Ka Lahui Hawaii, Volume III, Number 34, 23 August 1877 — Page 4
KA NUPEPA KA LAHUI HAWAII.
HONOLULU, AUGATE 23, 1877.
KOMI TE HOOPONOPONO NO KEIA AOAO.
LAIKI MAKUA, MRS. KELA A. GILIMANA,
M RS. ELENA MAKALE, MRS. J. M. KUKE.
Gather Them In.
Gather them in, gather them in,
Gather the children in ;
Gather them in from the broad highway,
Gather them in, gather them in,
Gather them in, in this gospel day,
Gather, Gather them in.
Cho.—Gather them in, let the house be full
Gather them in to the Sunday School,
Gather them in, gather them in,
Gather the children in.
Gather them in, gather them in,
Gather the children in;
Gather them from the street and lane
Gather them in, gather them in,
Gather them in, both the halt and lame
Gather, gather them in.
Cho—Gather them in, &c.
Gather them in, gather them in,
Gather the children in;
Gather them in with a Christian love,
Gather them in, gather them in,
Gather them in for the Church above,
Gather, gather shem in.
Cho.—Gather them in, &c.
NA KA MAKUAHINE.
O kekahi wahine naauao loa, ua kakau oia penei: "Elua ano kanaka ma keia honua, o ka poe makua ole, a o ka poe Makua. Nani ka pomaikai o ka loaa ana ia kakou he Makua naauao loa, a me ka waiwai loa, e noho pu ana me kakou i na wa a pau, a o kona inoa ia kakou o ALOHA."
No ke aha la kakou i palaka ai i ke noi Iaia no na mea e pono ai na kino me na uhane i kela la a me keia la? Oia ka pule. E ala mai kakou, a e hoomaopopo i ko kakou pomaikai nui ma ka lilo ana i poe keiki no ke Alii nui.
He hiki loa ia kakou ma ka pule e waiho i ko kakou lima iloko o ka lima o ka makua, a e alakai no ia ia kakou me ka maluhia mawaena o keia a o ino, a i ka hora ikiiki o ka make oia pu no kekahi me kakou, a e lawe no oia ia kakou i ka home nani.
E hoomanao ia Na Solomana 3:6 penei. "Ma ko'u aoao a pau iaia no oe e nana aku ai, a nana no e hoopololei i kou hele ana." Ma ka hoomau ana ma ka pule e ike ai oukou he oiaio keia olelo hoopomaikai a ko kakou Makua.
KA PONO O KA MAI.
Mamua aku nei ua kamailio au no ka mai. Ma ia hope mai ua noonoo au no ia mea, a i ko'u wa i hele ai i ka hale mai a ike i ka poe mai malaila, ua ninau au ia'u iho, no ke aha la i haawi mai ai ke Akua i ka mai maluna o lakou? Ua lokomaikai ka Haku i na mea a pau. Ua maopopo ia, a ua ike no hoi kakou aole Ia i oluolu i ka hoeha ana i kanaka. Aka, he mau kumu no e maopopo ai i mea e pomaikai ai ka mai. Ma kekahi la ua ike au i kekahi kanaka mai ma ka haukipila. He haole ia. Ua hai mai la ia'u, aole e hiki iaia ke lilo i kanaka pono i kona wa e noho ana i keia Paeaina, a me kona wa e holo ana ma ka moana. Hai mai la oia i kona huhu i na bipi a me kona olelo ino ia lakou ; hai pu mai la no hoi oia i na hoowalewale e ae, he mea hiki ole iaia ke pale aku. "Aka ano, eia au maanei, ke heluhelu nei au i na buke maikai, aohe a'u mea e huhu ai a e hewa ai, he hiki ia'u ke hana pono," wahi ana. Pane aku la au, "alaila, he mea pono ai au ke mau aku ko'u mai ana." Ke manao nei au ua oiaio maoli ka makemake o kela kanaka e lilo ia i mea pono. Malia paha o kona mai mama, ua haawiia mai e ka Haku i mea e pakele ai oia i na hoowalewale, a i oi aku kona pono. A mahope e hooikaika ia oia e pale aku i na hoowalewale. Nolaila, ua ike maopopo kakou i ke aloha o ke Akua ma ka mai ana o kela kanaka.
A ke manao nei au, pela na mea a pau ma ka haukipila. Ke makemake nei ke Akua i oi aku ko lakou pono. Ina paha o ka inu rama a inu awa paha ke kumu o ka mai o kekahi kanaka. Malia paha e noonoo oia no ia mea a hoohiki aole e inu hou i ka rama a me ka awa a pela e lilo ai ka mai i mea e oi aku ai kona pono. E hoao kakou e imi i na loina a ka Makua lani aloha e ao mai nei ia kakou ma na mai i haawi ia mai maluna o ko kakou mau kino.
Ua holopono oukou, nawai la oukou i keakea i hoolohe ole ai oukou i ka oiaio?
O ka mea nana oukou i kahea aku, aole nona mai ia manao.
Sir Issac Newton.
E kamailio iki kakou no keia kii. O kela haole e ku ana, o Sir Isaac Newton kona inoa. Ua maikai kona maka, ua kaumaha nae, me he la he pilikia kona, a pela io no. No Pelekane keia kanaka ; ua hanauia oia i ka la 25 o Dek., 1642 ; ua make kona makuakane i kona wa uuku, a mare hou kona makuahine i ke kane,. Nolaila, ua noho pu oia me kona kupunawahine; aloha kona kupunawahine iaia. Ae, nui kona aloha. Mahalo no hoi na mea a pau iaia no kona akamai a me kona ike.
Aole ona makemake i ka paani, o ka hana ana i kekahi mea ana i noonoo ai, oia kona makemake. Ua hana oia he wati (clock) ano e, o ka wai ka mea e hooholo ai i ua wati la. Ua hana no hoi oia he mea ana hora (Sundial) no kona kupunawahine.
Ua oleloia, aia no kela mea ana hora ana i hana ai i keia la ma kana wahi i kau ai me kona mau lima. Ua aui na mea maikai ona, aka aole e hiki ia kakou ke kamailio no ia mau mea i keia manawa, mahope paha.
He kanaka ikaika i ka noonoo o Newton. Ua kaulana no kona ike, aka he kanaka oia no ke Akua, nolaila aole i poho kana mau hana maikai a pau.
He wahi holoholona aloha ka ua kanaka kaulana nei, he ilio uuku, o kona inoa o Kaimana. Ke nana nei o Newton iaia. Heaha kona hewa? Eia, ua ike kakou ia Newton ma keia kii, he 50 paha kona mau makahiki, ua pau kahiko kona hele ana i ke kula nui, ua hookaulana ia kona inoa ma na aina naauao no kona hooikaika i ka noonoo; a ua paiia kekahi mau buke ana i kakau ai, hookahi buke i koe, he 20 makahiki i noonoo ai no ua buke la, aia na pepa o kela buke ma ke pakaukau. Ua hele iki o Newton iwaho, a ua hiamoe o Kaimana, pani ia ka puka, ala ua ilio la, nana i o a ia nei, a lele maluna o ka pakaukau, a haule ke kukui iaia, a aa koke na pepa a pau i ke ahi. Hoi mai o Mr. Newton, komo i kona rumi, a o ke ahi wale no i koe, no kona hana i keia mau makahiki iwakalua, nolaila kona kaumaha, nolaila kona pilikia; a pehea oia? Hoomake paha oia ia Kaimana? Aole! kulou oia a paa kona lima i kona poo me ka olelo, "E Kaimana! E Kaimana! Aole oe i ike i ka poino nui au i hana ae nei."
E nana i ka pakaukau, aia ke kukui ua kahuli ia maluna o ka pukaukau, aia ka ipu inika a me na peni elua e ku ana, ke ike nei kakou i ka lehu o ka pepa i pau i ke ahi. Aloha ino!
KA LA SABATI.
Ua lohe au i kekahi Kahunapule haole ma Kapapala, e haiolelo ana, a o ke Kanawai eha, oia kana poolelo, oia ka haawina Kula Sabati no ia la. Olelo oia, ua kauoha ke Akua i ka poe Iseraela e hoomanao i ka La Sabati no ia la. Olelo oia, ua kauoha ke Akua i ka poe Iseraela e hoomanao i ka La Sabati. He okoa ke kauoha no na kanawai e ae, me he mea la, aole i ike mua na kanaka ia mau kanawai. Aka, o ka La Sabati, ua ike no lakou ia mea. Ua malamaia ka La Sabati mai kinohi mai, a kauoha ai ke Akua e hoomanao ia la, a e hoano hoi. Ua hana ke Akua i ka Sabati no ke kanaka, aole nona iho. He mea ia e pono ai ke kanaka. O ka maha o ka la Sabati, he mea ia e pono ai, a o keia wa, he wa e noonoo ai i na mea pili i ka pono o ka uhane. Nolaila, o ka la Sabati, he pomaikai ia no ka uhane a me ke kino kekahi. He lokomaikai nui ke Akua i ka haawi ana mai ia la, aka, olelo kekahi poe, he mehameha ia la, a he ikiiki no ka ae ole ia e paani; aole o lakou makemake e malama ka la Sabati i hoano ia la, a o kekahi poe hoi he ake e hiamoe ma ia la mai kakahiaka a po, aole hele ia ka pule, aole hoi i ke kula Sabati, a o kekahi poe, he holoi ma ia la, he humuhumu, he pepa, a me na hana pono ole e ae. O ka hana ana pela, oia ka hehi ana i ke kanawai o ke Akua a me ke kanawai o ka aina, no ka mea, o kekahi kanawai maikai o ke Aupuni oia keia: "ua kapu ka la o ka Haku."
E nana iho oukou i ka olelo hoopomaikai no ka poe malama i ka la Sabati, penei: "Ina e malama oe i kou wawae i ko'u la Sabati, aole hoi e hana i kou lealea i ko'u la hoano; a kapa aku hoi i ka la Sabati, he olioli, ka mea hemolele o Iehova, a me ka nani; a hoomaikai hoi oe ia, me ka hana ole i kou mau aoao; aole me ka imi i kou lealea iho, aole hoi me ka olelo i kau mau olelo iho, alaila, e olioli no oe ia Iehova, a nau no e hooholo ia oe ma na wahi kiekie o ka honua, a e hanai aku au ia oe i ka hooilina a Iakoba, a kou kupunakane, no ka mea, na ka waha o Iehova i olelo mai.
He Moolelo Baibala—Ke Kanaka i hanau makapo ia.
Ua nanea loa au i keia mau la iho nei i ka heluhelu ana no ke kanaka i hanau makapo ia. I ka wa i maalo ae ai o Iesu me kana mau haumana, ua ike lakou i keia kanaka pilikia. Mamua iki iho, ua pakele mahunehune o Iesu i ka make ma ka lima o ka poe i manao e hailuku iaia i ka pohaku, aka, o Iesu, ka mea e oia mau ana inehinei, i keia la a mau loa aku no, ua piha oia i ke aloha no ka poe pilikia. I ka wa i ike ai na haumana i ke kanaka makapo e noho ana me kona pilikia nui, ua noonoo lakou e like me ka noonoo ana o kekahi poe kanaka Hawaii, oia hoi keia, ua hewa ua kanaka la, a i ole ia o kona mau makua, a oia ke kumu o kona makapo—he hoopai no ka hewa. Aka, i ka wa a lakou i ninau ai ia Iesu owai kai hewa, pane mai la kela, aole no ka hewa ke kumu o kona makapo, aka, i mea e ike ia ai ka nani o ke Akua ma kona hoola ia ana. Alaila, hoopulu iho la o Iesu i ka lepo a hookau aku la i ka lepo ma na maka o ua makapo nei, me ke kauoha pu e hele e holoi iloko o ka wai o Siloama. O keia hana ka mea e ikaika ai ka manaoio o ua kanaka nei, no ka mea, aohe mana iloko o ka lepo. Hele pololei aku la ua kanaka nei e like me ka mea i kauoha ia, a i kona holoi ana, ike koke iho la ia, he mea hou ia iaia. Mamua, ma ka hoopa wale no kona ike, ano hoi e ike maka ana oia. No ke kupanaha loa o kona ola ana, olelo na makamaka he kanaka okoa ia, a ua like pu nae me ia mai ka hookumu ana mai o ka honua. Aka, hai aku la ia, oia no ua kanaka la, a i ka wa a lakou i ninau ai pehea i hana ia ai ia mea, hai aku la oia a pau, alaila, kai aku la lakou iaia i ka poe Parisaio; ua huhu na Parisaio no ko Iesu hana ana i keia mea i ka la Sabati.
Olelo lakou ua hewa o Iesu no kona uhai ana i ka la Sabati, aka, o kekahi poe, olelo lakou, ina he kanaka hewa o Iesu, aole hiki iaia ke hana i kela hana mana, aka, o na Iudaio, aole lakou i manaoio ua hanau makapo ia oia, alaila, kahea aku la lakou i na makua o ua kanaka nei, a ninau aku la ia laua, aka, aole pau iki o ko lakou haohao, a ua ninaninau nui lakou i ua kanaka nei, a kaea loa oia i na ninau a lakou, a pau ae la kona pane ana, alaila, huhu iho la ka poe Iudaio, a olelo aku la i ua kanaka nei, he mea hewa wale no ka mea nana ia i hoola, aka, ku mai la ua kanaka nei me ke ano koa loa ma ka aoao o Iesu e kue ana i na kanaka, a hiki i ka wa a lakou i kipaku aku ai iaia mawaho o ka luakini. A i ka wa a Iesu i lohe ai i ka lakou hana ino i ke kanaka ana i hoola ai, hele aku la Oia i ona la a ninau aku la, ina ua manaoio oia i ke Keiki a ke Akua, aole i ike ua kanaka 'la i ka mea i olelo ia he Keiki na ke Akua; aka, i ka wa a Iesu i hoike aku ai Oia no ia, manaoio koke iho la ua kanaka nei, a hoomana aku la ia Iesu, aole no paha i ike kela kanaka o ke Keiki a ke Akua ka mea nana i hookaakaa kona mau maka, aole i hai aku o Iesu Oia ka mea nana ia i hoola.
Ke manao nei au he kanaka pono ia, no ka mea, ua malama oia i ka olelo a ka mea nana ia i kokua. Ua lawe oia ia Iesu i Haku nona me ka manaoio i kona wa i ike ai iaia, a he nui na mea e ae i manaoio ia Iesu no ka olelo a ua kanaka nei. A oia kekahi, ua manao ua kanaka nei, ua makepono na makahiki o kona noho naaupo ana, no ka mea, ua ike oia ia Iesu; a o ka poe a pau i manaoio ia wa, aia paha lakou ma ka lani i keia wa me ua kanaka la, ka mea i hanau makapo ia i kumu e manaoio ai lakou i ka Mea nana e haawi i ke ola i ka poe manaoio ia Iesu.
KE KEIKI WAI HUIHUI.
I aku la kekahi lede i kana wahi keiki, "E Nede heaha kou mea i lawe ole mai ai i ke ko ? I aku la kahi Nede, "Aole hiki o Kame ka mea nana i pena ke kii iloko o kuu buke, ua kauoha mai kela ia'u aole au e komo iloko oia hale kuai, no ka mea, he kanaka kuai rama kela, a me na mea e ona ai o Kame, he keiki wai huihui ia, a pela no hoi au a pau kuu ola." Ninau aku la kona Makuahine, Heaha ke keiki wai huihui?" Pane aku la o Nede, "Oia ke keiki ae ole e komo i ka hale kahi i kuai ia ai ka rama, aole no hoi e ae e hoao i ka waina, a me ka Caida a he hoopaa loa i kona waha penei. A o na keiki wai huihui, ua aloha lakou ia Tede, (he keiki ilihune ia) a he haawi i na lole a me na kamaa nona, a me na mea paani, a he huna lakou iaia iloko o ka hale i ka wa e ona ai kona makuakane, a huhu iaia."
I aku la ka makuahine, "E Nede, makemake au e loaa koke kela ko." Pane mai la o Nede, "Ina pela, e hoouna oe ia Pate, aka owau, aole au e ae e komo i ka hale kuai rama i ke ko, no ka mea, malia o haule kekahi kulu rama iloko o ke ko, a malia paha o lilo ia ia kakou. O ka'u ko a pau, he ko wai huihui wale no, no ka mea, he keiki wai huihui au, a o kakou a pau iloko o keia hale, i poe wai huihui wale no kakou." I aku la ka makuahine, "Pela io no, e kuu keiki aloha." A ke manaolana nei no hoi makou, o ka poe heluhelu a pau e lohe no Nede wai huihui, e hoopaa lakou i ka waha e kue aku i ka waina, ka bia a me ka Caida.
NA KA MAKUAHINE.
Pomalkai ka poe maemae ma ka naau, no ka mea, e ike lakou i ke Akua." Mat. 5:8.
I ka wa hea e ike ai ka poe maemae ma ka naau i ke Akua? Ma keia ola ana, i ka wa a lakou e hookokoke aku ai i Ona la ma ka pule a me ka manaoio. O ka hewa wale no ka mea e kaawale ai kakou me ka Makua ma ka lani.
Iloko o kekahi mau makahiki mamua, e noho ana ma Farani he lede hanohano, a he wahine waiwai loa ia. I kona wa opio, ma kona home maikai, ua hele pu oia me ke Akua;
Mahope nae hiki mai na ulia poino maluna ona. Make aku la kana kane, a ua kue mai kona poe hoa'loha no kona pono. Ua hoomaauia oia e like me ka mea i oleloia ma Mat. 5:11, 12. A mahope o ia, ua hoopaaia oia ma kekahi hale paahao ino loa, he pouli loa. Aka, iloko o ia wahi, ua loaa no iaia ka malu a me ka hauoli nui. I kekahi wa, no ka nui loa o kona hauoli, ua ane like na paia o kona hale paahao me ke gula a me ke daimana ma kona nana ana. E like me ia i pule ai o Paulo a me Sila iloko o ka hale paahao.
E na makamaka, e hooikaika kakou i maemae ma ka naau, pela ma na olelo a me na hana, i hele pu kakou me ke Akua ma keia honua, a i noho pu kakou me Ia ma Kona wahi hoano.
HAAWINA KULA SABATI.
HELU 10—SABATTI, AUG. 2.
KUMUHANA.—Paulo ma Torineto
PAUKU BAIBALA. Oihana 18:1—11.
A MAHOPE iho o keia mau mea, haalele iho la o Paulo ia Atenai, a hele ae la i Korineto.
2 A loaa ia ia kekahi Iudaio, o Akula kona inoa, i hanauia ma Poneto ia wa mua iho kona hiki ana mai, mai Italia mai, me kana wahine, o Perisekila (no ka mea, ua kauoha aku la o Kelaudio i ka poe Iudaio a pau e haalele ia Roma,) a hele mai la io laua la.
3 A no ka like o kana oihana, noho ia me laua, a hana iho la; no ka mea, he poe humuhumu halelole lakou.
4 Kamailio ae la ia maloko o ka halehalawai, i na la Sabati a pau, e hoohuli i na Iudaio a me na Helene.
5 A hiki mai la o Sila laua me Timo teo, mai Makedonia mai, alaila ikaika loa o Paulo ma ka olelo, a hoike aku la i na Iudaio ia Iesu, oia no ka Mesia.
6 Kuee aku la lakou, olelo hoino mai la, alaila lulu iho la ia i kona kihei, i mai la ia lakou, Aia maluna o ko oukou poo iho ko oukou koko; ua maemae au; ma keia hope aku e hele au i ko na aina e.
7 Hele aku la ia mai ia wahi aku, a kipa aku la i ka hale o kekahi kanaka, o Iouseto kona inoa, ua malama i ke Akua; ua pili no hoi kona hale ma ka halehalawai.
8 A o Kerisepo ka luna o ka halehalawai, manaoio aku la ia i ka Haku me ko kona hale a pau. A lohe ko Korineto he nui loa, a manaoio aku la, a bapetisoia iho la.
9 Olelo mai la ka Haku ia Paulo ma ka hihio i ka po, Mai makau oe, aka, e olelo aku, mai hoomumule:
10 No ka mea, owau pu kekahi me oe, aole hoi e lele kekahi ia oe e hana ino aku ia oe; no ka mea, ua nui o'u poe kanaka maloko o keia kulanakauhale.
11 Noho iho la ia malaila, hookahi makahiki a me na malama keu eono, e ao ana ia lakou ma ka olelo a ke Akua.
Pauku Gula. "I ka hana mau ana, mai hoopalaleha, i ikaika hoi oukou ma ka naau; e malama ana i ka Haku." Rom. 12:11.
Hoopaa naau p 9, 10.
Topika. Ka hana mau ana.
1 Ma ka hele ana p 1—3.
2 Ma ka hoike ana p 4—8.
3 Ma ke ao ana p 9—11.
Mele.—Mele hou. 8—9.
1
Ku a hele a kaapuni
Ma na wahi naaupo,
Imi i ka poe auwana,
A hoohuli ia lakou.
Ku a hele i na aina,
I ka poe hoomanakii,
A hai aku i ka olelo,
A ao ae i na pokii.
Pule no na aina naaupo, no ka poe hoomana kii, &c.
Na ninau a na Kumu.
Aole i loihi ka noho ana o Paulo ma Atenai, aole nui ka poe i huli mai, aole i kukuluia i ekalesia malaila. No ko na kanaka kanalua a hoopanee ana, ku no Paulo a haalele ia lakou, a hele aku i Korineto. He kulanakauhale kaulana keia no Akaia ma Helene, he 45 mile ma ke komohana ae o Atenai. Ua kukuluia ma kahi mokupuni uuku. Ua kaulana ia no ka nui o na kanaka, no ka waiwai, a no ka hoomanakii me ona mau hoopili, ka noho uhauha, a huikau wale a moekolohe, o Venusa ko lakou akua, he akua wahine, he heiau nona ma Korineto; he akua kokua ia i ka moekolohe, he akua kii lapuwale no. Ua hele nae Paulo ilaila, a hai aku i ka Iesu olelo i na kanaka. Ua hoolana ke Akua i kona manao, e olelo ana, mai makau oe,
Owau pu kekahi me oe; ua nui o'u poe kanaka iloko o keia kulanakauhale. A pela io no, nui ka poe i hoolohe, a huli mai. A ua kukuluia i ekalesia malaila; a he mau Episetole elua a Paulo i kakau ai na ia ekalesia.
P 1--3. Ka hele hou ana o Paulo. Mai hea aku oia i hele ai, a hiki i hea? Heaha Korineto? Aia mahea? Kaulana ia no keaha? Owai kona akua? Heaha kona ano? owai ka i loaa ia Paulo? Owai ka wahine a Akula? He mau Iudaio aha laua? Hanau ia mahea? Poneto, he aina ia ma ka hikina akau o Asia Uuku. Ua hele nae Akula ma i Italia, a noho paha ma Roma a i ole, ma kahi e kokoke ana i Roma. Ua haalele no nae laua ia Italia no keaha? owai o Kelaudio? Kelaudio Kaisara keia. Ka Emepera o Roma. Hoomaka oia i kona alii ana ma ka mak. 41, a make ma ka mak. 54. Ua lohe paha oia he poe hoomana e na Iudaio a kue i ka hoomanakii, ka hoomana o ke aupuni o Roma. He mau Iudaio no Akula me Perisikila, ua lilo nae i mau haumana na Iesu, a lilo hoi i mau kokua no Paulo. Nana Roma 16:3, 4, 5. I Kor. 16:19. 2 Tim. 4:19. Ua hookukeia laua mai Italia aku, a hele i Korineto, a hookipa laua ia Paulo, no ka mea, ua like kona oihana lima me ko laua. Heaha ia oihana? Pehea ka Paulo hana no ke ola kino? Oih. 20:33, 34. 1 Kor. 4:12. 1 Tes. 2:9. 2 Tes. 3:8. Pono anei i na kahuna i keia wa ke hoohalike? Hoopaa naau. Sol. 22:29.
P 4—8. Ka hoike mau ana.
Heaha ka Paulo hana ma na Sabati a pau ma na halehalawai? Owai ka i hiki mai a hui pu me Paulo? Mai hea mai laua? mok. 17:14, 15. Mai Beraia mai. A hui laua me Paulo, ikaika loa Paulo i ka hoike pehea? Ae anei na Iudaio? I ko lakou hookuli, a kuee ana, heaha ka Paulo hana, a me kana olelo no lakou, a nona iho, a no kona hele ana i ko na aina e? Lulu i kona kihei, heaha ka Iesu kauoha ma Mat. 10:14? Heaha ka Paulo hana mamua? mok. 13:51. Ina make lakou no wai ka hewa? No Paulo anei? Ina make oukou, no wai ka hewa? no na kahuna anei? Haalele Paulo ia halehalawai a kipa ma ka hale owai? He kanaka aha o Iouseto? mahea hoi kona hale? He Iudaio paha oia ua lilo nae i haumana na Iesu. Owai hoi kekahi luna o ka halehalawai i manaoio me ko kona hale a pau? Pehea hoi ko Korineto poe he nui loa. Hoopaa naau Ieremia 1:7.
P 9—11. Ke ao mau ana Ma kekahi po ma ka hihio, owai ka i olelo ia Paulo? Heaha hoi kana mau olelo hoolana? Heaha ka ke Akua olelo ia Ieremia mok. 1:8—19? Heaha ka Iesu olelo Mat. 10:28? Pehea ka loihi o ko Paulo noho ana ma Korineto? Hai mai 2 Tim. 2:24, 25.
Mele. Mele hou, 7—6. Leo Hosana kamalii
Ikaika no Akula,
Pe risekila pu,
Ua luhi pu me Paulo,
Aole i makau.
Ua mau ka laua hana,
Ua hoomaauia no;
Ko laua ola kino,
Ua lilo no Iesu
E hoohalike, ea,
Me laua kakou nei,
E luhi, hana ikaika
No ko na aina e.
Na Ninau a ke Kahu.
Na makua. Korineto, heaha ia? kona ano mua? Owai ka i hele ilaila, e ao a hoohuli i na kanaka? Ua nui anei ka poe i huli mai? Ua kukuluia anei he ekalesia malaila? Ehia a Paulo episetole ia ekalesia?
Na keiki. Hai mai i kekahi kane me kana wahine i hookipa a hana pu ma Paulo? Akula, Perisekila Hiki anei ia oukou ke kokua i na haumana a Iesu? Hai mai Mat 10:40—42. Heaha kela mau pauku no Akula ma ma Rom. 16:34? Aole anei he pono ke haawi oukou i ko oukou ola no ke ao aku i na keiki ma na aina naaupo?
Ke kula a pau. I ka mak. ehia i alii ai Kelaudio? Heaha kana hana ino i na Iudaio? No keaha? Owai na mea elua i k ipakuia a hele i Korineto? Heaha ka laua oihana? Owai ka i hana pu ma ia oihana hookahi? He mea mau anei i na mukua Iudaio ke ao i na keiki ma kekahi oihana hookahi? He mea mau anei i na mukua Iudaio ke ao i na keiki ma kekahi oihana hooikaika kino? Hilahila anei Paulo ke hana me kona mau lima i lawa kona ola kino? Heaha ka oihana kino o Iesu? Pehea na kahu ekalesia, hewa anei ke hana lima lakou i mea e lawa ai ko lakou ola kino? Pono anei ia lakou ke komo iloko o na hana, na mahiko, &c, i mea e waiwai ai lakou? Maluna o ke poo owai ka make o ka poe hoomaloka a hookuli? Heaha ka olelo a ka poe e kau ana ia Iesu ma ke kea? Mat. 27:25. Owai ka poe make ia lakou?
Ma keaha e hoohalike ai ka kakou me Akula ma? Heaha ka mea hoolana i ka manao o ka poe e hana ana no na aina e? Hai mai pauku 9, 10. Hai like mai i ka pauku gula, a me na mahele ekolu.
Mele.—Mele hou, 7. Leo.
Lana, lana ka manao,
Ole make e makau;
Hana, hana no Iesu,
Ko Iehova lima pu.
Nui, kini, lehu no
Ko na aina naaupo.
Mana nae ka uhane e,
Nana e hoohuli mai.
Pule no na aina e, no na misionari, a pela aku.
Haawina no Sept. 9. Oih. 19:1—12.