Ka Lahui Hawaii, Volume III, Number 19, 10 May 1877 — Page 3

Page PDF (1.17 MB)

View this newspaper issue

NA ANOAI.

Ua nele loa mai nei na pipa alanui i na mea hou ole.

Inehinei i holo aku ai ka moku Fantome no Maui.

Ua nui ka ua i haule mai nei ma Honolulu nei, a mahuahua ka hauoli.

Aloha oe e ko makou elemakule D. Manuia. Aole makou i poina ia oe.

Ua wehe ae nei kekahi Hawaii Ponoi i hale kahi umiumi ma Alanui Beritania.

Ua hookauluaia ka manao o ko kakou kaikuahine Mrs. Kahelemauna a keia pule ae.

I ke kakahiaka nui o ka la apopo e ku mai ai ke Kilauea, a ia ahiahi no e holo hou ai no Kauai.

He nui na leta a na makamaka i loaa mai, e hoomanawanui nae, a e puka aku no e like me ka hiki.

Ua kaumaha makou i ka lohe ana mai no ka make ana o Dr. Treat, he Kakauolelo o ka Papa Amerika, i ke 73 o kona mau makahiki.

O ka Poakahi mua iloko o Iune ka manawa no ke koho makahiki ana i na Luna Kinaiahi Nui. Owai la auanei ke komo ana?

Ape rila 29, ma Kealia, Kona Hema, Hawaii, ua hoopomaikai ia o J. E. K. Namaka me Kaimiola me kekahi opuu kaikamahine.

Ua hookaulua ia ko kakou Kaao i keia pule, a keia hebedoma ae, e puka aku no. E nana iho no oukou, a e ike no i ka piha loa o kahi waa.

I ke Komite o ka "Ahahui Himeni o ka Lanakila," o Haiku, Maui, aole i loaa mai ma ko makou lima ka oukou mea i manao ai e pai. Auhea? E hoouna mai.

E kukulu ia'na i moku kuna huila mahope no Kapena Hopena, no ka holoholo ana mawaena o keia awa a me Kahului. Pomaikai. Hulo no ke Kuikahi Panailike.

I keia mau la aku nei, ma Waialua, ua make iho la kekahi haole kamaaina, i noho loihi ma Hawaii nei. Ua hiki mua mai oia i Hawaii nei me Kauka Ruka, oia o Mr. Curtis.

I ka Poalima nei ko makou ike ana 'ku i ke Kuokoa e heluhelu ia mai ana, aka, o ka la i oleloia no ke pai o ka Poaono, pela ma ke poo Auwe! Kuhihewa ae la ka hoi makou. O ua olalau nei no paha keia. Auhea oe, eia hou keia huhewa o makou, e aho ia, kakauia mai i wahi itamu. Nani kela.

Ua nui ka uluaoa ma ka Hale Hookolokolo Hoomalu i keia mau la iho nei, mamuli o ka mikiala o na makai, a pau i ka hopuhopu ia ka poe haihai i ke kanawai. No lakou ka mahaloia, a o ka maluhia malalo o ka lakou kiai ana ka waiwai nui o ka lehulehu.

E halawai ana na makaainana o ka apana o Ewa ma ka luakini o Waiawa, ma ka la 25 o keia mahina. E kuka a e noonoo pu me ko kakou Lunamakaainana no na mea e pono ai kakou iloko o ke au o ke Kuikahi Panailike, a pela aku. E hele nui ae kakou a pau maloko o ua mau wahi la e kaana i kahi momona o ka manao e hopu ai, a e hilinai aku i ke Akua Mana Loa, ka manaolana o ka apana, i holo imua na hana o ka lahui.

E nui ana ka lealea a me ka hauoli ke hiki aku i ka la 11 o Iune ae nei ma Kapiolani Kuea. He mau heihei a pela wale aku. E wehe mua ia'na ka Paka i ke kakahiaka me ka haiolelo wehe a ka Moi, mawaena o na leo pu kuniahi aloha malaila, na puali koa, a me ka puali puhi ohe. E lilo ana ia i la kulaia nui, a e nui ana na lealea me na hauoli no ka hookilakila ana i ka la hoomanao i ka inoa Kamehameha Nui Nai Aupuni.

Auhea oe e W. Yates, o ka Hale Koa; o kau mau anoai, ua opiopi ia, a waiho ia ma ke kuono. Aole o makou manao, he mea kupono ke ao ana'ku i ka lehulehu ma ia mau mea; nolaila, ua oluolu makou e kapae loa, e poina mai ko makou noonoo ana, me ka manaolana, e pau kou mau hihio moeuhane ana no na anoai "akamai i ka hula, olioli a me na hooipoipo." Pela ko Huaa noonoo pono.

Moolelo o ka Ahahui Euanelio o
KA MOKUPUNI O OAHU.

Halawai ka Ahahui Euanelio o Oahu, ma Kawaiahao, Aperila 10, M. H. 1877. Hora 10 A M
Weheia na hana me ka Haiao a ka Lunahoomalu mua, Rev. J. Manuela.
Hoomaopopo ia na lala i hiki mai.
Ekalesia Kahu Haiolelo Elele
Kawaiahao H. H. Paleka J. K. Iosepa Kupele
Kaumakapili M. Kuaea    J. W. Kaapu
Kalihi & M. S. Paaluhi    Huka
Ewa     J. S. Kalana Mahi
Waianae     J. W. P. Kahalewai Haona
Waialua     Amara
Kahuku J. Kekahuna    Niau
Hauula & Kahana D. Kekiokalani
Waikane J. N. Paikuli    Kailaa
Kaneohe     J. P. Kamai
Waimanalo S. Waiwaiole    Apela
Wailupe     Kawai
Na Lala mau, Rev. J. F. Pokue, H. Binamu, L. Kamika, P. Naone.
Koho ka Aha ia Rev. S. Waiwaiole i Lunahoomalu, S. Paaluhi i Kakauolelo.
Pule ka Lunahoomalu.
Ma ke noi a M. Kuaea e heluhelu hou mai ke Kakauolelo i na lala i hiki mai.
Koho ka Lunahoomalu i Komite Imi Hana, M. Kuaea, J. N. Paikuli, Apela.
Na Komi te Imi Haawina. J. Manuela, D. Kekiokalani, H. U. Mahi.
Komi te Pai Moolelo, M. Kuaea, S. Paaluhi.
Ma ke noi a J. Manuela, e lilo keia manawa i wa haipule a hoi mai na Komite Imi Hana. Hooholoia.
Heluhelu hapa mai o M. Kuaea i ka hoike a ke Komite Imi Hana. A hoaponoia.
1 Hapalua Hora haipule.
2 Na Hoike Kihapai
3 Na Palapala Hoopii.
4 Na Ekalesia Kahu ole.
5 Heluhelu Kumumanao.
6 Koho ana i na Komite o keia aha e hoike ai i ka Aha Euanelio Hawaii.
7 Koho Elele no keia aha i ka Aha Euanelio Hawaii
8 No na hana kuloko.
9 No na hana kuwaho.
10 No na kahunapule i make.
11 Kahi e ku hou ai keia aha.
Ma ke noi a Kamai, e hoopanee i ke kumuhana 1 a hiki i ka la apopo. Hooholoia.
Hapai ka aha i ke kumuhana 2.
No na hoike kihapai.
Noi mai o M. Kuaea e kali kana hoike a mahope.
Heluhelu mai o S. Paaluhi i ka hoike o ka ekalesia o Kalihi me Moanalua.
Heluhelu mai o J. S. Kalana i ka hoike o ka ekalesia o Ewa.
Hoike waha mai o S. N. Emesona no ka Ekalesia o Waialua. A kauoha pu mai i keia Aha e pule i ke Akua no ia Ekalesia, Pule o D. Kekiokalani.
Heluhelu mai o D. Kekiokalani i ka hoike o ka Ekalesia o Hauula me Kahana.
Ma ke noi a M. Kuaea e hoopanee keia Aha, a hui hou i ka Hora 1 P. M. Ama ka Hora 3 P. M. Hoomaka ka Ahahui Kula Sabati.
Pule o Apela.
Halawai hou ka Aha i ka hora i hoopanee ia. Pule o Kawai.
Hapai ka Aha, No na Hoike Kihapai.
Heluhelu mai o J. N. Paikuli i ka hoike o ka Ekalesia o Waikane.
Heluhelu mai o J. Manuela a me J. P. Kamai i ka hoike o ka Ekalesia o Kaneohe.
Heluhelu mai o Kawai i ka hoike o ka Ekalesia o Wailupe.
Hapai ka Aha no ke Kumuhana 3.
No na Palapala Hoopii.
Heluhelu mai ke Kakauolelo, he Palapala e hookuu aku i ko Rev. J. Manuela noho Kahu ana no ka Ekalesia o Kaneohe, ua ae ia e na aoao Elua me ka oluolu a me ke aloha hoi.
Heluhelu hou ia mai, He Palapala Hoopii no Ewa. E noi mai ana i ka Aha e Hookahuna ia J. S. Kalana i ko lakou Haiolelo.
Ma ka noonoo o ka Aha, e koho ka Lunahoomalu i Komite e nana i ka Palapala Hoopii o Kaneohe.
L. Kamika, M. Kuaea.
Lawe ka Aha a noonoo i ka Palapala Hoopii a ka Ekalesia o Ewa.
Ua ninau ka Aha i ko J. S. Kalana ae i ka Palapala noi a ko Ewa.
Ua hoike mai oia i kona ae ia Palapala Kahea.
Ma ke noi a J. Manuela e ninau ka Aha ia J. S. Kalana i kona makaukau i ka oihana kahunapule.
Na L. Kamika i alakai mua ka ninau. H. Binamu. M. Kuaea. S. Waiwaiole.
Hooholo ka Aha a ka la apopo e ninau hou ia o J. S. Kalana.
Ma ke noi a M. Kuaea e hoopanee keia Aha, a halawai hou i ka la apopo. Hora 9 A. M.
Pule o J. W. P. Kahalewai.
La Hana 2.
Halawai ka Aha i ka hora 9 A. M. ma Kawaiahao, Aperila 11. Lunahoomalu ma ka Noho.
Malama ia ka Hapalua hora haipule.
Heluhelu mai ke Kakauolelo i ka moolelo o ka la mua, me na hooponopono a hoaponoia.
Hapai hou ka Aha no ka ninau ana ia J. S. Kalana.
Ma ke noi a M. Kuaea, e hookuu aku ia Kalana no kahi manawa, ae noho ka Aha e noonoo, Hooholoia.
Hooholo ka Aha e hoapono i ko Kalana Hookahuna ana.
Koho ka Lunahoomalu i Komite Hoonoho ia Kalana.
M. Kuaea, J. N. Paikuli, S. Waiwaiole, S. Paaluhi, D. Kekiokalani, J. Kekahuna.
Heluhelu mai ke Kakauolelo, he Palapala noi na M. Kuaea e hookahuna ia S. N. Emesona i Luna Haiolelo no ka Haku.
Noi mai o Kailaa, e hoomaha ka Aha, a hui hou i ka hora 1 P. M. Pule o L. Kamika.
Halawai hou ka Aha i ka hora i hoopanee ia, Pule o Kupele
Hapai hou ka Aha i ka noonoo ana e hookahuna ia S. N. Emesona i Lunahaihaiolelo no ka Haku.
Ua kamailio ka Aha a ua haule ka Palapala noi, no ka hookahuna ana ia S. N. Emesona.
Hoike waha mai o M Kuaea ke Komi te o ka Palapala Hookuu o ka Ekalesia o Kaneohe i ko lakou kahu. E hoapono ana ia Palapala. Hooholoia.
Heluhelu mai o M Kuaea i ka hoike o ka Ekalesia o Kaumakapili.
Heluhelu mai o J. Kekahuna i ka hoike o ka Ekalesia o Kahuku.
Ma ke noi a J. K. Iosepa. E hoopanee keia Aha, a halawai hou i ka la apopo Hora 9 A M. Pule o Iosepa.
La hana 3 Aperila 12. Halawai ka Ahahui i ka hora 9 A. M. ma Kawaiahao S. Waiwaiole ma ka Noho.
Malama ia ka hapalua hora haipule Heluhelu mai ke Kakauolelo i ka moolelo o ka la 2 a hoaponoia.
Hapai hou ka Aha. No ke Kumuhana 2. No ka hoike Kihapai.
Heluhelu mai o H. H. Pareka i ka hoike o ka Ekalesia o Kawaiahao.
Heluhelu mai o Haona i ka hoike o ka Ekalesia o Waianae.
Heluhelu mai o S. Waiwaiole i ka hoike o ka Ekalesia o Waimanalo.
Olelo Hooholo na J. F. Pokue Hooholoia E lilo o S. N. Emesona i keiki na keia Aha, a e komo aku i ke Kula Kahunapule o kakou ma Honolulu nei. Hooholoia.
Hapaiia ke Kumuhana 4 No na Ekalesia Kahu ole.
Hooholo ka Aha e hoomau aku i ko H. H. Pareka noho kahu ku i ka wa ana no ka Ekalesia o Wailupe.
Hooholoia o J. F. Pokue i kahu ku i ka wa no ka Ekalesia o Kaneohe a me Waialua.
Hooholoia o J. Kekahuna i kahu ku i ka wa no ka Ekalesia o Hauula.
E hoomau aku i ko J. N. Paikuli noho kahu ku i ka wa ana no ka Ekalesia o Waianae.
Hoike mai o J. Manuela ke Komite o keia Aha i koho ai e pili ana i ka aie o ka ekalesia o Wailupe, a me D. Kekiokalani ko lakou Kahu mua.
Ma ke noi a J. S. Kalana, e hoomaha keia Aha, a hui hou mai i ka hora 1 P. M. Pule ka Lunahoomalu.
Halawai hou ka Aha i ka hora i hoopaneeia. Pule o Kailaa.
Hapai ka Aha no ke Kumuhana 10. No na Kahunapule i make.
Hooholo ka Aha, e lilo o J. F. Pokue i Komite nana e haku i na manao hooalohaloha no na Kahunapule i make.
Hapai ia ke Kumuhana 5
Heluhelu Kumumanao.
Heluhelu mai o J. Manuela i kona haawina, "Heaha ke koi i oleloia, e waiho ana ma ke kumu o kela laau keia laau, a heaha hoi ka laau i oleloia e oki, i hoikeia ma Mataio 3: 10?"
Heluhelu mai o Kalana i kona haawina, "Heaha ka peahi a ke Akua e hoomaemae ai i kana hua ai, i hoikeia ma Mat. 3:12?"
Heluhelu mai o Kahalewai i kona haawina, "Heaha ka aahu keokeo o ka poe pono, i hoikeia ma Hoikeana 3:5?"
Heluhelu mai o Waiwaiole i kona haawina.
E wehewehe i ka pauku ma Heb. 12:28.
Heluhelu mai o S Paaluhi i kona haawina, "O ka pule ikaika a ke kanaka pono, e lanakila nui ia? Heaha la ka ikaika kupono o ka pule, i lanakila nui ai ke kanaka pono?"
Heluhelu mai o D. Kekiokalani i kona haawina, "O ka mare ana o kahi Kahu mare a mau kahu paha i kekahi mau mare a mau mare paha, a loaa kekahi keakea a mau keakea paha, iloko o ka wa e mare ia ana e ke kahu mare, kauo a hina, ua mana anei a ku i ka maikai ia mare ana?"
Heluhelu mai o L. Kamika i kona haawina.
Heaha la ka hana kupono a ke Kahu Ekalesia e hana ai i mea e ola ai oia, a me kona ohana, ke hanai pono ole ia mai oia e ka Ekalesia?
Hooholo ka aha, e hoolaha ia ka haawina a L. Kamika ma na nupepa.
Hapaiia ke Kumuhana 6.
Koho ana i komite hoike i ka Ahahui Hawaii.
M. Kuaea ke komite hoike i na hana a na Ekalesia o keia aha, i ka Ahahui Euanelio Hawaii.
S. Paaluhi ke komite hoike i na hana a ka Ahahui Euanelio o Oahu, i ka Ahahui Hawaii.
Koho ka lunahoomalu ina elele a keia aha, i ka Ahahui Euanelio Hawaii. J. W. P. Kahalewai, J. K. Iosepa, J. W. Kaapu a me Abela.
Hapai ke aha no ke kumuhana 8. No na hana kuloko a me ke kumuhana 9.
Ua waiho ia ma ka lima o kahi komite, ka noonoo ana no na hana kuloko, M. Kuaea, J. N. Paikuli a me Mahi, a hoike mai i ka la apopo.
Hoike mai o J. Manuela, ke komite Imi Haawina.
Hoapono aku ka aha i ka hoiko a ke komite.
1. E wehewehe ia Mataio 16:19. Rev. M. Kuaea.
2. Heaha la na ipuka o ka po i olelo ia ma Mataio 16:18? Rev. S. Paaluhi.
3. Heaha ke kumu o ko Iesu uwe ana ma ka luakupapau o Lazaro? J. S. Kalana.
4. E wehewehe i ke Mele a Solomona 1:5—6. J. W. P. Kahalewai.
5. E wehewehe i ke Mele a Solomona 8: 8—9. Rev. D. Kekiokalani.
6 Ka manaoio me ka mohai a Apela. Rev. L. Kamika.
7. He pono anei i ke Kahunapule i Levi ia e lawelawe i ka oihana loio? Rev. S. Waiwaiole.
8. Ua olelo mai o Iehova e noho oia ma ka pouli loa. Heaha ia pouli i hoikeia ma I Na Lii 8:12. Rev. J. N. Paikuli.
9. Owai ka makuahine o na wahine hookamakama, a heaha ka mea i olelo ia
ai he makuahine hookamakama ia Hoik. 16:5. J. K. Iosepa.
10. He pono anei i na Kahunapule ke ao wale aku no ma ka olelo maikai me ka hana lima ole? Rev. J. Kekahuna.
11. Heaha la ka oihana i hoikeia ma ka Baibala i kupono imua o ke Akua? Rev. H. H. Paleka.
12. O ka hope hea o ka Kristo Oihana Kahuna i hana ai ma ka honua nei, a o ka hope hea kana i hana ai ma ka lani. Rev. J. Manuela.
Ma ke noi a Rev. J. F. Pogue, e hookuu iaia ma ke ano komite no ka haku ana i na manao hoalohaloha no ke Kahunapule i make, ua ae aku ka aha ia noi.
Hooholo ka aha o S. Waiwaiole, J. K. Iosepa, J. W. P. Kahalewai, na komite no ka haku ana i na manao hoalohaloha no Rev. B. W. Paleka.
Hoopanee ka aha a halawai hou i ka la apopo, hora 8 a m, pule o Rev. S. Waiwaiole.
La hana 4. Halawai ka aha ma Kawaiahao, Aperila 13, hora 8 a m.
Lunahoomalu ma ka noho, malama ia ka hapalua hora haipule, heluhelu mai ke kakauolelo i ka moolelo o ka la hana 3, me na hooponopono a hoaponoia.
Heluhelu mai o S. Waiwaiole ke komite no ka haku ana i na manao hoalohaloha no B. W. Paleka i make. "He poe malihini kakou a pau ma keia noho ana, aole kakou e mau ana, a ke hele liilii aku nei kekahi mau makua o kakou."
Iloko o ka malama o Maraki i hala ae nei, ua lawe aku la ka Makua mana loa i kekahi makua mikanele o keia Ahahui iloko o ka maha mau loa, e waiho la no ko ke Akua poe kanaka, ia Rev. B. W. Paleka, he makua nana i hooikaika nui e hoonaauao i keia lahui. A ke uwe nei kakou iaia me ke kaumaha nui, no ka mea, ua pau ka ike ana, a me ka lohe ana o keia aha i kona leo ma ke ao ana, a paipai ana mai i keia aha, e kupaa ma ka pono a e hooikaika i ke kukulu ana i ko Iesu aupuni, ua pau ka ike ana o keia Ahahui i kona mau helehelena kino maloko o keia aha a ua komo aku la oia i ka olioli mau loa, a ua kuu ka luhi no ka hooikaika ma keia ao. Ua pau kona paio ana me na enemi o keia noho ana, a ua hoopaa hoi i ka manaoio i ka mea nui hookahi ana i au mai ai iloko o ka moana loa mai Amerika mai, a amo hoi i ke Kea o ka Haku ma Hawaii nei. A ua lei aku la oia i ka lei o ka pono ka mea a ka Haku i haawi mai ai iaia, aole nae iaia wale no, aka, i ka poe a pau a ka Haku e haawi mai ai me kona olioli nui. Hala aku la kekahi makua o ka pono i noho me ka hoomaha ole, no ka oihana a ka Haku, he Peresidena no na kula a na kaula. Ke uwe nei au mau keiki me ke paiauma ana ma o a maanei. Komo aku la oia i ka hale a hoomaha, kuu ka luhi palekaana aku la kela. S. Waiwaiole, J. K. Iosepa, na komite.
Heluhelu mai o M. Kuaea ke komite no ka hoohui ana i na Ekalesia liilii o keia mokupuni o Oahu nei. Hooholo ka aha, e lawe i ka hoike a ke komite a e noonoo pakahi i na mahele. Hooholoia. No ka mea, ua maopopo lea ka pilikia o na kihapai Ekalesia liilii, no ka hiki ole ia lakou ke malama i ke ola o ko lakou mau kahu. A no ka mea hoi, ua maopopo lea ka pilikia a me ka hoomanawanui o na Kahu Ekalesia e noho nei ma kekahi mau Ekalesia liilii, nolaila, e hooholoia, e hoohuiia kekahi mau Ekalesia liilii penei.
1 E hoohui i ka Ekalesia o Wailupe me ka Ekalesia o Kawaiahao i hookahi. Hooholoia.
2 E hoohui i ka Ekalesia o Waimanalo me ka Ekalesia o Kaneohe i hookahi, e hookoe ana ia Kahaluu ma no Waikane. Hooholoia.
3 E hoohui i ka Ekalesia o Kahana me ka Ekalesia o Hauula i hookahi.
4 E hoohui aku ia Laie a hiki i Waimea, no ka Ekalesia o Kahuku.
5 E hoohui ia Lihue me ka Ekalesia o Waianae.
O ka mahele 3 a hiki i ka mahele 5, ua hooponopono ka Aha me na hoololi a me na pakui. Ua hooholo loa ia.
I mea e pono ai keia hoohui ana, e kohoia o M. Kuaea, i komite e launa aloha aku me keia mau ekalesia, e alakai i keia mau ekalesia, e oluolu a e kuikahi ma keia hoohui ana. M. Kuaea Komite.
Hapai ka Aha i ke Kumuhana 11. Kahi e ku ai keia Aha.
Ina e hoopanee keia Aha, e halawai hou aku ma Waianae, i ka Poalua elua o Okatoba, M H 1877. Hooholoia
Ma ke noi a H. U. Mahi, e koho keia Aha Euanelio i Komite hau i na manao hoalohaloha no ka hooilina Moi i make, ke Keiki Alii Wohi i hala e aku la, William Pitt Leleiohoku.
Koho ka Aha ia Rev. M. Kuaea, Rev. S. Waiwaiole a me H. U. Mahi i Komite.
E kakauia i ekolu kope: 1 Na kona hanau mua. 2 Na kona makua aloha R. Keelikolani. 3 E hoolahaia ma na nupepa o kakou.
A e kakauia hoi keia ma ka Buke Moolelo o keia Aha. Hooholoia.
Olelo Hooholo, Hooholoia—Ke mahalo aku nei keia Aha i ka Ekalesia o Kawaiahao, no ko lakou malama maikai ana mai i na hoa o keia Aha, ma na mea e oluolu ai ke ola kino, ma ke paina awakea ana a me ka mea nana i lawelawe na mea ai, oia hoi o D. W. Kaawa.
Hookuuia me ka pule a ka Luna Hoomalu. S. PAALUHI.
Kakauolelo.

Hoolaha a ka Luna Hooponopono Waiwai.

O NA MEA A PAU I KULEANA I KA WAIWAI o C. KANAINA i make, i waiho ole ia mai, e oluolu lakou e waiho koke mai imua o ka mea nona ka inoa malalo iho nei, me ka hooiaio pu ia, oiai ua makemake au e uku aku ia mau kuleana me ka ae o ka Aha Hookolokolo.
Ua waihoia mai he mau Bila Aie lehulehu, me ka hooiaio mua ole ia, nolaila, e hoomaopopia keia mea, a e hana kokeia. W. C. PARKE.
Lunahooponopono Waiwai o C. Kanaina.
Honolulu, Mei 9, 1877. 2t

OLELO HOOLAHA.

E IKE auanei na kanaka a pau, haole pake, a ano kanaka e ae, mai hoaie mai oukou i kuu wahine mare ia Kauloa, aole hoi e hookipa iaia. Ina o ka poe e hoaie iaia, aole au e hookaa i kona aie. A o ka poe e hookipa iaia, e hoopii no au ia lakou imua o ka Lunakanawai. E hoolohe i keia o pilikia auanei. Chas. Copp.
Makawao, Maui, Apr. 24, 1877. 19 3t

OLELO HOOLAHA.

Owau o Ruta Keelikolani, o Honolulu, Oahu, ke kukala aku nei au ma ke akea, i ko'u hoonoho a hookohu a hoolilo ana aku i ko'u kanaka i manao pono ia, oia o Simon Kaloa Kaai, o Kailua, Kona Akau, Hawaii, i Luna nana e hooponopono i ko'u mau Waiwai Paa, a me ko'u mau Waiwai Lewa, mai Hawaii a Kauai. Nolaila, ke kauoha ia aku nei na Konohiki, na Hoaaina, ka poe mea hoolimalima mai i na aina a me na mea e ae no'u, e ike ae iaia, me ka hoolohe, a me ka malama ana i kana mau kauoha a pau. A ke kauoha pu ia aku nei ka poe a pau a'u i aie aku ai, e hooponopono aku me ia, a me ka poe a pau i aie mai ia'u e uku aku iaia.
R. Keelikolani.
Honolulu. 19 tf.

OLELO HOOLAHA.

E weheia ana ke Kula Hanai a Kula La o Haleakala, Maui Hikina, i ka pule mua o Iune, me ka makaukau pono no Kanaono haumana. O ka Olelo Beritania pololei ka mea e aoia. a e hoomaamaaia na haumana ma na mea e pili mahiai, kanu laau, kanu kope, ka hana ana me na mea hana a na kamana, a me na ano hana e ae. E aoia no na haumana me na hana hooikaika kino, ka Paikau Koa, ka Himeni, &c.
O ka uku he $40.00 no ka makahiki, e uku mau i kela a me keia hapaha, e hookaa mua mai me ka hala ole. No ka hoomaopopo pono ana, e nana i na palapala pai liilii, a i ole, e kakau i ke kumu ma ke Kula o Haleakala, Maui. F. L. CLARKE. Kumu.
19 3ms.

HALE KUAI MEA AI!
NO
FRIEL & BUSH,
(Ma ka Hale Mu, Alanui Papu.)

Ke kono aku nei laua i na mea ohana a me ka poe e ae a pau e makemake ana e loaa
Na Lako Mea Ai Maikai!
ma na kumukuai makepono, e hele ae malaila. Eia no na mea ai:
Na Berena palupalu,
Na Berena wai soda, waina a me Graham,
Na Palaoa Graham a me na Huita,
Na Makale a me na Olepe,
Na Uha Puaa Hame,
Na Io Bipi paakai moa,
Na Ula iloko o na tini,
Na Waiubata Kaleponi,
Na Kele a me na Elelo Bipi moa,
Na Hone Kaleponi,
Na Waina maloo,
Na Kopaa keokeo Kaleponi,
Na Kope moa, na Ti lau,
Na Aila Puaa,
Na Elelo Hipa, a me ka Bipi,
Na Io Hipa Pelelu,
Na Huelo Bipi,
Na Hua Manu,
Na Kopaa Hawaii o na ano a pau,
Na Pia Lole, a me na lako Ai he nui wale aole e pau ke heluia.
E hoopihaia na kauoha o na Mokupuni e mai me ka hikiwawe, a e opeopeia me ka maikai.
E kipa mua mai ma ko maua Hale.
FRIEL & BUSH.
805 2t. 19 2t.

KUAI A KA LUNA HOOPONOPONO WAIWAI.

E kuai aku ana ka mea nona ka inoa malalo iho ma ke kudala, maluna o kahi i noho iho nei o E. Mikalemi, ma Kapalama-kai, Honolulu, Oahu, ke hiki aku i ka Poaha la 10 o Mei, ma ka hora 10 A. M. oia na lako hale o ka mea i make; oia na Noho, na Pakaukau, na Noho Uwai, na Pakaukau kakau, na Pahu Lole, na Ume waiho kapa, Na mea kau Mamalu, na Moe, na Uluna, he paa ili lio kauo kaa, 2 mau kaa huki l ma, na lako pa, a me na heluna nui o na lako hale maikai a hoonani.
W. L. WILCOX.
18 2t. Lunahooponopono Waiwai.

OLELO HOOLAHA.

KE papa ia'ku nei na mea a pau aole e hele wale maluna o na Aina nona na inoa o Malaekahana a me Kahuku; a o na holoholona, lio, bipi, a me ka puaa e hele wale ana maluna o keia mau aina, e hana ia no e like me ke Kanawai. UA PAPA LOA IA NA ILIO, aole e hookuu wale ia maluna o keia mau aina, a o ka poe e hele ae ana ma ke Alanui Aupuni me na ilio, ke hai ia'ku nei e hoopaa me ke kaula a hala na palena o keia mau aina.
J. A. HASSINGER.
Kahuku, Mei 1, 1877 r 18 5t.

OLELO HOOLAHA.

E IKE AUANEI NA ANO KANAKA A PAU, ke hai ia'ku nei ka lono, ua kapu loa ka hookau wale ana i na ano holoholona a pau maluna o kuu aina kuai, e waiho ia ma NUWANU, apana o Hilo-paliku, nona na eka he 25 a oi aku. O ka mea a mau mea e hookuu wale ana i ko lakou mau holoholona, a i loaa i kuu luna ia F. D. Nawahine, e hooukuia ke poo hookahi $1.00. E lilo keia i kanawai paa loa. Mrs. Kamali
Hilo, Hawaii, Apr. 18, 1877. (17 3t.) 805 4t* 808

NO KE KUAI!
KE KUNA KEONIANA.

I makaukau me na mea a pau.
No ka hoomaopopo pono ana, e ninau ia CHAS. LONG.
(795) [8 3ms.] (Kale Lona.)

CECIL BROWN,
Loio a he Kokua ma ke Kanawai

A HE AGENA NO KA HOOIAIO ANA I NA Palapala no ka mokupuni o Oahu.
Helu 8 Alanui Kaahumanu, Honolulu, H. P. A.
763 1y

WILLIAM R. CASTLE.
(Kakela Opio.)
LOIO!

MA NA ANO HANA PILI KANAWAI A pau, e lawelawe koke ia me ka hikiwawe. Na Palapala Sila a me na Palapala pili aina o na ano a pau, e hoomakaukau ia no.
Keena hana, ma ke kihi o Alanui Kaahumanu a me Kalepa, Honolulu. (786 1y) [51]

UA MAKEMAKEIA,

I ELUA MAU KEIKI HAWAII I AKAMAI I ka heluhelu ana a me ke kamailio ana ma ka olelo Beritania, no ke ao ana i ka Oihana Pai Palapala. E ninau koke ma ka halepai o ka Nupepa PACIFIC COMMERCIAL ADVERTISER. H. L. SHELDON.
17 tf. (Kelekona.)

AMA RA! AMARA!!

UA WEHE AE NEI AU I HALE AMARA ma ka Uwapo o Haaliliamanu, malalo o na hooponopono ana a kaua, Hawaii Ponoi. A nolaila, eia ka manawa! he Hawaii a he Hawaii. Ua makaukau mau wau e hana i na Kaa o kela a me keia ano, me ka nani, a haahaa loa ka auhau ana. Malaila e hana ia na kamaa lio me ka eleu, iloko o na minute pokole me ka mikioi lua, i ke Alanui Moi e hulali ai ka hao, haukawewe kela i ka Uwapo o Haaliliamanu. HARRY THOMAS.
16. 1m. (Keliimoewai.)

E IKE IA KAKOU HOOKANAKA!
E LULU LIMA ALOHA!!
ME KO OUKOU MAKAMAKA!!
L. ASEU.

UA HOI MAI NEI AU MAI KO'U KIEI ana aku nei i kuu Aina Kulaiwi. Ano, ke ku aku nei au me ka makaukau mau e lawelawe a e kuai makepono loa me oukou e na makamaka o ka Ua Kukalahale, i na Lole Nu Hou loa o kela a me keia ano, mai ko na Lede, Keonimana a me ko na Kamalei. I pau ai kuhihewa, e naue mai ma ko'u Halekuai, ma ke kihi ma Ewa o na Alanui Moi a me Nuuanu. [8 6m.]

NU HOU MAIKAI!
UA LOAA MAI
ENELANI, FARANI A ME AMERIKA MAI!

He nui wale na mea nani e hoohihi ai ka manao.
E LAA NA
Noho Berekane, Noho Mareka, Noho Italia, a me na lako a pau e pili ana i na Noho Paniolo.
NA TINI AILA MAHU!
Na Aila Pena a me na Pena o na ano a pau.
Ma wahi waiho mea ai, e like me na Pa, Pola, Pakeke Poi, Pola Poi, a me na laau o na ano a pau.
Na mea Mahiai,
Na Oo, na Koi, na Kui o na ano a pau.
NA KAULA HE NUI WALE KE ANO.
NA HAO O KELA A ME KEIA ANO HE NUI WALE.
Kuaina, Kuaina Upena, Na Upena, a me na ano Kuaina he makena wale.
Na Makau Lawaia o kela a me keia ano.
NA PU KAUPOOHIWI NANI A MAIKAI, Ka Pauda, Lu, Kukaepele-pu.
NA AHI-KOE o na ano LEHULEHU
Na Lole o na ano a pau,
EMI KE KUIKE.
Ahina Belekane o na ano a pau, na Kalakoa Lilina, na lole e ae he nui, na Alapia, Pahoehoe, a me na mea Silika o na ano he nui, pau ole ke helu aku, na Palule, Kuka, Puliki, Lolewawae, na Kamaa kane, wahine a me keiki, Na Wai hoope kino e moani ai, na Waiala kela loa o ke ala huihui he nui wale ke ano. Na Bakeke laau a hao, Na Kapu o na ano he nui. Na Paakai hoohu maikai, a me na mea he nui e hiki ai ke kaana maikai ia. E kipa mai a luana ma kahi o Walakahauki ma ka Uapo.
J. T. WATERHOUSE.
Honolulu, Mar. 20, 1877. [12 3ms.]

WIL DER & Co.,
(WAILA MA.)

AIA MA KE KIHI O
ALANUI PAPU me MOIWAHINE.
Ua hoolako mau ia me ke kuai ana aku i na
Papa me na Lako Kukulu Hale
O NA A PAU.
NA PANI PUKA!
PUKA ANIANI.
OLEPELEPE,
LAKA,
AMI LIILII,
AMI LOLOA.
PENA o na ano a pau,
AILA PENA,
VANIKI, &c.
Ma Balaki Pena me Puna,
Na Pepa Hale me na Lipine Pepa.
Aniani, Paakai, &c.
O na mea a pau maluna'e, e kuai makepono loa ia'ku no ke Dala Kuike. [3—1y.]

HE PAPA KUHIKUHI MANAWA HOLO
O KA
Mokuahi Hawaii
KILAUEA!
KAPENA MARCHANT!

Mei 14—Poakahi, 5 p. m. . . . . . Kona
Mei 21—Poakahi, 5 p. m. . . . . . Hilo
Iune 1—Poalima, 5 p. m. . . . . . Nawiliwili
Ku ana ma Honolulu i ke kakahiaka la Sabati.
Iune 4—Poakahi, 5 p. m. . . . . . Kaapuni ia Hawaii
Iune 11—Poakahi, 5 p. m. . . . . . Hilo
Iune 18—Poakahi, 5 p. m. . . . . . Kona
Iune 25—Poakahi, 5 p. m. . . . . . Hilo
I KA HOLO ANA MA KONA, O HOOPULOA KA PALENA.
Ma na huakai a pau a Kilauea e hoi mai ai mai Hawaii mai, aole e haalele ana ia Kawaihae a hiki i ka hora 10, a mahope iho paha; Makena, e like me ka mea i hoolaha wahaia; Maalaea a hiki i ka hora 7 a. m. a mahope iho.
Uku Eemoku mai Honolulu aku.
A hiki i Kaunakakai pela maluna mai . . . . . $5.00
" Lahaina, " " . . . . . 6.00
" Maalaea, " " . . . . . 7.00
" Makena, " " . . . . . 8.00
" Mahukona, " " . . . . . 10.00
" Kawaihae, " " . . . . . 10.00
" Kailua, " " . . . . . 10.00
" Kaawaloa, " " . . . . . 10.00
" Hilo, " " . . . . . 12.50
" Kau, " " . . . . . 15.50
Uku kaapuni ia Hawaii . . . . . 22.00
A hiki i na awa o Kauai . . . . . 8.00
Uku kaapuni ia Kauai, . . . . . 12.00
Uku ohua Hawaii oneki, . . . . . 2.00
Aole aie no na uku ohua.
Ma ka Hale Oihana e loaa'i na palapala.
Aole keena o hope e lilo, aia wale no a kaa mua mai ka uku moku. Aole e ili ka hewa no na paiki, ukana a puolo paha, ke ole e kakauia ka loaa ana mai.
E hookaaia ka uku ukana i ka wa e noiia aku ai.
SAMUEL G. WILDER (Waila,)
A gena.
Keena ma ka Hale Kuai Papa o Waila ma, kihi o Alanui Papu a me Moiwahine. (801 3m) 14 3ms.