Ka Lahui Hawaii, Volume III, Number 16, 19 April 1877 — Page 1
KA LAHUI HAWAII.
"Ua mau ke Ea o ka Aina i ka Pono."
BUKE III.} HONOLULU, POAHA, APERILA 19, 1877. {HELU 16.
KA NUPEPA KA LAHUI HAWAII.
Paiia ma kela Poaha me keia Poaha.
H. H. PALEKA, Luna Hooponopono.
He pepa i hoopukaia i kela me keia hebedoma no na Ohana a me na Ekalesia o Hawaii; he mea kokua i ka noho pono ana o na ohana, ka maluhia o kanaka, a me na pomaikai kino a uhane o ka Lahui Hawaii. "Aole paonioni; aole haanui; aole hikiwawe ka huhu; aole noonoo ino."
O na Kumumanao a pau, na Nu Hou o kela me keia ano, na Mare, Hanau, Make, e kakau mai i ka Luna Hooponopono, a e paiia no ke kupono.
Aole e aeia ka pilikino, ke kuamuamu, ka hoino, a me ka huhu, a ua makemakeia ka hoohoihoi, hoolana manao, hoonaauao, a me ka hoopono.
He $1.75 ka auhau o keia pepa no ka makahiki, a he $1.00 no ka hapa makahiki.
E hookaa mua ia ka auhau o ka pepa mamua o ka loaa ana i kekahi mea makemake e lawe.
NO NA OLELO HOOLAHA.
E lawe ana keia pepa i na Olelo Hoolaha a na makamaka, e like me ke kupono, a e lawa pono ai hoi me ka hoohaiki ole i ka huina o na kolamu kukulu manao, no ka uku haahaa.
O kela a me keia makamaka e makemake ana e hoolaha, e hele mai ma ke keena a e hui pu me ka Luna Hooponopono.
Aole e paiia kekahi Olelo Hoolaha ke ole e hookaa mua ia ka auhau.
Eia kekahi, ke noiia aku nei na makamaka e hoouna mau mai i na mea hou; mai hooloihi loa i na palapala; e hai pololei mai i na manao me ke kuawili ole, a e kakau mai me na hua moakaka.
H. H. PALEKA,
Luna Hooponopono.
S. B. DOLE.
LOIO a he Alakai ma na mea pili Kanawai. Ua makaukau oia e pale i na hihia imua o na Aha Hookolokolo a pau o keia Aupuni, me ke kakau ana i na Palapala Pili Kanawai, ma ka olelo Hawaii a ma ka olelo Beritania. 1 1y
E. STREHZ,
[AILUENE]
MALAILA E LOAA AI NA ANO LAAU A pau; a me na wai hoomaemae o kela a me keia ano. E hamama mau ana ka ipuka ma na po Poaono a pau. Ma ke kihi o Alanui Papu a me Hotele, ma Monikahaae. 1 1y
WAi Hui o ka Hau!
E IKE IA ka Hale ma ka inoa o "BONANZA" Ke haawi ia aku nei ka poloai i na makamaka keonimana a me na lede o ke kaona Alii, e kipa ae ma ka hale hookipa inu wai momona o ko oukou makamaka nona ka inoa malalo iho, a e loaa no ka hau i hoomomonaia (ICE CREAM) na wai momona o na ano a pau! hoohuihui ia e ka hau iniki o Nuuanu. O keia hale, he hale i hoomakaukauia no na keonimana a he keena nani i hoomakaukau ia no na lede. E kipa mai, a o ka makepono me ka oluolu ke haawi ia'ku, oiai, he makamaka, a he kamaaina no Hawaii nei o JOHN W. CROWELL.
2-1 y (Keoni Koloela.)
Ma ka Hale "BONANZA" ma alanui Moi, mawaena o ka hale kahi umiumi a me ka halekuai o Dillingham ma.
C. H. DICKEY, (Kale Kika,)
LOIO!
A he Luna Kepa i apono ia e ke
Aupuni no ka Apana o Makawao, Maui Hikina.
E HELE NUI mai ka poe a pau i loohia ia me na pilikia pili Kanawai o ka "Ua-ukiu" nei, a na ko oukou makamaka oiaio no e kokua a e hooikaika e hoopau i na pilikia ma na ano a pau o ke Kanawai. 17-1y.
E. O. HALL & SON
[E. O. HOLO MA.]
NA MEA KUAI I NA MEA MAHIAI
NA LOLE, PENA, AILA,
—A ME—
NA ANO LAKO E AE A PAU.
Kihi o Alanui Papu me Moi. 1-1y
KE HOIKE AKU NEI KA MEA NONA KA inoa malalo iho i ka lehulehu o Koloa a me na wahi e ae e kokoke ana, ua makaukau oia i keia manawa e hana i na
KII KAHA NO KE KUKULU HALE
ana a me ka houluulu ana i na lilo, no ka poe e manao ana e kukulu hale. A ua makaukau no hoi e hana Olelo Aelike no ke kukulu hale o na ano a pau, a
HANA KAA O KELA ME KEIA ANO.
O na ano mea hana kamana a pau e loaa no ma ke kahua kahiko, ma Koloa, oia hoi na
PAPA O NA ANO A PAU, PUKA
MOLINA-PUKA ANIANI, KUI,
PENA, AILA, &c. &c.
E kuaiia no ma ke kumukuai haahaa loa. E hoopaeia no ka papa ma na awa pae a pau mai Koloa a hiki i Waimea me ka uku haahaa loa. Aole uku o ke kaha ana i na Kii Hale ke kuaiia ka Papa mai a'u aku.
W. H. WRIGHT.
Koloa, Kauai, Dek. 4, 1876. [51-6m.]
PAPA, PAPA.
AIA MA KAHI O
LEWE RS & DICKSON
(O LUI MA.)
KE KAHUA KAHIKO MA
Alanui Papu a me Alanui Moi
E LOAA AI NA
PAPA NOUAIKI o kela a me keia ano.
NA PAPA NANI
A PAA NO KE KUKULU ANA I NA HALE.
Na Pani Puka,
Na Puka Aniani,
Na Olepelepe,
Na Pou, na O-a,
Na Papa hele,
Na Papa Ku,
Na Papa Moe.
Na Pili o na ano a pau!
NA PEPA HOONANI,
Na PENA o na wai a pau
Na Kui mai ka nui a ka makalii,
Na Ami-puka,
Na Ami-puka Aniani,
Na Ami o na ano a pau,
NA AILA PENA,
NA AILA HOOMALOO,
NA AILA o na ano a pau.
NA VANIKI
Na mea HOOHINUHINU o na ano a pau.
Na Balaki o kela a me keia ano.
A KE HAI IA AKU NEI KA LONO i na makamaka a pau, ua makaukau keia mau hoa o oukou e hoolawa aku ma na mea a pau e pili ana ma ka laua oihana
—NO KA—
UKU HAAHAA LOA!
like me ka mea e holo ana mawaena o LAUA a me ka MEA KUAI.
E hele mai! E na makamaka!
A e lawa no hoi ko oukou makemake me ka oluolu
1] a me ka maikai.
WON DERFUL BLOOD!
Gospel Singer. p. 99.
1
Make Iesu la, a nolaila mai
Kahe ke koko e hoomaemae ai,
Kahe, hoopili, a hoola mai
Kei no na pono! Nawai la e hai?
Re f.—Koko pa mau ! Pa kamahao !
Koko hoopau i na kina a pau,
Koko pa mau! Pa kamahao!
Me ia no au e hoomaemae a mau.
2
Lawe no au ia koko ano.
Lawe, hoopa la i ano hou au.
Koko maemae a kakahe mau no'u,
Kahe no no'u me na hoa pu o'u.
Re f.—Koko pa mau ! &c.
3
Koko pa mau! me he wai hoomaemae,
A loaa wale, aole kuai,
Kei ke aloha! ua imi no ia'u
A nona mai la kuu pono a pau.
Re f.—Koko pa mau! &c.
Koko pa mau! Koko pa kamahao!
Loaa ka malu, maemae kuu naau,
Me ia no au la e ola mau ai,
Homai! homai la ia koko maemae.
Re f—Koko pa mau ! &c.
HAWAII.
KA NANEA EEHIA!
O NA LA
I AU WALE KA MANAWA
A O KA
HIHIO ILIHIA A KA UI
LEON ROSE!
NO NA
KOA KAVALIA OPIO:
NA
SEPANIA EKOLU!
He Nanea Walohia o ka Weli Eehia.
MOKUNA V—HELU 13.
O! e ka wiwo ole,
He pakika, he pahee kou awiwi;
E komo, a nohoalii no ka puuwai,
O ke kanaka i hanau ia he koa!
HE PULE paha mahope iho, hiki mai la kuu haku wahine, a he mea hiki ke hoomaopopo aku, aia he kupouli o ke kaumaha luulu e nalu hohonu ana maluna o kona umauma. Hoi aku la ia me kana kaikamahine iloko o ka rumi i hoomakaukau ia no laua, pani mai la i ka puka, a waiho aku la iloko o ke kaumaha a ka naauaua a me ka u ana. O ke aloha wale no ka mea hiki ia'u ke haawi aku iaia, no ka mea, aole manawa e loaa ia'u no ke kamailio ana'ku.
I kumu e nalo ai na hiona hakumakuma hauliuli o kana mau hana, hoomakaukau iho la ka maalea nui o Padila e malama i kekahi ahaaina nui, a poloai aku la i na alii o ka aina e hele mai, a e hauoli pu, no ka mea, o kona hoohui ia ana keia ma ka mare me ka lede Zidana.
Ua hoopihaia ka rumi hookipa nui o ke kakela me na nani a pau, e kani ana na luta, na gita, ka hapa, a me na leo mele o ka poe i hele mai, a e hulahula ana hoi kahi poe malalo o ka malamalama nani o ka mahina a me na huihui kukui nani a nunui. Ua hooikaika aku la o Padila e hoohauoli i ka lede Zidana, aka, aole loa e hiki iaia ke holoi ae i na kipona o ke kaumaha e uhi ana maluna o kona kino i like me ke koloka eleele i uhiia iho maluna ona.
O ke pakaukau, ua piha pono me na mea ai ono o na ano a pau e ulu ana maluna o ka aina, i hoonaniia me na pua hihiu o ka waonahele, a iwaena o na hauoli ana, ua hoomakaukauia ka manawa no ka paina ana. Nonoho ae la kela a me keia a puni ke pakaukau, e hulali ana na aahu kula a me na pilali lelo o na'lii, a e hoohie ana hoi ko Dona Padila manao no ka nani a me ka hauoli o ka manawa.
Ia manawa, he ahe makani puanuanu kai pa koaheahe mai, kololio mai la ma na ipuka aniani a loaa'ku la na mea a pau me ka huihui ano e, a ia wa, ua lohe ia'ku la ke kani ana mai a ka wati, o ka hora ekahi ia o ka liula po, a o ka hoomaka ana hoi e kahuli ka manawa, a helu aku i na hora liilii o ka wehekaiao ana.
Ia sekona hookahi, aia hoi, ua lohe ia 'ku la kekahi leo uwe ehaeha a weliweli, punia ia'e la na paia o ua kakela nui nei me ka hanehane, a kani aku la ke o o ka makau i na pepeiao o kela a me keia. Me he la, he uwe no ka pepehikanakaia o kahi, i awiliia me ka puahiohio makani o ke kukulu hikina. Ku ae la kela a me keia iluna, a haka aku la na maka i kela a me keia me ka weli. O na kukui ihoiho e a makawalu ana maluna o ke pakaukau a ma na paia, ua pio ano e wale iho la no me ka hikiwawe loa ; a mailoko mai o ka nani malamalama, ua hoohuli ia'e la na ano a pau iloko o ke kupouli a me ka eehia nui. Pau koke ae la ke kani ana o na mea kani a me na leo mele, a holo pu-a-a'ku la kela a me keia iwaho, e hookeke ana, a e pihoihoi ana me ka makau nui. Haule maule iho la kekahi o na lede no ka nui o ka makau.
Ua hiki ole ia'u ke hoomaopopo iho i ka mea e hana'i ia manawa, aka pee koke aku la nae au malalo o na uhi hoonani o na pukaaniani. Iloko o na minute pokole, ua nalo aku la na mea a pau, a aohe mea i koe iho, o Dona Padila wale no a me ka lede Zidana, a me a'u no hoi. O na leo hauwalaau o ke anaina, ua nalo aku la, a waiho iho la mahope, he neo anoano ano ilina kupapau, a ia manawa, ua a hou ae la na kukui a pau me ka hikiwawe loa, a ia manawa i ike ia'ku ai he ouli oi ae o ka weliweli mamua o ka mea mua iho.
O ke kii aka o ke Count Ferendeza i pepehi ia, e ku mai ana ma ke poo o ke pakaukau, a e haliu mai ana kona alo ia Padila a me ka lede Zidana; o kona aahu, he aahu koa, ka aahu no hoi ona i haalele aku ai i kona kakela: alawa'e la kona mau maka wela me he ahi la, ma o a maanei, me he la e ninau mai ana no na mea i hanaia, e hulili ana me he kukuna la la. haule koke iho la kuu haku lede a maule; a na ka nele ana o na papalina o Padila i ke koko ole ia manawa, i hoike mai i kona piha i ka makau.
Kau aku la na maka o ua aka nei maluna o Padila no kekahi mau minute, a pane aku la me ka leo hanehane. "Ua ike no anei oe ia'u?"
Oni ae la na lehelehe o Padila, aka, aole pane i puana mai.
E nana mai ! wahi a ke aka, i ka hana a kou lima; aka, aole e loihi ka holopono ana o kau mau hana !
Me ka leo haalulu ua Padila nei i pane mai ai. "Aole owau ! Aole loa i hapai ko'u lima a kue aku ia oe !"
Pupuku iho la na maka o ke aka, a pane mai la. " Ano ! he hiki no anei ia oe ke hoopunipuni mai ? Aole anei i maopopo ia'u kou mau manao a me kau mau hana? Aka, he manawa kou—
I keia manawa, ua uluaoa'e la na manao o ua Padila nei, a ku ae la a pane mai la. "E hookaawale aku ! a e nalo ! o kau mau hoomaka'uka'u ana a me oe pu, he aka wale no !"
Kau mai la ka lima o ke aka me ka weliweli nui—pae hou ae la ua leo uwe nei a wawalo o loko o ua kakela nei—pio hou iho la na kukui me ka hikiwawe loa—a a hou ae la e like me mamua—a o ke aka, ua niau aku la a nalo—a pa hou mai la ke ahe makani me ka huihui ano e.
Hoomaopopo aku la au i na hiona weli makau e kau ana maluna o Padila, a haalulu iho la au. E noho ana ia me ke kalele ana o kona auwae maluna o kona mau lima maluna iho o ke pakaukau, a hakapono aku la kona mau maka ma kahi a ke aka i ku mai ai, me he la e ike aku ana no, a i ole, o na hihio o ka hopena o kana mau hana ke ku mai ana imua ona; o ka lede Zidana hoi, e waiho ana ia i ka papahele, a o na mea ai, e muu ana iluna o ke pakaukau.
I keia manawa, ua makau iho la au o ike mai kela ia'u, no ia mea, ua nihi malie aku la au me ka manao e holo aku ; aka, aole au i hemo aku, ua ike mai la kela ia'u, a me ka leo nui, me kana pahi kaua e paa ana i kona lima , holo mai la me ka pane leo nui ana mai.
A! aole oe he aka, aka, he hiki ia'u ke hoolilo koke ia oe i aka. Lele ino mai la kela maluna o'u, kauo aku la ia'u ma kuu pu-ai a hiki i ke pakaukau, a hapai ae la i kana pahikaua e hahau mai —
[E ka mea heluhelu, ke hoomanao nei no kakou, o ka Makuisa o Denia keia e kamailio nei imua o ke Count Antonio maloko o kekahi rumi, a e hai ana i na mea a laua me Fenado i ike ai; a o Denia no hoi keia e kamailio nei, e hai ana i na olelo a ka elemakule ia laua, imua o Antonio.]
Ma keia wahi e Antonio, wahi a Denia, hoomaha iki iho la ua elemakule nei, me he la e ku ana o Dona Padila imua ona me ka pakaukau e uhau iho i ka pahi. Kani mai la ka bele nui o ka uwati kakela, o ka hora ekahi ia, a komo mai la ka lia iloko o'u no ko ua elemakule Gonzaleza nei kulana, e like me kana mau mea i hai mai la ia maua. Ua noho iho la makou me ka meha no kekahi mau minute, a hoomaka mai la oia e kamailio penei.
I ka hoomaopopo ana iho o Padila owau kana e paa nei, hookuu ae la ia'u, me ka paa no nae i ka pahi ana i kuu pu-ai.
E Gonzaleza! wahi ana, o oe anei keia? Ua kipaku ia'ku o Pedro mai o'u aku no ka hewa uuku iho malalo o keia, aka, ke hoohiki paa nei au, a hana hou aku oe, o kou make ka hopena. E hoolohe mai ia'u. O keia ka'u kanawai e kau aku nei maluna ou, a maluna oia mea wau e ae aku nei e ola oe—e huna i kau mau mea a pau i ike iho nei iloko loa o kou umauma, mai hawanawana ia mau mea ia oe iho—a i lohe au ua uhai oe i keia, alaila, he la pouli ia me ka make maluna o kou kino.
"A aole no oe e pakele! wahi a kekahi leo i pane mai ai ma kekahi kala mai o ka rumi a makou e noho nei, me he la aia maloko o na pohaku. Ku ae la o Fenado me ke kahaha, o ua elemakule nei hoi e alawa ana kona mau maka ma o a maanei, a owau ua ano weli.
Heaha keia mea kupanaha? wahi a ka elemakule.
O kekahi paha o na kauwa e hoomaka'uka'u mai ana ia kakou, wahi a Fenado.
Holo aku la ua elemakule nei ma kahi a ka leo i pae mai ai, aka, aole nae he ike kanaka ia, a mea e ae paha.
(Aole i pau.)
Ke ano o na hana a ka Haku ma ka Pae Aina o Maikonisia ma ka
MOKUPUNI O MILE.
O keia wai niu, he hiki ke hooliloia i malakeke; penei e lilo ai i malakeke : Iloko o keia wai lolo niu, e hookomo iloko o ka ipuhao, a ho-a ke ahi a nui malalo ae o ka ipuhao, a e paila e like me ka paila ana o ke ko, a pela no e hana'i a hiki i ka wa e lena'i ka wai, a o ka mo-a no ia. I ka mo-a ana, e hapai ma kula, a maalili, o ka paakiki ae la no ia, a o ka lilo ana ia i malakeke. O ko keia wa mai nei nae keia, o ko ka wa mua, he wahi okoa iki nae, a penei e hana'i: O kela puniu no i kau ia'i iluna, ma kela a me keia kumu, e lawe mai, a e ho-a i ka imu a enaena, e kalua i keia mau puniu me ua wai nei iloko, hookahi la e kalua'i, alaila, kii aku e hoao, a ina e mo-a, huai loa, a i mo-a ole, e kalua hou i hapa la, a kii aku, ua mo-a maikai, ua like loa me ko ka ipuhao maoli, a waiho a maalili, a o ke kohu malakeke loa no ia. No ka wai kai.—O ka wai kai, eia no ka wai i eli ia na punawai, e like me ko na aina kahawai ole a me na aina ano au-kaha. Ua ike nuiia keia ano wai ma na Kona i Hawaii a me kau wahi ano like. O na punawai wai kai nae olaila, aole no e like ka hana ana me ko Hawaii nei ka eli ia a hohonu, me ka hoomaemae ia a maikai, o ko laila, oia eli iho no a puapuai ae n o ka wai, iho no na kiaha, a inu ae la no, a o ka pau no ia. Aka, i ko maua hana ana i ko maua punawai a maikai, e like me ke ano me ko Hawaii nei, ia wa, ike mai la lakou, a hoopili mai la, a o ka poe i huli mai, aia lakou ke malama la, a ua haalele i ko ke au mua.
35. Ka lakou mau ipuhao.—O na iwi niu, o ka lakou mau ipuhao no ia. O ka ipuhao ma ka olelo Makala, "Ainbal," penei e hana'i: E wa'uwa'u ia waho o ka iwi a maikai, a o ka ipuhao iho la no ia. Ina he ai a he i-a paha ka mea i makemake ia e hoomo-a, e ho-o iloko o ua mau puniu nei, a e kau aku iluna o ke ahi lanahu, a a-a maikai hoi, a mai hoopoina i ke kawili mau ana, o ino auanei ka mea ai, a lilo i mea ole. Eia nae, elua a ekolu no kupa ana, o ka puka no ia o keia ipuhao, a lilo i mea ole. I pono loa no nae i ka nui o ka niu.
36. Ka lakou mau upa ako lauoho. O ka inoa o ka upa ma ka olelo Makala, "Jijej." O ka lakou upa ako lauoho, he ahi, e ho-a i ke ahi a maikai, alaila, e hele aku a moe aku ke poo ma kae o kapuahi, a lu aku la i ka lauoho iloko o ke ahi, a a-a ia mai la e ke ahi, a i ka pau ana, aole nae he maikai, oiai, ua loloa a pokopoko kahi. O ka hoomaikai ana, na ka niho no e nahunahu, alaila maikai iki ae. I keia wa nae, ua loaa hoi na upa, oiai, ua lawe ia'ku e ka Euanelio a Kristo a nui.
37. Na kahi lauoho o lakou.—O ke kahi ma ka olelo Makala, ua like no me ka ka haole. O na kahi lauoho, oia no na maiuu o na lima, aia no a hoomaka e kahi, e hoopili like i na maiuu o na manamanalima, alaila kahi no, a hana no hoi i na pu lauoho, a hookomo ae maloko o na puka i hou ia'i ma na pepeiao. I keia wa, ua loaa na kahi, mamuli o ka mana o ka Euanelio.
38. Ka lakou mau pahi.—O ka pahi ma ka olelo Makala, "Bokbok." O ke kaulaaha ka lakou pahi ponoi, ina e makemake e oki i ka i-a a ai paha i ku i ka moku i na pahi nei, e hikii mawaena a ma kahi paha i makemakeia, a e huki ma o a maanei, a pela iho la e moku ai na mea ai.
39. Ka lakou panana holo moana. He panana no ka lakou, a o ka inoa ma ka olelo Makala, "Kenbakaijen." Penei ke ano o ia panana: E hana i na laau i huina-kolu, a e lawalawa i na kaula he nui na moe ana iloko o ka huina-kolu o ka laau i hana mua ia. O na huina-kolu, oia no na ihu, a o na kaula i lawalawa ia, oia no na ale, a na keia mau kaula no e hoakaka mai i ka huli ana o ka ale o kela a me keia wahi, e like me ko Hawaii nei i ka wa kahiko.
40. Na laau o Hawaii nei i ikeia ma Mile. Eia na inoa o na laau mai ka olelo Makala a i ka olelo Hawaii:
Inoa Makala. Inoa Hawaii.
Ni . . . . . Niu
Me . . . . . Ulu
Kano . . . . . Kou
Wo t . . . . . Ape
Bob . . . . . Hala
A rme . . . . . Mamaki
Kepa ran . . . . . Maia
Anamaklili . . . . . Okupukupu
Kio b . . . . . Lilia
Lo . . . . . Hau
Aole inoa Makala o ka Ekaha a me ke Kaunaoa-pehu, a me ke Kowali-pehu. O keia mau laau, oia iho la no ka'u i ike ai ma ka mokupuni o Mile.
41. Na huahelu, mai ka Akahi a hiki aku i kahi o na Tausani, &c.
Helu Makala. Helu Hawaii.
Juon . . . . . Akahi
Ruo . . . . . Alua
Jilu . . . . . Akolu
Emen . . . . . Aha
Lailim . . . . . Alima
Jiljino . . . . . Aono
Jiljilimjuon . . . . . Ahiku
Drualitok . . . . . Awalu
Drualimjuon . . . . . Aiwa
Jonoul . . . . . Umi
Jonoulimjuon . . . . . Umikumamakahi
Jonoulimruo . . . . . Umikumamalua
Jonoulimjilu . . . . . Umikumamakolu
Jonoulimemen . . . . . Umikumamaha
Jonoulimlailim . . . . . Umikumamalima
Jonoulimjiljino . . . . . Umikumamaono
Jonoulimjiljilimjuon . . . . . Umikumamahiku
Jonoulimdrualitok . . . . . Umikumamaiwa
Ronoul . . . . . Iwakalua
Konoulim juon . . . . . Iwakaluakumamakahi
Jilnoul . . . . . Kanakolu
Anoul . . . . . Kanaha
Limnoul . . . . . Kanalima
Jiljinonoul . . . . . Kanaono
Jilijilimjuonnoul . . . . . Kanahiku
Drualitoknoul . . . . . Kanawalu
Duatimjuonnoul . . . . . Kanaiwa
Jibuki . . . . . Haneri
Rubuli . . . . . Alua Haneri
Lima buki . . . . . Alima Haneri
Jiljinobuki . . . . . Aono Haneri
Juou tausan . . . . . Akahi Tausani
O keia helu ana, no ka wa i hiki aku nei ka naauao o ka Euanelio, aka nae, ua ano komo no nae na hua ma ko laila mau helu. Eia ko lakou mau helu ponoi, ma ke ano helu palua ana:
Helu Makala. Helu Hawaii.
Jokren . . . . . Iwakalua
Luako r . . . . . Kanaha
Jilukor . . . . . Kanaono
Aako r . . . . . Kanawalu
Limako r . . . . . Akahi Haneri
Jiljilno . . . . . Akahi Haneri Iwakakua
Jiljilmijuon . . . . . Haneri Kanakolu
Rualtok . . . . . Haneri Kanaono
Ruajimijuon . . . . . Haneri Kanawalu
Jonoul . . . . . Alua Haneri
42. No na himeni i hakuia e ka'u kane, a me na himeni i unuhiia mai ka olelo Hawaii a i ka olelo Makalu.—Nui no na himeni i haku a i unuhiia e ka'u kane, mai ka olelo Makala a i ka olelo Hawaii, a mai ka olelo Hawaii a i ka olelo Makala. A eia iho kekahi mau himeni a me ko laua mau inoa.
AINEMN ILOLON.
1 Ewi ewi ajiri dri juro,
Ewi ewi ajiri dri juro,
E kar likit marmar in mour,
Im rainemon ilolon.
Ko ba.—Holon renaj ber iber,
Ilolon renaj ber iber,
Ilolon renaj ber iber,
Rej ber ilo Ke'nau ekal.
2 Ewi ewi dri Ka'nan Daniel,
Ewi ewi dri Ka'nan Daniel,
Ka' r joloko ilo ron in Laiona,
Imainemon e ilo lan.
Ko ba.—Ilolon renaj ber iber, &c.
3 Ewi ewi dri Ka'nan Elias,
Ewi ewi dri Ka'nan Elias,
E kar Katliklik ilo enej maren,
Im bao reven ko rej ajirinin.
Ko ba.—Ilolon renaj ber iber &c.
Eia ka unuhi ana ma ka olelo Hawaii:
KAMAIKI ILOKO O KA LANI.
1 Auhea auhea na keiki Iudaio,
Auhea auhea na keiki Iudaio,
Ua hooleiia iloko o ka lua Liona,
A ua maluhia iloko o ka Lani.
Hui.—Iloko o ka Lani e hui ai kakou,
Iloko o ka Lani e hui ai kakou,
Iloko o ka Lani e hui ai kakou,
A noho iloko o ke Kanaana hou.
2 Auhea auhea la ke Kaula Daniela,
Auhea ahuea la ke Kaula Daniela,
Ua hooleiia iloko o ka lua Liona,
A ua maluhia iloko o ka Lani.
Hui.—Iloko o ka Lani e hui ai me lakou.
3 Auhea auhea ke Kaula Elia,
Auhea auhea ke Kaula Elia,
Ua pee aku iloko o ka waonahele,
A na na manu tolaka oia i hanai.
Hui.—Iloko o ka Lani e hui ai me lakou.
Eia hoi ka mea i unuhiia mai ka olelo Hawaii a i ka olelo Makala, aole nae like loa ma kahi mea. Eia ka inoa ma ka olelo Makala.
ALELE IM LONLIN.
1 E lanei kwoj monono,
Alel Alel,
Alel bareinwor bao ko,
Alel imu lonlin,
Ke vonalel eon Jisos Kristo,
Alel alel Haleluja,
Alel im lonliln.
Ko ba.—Alel Alel im monono,
E monono ne jeramon,
Jen ainiken kwoj alel,
Alel im lonlia.
2 E lane kowj buruomij,
Alel, Alel,
Amalel en kainemon,
Alel im lonlin,
Jisos ekar buruomij,
Alel ekar kainemon,
Alel buruomij en jako,
Alel im lonlin.
Ko ba.—Alel Alel im monono, &c.
3 Elane kwo jermon,
Alel Alel,
Kin men ko re mon ibom,
Alel ima lon lin,
Ilo ien kwaj Sabati Skul,
Ilo ien kwaj jerkabun,
Ilo ien kuj jerbal,
Alel im lonlin.
Ko ba.—Alel Alel im monono, &c.
Eia ke ano ma ka olelo Hawaii, a eia hoi ka inoa:
MELE OLI AE.
1 Ina he hauoli ko'u,
Mele, Mele,
Himeni e like me na manu,
Mele me ka olioli,
Oe e himeni ia Iesu Kristo,
Mele mele Haleluia,
Mele a Hosana Iaia,
Mele me ka olioli.
Hui.—Mele mele me ka olioli,
Olioli no me ka pamaikai,
No kuu leo himeni,
Mele me ka olioli.
2 Ina he kaumaha kou,
Mele, Mele,
Na kau himeni e hoomaikai,
Mele me ka olioli,
O Iesu kai kaumaha,
O kana himeni kai hoomaikai
E mele me ke kaumaha a nalowale
Mele me ka olioli.
Hui.—Mele mele me ka olioli, &c.
3 Ina oe e pomaikai,
Mele, Mele,
Ina mea maikai ia oe,
Mele me ka olioli,
Iloko o ke Kula Sabati,
Iloko o kou wa hoomaha,
Iloko o kou wa hana,
Mele me ka olioli.
Hui.—Mele mele me ka olioli, &c.
He nui no na himeni, aka, ua manao au ua lawa no ko kakou ike i keia mau himeni elua; nolaila, ua oki ia.
(Aole i pau.)