Ka Lahui Hawaii, Volume III, Number 16, 19 April 1877 — Page 3
AHAHUI EUANELIO HAWAII.
E halawai ana ka Ahahui Euanelio Hawaii ma Kawaiahao, Honolulu, Oahu, i ka Poalua mua la 5 o Iune, M. H. 1877—Hora 10 A. M.
NA HAIOLELO.
Oihana Misionari Kuwaho.
Olelo Hawaii, Rev. J. H. Pahio.
Olelo Haole, Rev. S. E. Bishop.
Oihana Misionari Kuloko.
Olelo Hawaii, Rev. S. Waiwaiole
Olelo Haole, Rev. J. D. Paris
Olelo Hoakaka.
E pono e makaala na Kahu Ekalesia no na Kokua i ka Waihona o ka Papa Hawaii no keia makahiki. E hoopaaia ana na buke o ka Puuku ma ka la 15 o Mei ae nei. Nolaila, e hoouna mua mai i na Kokua Mahinahou a me na kokua e ae i manaoia mamua ae o ia la, i komo iloko o ka hoike o keia makahiki. E makaala, mai poina, o hemahema auanei ko oukou mau huahelu.
6 t. MA KE KAUOHA.
NA ANOAI.
Ua manaoia e ku mai ana ka mokumahu Zelandia i keia Poakahi ae mai Sidane mai.
Ma Makawao, Maui, ua pepehiia kekahi Pake a make loa e kekahi hapahaole, nona ka inoa o Henry Treadway.
E holo ana ke Kilauea i Nawiliwili i ke ahiahi o ka la apopo, (Poalima) a e ku hou mai ana i ke kakahiaka Sabati. A Poakahi ae e holo hou aku ai no Hilo.
Ma nehinei i hoohelelei liilii mai ai na pakaua kilihune o ka Ua Kukalahale, (April Shower's) a ma keia hoa mau ana iho, ua hala'e la kekahi uiha ikiiki o na la wela o keia kau.
Apr. 17, ma Alanui Papu, ua hoohui ia ma ka berita mare o Ailuene Damon, (E. C. Damon) me Miss Conelia Bekuwiki, (Beckwith) ma ka Materemonio Hemolele.
Ua ku ae ma Hilo i ka la 11 iho nei kekahi moku kiapa okohola, nona ka inoa o Helen Mar mai Nupepeki mai, (New Bedford) me 250 barela aila Pamuela. A ua kalawa'e oia mawaho o ke awa o Kou i ka Poaono nei.
I keia mau po, ma ka pa alii kumakena, ua komo ae kekahi poe himeni kanikau e mele inoa no ke kino wailua e moe oni ole la. I ka lohe ana'ku ia mau leo hano i huiia me ke ano kehau lailai o ke kulu aumoe, me he la ua
"O Ili Ilihia i Makiekie ke aloha,
Aloha uina kani lea i ka manawa,
O kuu manawa e au wale nei,
Ua hele ka pili aloha me ka i—po—e,
Kuu—ho—a."
Pau ole kuhihewa o Hawaii! O ka olelo naaupo a kahi poe ke hele nei ka ka mu e hoomakakiu a pepehi i kahi poe. Auhea oukou ; aohe mu e ae o ia mau hana wale no a oukou. O na hana lapuwale a pau o keia ano, oia iho la no ka mu nana e hoolauwili ia oukou.
Ua lohe ia, o ka la 25 ae nei ka la e manele hope loa ia aku ai ke kino lepo o ke Keiki Alii Leleiohoku. O kona olowaa hope loa ke hanaia nei me ka nani lua ole ma kahi o Weicke, Alanui Moi.
Ua makaukau mau ko makou mau pepa me ka wa-hi ia, ua kupono ke hoouna ia i na makamaka ma na wahi a pau. No na wahi a puni o Hawaii nei, he 10 keneta ko ke kope hookahi. A no Kapalakiko a me na wahi e ae, he 15 keneta ko ke kope hookahi. Nolaila, eia ka wa e na hoa'loha e hele mai ai e kauoha i mau pepa na na makamaka ma na kuaaina, oiai, ia makou no na lilo kuni leta.
Ua lohe wale mai makou e ili aku ana ka hanohano o ka manele ana aku i ka huakai hope loa a ke Keiki Alii e moe mai la i ka moe anuanu ma Kauluhinalo, ma ke kauo lilma ana aku a kona mau makaainana o ka Hui Poola mai ka Pa Alii aku a i Maunaala. Ua hiki, no ka mea, o kona ike hope loa ana no ia imua o oukou a pau e kona mau makaainana, a moe loa aku ia ma kahi a oukou e ike hou ole aku ai ia ia, ma na paia eehia ma ka Ilina Maunaala.
"Aloha wale ia ka Haku o ke kino."
Ma ke kakahiaka Poalua nei ma Alanui Moi mawaho iho o kahi o Mrs. Ailau, ua lohe ia aku he leo nahenahe mai ka waha mai o na kamalii liilii e ku poai ana, he hookahi o lakou he wahi mea mahuahua iki, a oia paha ke kumu, oiai ia ia ka hao huinakolu, a nana no hoi e alakai ana a he maikai a nani ko lakou mau leo. O ka hoomaamaa ana i na kamaiki ma ia ano, he alanui ia o ka neeu ana aku e hele ma ka laina pololei o ka holomua. Aole hoi ma ke ano a kekahi poe makua e hoomoamoa nei i na keiki no ka hula ano ole e anapau ai. Heaha ke hoa?
Ma ka lokomaikai o J. M. Ingrams kela haole nana ka wai kupua hoopau kohu lole o makou i hoolaha aku ai. Ua hoomaikeike aku oia ia makou ma ke keena heluhelu o ka Hale Luina (Sailors Home) e ike i kana hana nui, o ka holoi a me ka hoopau ana aku i na kohu paa a me na lepo hao o ka uhi kupapau alii. O ua uhi la he veleveta eleele i pili ia me ke silika keokeo; a aia ma ka lihilihi silika me ka ka veleveta na kikohukohu a he mea ole hoi ia paa i kela wai hoomaemae, ke nana aku i keia wa alohi lua ke silika, a o ka veleveta hoi, ua hele a nani.
Ua hauoli makou i ka ike ana'ku na maka o ke Kiaaina o na Hono, ke alii o ke Kai Malino, a me ke Kiaaina o ka moku kaili la o lalo ; ua holo mai nei lakou a me ka lehulehu e ae e uwe pu, a e u pu, no ke 'Lii i hala'ku.
Mai ia Meemano i lohe mai ai makou i ka pii loa ana'e o ke kumukuai o ka ai a ka hapalua no kahi ma-na ai uuku, ma Koolau ae nei. He oiaio, ke hana mai nei ka wi ma na aina wai, oki aku kakou ko ke kaona nei.
Elua itamu i koe pau kauna a ke Kuokoa o keia pule iho nei, no ka lilo loa i ka haanui ma na kualehelehe ano ole, oili malu kahi itamu mai ka pakeke ae, a hoike mai la laua a elua hookahi no ano, "He hana Aloha." A ehia la auanei mau itamu like loa o keia pule? S.
Pehea la ke "Kuokoa" i kokua nui ai i ka hoike hoopunipuni a P. N. K. o Olowalu no ka wi, o ka wi anei ia ke loaa kela mau kalo nunui he umi no ka hapawalu, a o ka nui o ke kalo hookahi 5 kapuai ke kiekie, a he anana kona anapuni (6 kapuai). Malia paha he lilo loa no i ka liki pau paka i oili malu hou ai. J.
Ma ko makou manao ana, ua aie nui na olula okohola o kakou ia His Ex. A. S. Hartwell i kona hooponopono a kaana loea ana i ka waiwai io mawaena o kela me keia Hawaii au kai, a kela mau moku pakaha wale i holapu ae ai i na moku okohola a puhiia i ke ahi e ka Kanedoa me ka Alabama, a i keia mau la iho nei, ua ohi mai na mea a pau i ko lakou luhi i poho wale ai. A o ka nui o ka puu dala $121,077, a mailoko ae o keia ua mahele liilii ia'ku la. E haawi ia na mahalo Hawaii ana a nui ia Mr. Hartwell a me ke Senate Cole o Kapalakiko.
Ua ike lihi iho makou ma ka nupepa haole o ka Poakolu nei, i ka papa kuhikuhi o na Laina Mokuahi Lawe Leta o ka Hema a me Kapalakiko mai. Mamua he lono kai pahola iho mawaena o kakou e haalele mai ana ua poe mokuahi nei i ke kipa ana ia Honolulu. Aka ano, he papa kuhikuhi no ke kipa mau mai. Ua maopopo ia makou ke kumu o kela mau olelo, "aole e kipa hou mai," e ake ana i mau dala haawina hou ke puni aku kakou. Oia ka uu maunu.
O ka rula paa mawaena o na Lunahooponopono nupepa o ka papa pai, oia no ke kapu loa o ke kii wale ana i kahi mau manao a mau palapala paha a lawe ae nana iho. Ua kapa ia he limalima, a he pakaha. Pela makou i hanaia mai ai i kela pule aku nei, aka, ua ike no nae makou ua nawaliwali ko makou hoa, ua ano mauliawa me na noonoo ana, nolaila, e kala ia'ku no ia. Aole no makou e pane, ina i hai mua ia mai, a ina no hoi he luhi io no ka nui o ka hana, oiai ua piha mua no hoi i na olelo hoolaha, a he uuku wale no kahi hana, heaha la ka mea o ka lima nui ana. O ka manao nona ke poo "na anoai o ka wa i ike ia," i kakauia e S. P. K. Nawaa, a i puka'ku ma ke "Kuokoa" o ka pule i hala, ua hoonohoia mai ka makou kope aku, ua heluheluia e makou, a na ko makou luhi i hooponopono no ka LAHUI HAWAII, aka, miki mai la ke oau no ka hemahema, a anunu aku la. "O ka mea nawaliwali, e pono e kokuaia oia." "Laweia, a e pomaikai oukou."
NA HOALOHALOHA ALII.
I K A MOIWAHINE KAPIOLANI:
Ua pahola mai io makou nei ka lono kaumaha, e haki kaikoo ai i ka manawa, i ka oluolu ana i ka Mea Mana Loa e lawe aku i ko Olua Pokii Alii, ka Hooilina hoi o ke Kalaunu o Hawaii.
Nolaila, ma ka inoa o ka Ahahui Hoola Lahui o ka Apana o Kauaula, Waialua, Oahu, ke waiho aku nei i ke aloha haalipo a walohia hoi. A ke komo pu aku nei lakou i ka uwe pu ana'ku me Oe. A ke pelu haahaa iho nei makou i ko makou mau kuli, a kalokalo ae i ke ahonui o ka Mea Mana Loa, e hoomaalili mai i kou kaumaha. E ola ka Moiwahine Kapiolani i ke Akua. C. N. Kalama,
Komi te. S. H. Peter.
J. A. Haupu.
Kauaula, Waialua, O., Apr. 16, 1877.
I KA MOI KALAKAUA:
Aloha oe:—Ua oluolu i ke Akua ka Makua Mana Loa ka lawe ana aku i ke ola o Kou Pokii Alii i aloha nui ia, Ka Mea Kiekie W. P. Leleiohoku, ka Hooilina Moi o ko Hawaii Pae Aina.
A nolalia, o makou o na lala o Ka Hui Aloha o Kalihi-uka kekahi hapa uuku o kou mau makaainana, ke hui pu aku nei makou e kanikau kumakena pu aku me Oe a me Kou mau kaikuahine Alii, a me ka Makuahine Alii R. Keelikolani, a me na Alii hanau o ka Aina a me ka Lahui holookoa.
A nolaila, o makou o na Komite ma o na makaainana la, ke hilinai a ke nonoi ae nei makou i ka lokomaikai o ka Mea Mana Loa, e hoomama mai i Kou naau kaumaha a me Kou mau Pokii Kaikuahine a me ka Makuahine Alii.
D. Kahakalau.
Na Komite S. K. Kanekuahine.
W. P. Kekino.
I KA MOI KALAKAUA:
E ka Makua ;—Ua hiki mai io makou nei ka lono kaumaha, i ka oluolu ana o ka Mea Mana Loa e lawe aku i Kou muli Pokii, ka Hooilina hoi o ke Kalaunu o Hawaii. Nolaila, ma ka inoa o na makaainana o ka Apana o Lahaina, ke haawi aku nei i ko lakou aloha kuhohonu a walohia hoi, a ke komo pu aku nei lakou i ke kanikau pu me Oe, a me ka ohana alii i hoonele ia mai i ka Pokii ole.
A ke nonoi aku aku nei makou i ka lokomaikai o ka Mea Mana Loa, e hoomama mai i Kou kaumaha, a e hooloihi i Kou mau la maluna o ka Nohoalii o Hawaii.
O makou no Kau mau kauwa haahaa.
L. Aholo, M. Makalua,
J. W. Kalua, D. Kahaulelio, A. Pali.
Komi te.
I KA MOI LANI KALAKAUA:
E ka Makua ;—No ka mea, ua oluolu i ka Makua Mana Loa ka lawe ana'ku i ka Mea Kiekie ke Keiki Alii ka Hooilina o ka Nohoalii o Hawaii, William Pitt Leleiohoku, Kou Kaikaina i aloha nuiia, mai keia ola ana. Nolaila, ua ili iho maluna Ou, Ou mau Kuahine a me ka Makuahine Alii, na'lii a me ka Lahui Hawaii ka luuluu, ke kaumaha, ka minamina, ka menemene, ka lihaliha, ka paumako, ka pilihua a me ke kumakena.
Nolaila, o makou o na Komite i kohoia e ka Ahahui Euanelio o ka mokupuni o Oahu i akoakoa i na la 10 a me 13 o keia mahina ma Kawaiahao, ma ka inoa o na Ekalesia Euanelio o ka mokupuni o Oahu, ke hoike nei i ko lakou minamina, paumako a me ko lakou kumakena, no ka ako ia ana o ka muo o ke Aupuni, ka liko hoi o ka lahui, mai kona kulana nani, hanohano, kilakila, alii, kapukapu, piha ike a naauao, ka manaolana hoi o ka lahui i kona mau la opio.
A oiai e noho ana Oe, Ou mau Kuahine a me ka Makuahine Alii iloko o ka pouli maeele, ka malohilohi, ka lipua, ka hui a me ke koni iloko o ka iwihilo, wahi i ka pu-a o ka manawa i ka eha lima ole a ke aloha e koni ana iloko o ka puuwai.
Ke kulou haahaa aku nei makou imua o ka Makua lani me ke kalokalo aku, e hooluolu mai me keia mau huaolelo: "Na Iehova i haawi mai, a na Iehova i lawe aku, e hoonani ia ka Inoa o Iehova." "Owau ke hele aku i Ona la, aole ia e hoi hou mai i o'u nei.. Moses Kuaea.
Komi te, S. Waiwaiole.
H. U. Mahi.
I KA MOI KALAKAUA:
Aloha oe:—Ua oluolu i ka Makua Mana Loa, ka lawe ana'ku i ke ola o Kou Pokii ke Alii Ka Mea Kiekie, William Pitt Leleiohoku, ka Hooilina Moi o ke Aupuni, a Kapena o ka Puali Kaua Lio Leleiohoku Guard.
Nolaila, o makou o na Koa Ponoi o ka Puali, ke hui pu aku nei makou me Oe, a me ka Ohana Alii, ma ke kanikau kumakena ana no Kou Pokii i aloha nui ia.
Nolaila, ma o ke Komi te la, ke waiho haahaa aku nei i ka makou Olelo Hoalohaloha, oia keia
Hooholoia. Ke hoike aku nei makou i ko makou aloha Alii, ma ke komo pu ana aku me Oe iloko o ka u kumakena, me ka naau walania no ka make ana o ko makou Kapena i aloha nui ia.
Hooholoia. Ke hoike aku nei makou i ko makou aloha Alii ia oe e Lydia Kamakaeha ka Hooilina o ke Kalaunu o ke Aupuni ma ka make ana o kou Kaikunane Pokii.
Hooholoia. Ke uwe kanikau pu aku nei makou me ka Makuahine Alii R. Keelikolani, no ka lawe ana'ku o ka Makua Mana Loa i Kau milimili.
Hooholoia. Ke uwe kanikau pu aku nei makou me na kaikuahina Alii o Olua, a me na Lii hanau o ka Aina.
Hooholoia. Ke kulou haahaa aku nei makou imua o ka Mea Mana Loa, a ke nonoi aku nei hoi i ka lokomaikai o na Lani e hoomama mai i Kou naau kaumaha, a Nana hoi e kokua mai ia Oe iloko o na la kanikau. D. Mana. W. Makanui. F. Keiki. J. Kanoe. S. Hookano.
I KA MOI KALAKAUA:
Aloha oe :—Ua oluolu i ke Akua ka Makua Mana Loa i ka lawe ana'ku i ke ola o Kou muli ke Alii Ka Mea Kiekie William Pitt Leleiohoku ka Hooilina o ka Lei Alii o ke Aupuni. A no ka mea hoi o makou o na lala o ka Ahahui Paio Ho'ulu Noonoo o na kanaka Opiopio Karistiano o Kamoiliili kekahi hapa o Kou makaainana.
A no ka mea hoi, E ka Makua—e, ma o kela kaumaha walohia ehaeha i ili iho maluna Ou a me Kou Ohana Alii, ke waiho haahaa aku nei makou i ka makou mau Olelo Hooholo Kumakena ma o ko makou mau Komite la, a e oluolu i Kou ilihia e ike mai.
Hooholoia. Ke hoike aku nei makou i ko makou aloha Alii, ma ke komo pu ana aku me Oe a me na Kaikuahine Alii o Olua a me ka Ohana Alii hanau a pau o ka Aina, iloko o ke kumakena ana no Kou Pokii Alii i aloha nui ia i hala aku.
Hooholoia. Ke kulou haahaa aku nei imua o ka Makua Mana Loa, a ke nonoi aku nei hoi i ka lokomaikai o ka Haku e hoomama mai i Kou naau kaumaha, a Nana hoi e kokua mai ia Oe a me Kou Ohana Alii a pau, i na manawa a pau o keia mau la kumakena.
J. W. IONA,
H. HAUMEA,
J. W. MIKASOBE, Komite.
SAM'L. SMITH,
M. NAAI.
I ke Alii ka Moi KALAKAUA
a me ka Ohana Alii:
E ka Makua:—Ma ka halawai ana o ka Ahahui Hoola Lahui o Kaumakapili, ua hooholoia, e hoouna aku i ko lakou Hoalohaloha ia Oe:
No ka mea, ua oluolu i ka Makua Mana Loa, ka lawe ana aku i ka Mea Kiekie ke Keiki Alii, ka Hooilina o ka Noho Moi William Pitt Leleiohoku, Kal ahoolewa, Kou Pokii i aloha nuiia mai keia ola ana; no ia mea, ua ili iho maluna Ou a me Ou Kuahine aloha a me ka Ohana Alii, a me ka Lahui, ka ukana luuluu, kaumaha, minamina, menemene, lihaliha a ehaeha kuhohonu no Kona hala ana.
O makou o kekahi hapa o Kou mau makaainana, ke hui pu aku nei me Oe iloko o ke kanikau kumakena, walohia no Kona hele ana.
A ke poloai ae nei makou mau pule i ka Makua Mana Loa, e loaa ia Oe a me ka Lahui ka maha, ma maluhia a me ke aloha iloko o Kona hoomalu ana.
M. Kuaea, Bakeke Keliipio,
M rs. Kaili, Mere Alapai,
M rs. T. Kuaea, Mrs. S. Kealoha,
M rs. Kahae Aea.
KA MEA KIEKIE RUTA KEELIKOLANI:
O makou na Lala o ka Ahahui Hoola Lahui o Kauaula, Waialua, Oahu. No ka hiki ana mai i o makou nei ka lono kaumaha walohia, no ka lawe ia ana'ku o ke ola makamae o ka Mea Kiekie ke Keiki Alii i aloha nui ia, William Pitt Leleiohoku, ka Hooilina Moi o ke Aupuni Hawaii nei ; Nolaila,
Ke hui pu aku nei makou me oe a me na Lala a pau o keia Ahahui, e uwe a e kanikau pu me oe, me ka naau i kaumaha luuluu i ke aloha, Nolaila, ke kulou haahaa iho nei makou, me ke noi aku i na Mana Lani, e maliu mai, a e hoomaholahola malie mai i kou manawa kumakena, a e manawalea pu mai no hoi ia oe i ka oluolu, ka pomaikai ka maha a me ke ola loihi, A ke panai pu aku nei no hoi makou me keia mau wahi lalani kanikau malalo iho :
Kanikau he aloha—a,
No Leleiohoku—e,
He aloha o Kona—a,
Kai maokioki—e,
I malino i ka hau—a,
Kehau o uka—e;
O ka pa a ka Eka—a,
Ka makani kolonahe—e,
Lai o Kaliliki—a,
Olu ai Hulihee—e,
One o Niumalu—a,
Nalu o Huiha—e,
Wai o Kiope—a,
Auau o Kalani—e,
Ia wai pilima—a,
He—u, he aloha—e,
Neu e Kawaihau—a.
C. N. KALAMA,
Komi te, J. H. HAUPU.
KA MOI KALAKAUA:
Aloha oe.—O makou o na Komite o ka Ahahui Opio o na Keikikane o Laie-wai, Apana o Koolauloa, mokupuni o Oahu. No ka hiki ana mai i o makou nei o ka lono kaumaha, walohia, no ka laweia ana aku o ke ola makamae o Kou muli Pokii, Ka Mea Kiekie Ke Keiki Alii i aloha nui ia, W. P. Leleiohoku, ka Hooilina Moi o ke Aupuni Hawaii nei; Nolaila, e
Hooholoia.—Ke hui pu aku nei makou me oe, a me na lala a pau o keia Ahahui, e uwe, a e kanikau pu me oe, me ka naau i kaumaha luuluu i ke aloha nui, no ka lawe ana aku o ka Mea Mana Loa i Kou Panihakahaka ma ka Nohoalii, ka mea a ka Lahui i makee nui ai me ka puuwai lokahi. Nolaila, ke kulou haahaa iho nei makou, me ke noi aku i ka Mea Mana Loa, e hooluolu mai i kou mau kaumaha, a nana no hoi e kokua mai ia oe i na wa a me na manawa a pau o keia mau la kanikau, no kou pokii.
Hooholoia.—Ke uwe a kanikau pu aku nei no hoi makou me ko Olua mau kaikuahine Alii, na Kama Alii Lani a moopuna a Iwikauikaua, no ke kailiia ana aku o ke ola o Ka Mea Kiekie W. P. Leleiohoku, a ke nonoi ae nei makou, na ka lokomaikai palena ole o na Lani e hoomanao mai i ko oukou mau puuwai palupalu.
Hooholoia.—Ke hui pu aku nei no hoi makou me ka Ohana Alii hanau o ka aina a me ka Lahui holookoa, e komo pu aku iloko o ke kanikau kumakena ana, no ko kakou Alii Opio, ka Hooilina Moi i hala aku la.
Hooholoia.—E hoounaia kekahi kope o keia Hoalohaloha Alii i ka Moi, a o kekahi iloko o na nupepa.
S. M. Kinimakaleeua,
L. B. Nainoa,
Komi te, M. K. Kou-opio,
J. W. Kahaiao,
J. H. Kahiona.
I KE ALII KA HOOILINA MOI:
E ka Makuahine:—A no ka mea, ua oluolu i ka Makua Mana Loa, ka lawe ana aku i ka Mea Kiekie ke Keiki Alii, ka Hooilina o ka Noho Moi W. P. Leleiohoku, Kou Kaikunane Pokii i aloha nuiia mai keia ola ana; a ua ili iho iluna Ou Kou Kaikunane, Moi, kou Kaikaina, ka Makuahine Alii, na'Lii a me ka Lahui holookoa ke kaumaha, ka luuluu, ka paumako, ka menemene, ka lihaliha, ka mokumokuahua,
Nolaila, o makou o na Hoa o Kou Aha Komite Hoola Lahui o Kaumakapili, ke haawi aku nei i ke kanaenae aloha ma ka huipu ana aku me Oe iloko o ke kanikau, ke kaumaha, ka luuluu, ka paumako no ke oki koke ia ana o ke ola o ke Keiki Alii nani, hanohano, kilakila, kapukapu alii, aloha lahui i Kona mau la opiopio loa.
Oiai Oe e noho ana iloko o ke kanikau, kumakena, paumako, no ka ako ia ana o ka muo, ka liko o ka Lahui, a o makou pu iloko o ia haawina. Aka ano, ua hoohauoliia makou i kou hiki ana'ku i ka Noho Hooilina Moi, a ke hooho ae nei makou, Ua kupono loa Kou ano Alii, ano Makua, akahai a haahaa, e ike ana i ka poe pilikia a me ka poe ilihune. Ua haaheo makou Kou mau lima hana iloko o ka hana nani oi kelakela Au e auamo nei no ke ola o Kou Lahui.
Ke pule nei makou, e hooloihiia kou ola ana a me ke ola o ka Moi, a me ka Ohana Moi a i ka puaneane, a e hoohua ae a e hoolaha a e hoopiha ia Hawaii.
Na makou:—Mrs. T. Kuaea, Mrs. Kahae Aea, Mrs. Hoonauao, Ikanaka, Mrs. Kaili, Bakeke Keliipio, Mrs. Susana Kealoha, Mere Alapai, Momona, L. Keliipio, S. K. Kuhano, W. A. Kiha.
AMA RA! AMARA!!
UA WEHE AE NEI AU I HALE AMARA ma ka Uwapo o Haaliliamanu, malalo o na hooponopono ana a kaua, Hawaii Ponoi. A nolaila, eia ka manawa! he Hawaii a he Hawaii. Ua makaukau mau wau e hana i na Kaa o kela a me keia ano, me ka nani, a haahaa loa ka auhau ana. Malaila e hana ia na kamaa lio me ka eleu, iloko o na minute pokole me ka mikioi lua, i ke Alanui Moi e hulali ai ka hao, haukawewe kela i ka Uwapo o Haaliliamanu. HARRY THOMAS.
16. 1m. (Keliimoewai.)
PILI LAAU HALE
Ma kahi o Walakahauki e loaa ai na Pili Laau Hale makepono loa i keia manawa. Nolaila, e wiki mai oukou o pau e. A malaila no hoi e loaa ai na mea nani a pau loa, o na waihooluu like ole i keia mau la kuai manuahi. 14 1m. J. T. WATERHOUSE.
NO KE KUAI!
KE KUNA KEONIANA.
I makaukau me na mea a pau.
No ka hoomaopopo pono ana, e ninau ia CHAS. LONG.
[8 3ms.] (Kale Lona.)
WILLIAM R. CASTLE.
(Kakela Opio.)
LOIO!
MA NA ANO HANA PILI KANAWAI A pau, e lawelawe koke ia me ka hikiwawe. Na Palapala Sila a me na Palapala pili aina o na ano a pau, e hoomakaukau ia no.
Keena hana, ma ke kihi o Alanui Kaahumanu a me Kalepa, Honolulu. (786 1y) [51]
CECIL BROWN,
Loio a he Kokua ma ke Kanawai
A HE AGENA NO KA HOOIAIO ANA I NA Palapala no ka mokupuni o Oahu.
Helu 8 Alanui Kaahumanu, Honolulu, H. P. A.
763 1y
OLELO HOOLAHA
E IKE mai auanei na mea a pau ke nana mai lakou, owau o ka mea nona ka inoa malalo nei, ke papa aku nei au i kela a me keia mea, mai hoaie mai oukou i kuu wahine mare ia Mrs. Liloa, oiai, ua haalele kumu ole mai oia ia'u. A ina e hoaie mai oukou iaia, alaila, maluna no ona ko oukou poho. J. P. KEO
Lepekaholo, Honolulu. 15 2t
E. STREHZ,
[AILUENE]
MALAILA E LOAA AI NA ANO LAAU A pau; a me na wai hoomaemae o kela a me keia ano. E hamama mau ana ka ipuka ma na po Poaono a pau. Ma ke kihi o Alanui Papu a me Hotele, ma Monikahaae. 1 1y
HE PAPA KUHIKUHI MANAWA HOLO
O KA
Mokuahi Hawaii
KILAUEA!
KAPENA MARCHANT!
Ape rila 20—Poalima, 5 p. m. . . . . . Nawiliwili
Ku ana ma Honolulu i ke kakahiaka la Sabati.
Ape rila 23—Poakahi, 5 p. m. . . . . . Hilo
Ape rila 30—Poakahi, 5 p. m. . . . . . Kaapuni ia Hawaii.
Mei 7—Poakahi, 5 p. m. . . . . . Hilo
Mei 14—Poakahi, 5 p. m. . . . . . Kona
Mei 21—Poakahi, 5 p. m. . . . . . Hilo
Iune 1—Poalima, 5 p. m. . . . . . Nawiliwili
Ku ana ma Honolulu i ke kakahiaka la Sabati.
Iune 4—Poakahi, 5 p. m. . . . . . Kaapuni ia Hawaii
Iune 11—Poakahi, 5 p. m. . . . . . Hilo
Iune 18—Poakahi, 5 p. m. . . . . . Kona
Iune 25—Poakahi, 5 p. m. . . . . . Hilo
I KA HOLO ANA MA KONA, O HOOPULOA KA PALENA.
Ma na huakai a pau a Kilauea e hoi mai ai mai Hawaii mai, aole e haalele ana ia Kawaihae a hiki i ka hora 10, a mahope iho paha; Makena, e like me ka mea i hoolaha wahaia; Maalaea a hiki i ka hora 7 a. m. a mahope iho.
Uku Eemoku mai Honolulu aku.
A hiki i Kaunakakai pela maluna mai . . . . . $5.00
" Lahaina, " " . . . . . 6.00
" Maalaea, " " . . . . . 7.00
" Makena, " " . . . . . 8.00
" Mahukona, " " . . . . . 10.00
" Kawaihae, " " . . . . . 10.00
" Kailua, " " . . . . . 10.00
" Kaawaloa, " " . . . . . 10.00
" Hilo, " " . . . . . 12.50
" Kau, " " . . . . . 15.50
Uku kaapuni ia Hawaii . . . . . 22.00
A hiki i na awa o Kauai . . . . . 8.00
Uku kaapuni ia Kauai, . . . . . 12.00
Uku ohua Hawaii oneki, . . . . . 2.00
Aole aie no na uku ohua.
Ma ka Hale Oihana e loaa'i na palapala.
Aole keena o hope e lilo, aia wale no a kaa mua mai ka uku moku. Aole e ili ka hewa no na paiki, ukana a puolo paha, ke ole e kakauia ka loaa ana mai.
E hookaaia ka uku ukana i ka wa e noiia aku ai.
SAMUEL G. WILDER (Waila,)
A gena.
Keena ma ka Hale Kuai Papa o Waila ma, kihi o Alanui Papu a me Moiwahine. (801 3m) 14 3ms.
HOOLAHA A KA LUNAHOOPONOPONO WAIWAI.
O KA POE a pau he mau kuleana koina ko lakou i ka waiwai o ka Mea Kiekie CHARLES KANAINA, i make kauoha ole, ina oia mau kuleana koina he moraki maluna o na waiwai paa a ano e ae paha, ke kauoha ia'ku nei e waiho mai ia mau mea, me na hooiaio kupono, i ka mea nona ka inoa malalo iho, ma ke Keena Ilamuku ma Aliiolani Hale, ma Honolulu, me ka lohi ole, a ke hai ia'ku nei, ina e waiho ole ia mai ia mau kuleana koina iloko o na Mahina Eono mai ka puka mua ana'ku o keia hoolaha, a iloko paha o na mahina eono mai ka la e kikoo ia'i, alaila e hoole loa ia no, a aole loa e ae ia ka Lunahooponopono Waiwai e uku aku ia mau kuleana koina. A o na mea a pau i aie i ka waiwai i oleloia, ke kauoha ia'ku nei e uku koke mai i ka mea nona ka inoa malalo iho.
W. C. PARKE.
Lunahooponopono Waiwai o H. H. C. Kanaina i make.
Honolulu, Aperila 6, 1877. 15 4t.
Hoolaha a ka Lunahooponopono Waiwai.
E KUAI KUDALA aku ana ka mea nona ka inoa malalo iiho, ma kahi noho o ka Mea Kiekie C. Kanaina i make, ma Haimoeipo, ma ke alanui Palace, Honolulu i ka Poakahi la 30 o Aperila, i ka hora 10 kakahiaka, na waiwai pilikino malalo iho, o ka waiwai o ka mea i make penei:
NA LAKO HALE, na koki me na pale like ole, na noho paipai, na noho hooluolu, na noho ohe, &c. na pakaukau koa, na pakaukau mabala o luna, na pakaukau hooloihi &c., na aniani o na ano a pau, na mea waiho hoonani, na ipu aniani hoonani, na aniani hoolele aka, na moe koa, uluna, pela hulu, na uhi kilika a veleweta, na holowaa waiho lole koa a me ka laau rose, na pahu humuhumu, na pahu Iapana a Pake, na pahu papale, na pakaukau hana, na mea waiho omole pakaukau, na pakaukau rumi hookipa, na noho loloa hooluolu, na pahu ume, na pahu kakau, na holowaa aoao waiho aulani, na kukulu buke, na moe hao, pela koki, na mea holoi maka, na pahu iliahi, koa a ano e ae, na peahi, na ipukuha, na eke ili kaahele, na ohe aniani liilii, na apa lole kilika, na pu kaupoohiwi, na pu panapana, na buke waiho kii, na lei a-i, na pahikaua, na kukaa moena, mea hoonui kii, na upena me ke aho he mau haneri umeke o na ano lehulehu.
NA PONO ANIANI.—He mau pahi a me na O pake hou, na pono dala a me na ano e ae, na bola, na kawele &c. Kapuahi a me na pono, na ipu ti, na kukui a me na uhi.
1 Lio kea, 1 Lio wahine, 2 paa lio haulaula, no ka holo hookahi a palua, 2 lio e ae, 19 bipi hana, 1 kaa lawe ukana a ohua hou, 1 kaa kahiko oia ano, 1 kaa uuku, 2 paa ilikaa palua, 1 paa ili holo pakahi, na keehi noho, na noho lio, na kepa, na punuku a ili poo, &c. 7 kaa bipi, 9 Lei bipi.
2 waa, 2 heleuma, 20 moa wahine, a he lehulehu wale aku o na mea maikai a nani. W. C. PARKE.
15 3t Lunahooponopono Waiwai.
E HOOLOHE E PONO AI!
E IKE auanei na mea a pau, ua kapu loa ka Aina mahi kalo o Hale Kawa, ma Kalihi uka. Ua ike ia i na manawa a pau, ua poino mau keia aina i ka ai ia e ka puaa, nolaila, mai keia la a mau loa'ku, e ki ia no i ka pu ka puaa ke ike ia maloko o ka loi a ma na palena o Hale Kawa me ka hala ole. A e uku ia no hoi ka mea nana e hopu a loaa ka puaa, elua dala makana. D. KAHAKALAU.
Kalihi-waena, Apr. 10, 1877. 15 3t.
WAi Hui o ka Hau!
E IKE IA ka Hale ma ka inoa o "BONANZA" Ke haawi ia aku nei ka poloai i na makamaka keonimana a me na lede o ke kaona Alii, e kipa ae ma ka hale hookipa inu wai momona o ko oukou makamaka nona ka inoa malalo iho, a e loaa no ka hau i hoomomonaia (ICE CREAM) na wai momona o na ano a pau! hoohuihui ia e ka hau iniki o Nuuanu. O keia hale, he hale i hoomakaukauia no na keonimana a he keena nani i hoomakaukau ia no na lede. E kipa mai, a o ka makepono me ka oluolu ke haawi ia'ku, oiai, he makamaka, a he kamaaina no Hawaii nei o JOHN W. CROWELL.
2-1 y (Keoni Koloela.)
Ma ka Hale "BONANZA" ma alanui Moi, mawaena o ka hale kahi umiumi a me ka halekuai o Dillingham ma.
NU HOU MAIKAI!
UA LOAA MAI
ENELANI, FARANI A ME AMERIKA MAI!
He nui wale na mea nani e hoohihi ai ka manao.
E LAA NA
Noho Berekane, Noho Mareka, Noho Italia, a me na lako a pau e pili ana i na Noho Paniolo.
NA TINI AILA MAHU!
Na Aila Pena a me na Pena o na ano a pau.
Ma wahi waiho mea ai, e like me na Pa, Pola, Pakeke Poi, Pola Poi, a me na laau o na ano a pau.
Na mea Mahiai,
Na Oo, na Koi, na Kui o na ano a pau.
NA KAULA HE NUI WALE KE ANO.
NA HAO O KELA A ME KEIA ANO HE NUI WALE.
Kuaina, Kuaina Upena, Na Upena, a me na ano Kuaina he makena wale.
Na Makau Lawaia o kela a me keia ano.
NA PU KAUPOOHIWI NANI A MAIKAI, Ka Pauda, Lu, Kukaepele-pu.
NA AHI-KOE o na ano LEHULEHU
Na Lole o na ano a pau,
EMI KE KUIKE.
Ahina Belekane o na ano a pau, na Kalakoa Lilina, na lole e ae he nui, na Alapia, Pahoehoe, a me na mea Silika o na ano he nui, pau ole ke helu aku, na Palule, Kuka, Puliki, Lolewawae, na Kamaa kane, wahine a me keiki, Na Wai hoope kino e moani ai, na Waiala kela loa o ke ala huihui he nui wale ke ano. Na Bakeke laau a hao, Na Kapu o na ano he nui. Na Paakai hoohu maikai, a me na mea he nui e hiki ai ke kaana maikai ia. E kipa mai a luana ma kahi o Walakahauki ma ka Uapo.
J. T. WATERHOUSE.
Honolulu, Mar. 20, 1877. [12 3ms.]
E IKE IA KAKOU HOOKANAKA!
E LULU LIMA ALOHA!!
ME KO OUKOU MAKAMAKA!!
L. ASEU.
UA HOI MAI NEI AU MAI KO'U KIEI ana aku nei i kuu Aina Kulaiwi. Ano, ke ku aku nei au me ka makaukau mau e lawelawe a e kuai makepono loa me oukou e na makamaka o ka Ua Kukalahale, i na Lole Nu Hou loa o kela a me keia ano, mai ko na Lede, Keonimana a me ko na Kamalei. I pau ai kuhihewa, e naue mai ma ko'u Halekuai, ma ke kihi ma Ewa o na Alanui Moi a me Nuuanu. [8 6m.]
WIL DER & Co.,
(WAILA MA.)
AIA MA KE KIHI O
ALANUI PAPU me MOIWAHINE.
Ua hoolako mau ia me ke kuai ana aku i na
Papa me na Lako Kukulu Hale
O NA A PAU.
NA PANI PUKA!
PUKA ANIANI.
OLEPELEPE,
LAKA,
AMI LIILII,
AMI LOLOA.
PENA o na ano a pau,
AILA PENA,
VANIKI, &c.
Ma Balaki Pena me Puna,
Na Pepa Hale me na Lipine Pepa.
Aniani, Paakai, &c.
O na mea a pau maluna'e, e kuai makepono loa ia'ku no ke Dala Kuike. [3—1y.]