; a ua nui kona kaumaha i ka ike ana aku ua manao ino lakou i kona makuakane, a me ko lakou mau manao paakiki a huii ole ae mai na hana ino. Ua nui ko lakou inaina ia Iesu, a pane aku la; "Aole o ke Akua kou Makua;" aka, ua pane mai la o Iesu; "O ko'u Makua ia, a ua iho mai au mai ka lani mai, kona wahi noho ia, a e hoi hou aku ana no au i ona la i kekahi la mahope."
Mahope mai, ua lalau iho la na kanaka i na pohaku no ka hoonou ana mai iaia, aka, aole ia i manao e make ia manawa, a ua hiki wale no iaia ke hoohala ae i na manao ino a me na hoopilikia a ka poe i enemi wale mai iaia, a ua nalowale aku la me kona hana ino ole mai. Hele aku la o Iesu me kana mau haumana ma kahi mamao e noho ai, a hiki i kona manawa e hoi hou aku ai i Ierusalema.
He Leo i na Makuahine Hawaii.
Iloko o ka puuwai o kela a me keia makuahine, ua hoolawa mai ke Akua he aloha no ka lakou mau keiki. Ua ike ia keia mea ma na wahi a pau, a ma na ano a pau o ka noho'na mawaena o na makua a me na keiki. O keia aloha o na makuahine no na keiki, na iini ana hoi no ka waiwai makamae o ke aloha lani i haawi mai, ua hoike oiaio ia, a ke hooia paa ia nei ma Hawaii nei. Ua ike laulaha ia keia aloha paa mawao na makuahine Hawaii no ka lakou mau keiki, he mea maikai ia, he mea hoonani no ka home; aka, ke minamina nei no nae makou i ka puana ana, ua oi loa'ku mamua o ke aloha maikai i kekahi wa, a loaa ke kumu e pono ai na keiki. Ua oi loa'ku ka hoike ia ana o ke aloha, a palaka iho la ka noonoo no ka pono iho o na keiki.
I kekahi manawa, ua ike mai la ke keiki i ka makua e puhi baka ana, a o ke ano mau, e ne mai ana, a e hoohana, e hookeekee ana, e ake e loaa ka ipubaka, a e puhi. O kekahi poe makuahine Hawaii, a o ka hapa nui no paha, e haawi aku ana no, a e hauoli ana e haawi aku i ka ipubaka ia lakou, a e ike aku e puhi ana mamua o ka hoole ana'ku, a haawi aku i na huaolelo ao.
Pela no me ka poe inu awa, no ko lakou hoopunahele loa i na keiki, e haawi ana no lakou i na apu awa, i ko ai ka makemake naaupo o na keiki liilii. Aole o lakou manao iho i ka ino a me na haawina awaawa a ia mau mea e kau mai ai maluna o ka lakou mau keiki, aka, o ka manao hoopunahele wale aku no ka mea nui.
O keia ano hana, aole loa ia he hoike ana i ke aloha; ua hana io no paha na makua me ka manao aloha, aka, owai la ka makuahine e ae mai ana, o ke ao ana'ku o kekahi o lakou i na keiki i ke puhi baka, inu awa, ka pepa, ka hoopuka ana i na huaolelo pelapela, a me kekahi mau mea e ae he nui wale, o ke aloha ia o ka makuahine no ke keiki. Aole! aka, o ka manao ino ia, o ka haawi ana'ku ia i ka poino ia lakou, a o ke aloha ole ia. Mai haawi aku, a mai ae e hana ia e like me ko lakou makemake, aka, e ao aku, a e hooiaio aku i ke aloha makuahine ma ka hooikaika ana e ulu ae lakou me ka maemae a me ka maalahi mai na kumu hoopoino a pau o keia ao.
HAAWINA KULA SABATI
HELU 4. SABATI, APERILA 22.
KUMU HANA. Gehazi i ka lepera.
PAUKU BAIBALA, II Na Lii 5:20—27.
20 ΒΆ I iho la o Gehazi ke kauwa a Elisai ke kanaka no ke Akua, Aia hoi, ua hoole kuu haku ia Naamana i keia kanaka no Suria, aole i lawe mai kona lima i ka mea ana i lawe mai ai: aka, ma ke ola o Iehova e holo no au mahope ona, a e lawe i kekahi mea mai ona mai la.
21 A hahai aku la o Gehazi mahope o Naamana; a ike ae la o Naamana ia ia e holo mai ana mahope ona, iho ilalo ia mai ka halekaa mai e halawai me ia, i mai la, Ua pono anei?
22 I aku la ia, Ua pono Ua hoouna mai kuu haku ia'u, i mai la, Aia hoi, i keia manawa, ua hiki mai ia'u nei elua kanaka ui mai ka mauna o Eperaima mai, he mau haumana a ka poe kaula; ke noi aku nei au ia oe' e haawi mai oe no laua i hookahi talena kala, a i elua lole aahu.
23 I mai la o Naamana, E oluolu mai oe i ka lawe i na talena elua. Koi mai oia ia ia a hoopaa iho la ia i na talena elua iloko o na aa elua, a me na lole aahu elua, a haawi aku la i na kauwa ana elua; a lawe aku la laua imua ona.
24 A hiki aku la ma Opela, lawe ae la oia ia mau mea, mai ko laua lima mai, a waiho iho la iloko o ka hale; a kuu aku la i na kanaka, a hoi aku la laua.
25 Komo aku la ia maloko, a ku imua o kona haku; ninau mai la o Elisai ia ia, Mai hea mai oe, e Gehazi? I aku la ia, Aole i hele au kauwa io, a ia nei.
26 I mai la kela ia ia, Aole anei i hele kuu naau, i ka manawa i huli ae ke kana-
ka mai kona halekaa mai e halawai me oe? He manawa anei keia e lawe i ke kala, a e lawe i na aahu, me na oliva, a me na pa-waina, a me na hipa, a me na bipi a me na kauwakane a me na kauwawahine?
27 Nolaila e pili mau loa mai ko Naamana lepera ia oe, a me kou hua. A hele ia mai kona alo aku me ka mai lepera e like me ka hau.
Pauku Gula. "O ka mea makee waiwai, hana ino loa oia i ko kona hale." Solomona 15:27.
Mele.—Him. 213, 8. Leo.
A no keaha e pau ai
Ko oukou wa e ola nei
Ma ko ke ao nei wale no,
A hoopoina i kela ao?
E pau ko oukou nei manao
Ma ko ke kino, ko ke ao;—
E ala, huli, lelepau,
A hele i ke ola mau.
Pule no ka poe makee waiwai, a pau ke ku ko ma na mea o keia ae, &c.
Na ninau a na Kumu.
Owai ka lepera i ola ia Elisai? Ma ka hana aha ke ola ? A ike Naamana, ua ola oia, heaha kana i noi aku ai ia Elisai e lawe ? A ike hoi oia, mahea wale no ke Akua? Ma keaha kona ike ana ia ? Aole anei ke Akua ma na wahi a pau ? Ae, pela io no, aka, ma ia manawa, maloko o ka Iseraela wale no paha, kahi i hoomanaia'i ke Akua oiaio. Ma na wahi e ae, he hoomana akua kii wale no paha. Ua ae anei Elisai e lawe i ka makana ? Aole anei oia i ae mahope ma ko Naamana koi ana? Aole no. No keaha ko Elisai hoole ana i ka makana? A mahope iho o keia hoole, heaha kekahi mau hua olelo a Naamana ? A pane Elisai pehea? 5:15—19.
P 20. Heaha ka manao o Gehazi no keia makana a Elisai i lawe ole ai ? Heaha ke kumu o keia manao ?
P 21. Hooko anei oia i kona manao? A ike Naamana i keaha ? pehea iho la ia ? a ninau, pehea ?
P 22. A pane aku Gehazi pehea? Heaha hoi kana mau olelo hoopunipuni i mea e loaa'i kekahi hapa o ko Naamana makana ? Heaha kana noi ana ?
P 23. A pane mai Naamana pehea ? kuhi anei oia, he oiaio ka Gehazi mau olelo ? Heaha hoi ka Gehazi i lawe ai? Gehazi wale no anei ma keia hana apuka?
P 24. A hiki i Opela, aha Gehazi i ka makana? lawe a waiho mahea? Opela he wahi puu paha ia, he wahi kiekie iki mawaena o ka hale o Elisai, a me kahi e ku ana o Gehazi. Kuhi oia, aole ike mai Elisai.
P 25. Ia ia i komo ai iloko o ka hale. heaha ka Elisai i ninau mai ai? A pane aku Gehazi pehea? oiaio anei?
P 26. A pane mai Elisai pehea ? A ninau mai pehea? Ma keaha ko Elisal ike ana i ka hana a Gehazi? Ike maka paha; a i ole, ua hoke mai ke Akua ia ia. He manawa anei keia e aha ai? heaha ke ano? Eia paha, he kanaka hoomana kii keia, akahi no o Naamana a lohe i ke Akua oiaio. He kauwa o Gehazi na ke Akua o ka Iseraela. Pono ke hana maikai, hana aloha, hana oiaio i manao maikai aku Naamana i keia Akua. Nohea na oliva, na pawaina, na hipa, na pipi? Manao paha Gehazi e kuai ia mau mea me keia mau talena elua.
P 27. Heaha ka hoopai i hooiliia mai maluna o Gehazi no keia hana hoopunipuni a makee waiwai? Hai mai Iakobo 1:15. Nana—Nahelu 12:10. I tim. 6:10.
Mele. Mele hou, 8—7. Leo.
Makee waiwai o Gehazi,
Loaa ma ka wahahee,
Wahahee la ia Naamana,
Wahahee ia Elisai.
Loaa nae ko ia la hewa,
Kau maluna ka hoopai,
Lilo oia i lepera,
Keokeo ino e.
Mai makee a kuko wale,
Mai hoopunipuni mai,
O kau mai ka mai lepera,
Me na mea hoopai e ae.
Na ninau a ke Kahu.
Na makua. Heaha ka pauku gula? Owai ka i hana ino i ka poe Iseraela a pau ma ka makee waiwai ana? Ma keaha i hana ino ai o Gehazi ia ia iho, a i kona ohana? Heaha ka hoopai maluna ona? Heaha ka hoopai maluna o Akana? Owai ke kaikuahine i lilo i lepera no ka ohumu ana? Owai hoi na mea elua i hoopaiia i ka make no ka makee waiwai a wahahee hoi?
Na keiki. Hai paanaau mai I Tim. 6:10. Iak. 1:15. Pono anei ia oukou ke wahahee i na makua, i na kumu, i na hoa, i loaa ka waiwai, ke dala, ka lole, ka ai? Kuhi Gehazi, aole ikeia kana hana apuka, ua hunaia malalo ae o ka puu, ua nalo anei? Hiki anei ke hana kolohe me ko ke Akua ike ole? Aia mahea na maka o Iehova?
Ma keaha oukou e lilo ai i poe hoike no ka maikai o ke Akua. Ma ka hana maikai ana paha, olelo oiaio, hoopunipuni ole.
Ke kula a pau. Ua mihi anei Gehazi mahope, a laweia'ku kona mai lepera? Ina hoopai mai ke Akua ma keia ao, heaha ka pono? A pehea ke hoopaiia ma kela ao?
Mele.—Him. 17, 8. Leo.
Ua ike mai ke Akua ia'u,
Ko waho me ko loko pu,
Kuu ala, me kuu moe no,
Kuu kino pu me kuu naau,
E paa mau ia i kuu manao
Ma kahi nani, maha o'u.
Mai aa e hana hewa hou,
Maanei ke Akua, a ma o.
Pule i makaala a makau i ka hana he wa ma kahi malu, &c.
Haawina 5. II Na Lii 6:8—18.