Ka Lahui Hawaii, Volume III, Number 24, 14 June 1877 — Page 3
E ka Lahui!
O KA MEA NUI o keia mau la e hele nei, oia no ke ala ana mai o na haole i keia mau la, a hooikaika nui i ka mahi ko. O kekahi mau haole i kamaaina mau i ke alo alii nei, ua haalele iho nei i ke kulanakauhale, a ke hoi aku nei ma na kuaaina i ka hooikaika i ka mahi ana i ke ko. A oia ka makou e palua a pakolu aku nei ke kamailio ana ma na pepeiao o ko makou mau makamaka ponoi o ka Lahui o ka waihooluu hookahi, e noho ana ma ko kakou mau wahi pukoo iloko o keia moana akea, oiai, eia na makahiki momona o ke Kuikahi Panailike, ke kahea mai nei ia kakou, "Ua wehe ae nei au i ke pani hao o ke kalepa kuwaho, ua hemo ke kopaa aohe Dute, ua pau hoi ka auhau o ka Raiki ma na awa o America." Nolaila, o ka kakou hana ma ko kakou aoao, waele na mala, olao na nahelehele, o ka poe mea aina ole, aia ka aina nei a ko kakou Makua Lahui i imi aku nei i Kealia i Kauai, holo no a mahi.
O kakou ka poe nona ka aina, ke kau nei ko kakou mau poo i ka uluua, aohe hana a Kauhikoa, aka, o na malihini, ke noho mai nei lakou la i ka lepo, aohe pane leo. He mau makahiki wale no i koe, a ike aku kakou, he mau hale wili ko, hale kuai, a pela aku ko na malihini e ku mai ana, o ka kakou wale iho no, o ka noho hoolimalima aku malalo o na malihini, no ka hapalua dala no ka la.
E ala kakou a ku iluna, e wehe na kuka a me na puliki, kiola na kika a me na kookoo, a e hume i na malo, a lalau na lima i ka oo, a kuha iho i ka poholima ; mai nana i ka luhi a me ka inea, no ka mea, he ukupanee ko kou luhi, he mau tausani dala no ka makahiki, a he kuala hoi ke loaa mai ana i pani no kou inea, he mau hale laau nani, he mau kaa holo lealea, a pela aku, oia ka waiwai o ke Kuikahi Panai Like.
NA ANOAI.
HUINA KULA SABATI—E malama ia ana ka huina hapaha o na Kula Sabati o Kawaiahao ma ka la Sabati hope o keia mahina e like me ka mea mau.
HOIKE KULA KAIKAMAHINE.—E weheia ana ka hoike makahiki o ke Kula Hanai Kaikamahine o Waialua i ka Poaha ae nei la 21 o keia mahina, ma ka luakini o Waialua, ma ka hora eiwa o kakahiaka.
HOKU AO.—E holo ana o "Hoku Ao" no "na moku o kai lilo e" ma ka auina la o keia la. E malama ia ana he halawai haipule maluna o ka moku i ka hora 1.
E hoike ana ke kula St. Al ban's College ke hiki aku i ka Poalima Iune 15 mauka ma Kaalaa, e hoomaka ana ma ka hora 9 kakahiaka a e pau ana ma ka hora 12 ponoi, ua makemake nuiia ka lehulehu e hele nui ae malaila.
HOIKE KULA O MAUNAOLU.—E hoike ana ke kula kaikamahine o Makawao ke hiki aku i ka Poaha la 28 o keia malama, e hoomaka ana ma ka hora 10 kakahiaka, mahope iho o ka pau ana o ka hoike, he mau mea hana lima kekahi e kuaiia aku ana i ka lehulehu. Ua makemake nuiia ka lehulehu a me na hoa'loha e hele nui'e.
HE OLAI IKAIKA.—Ma ke kakahiakanui o ka la 31 aku nei, ua hoonaue ae kekahi olai ikaika ma ka mokupuni o Hawaii, a ua hooni pu ae no hoi i ka mokupuni o Maui, a ma ka apana o Kau kahi ikaika loa o keia olai ana, ua hoohioloia na pa a ua hoonakakaia na luawai a me na auwai.
Ua hauoli makou i ka hoike aku ma na lono i lohe ia mai, no ka holomua o ka ike o na haumana o ke Kula Alii ma Kahehuna. Ua maikai na hana me ka mahalo nui ia. E naue imua e na keiki.
Mamuli o ke kaawale ana aku o ka mea nana e unuhi ko kakou moolelo, ua hooneleia me ia mahele heluhelu ; aka, e kuilima ana no kakou me kona mau hiona i keia pule ae.
Ua ike iho nei makou i ke kii o ke Keiki Alii Leleiohoku a me ka Mea Kiekie Ruth Keelikolani maluna o kekahi apana pepa maikai, ua hoowehiwehi ia me na lau lipo o ka palai moe waokele, i kikohu pu ia iho me ka waihooluu o ka inika, a ua kinikohu ke nana aku; na kekahi o ko makou lima hana ulele hua i hana i keia mau kii, a ua mahalo nui makou no keia talena i loaa iaia ; nolaila, eia ka makou kau leo, e nee aku imua ma na hana maikai e Hawaii, i pahola ia ai ka pomaikai ma kou mau kapakai.
E na makamaka heluhelu, e kala mai ia makou no ka lolohi loa o ka kakou pepa o keia kakahiaka ; aole no ko makou palaleha a manaka i ka hana, ke kumu i lohi loa ai, aka, iwaho aku nei makou o na pea o ka aina kahi i noii ai i mau wahi mea hou no ko oukou pomaikai, a o ka hoi ana mai nei no ia me ka mahuahua ole o na wahi mea i loaa, a ua lilo aku nei mau wahi aweawe la ia lakou nei ae, a eia mai ke panee ia aku nei.
ILOKO o ka halawai Poakolu ma Kawaiahao i ka Po nei i hoohui ia ai ma ka oihana mare e Rev. H. H. Paleka, o John Hale me Mary Kapukini, a me Aalaioa me Peleki.
Ua manaoia, o keia Poalua ae, oia ka la e ku mai ai ka mokuahi Kikane Australia mai na Panalaau mai o ka hema, a mai iaia mai e loaa ai na mea hou o ka hikina.
Ua loaa aku ke kino make o kekahi wahine ma na aekai o ka apana o Hamakua, ua manaoia mai ka moana mai paha keia kino make, aole i akaka loa.
Ma ka Poalua iho nei, ua ku mai ka manuwa Rukini Ermack. Kapena Livron, he 22 la mai Kapalakiko mai. He 4 ona mau pu, a he 47 ona mau kanaka. Aohe mea hou i loheia mai.
O ka ipu aimaka ka huaai nui loa ma ka makete kuai ia i keia mau la, he wahi huaai hoopau no hoi i ka houpo lewalewa o ka wa nokonoko o ka la. Momona a hukakai no hoi na ipu o keia kau.
Ua pipii loa mai nei na wahi pai ai o kakou i keia wa, o kahi pai ai loaa no i ka hapalua dala ia kakou i ka wa mamua, aole ia e loaa ana i keia wa i ka hookahi dala, he hoailona keia no ka wi, aka, nowai la ka hewa ? E olelo ae kela a me keia kanaka, no'u ka hewa i ka palaualelo.
I ka Poakahi iho nei ka hookuu ia ana o ka Ahahui Euanelio o ka Pae Aina Hawaii, a ma ka Poalua mai ke kau ana aku o na hoa o ia aha ma ke Kilauea, a huli hoi aku la ma ko lakou mau home.
Ua loaa mai ia makou kau leta e S. M. Kalohi o Kapulena, e hoakaka mai ana oe no ka hoouna ole ia aku o kau mau helu i haule. Ua nana makou i kou inoa ma ka makou Buke, aole i loaa, nolaila, aole makou e hoouna aku ana i ka pepa a akaka pono. Owai la oe?
Ua wehe mua ia ke Keaka Lio a Mr. Derby ma ka po Poaono iho nei, ua piha loa ka hale i ka poe komo, a mawaena o na lealea i hoikeia mai, aole e hoopoinaia ke keiki wawae kahi iluna o ka lio, aohe kaulawaha.
Ua lohe mai makou, o na loaa no ka Ahamele o Waianae i weheia ai ma Kawaiahao i ka po Poaono iho nei, he $23.50, no ka hoopau ana i ka aie o ka luakini o ka Haku e ku la ma Kaiahamauleo o Ewa.
HE MAU ILIHUNE.—Mai ka peni mai a W. C. Kekaulaili o Kona Hema, Hawaii i ike iho ai makou, he elua mau wahi elemakule palupalu ilihune kama ole, a aole hoi he mea nana e malama i ko laua ola. O ka makou wale no ia oe, ina he pilikia io ko laua, e hooikaika oe i ku kekahi Ahahui Hoola Lahui e like me na wahi e ae.
HE OIAIO LOA.—Ua ike iho nei au ma ka helu 23 o ka "Nupepa Kuokoa." Ua hoolaha akea ae nei o Novemaba, i kona hewa ole i ke akea, me na wahi manao uhiuhi i kona hewa oiaio, iike akea ia e a'u a me ka'u wahine. Auhea oe e Novemaba, aole loa e hiki i ke Kahu o Kawaiahao ke hoike imua o ka lehulehu, no keia hewa au i hana'i, ina aole he oiaio. Ke ao ia mai nei oe, mai hana hou pela, o hea mai auanei ke koko hala ole o ka mea au i enemi ai, a ke hea leo nui mai nei ke Akua, "O ka mea i huna ia ma kahi nalo e hoike ia no ma ke akea." Owau me ka oiaio. IKEMAKA.
June 12 1877.
Ma ka po nei ma ka luakini o Kaumakapili, ua hookahunaia o S. P. Kaaia, kekahi o ko kakou mau misionari i hoi mai nei mai Maikonisia mai, a e kau hou aku ana no maluna o ka "Hoku Ao" i keia la no ia wahi penei na hana i lawelaweia: Ia Rev. J. H. Mahoe ka himeni a me ka pule, ia Rev. T. Coan ka haiolelo e pili ana i ka hookahuna ana, a me ka pule hoolaa, ia Rev. H. Binamu ke kauoha i ke kahu hou ia Rev. S. Waiwaiole ka lima akau aloha, i ka pau ana o ka lima aloha, ua paipai mai o Dr. Hyde ke kumu o ke kula kahunapule i ke kahu hou, a na Rev. A. O. Polepe i unuhi mai i kana olelo, a i ke kahu hou ka pule hookuu, a hoopauia na hana me ka maikai.
UA WAIHO MAI ME KE ALOHA.—Ma ka Poakahi aku nei, ua waiho mai o Kahikina Kelekona i kona noho malamamoku (Hope Lunahooponopono) ana no ka kakou pepa, a ua hoi aku ma ka noho kupakako elua no ke Kilauea, ma kahi o Mr. R. Austin i hookiekie ia ae ma ke kulana kupakako helu 1 no ia moku; a ua pani'ku o B. W. KAWAINUI ma kona wahi i Hope Lunahooponopono no ko kakou wahaolelo, he Hawaii ponoi oia, a ua hoonaauao kuponoia; a ke lana nei ko makou manao e alakaiia kana hooponopono ana i ka kakou pepa me na ulia laki o ka holomua a me ka eleu, a na kana peni pauaho ole e hoolawa piha ia kakou me na ono o na ano a pau. Na na Lani e kokua mai i ka kakou mau hana a pau.
Ua hookauluaia ka holo ana o ke Kilauea i keia pule no ka la 11 o Iune, a ma ke ahiahi Poalua iho nei kona au ana ma kona alanui mau, no Hilo, a me kona mau awa kumau ma ka mokupuni o Maui. Ua kau pu aku maluna ona ke Kiaaina J. O. Dominis, i kii aku nei i kana Lede, ka Hooilina Moi o ke aupuni, oiai oia ma Hilo. Ua kau pu aku ko kakou makamaka Kahikina Kelekona, no kana huakai mua loa o ke Kupakako elua. Ke kalokalo ae nei makou i ka lokomaikai, e hahai ia kana mau hana me ka holopono.
Oiai kekahi poe e paina ana i kela pule aku nei, a i kekahi o lakou e pule ana no ka ai ana, ua pane mai kekahi, "pau ka io bipi i ka ilio!" A i ka amene ana o ka pule, aohe i pau ka io bipi i ka ai ia e ka ilio, ia manawa, lalau aku la ka mea i pule i ka pua-i o ka mea walaau, a paa aku la, a i aku la, "heaha iho la ka mea o ka walaau ana i ka wa pule?" A hu ae la ka aka o na mea a pau. Ma uka iho o Keoneula kahi i hanaia ai keia hana.
UA MAHA—Me ka walohia ka keia maka peni e hai aku nei ; o ko kaua makamaka aloha oiaio, oia o H. Haina, ua hala aku la ma kela aoao o ka muliwai eehia, ma ka la 6 o Iune nei, ma Kapaa, Kohala Komohana. O kona ano, he haahaa, he akahai, he akahele ma na mea a pau; a ma kona make ana hoi, ua hooneleia ka Ekalesia o Kohala K. i kekahi lima ikaika nana e paa ke kaula o ka pono iwaena o na hoahanau. He hiohiona kona o ka mahaloia, a aia maluna ona ka lana o ka manao, ua kii ia mai la oia e kona Makua lani, e kai a naue i ka nani, me kela poe ohua hauoli i pae e ma o o Ioredane. He Luna ikaika oia no ka Ekalesia, a ua akaka, aole i alualu kana pule, a hala wale aku la. Ua hoopau oia i kana hana luhi maanei, a ua pau loa ae la kona luhi o keia noho ana i kela noho ana lani maemae.
Ma ka halawai ana o ka Ahahui Kula Sabati o ka Paeaina Hawaii ma Kawaiahao, ua kohoia na Luna nui no keia makahiki e hele nei, penei: W. R. Kakela, Peresidena. Rev. S. Waiwaiole, Hope Peresidena. B. W. Kawainui, Kakauolelo. S. B. Dole, Puuku. Na Kahu Kula Sabati mokupuni. Rev. J. N. Kamoku no Hawaii Hikina. A. W. Mio no Hawaii Akau. T. Puuohau no Hawaii Komohana, Rev. S. Kamahiki no Maui Hikina; J. Kealoalii, no Maui waena, S. Kamohakau no Maui Komohana, M. Kane no Molokai, M. Kuaea no ka mokupuni o Oahu nei, a o R. Puiki no Kauai. Na lala o ke Komite Hooko. W. R. Kakela, S. Waiwaiole, B. W. Kawainui, S. B. Dole, M. Kuaea, H. H. Paleka, W. W. Hall, G. B. Elama a me S. Paaluhi. Komite Imi Hana. M. Kuaea, B. W. Kawainui a me S. Paaluhi.
KA HOIKE KULA A BINAMU—Ua noho kino makou ma ka rumi nui o Kawaiahao no ka nana ana i ka hoike makahiki o ke Kula Hanai Kaikamahine o Kawaiahao. malalo o ka noho Kumu ana a Miss E. K. Bingham a me na kokua kumu, Miss S. King, Miss E. Napoleon a me Miss A. Haina. Ua makaikai makou i ka hana mai ka mua a i ka hope, ua mahalo nui hoi i ka hoike aku imua o ko makou mau tausani poe heluhelu i ka holomua o ke kula, ua eleu na haumana ma na haawina i haawiia, a ua mikioi ko lakou leo ma ke mele ana i na himeni haole, ua kohu haole hoi ma na paio a me na haawina heluhelu, a he haole ke olelo mai. Aole nae makou e poina i ka hoike ae i ka inoa o Miss Kala Nailipelapela mawaena o na kaikamahine nunui, a me Miss K. Poli iwaena o na kaikamahine liilii loa, ua hoike mai laua he mau makuahine haole no ka lahui. Mahope iho o ka pau ana o na hoike haawina, ua nonoiia ka makua Rev. S. E. Bishop Dr. Hyde a me Rev. J. H. Mahoe no kekahi mau manao paipai. O ka panina hope loa o na hana, oia no ka hoohuiia ana ma ka berita o ka mare o George ——— o Kohala, Hawaii, me Miss Rhoda Kanoa o ke Kula Kaikamahine o Kawaiahao, e Rev. T. Coan. O keia kaikamahine, oia no kekahi o na kaikamahine a kekahi o ko kakou mau misionari e noho mai nei i na aina pouli, ua hanauia oia ma ka mokupuni o Apaiana, a i kona wa liilii, ua haawi kona mau makua iaia i kekahi wahine haole Kristiano, a nana i hoonaauao; a i kona make ana, ua kauoha oia e ukuia kekahi hapa o kona waiwai no ka hoonaauao ana iaia a hiki i kona mare ana i ke kane; a oia kauoha kana i hooko ai a hiki wale no i kona mare ana, he mau opiopio like laua, a ke lana nei ko makou manao, o ka maluhia pu me laua, a e hoohua mai i ka hua makamae o ka hooulu lahui.
Aia ma ka la 28 o keia mahina o Mei nei ma Honuaino apana o Kona Akau Mokupuni o Hawaii ua nahu ia kekahi keiki e ke Kekake o Kahalepio penei ke kumu o ke nahu ia ana ua hele aku keia keiki i ke kula me kona Kaikuaana me Papoko a maluna o na Kekake wale no laua aielua ia hele ana a hiki i ka hale kula i ko laua wa i lele ai i lalo oia ka wa i holo mai ai kekahi Kekake o ka wa ia i hakaka ai ia hakaka ana oua mau Kekake nei kii aku la o Kahalepio i kona Kekake e hookaawale mai o ka wa iho la no ia i nahu mai ai ma ka wawae a pepe liilii ka iwi weluwelu ka io i ka wa i ike ai ke kumu kula o Kaipo o ka wa ia i kii ia ai o Kahalepio a hoihoi ia i ka Hale kula o ka manawa o keia ulia poino i hana ia mamua o ka wa aole i kula o ka hora 9 paha ia he ku maoli no i ka manaonao ke nana aku nolaila Eou Lahui o ka ili hookahi e malama akahele i na keiki a kakou oia ka makemake o ko kakou Moi e noho ana i ka noho Kalaunu o ka ulu o kona Lahui. Eia keia mea hou. Ma ka la 30 o keia mahina no o Mei nei he olai kai hoonaueue ae i na Kona nei ma ka wanaao oua la ala i hai ia ae la maluna mai ka hiamoe ka'u ala ana ae i ka hoonaueue a keia mea ikaika nei i ka hapa i i ka honua aole nae i loihi ka manawa i hoonaue ae aole nae he mau mea i hoopoino ia oia iho la kahi mea hou o ka aina nei. Ua pau au maanei ke kahea mai nei na Bere o Kanatira ua ahiahi ke ko mai nei ke anu i kanahele i na keiki Lawe Poahi o ka hale pai ko'u welina i ka luna H. ko'u mahalo palena ole. Owau iho me ke hookamani ole. S. W. KAILIWELA.
Kanaueue, N. Kona, June 1, 1877.
AHAAINA PALAKAI.—Ma Kailua, Koolaupoko, he ahaaina la hanau kai malama ia no kekahi keiki ma ka Poalima iho nei, Iune 8, na John Paoa. Ua hoala ia keia hana me ke kono ana i na mea a pau e hele aku me na kenikeni, a o ka manao o na mea a pau e like me ka olioli, olioli hoi ia ka mea ahaaina i na kenikeni, a olioli hoi ka poe mea kenikeni i na kaka puaa, na kaka bipi a me na awa momona o Kaelepulu, a me na amaama. Owau pu kekahi i hele aku e like me ke ano mau o na poe e hele ana i ka ahaaina. A i ka hiki ana malaila, a nana i na mea a pau, aohe i kupono iki i kahi o ka olioli; a nolaila kela mau hua e kau ae la maluna. O ka palakai a'u i ike, aole i lawa ka ai me ka ia; ua hoihoi no ka poe i manao aku no ka mea i konoia i ka lakou mau makana; no ka palakai ke kumu. A nolaila ka'u mea e pane aku nei, aole e hana kekahi mea ahaaina penei. A o kekahi mea kaumaha, o na opio i aoia i na hana uso ole a ka pegana, oia ka hula, a me he la ua lilo ko lakou ao naauao ana ma ka hula, aole ma ka hua palapala, a oia ka'u e pane nei. Ua hoi no kekahi poe me kahi hoi'na, aka, ua kaniuhu kahi poe no ka ai ole a me ke kupono ole o kahi haawina no ka mea i makana ia'ku. Eia no hoi kekahi, aohe i makaukau na mea ai a pau, i ka la no i ahaaina ai, o ka la no ia i hoomoa ia ai na mea ai a pau, aohe no hoi he hoomakaukau mua i ka la mamua iho, a no ia makaukau mua ole, ua huluhulu ka puaa, a me ia huluhulu no i hoi aku ai kahi poe me kahi hoina kupono ole. A ke uwalo aku nei au i ka mea hana ahaaina, e hana me ka maikai, aole me ke ino. Me na Lunahooponopono a me na Keiki ulele hua metala ke aloha pumehana. J. M. MAAWE.
MOOLELO O KA AHAHUI HOOLANAMANAO O KA EKALEISA O PUULA MA MAKUU.
Halawai ka Aha ma ka Apana o Makuu i ka la 12 o Mei, 1877, hora 9 A. M.
Eia na Luna o kela me keia Apana i hiki mai.
No Kapoho, Aole. Kula, T. M. Kekuanuu. Kowae, Rev. J. N. Kamoku. Halepuea & Kahuwai, D. K. Kahoalalua. Makuu, J. P. Iwa, J. Kaui, Naopala, me S. K. Naopala. Keaau, S. K. Po. Olaa, J. W. Mao, J. W. Kipi.
Hoomaka na hana me ka pule a me ka haiolelo a Po. Ma ka balota, ua koho ia o J. W. Mao i Lunahoomalu, a o S. K. Po i Kakauolelo.
Hoike mai o Iwa ka L. H. o ke Komite i na kumuhana he 6. 1 Manawa haipule. 2 Heluhelu kumumanao. 3 Kokua Kahu e hele ai i ka Aha nui o Honolulu. 4 E nana keia Aha i mau kanaka kupono e hoouna aku i ke Kula Kahuna. 5 Kahi e ku hou ai keia Aha me ka manawa. 6 Komite imi kumumanao.
Ninau ia ko ka hale no keia mau kumuhana, a ua aponoia. Hapaiia ke Kumuhana 2.
Heluhelu mai o Iwa i kana kumumanao, E ulu hou ana anei keia Lahui Hawaii Ponoi?
Heluhelu mai o Po i kana kumumanao. Heaha ka hookuina mawaena o ke Akua me ke kanaka?
Noi mai o Iwa e hoopanee keia Aha, a hui hou mai i ka hora 2 P. M. Hookuuia me ka pule a Kamoku.
Hui hou ka Aha i ka hora 2 P. M. Hea ia na inoa, me ka pule a ke Kakauolelo.
Hapaiia ke kumuhana 3. Ua koho pono ka Aha i ke ola o ke Kahu e holo ai i ka Aha Euanelio. ($13.00.)
Hapaiia ke Kumuhana 4. Ua koho keia Aha i ke Kakauolelo o keia Aha S. K. Po, e hele i ke Kula Kahuna. Aponoia.
Hapaiia ke Kumuhana 5. Hooholo ia e ku hou keia Aha ma Puula i ka la 7 o Iulai, hora 9 A. M.
Hapaiia ke Kumuhana 6. Pehea la e ulu hou ai keia Lahui Hawaii Ponoi? D. K. Kahoalalua. Pehea la e malama pono ai na makua i ka lakou mau keiki? J. W. Kipi.
Ma ke noi a J. W. Kipi e heluhelu ia ka moolelo. Aponoia. Ma ke noi a Kamoku e hoouna i ka Nupepa KA LAHUI HAWAII. Hookuuia na hana me ka himeni a me ka pule a Iwa. S. K. PO.
Makuu, Puna, Hawaii, Mei 12, 1877.
MAKEMAKE PAI AI!
NO KA HOOLAWA ANA I KA HALEMAI Moiwahine mai ka 800 paona a i ka 1,200 o ka pule, no na malama eono mai Iulai 1 aku. E hoaponoia ke Pai Ai e ke Kuene Nui, a e laweia i na hebedoma a pau. E hamama no ka puka no ka poe ai hookomo mai a hiki i ka la 27 o kela malama, ma ka Hale Banako o Bihopa ma. Ua malamaia no iaia ka ae a me ka hoole ana i na noi.
John H. PAty.
Honolulu, Iune 12, 1877. Kak. Halemai Moiwahine.
24 1t.
OLELO HOOLAHA.
E weheia ana ke Kula Hanai a Kula La o Haleakala, Maui Hikina, i ka pule mua o Iune, me ka makaukau pono no Kanaono haumana. O ka Olelo Beritania pololei ka mea e aoia, a e hoomaamaaia na haumana ma na mea pili mahiai, kanu laau, kanu kope, ka hana ana me na mea hana a na kamana, a me na ano hana e ae. E aoia no na haumana me na hana hooikaika kino, ka Paikau Koa, ka Himeni, &c.
O ka uku he $40.00 no ka makahiki, e uku mau i kela a me keia hapaha, e hookaa mua mai me ka hala ole. No ka hoomaopopo pono ana, e nana i na palapala pai liilii, a i ole, e kakau i ke kumu ma ke Kula o Haleakala, Maui. F. L. CLARKE. Kumu.
19 3ms.
AILA.
Ua makemakeia na aila Bipi, Hipa, Kao a me na ano aila e ae. E haawiia na kumukuai kiekie no na aila ka lawe ia mai i ka Hale hana Sopa Hawaii ma Leleo. (20 3m) GREY & Co.
Leleo, Mei 16, 1877,
AINA HOOLIMALIMA.
AIA kekahi aina e waiho ia ma Kalihi, elua paha eka, he aina loi kalo, ua makemakeia e hoolimalima aku ka mea e makemake ana. He aina waiwai nui keia no ka poe e makemake ana e mahi. E loaa ana ka wai i na manawa a pau. E ninau i keia hale pai. 21 tf
E IKE IA KAKOU HOOKANAKA!
E LULU LIMA ALOHA!!
ME KO OUKOU MAKAMAKA!!
L. ASEU.
UA HOI MAI NEI AU MAI KO'U KIEI ana aku nei i kuu Aina Kulaiwi. Ano, ke ku aku nei au me ka makaukau mau e lawelawe a e kuai makepono loa me oukou e na makamaka o ka Ua Kukalahale, i na Lole Nu Hou loa o kela a me keia ano, mai ko na Lede, Keonimana a me ko na Kamalei. I pau ai kuhihewa, e naue mai ma ko'u Halekuai, ma ke kihi ma Ewa o na Alanui Moi a me Nuuanu. [8 6m.]
NU HOU MAIKAI!
UA LOAA MAI
ENELANI, FARANI A ME AMERIKA MAI!
He nui wale na mea nani e hoohihi ai ka manao.
E LAA NA
Noho Berekane, Noho Mareka, Noho Italia, a me na lako a pau e pili ana i na Noho Paniolo.
NA TINI AILA MAHU!
Na Aila Pena a me na Pena o na ano a pau.
Ma wahi waiho mea ai, e like me na Pa, Pola, Pakeke Poi, Pola Poi, a me na laau o na ano a pau.
Na mea Mahiai,
Na Oo, na Koi, na Kui o na ano a pau.
NA KAULA HE NUI WALE KE ANO.
NA HAO O KELA A ME KEIA ANO HE NUI WALE.
Kuaina, Kuaina Upena, Na Upena, a me na ano Kuaina he makena wale.
Na Makau Lawaia o kela a me keia ano.
NA PU KAUPOOHIWI NANI A MAIKAI, Ka Pauda, Lu, Kukaepele-pu.
NA AHI-KOE o na ano LEHULEHU
Na Lole o na ano a pau,
EMI KE KUIKE.
Ahina Belekane o na ano a pau, na Kalakoa Lilina, na lole e ae he nui, na Alapia, Pahoehoe, a me na mea Silika o na ano he nui, pau ole ke helu aku, na Palule, Kuka, Puliki, Lolewawae, na Kamaa kane, wahine a me keiki, Na Wai hoope kino e moani ai, na Waiala kela loa o ke ala huihui he nui wale ke ano. Na Bakeke laau a hao, Na Kapu o na ano he nui. Na Paakai hoohu maikai, a me na mea he nui e hiki ai ke kaana maikai ia. E kipa mai a luana ma kahi o Walakahauki ma ka Uapo.
J. T. WATERHOUSE.
Honolulu, Mar. 20, 1877. [12 3ms.]
WIL DER & Co.,
(WAILA MA.)
AIA MA KE KIHI O
ALANUI PAPU me MOIWAHINE.
Ua hoolako mau ia me ke kuai ana aku i na
Papa me na Lako Kukulu Hale
O NA A PAU.
NA PANI PUKA!
PUKA ANIANI.
OLEPELEPE,
LAKA,
AMI LIILII,
AMI LOLOA.
PENA o na ano a pau,
AILA PENA,
VANIKI, &c.
Ma Balaki Pena me Puna,
Na Pepa Hale me na Lipine Pepa.
Aniani, Paakai, &c.
O na mea a pau maluna'e, e kuai makepono loa ia'ku no ke Dala Kuike. [3—1y.]
CECIL BROWN,
Loio a he Kokua ma ke Kanawai
A HE AGENA NO KA HOOIAIO ANA I NA Palapala no ka mokupuni o Oahu.
Helu 8 Alanui Kaahumanu, Honolulu, H. P. A.
763 1y
WILLIAM R. CASTLE.
(Kakela Opio.)
LOIO!
MA NA ANO HANA PILI KANAWAI A pau, e lawelawe koke ia me ka hikiwawe. Na Palapala Sila a me na Palapala pili aina o na ano a pau, e hoomakaukau ia no.
Keena hana, ma ke kihi o Alanui Kaahumanu a me Kalepa, Honolulu. (786 1y) [51]
E. STREHZ,
[AILUENE]
MALAILA E LOAA AI NA ANO LAAU A pau; a me na wai hoomaemae o kela a me keia ano. E hamama mau ana ka ipuka ma na po Poaono a pau. Ma ke kihi o Alanui Papu a me Hotele, ma Monikahaae. 1 1y
S. B. DOLE.
LOIO a he Alakai ma na mea pili Kanawai. Ua makaukau oia e pale i na hihia imua o na Aha Hookolokolo a pau o keia Aupuni, me ke kakau ana i na Palapala Pili Kanawai, ma ka olelo Hawaii a ma ka olelo Beritania. 1 1y
WAi Hui o ka Hau!
E IKE IA ka Hale ma ka inoa o "BONANZA" Ke haawi ia aku nei ka poloai i na makamaka keonimana a me na lede o ke kaona Alii, e kipa ae ma ka hale hookipa inu wai momona o ko oukou makamaka nona ka inoa malalo iho, a e loaa no ka hau i hoomomonaia (ICE CREAM) na wai momona o na ano a pau! hoohuihui ia e ka hau iniki o Nuuanu. O keia hale, he hale i hoomakaukauia no na keonimana a he keena nani i hoomakaukau ia no na lede. E kipa mai, a o ka makepono me ka oluolu ke haawi ia'ku, oiai, he makamaka, a he kamaaina no Hawaii nei o JOHN W. CROWELL.
2-1 y (Keoni Koloela.)
Ma ka Hale "BONANZA" ma alanui Moi, mawaena o ka hale kahi umiumi a me ka halekuai o Dillingham ma.
C. H. DICKEY, (Kale Kika,)
LOIO!
A he Luna Kepa i apono ia e ke
Aupuni no ka Apana o Makawao, Maui Hikina.
E HELE NUI mai ka poe a pau i loohia ia me na pilikia pili Kanawai o ka "Ua-ukiu" nei, a na ko oukou makamaka oiaio no e kokua a e hooikaika e hoopau i na pilikia ma na ano a pau o ke Kanawai. 17-1y.
HE PAPA KUHIKUHI MANAWA HOLO
O KA
Mokuahi Hawaii
KILAUEA!
KAPENA MARCHANT!
Iune 12—Poakahi, 5 p. m. . . . . . Hilo
Iune 18—Poakahi, 5 p. m. . . . . . Kona
Iune 25—Poakahi, 5 p. m. . . . . . Hilo
I KA HOLO ANA MA KONA, O HOOPULOA KA PALENA.
Ma na huakai a pau a Kilauea e hoi mai ai mai Hawaii mai, aole e haalele ana ia Kawaihae a hiki i ka hora 10, a mahope iho paha; Makena, e like me ka mea i hoolaha wahaia; Maalaea a hiki i ka hora 7 a. m. a mahope iho.
Uku Eemoku mai Honolulu aku.
A hiki i Kaunakakai pela maluna mai . . . . . $5.00
" Lahaina, " " . . . . . 6.00
" Maalaea, " " . . . . . 7.00
" Makena, " " . . . . . 8.00
" Mahukona, " " . . . . . 10.00
" Kawaihae, " " . . . . . 10.00
" Kailua, " " . . . . . 10.00
" Kaawaloa, " " . . . . . 10.00
" Hilo, " " . . . . . 12.50
" Kau, " " . . . . . 15.50
Uku kaapuni ia Hawaii . . . . . 22.00
A hiki i na awa o Kauai . . . . . 8.00
Uku kaapuni ia Kauai, . . . . . 12.00
Uku ohua Hawaii oneki, . . . . . 2.00
Aole aie no na uku ohua.
Ma ka Hale Oihana e loaa'i na palapala.
Aole keena o hope e lilo, aia wale no a kaa mua mai ka uku moku. Aole e ili ka hewa no na paiki, ukana a puolo paha, ke ole e kakauia ka loaa ana mai.
E hookaaia ka uku ukana i ka wa e noiia aku ai.
SAMUEL G. WILDER (Waila,)
A gena.
Keena ma ka Hale Kuai Papa o Waila ma, kihi o Alanui Papu a me Moiwahine. (801 3m) 14 3ms.
NA Buke
I HOOLAHAIA E KA PAPA HAWAII
ME KE
KUMUKUAI O KELA ME KEIA.
BIABALA HEMOLELE NUI ILI GULA NANI me na kuhikuhi ma na aoao . . . . . $12 00
Biabala Hemolele Nui ili eleele kaekae waigula . . . . . 5 00
Baibala Hemolele uuku iki iho kae wai gula . . . . . 8 00
Baibala Hemolele pananaiki iho ili eleele . . . . . 4 00
Baibala Hemolele ili eleele . . . . . 2 00
Kauoha Hou ili gula nani me na kuhikuhi . . . . . 3 00
Kauoha Hou ili eleele kaekae wai gula . . . . . 1 00
Kauoha Hou ili eleele . . . . . 75
Kauoha Hou Hapa Haole . . . . . 75
Moolelo Ekalesia . . . . . 50
Haiao ili lahilahi . . . . . 10
Hele Malihini ana . . . . . 25
No ko ke Akua ano . . . . . 20
Hoike Palapala Hemolele . . . . . 20
Moolelo o Heneri Opukahaia . . . . . 10
Hoike Akua . . . . . 25
Wehwehehala . . . . . 25
Ninau Hoike ili manoanoa . . . . . 55
Kumumua Kula Sabati . . . . . 25
Buke Lawe Lima . . . . . 15
He Buke no ka Pope . . . . . 15
Ui Kula Sabati Helu 3 . . . . . 25
Ui Kula Sabati Helu 4 . . . . . 10
Ui Kula Sabati Helu 5 . . . . . 20
Buke Euanelio a Ioane Hapahaole . . . . . 10
Buke Wehewehe Huaolelo Baibala, elua ano . . . . . 2 00
Buke Wehewehe ano Mataio . . . . . 1 00
NA KAUOHA HOU PAKEKE.
Ili gula nani . . . . 1 50
Ili eleele kaekae nani . . . . . 50
Ili eleele . . . . . 35
KAUOHA HOU PAKEKE ME NA HALELU.
Ili gula nani . . . . . 1 70
Ili eleele kaekae wai gula . . . . . 65
Ili eleele . . . . . 50
NA HALELUA PAKEKE.
Ili Gula nani . . . . . 50
Ili eleele kaekae wai gula . . . . . 30
Ili eleele . . . . . 20
Ka Hae Hoonani (Buke Mele) . . . . . 25
NA BUKE MELE.
Himeni Hawaii ili nani . . . . . 1 75
Himeni Hawaii . . . . . 1 00
Kumu Leo Mele ili manoanoa . . . . . 50
Kumu Leo Mele . . . . . 10
Li ra Kamalii . . . . . 25
Li ra Hawaii 1848 . . . . . 25
Li ra Hawaii 1855 . . . . . 25
Hae Hoonani . . . . . 20
Leo Hoomana . . . . . 25
EIA NA BUKE HAAWI WALE.
PALAPALA LIILII—
Helu 4—Makemake anei oe i ke ola?
Helu 6—E hele i o Kristo la.
Helu 7—Ka hoi ana mai o ke Keiki Uhauha.
Helu 11—No ka hoohiki wahahee i ke Akua.
Helu 16—Ka Eehia ana o ka Ahaaina a ka Haku a me ka Bapetizo ana.
Helu 17—Mai hana ino i na holoholona.
Helu 18—No ka mahi ana, kuai ana a me ka inu ana i ka Awa.
Ka Davida Malo Kumumanao.
Ka Moolelo o Batimea Puaaiki.
Aia ke keena kuai buke o ka Papa Hawaii ma ka huina o Alanui Betela me Alanui Kalepa, e kokoke ana i ka Hale Leta. J. F. POKUE.
Kakaule ta o ka Papa Hooko o ka Ahahui Euanelio ko Hawaii Pae Aina.