Ka Lahui Hawaii, Volume III, Number 44, 1 November 1877 — Page 1

Page PDF (1.13 MB)

KA LAHUI HAWAII.
"Ua mau ke Ea o ka Aina i ka Pono."
BUKE III.}  HONOLULU, POAHA, NOVEMABA 1, 1877.  {HELU 44.

KA NUPEPA KA LAHUI HAWAII.

Paiia ma kela Poaha me keia Poaha.
H. H. PALEKA,  Luna Hooponopono.
He pepa i hoopukaia i kela me keia hebedoma no na Ohana a me na Ekalesia o Hawaii; he mea kokua i ka noho pono ana o na ohana, ka maluhia o kanaka, a me na pomaikai kino a uhane o ka Lahui Hawaii. "Aole paonioni; aole haanui; aole hikiwawe ka huhu; aole noonoo ino."
O na Kumumanao a pau, na Nu Hou o kela me keia ano, na Mare, Hanau, Make, e kakau mai i ka Luna Hooponopono, a e paiia no ke kupono.
Aole e aeia ka pilikino, ke kuamuamu, ka hoino, a me ka huhu, a ua makemakeia ka hoohoihoi, hoolana manao, hoonaauao, a me ka hoopono.
He $1.75 ka auhau o keia pepa no ka makahiki, a he $1.00 no ka hapa makahiki.
E hookaa mua ia ka auhau o ka pepa mamua o ka loaa ana i kekahi mea makemake e lawe.

NO NA OLELO HOOLAHA.

E lawe ana keia pepa i na Olelo Hoolaha a na makamaka, e like me ke kupono, a e lawa pono ai hoi me ka hoohaiki ole i ka huina o na kolamu kukulu manao, no ka uku haahaa.
O kela a me keia makamaka e makemake ana e hoolaha, e hele mai ma ke keena a e hui pu me ka Luna Hooponopono.
Aole e paiia kekahi Olelo Hoolaha ke ole e hookaa mua ia ka auhau.
Eia kekahi, ke noiia aku nei na makamaka e hoouna mau mai i na mea hou; mai hooloihi loa i na palapala; e hai pololei mai i na manao me ke kuawili ole, a e kakau mai me na hua moakaka.
E hoouna mai na Leta i ka LAHUI HAWAII.

S. B. DOLE.

LOIO a he Alakai ma na mea pili Kanawai. Ua makaukau oia e pale i na hihia imua o na Aha Hookolokolo a pau o keia Aupuni, me ke kakau ana i na Palapala Pili Kanawai, ma ka olelo Hawaii a ma ka olelo Beritania.  1 1y

WAi Hui o ka Hau!

E IKE IA ka Hale ma ka inoa o "BONANZA" Ke haawi ia aku nei ka poloai i na makamaka keonimana a me na lede o ke kaona Alii, e kipa ae ma ka hale hookipa inu wai momona o ko oukou makamaka nona ka inoa malalo iho, a e loaa no ka hau i hoomomonaia (ICE CREAM) na wai momona o na ano a pau! hoohuihui ia e ka hau iniki o Nuuanu. O keia hale, he hale i hoomakaukauia no na keonimana a he keena nani i hoomakaukau ia no na lede. E kipa mai, a o ka makepono me ka oluolu ke haawi ia'ku, oiai, he makamaka, a he kamaaina no Hawaii nei o  JOHN W. CROWELL.
2-1 y  (Keoni Koloela.)
Ma ka Hale "BONANZA" ma alanui Moi, mawaena o ka hale kahi umiumi a me ka halekuai o Dillingham ma.

E. O. HALL & SON
[E. O. HOLO MA.]

NA MEA KUAI I NA MEA MAHIAI
NA LOLE, PENA, AILA,
—A ME—
NA ANO LAKO E AE A PAU.
Kihi o Alanui Papu me Moi.  1-1y

WIL DER & Co.,
(WAILA MA.)

AIA MA KE KIHI O
ALANUI PAPU me MOIWAHINE.
Ua hoolako mau ia me ke kuai ana aku i na
Papa me na Lako Kukulu Hale
O NA A PAU.
NA PANI PUKA!
PUKA ANIANI.
OLEPELEPE,
LAKA,
AMI LIILII,
AMI LOLOA.
PENA o na ano a pau,
AILA PENA,
VANIKI, &c.
Ma Balaki Pena me Puna,
Na Pepa Hale me na Lipine Pepa.
Aniani, Paakai, &c.
O na mea a pau maluna'e, e kuai makepono loa ia'ku no ke Dala Kuike.  [3—1y.]

PAPA, PAPA.
AIA MA KAHI O
LEWE RS & DICKSON
(O LUI MA.)

KE KAHUA KAHIKO MA
Alanui Papu a me Alanui Moi
E LOAA AI NA
PAPA NOUAIKI o kela a me keia ano.
NA PAPA NANI
A PAA NO KE KUKULU ANA I NA HALE.
Na Pani Puka,
Na Puka Aniani,
Na Olepelepe,
Na Pou, na O-a,
Na Papa hele,
Na Papa Ku,
Na Papa Moe.
Na Pili o na ano a pau!
NA PEPA HOONANI,
Na PENA o na wai a pau
Na Kui mai ka nui a ka makalii,
Na Ami-puka,
Na Ami-puka Aniani,
Na Ami o na ano a pau,
NA AILA PENA,
NA AILA HOOMALOO,
NA AILA o na ano a pau.
NA VANIKI
Na mea HOOHINUHINU o na ano a pau.
Na Balaki o kela a me keia ano.
A KE HAI IA AKU NEI KA LONO i na makamaka a pau, ua makaukau keia mau hoa o oukou e hoolawa aku ma na mea a pau e pili ana ma ka laua oihana
—NO KA—
UKU HAAHAA LOA!
like me ka mea e holo ana mawaena o LAUA a me ka MEA KUAI.
E hele mai! E na makamaka!
A e lawa no hoi ko oukou makemake me ka oluolu
1  a me ka maikai.

P raise the Bountiful Giver.
C rown o f Glory, p. 102.

1
Hoolea'e a hoomaikai
I ka Makua maluna'e,
Nona mai ka hanu nei,
Nona koonei pomaikai,
Nona hoi ka uhane o'u,
Nona no ke ola mau.
Ala, e na hoa nei,
Ala, oli, hoomaikai.
Cho.—Hoolea'e i ka Haku aloha,
Mele, mele, mele mau loa.
Hoolea'e, hoolea'e ia Iehova,
Mele, mele, mele mau loa.
2
Hoolea'e a hoomaikai
I ka Makua maluna'e,
No ka alana o Iesu,
No ka lama a oli pu.
Hoolea'e na mea a pau,
No ka malu ma ke ao ;
Hui pu na kamalii,
Mele, oli, hoomaikai
Cho.—Hoolea'e i ka Haku aloha, &c.,
3
Hoolea'e a hoomaikai
I ka Makua maluna'e,
No ka haawi ana mai
I kokua e oli ai,
Oia no ka Uhane laa,
Me kakou e noho paa.
Nani na makana nei!
Ala, mele, hoomaikai
Cho.—Hoolea'e i ka Haku aloha, &c.,
HAWAII.

KA NANEA EEHIA!
—O NA LA—
I AU WALE KA MANAWA
—A O KA—
HIHIO ILIHIA A KA UI
LEON ROSE!
—NO NA—
KOA KAVALIA OPIO:
—NA—
SEPANIA EKOLU!
He Nanea Walohia o ka Weli Eehia.
MOKUNA VIII—HELU 24.

          Paulele kapekepeke, e ke keiki o ke kuhihewa,
          I alakai ia e ka palaleha, e hoopanee mau i ka hauoli,
          Iloko o na malu poino, a me na auamo o ka eehia.
          A IA manawa i pane mai ai o Dona Padila, me ka haalulu ano huhu. Aole anei e hiki i kekahi mea e ae ke hoike mai i ka like ole o keia mau mea?
          Pane aku la o Ferenado, he oiaio o oe wale no ka mea hiki.
          Owau hoi, pane aku la au me ka leo oluolu, o ka oi aku keia o na kamakamailio ano lapuwale i ikeia ; a ke manao nei hoi au e Dona Padila, e ae ia mai makou e haawi aku i ke aloha hope loa no na lede.
          Pane mai la oia me ke ano hookiekie, he kanalua au ia mea. Ua pilikia na lede i ka hana.
          Aole anei hoi he mea hiki ka waihoia aku ia mau hana, no ka hele ana mai e ike hope loa i ko lakou mau kaikunane. Anoai paha aole e halawai hou aku ana.
          Aole io no e halawai hou ana, i pane mai ai o Padila.
          Ina pela alaila, aole no hoi paha oe e hoole mai ana i ka lawe ana aku i ko'u mau hoomaikai no ko'u mau kaikuahine no na hana aloha i loaa mai ia'u.
          Na'u ia e hoike aku i kou mau hoomaikai, i pane mai ai o Dona Padila. Aohe kahua kupono o keia mau hoolala ana, he mea hoouluku wale no ia i ka noonoo, no ka manawa e kaawale aku'i.
          Ina e haalele mai ana na malihini hoopilikia wale ia oe, o ka oi loa aku ia o ka oluolu iloko o ke ola ana, wahi a Ferenado.
          Pane mai la o Padila, i keia la e loaa mai ana ia'u ka haawina nui o ka hauoli.
          "Ua hookaumaha io ia no oe e kuu makamaka," wahi a'u i pane aku ai,—aka he pono ia kakou e hookanaka. Ina paha, e hele ae ana oe ma Maderida i kekahi manawa e Dona Padilla, e halawai mai no oe me na hoohiwahiwaia ma ko'u Halealiii : a ke lana nei kuu manao, aole paha e liuliu mai keia manawa aku, e loaa no ia'u ka hauoli o ka hookipa ana mai ia oe ma ko'u wahi.
          Aohe ia he mea maopopo, i pane mai ai o Padila, no ka mea, o ke ola ke ku nei ma kahi nihinihi, e ka Makuisa. He kanaka ui oe a opiopio hoi ; aka, he lehulehu wale na kanaka e make nei i like na makahiki me kou—oiai ina oia maloko o ka puali kaua.
          Ike aku la au iloko o kona manawa e kamailio mai ana i keia mau olelo hua ole, i ka lele o kona mau kii onohi io a ianei me ka helehelena o ka inaina i piha i ka hookamani, a ua ala mai la iloko o'u ka manao hoohuoi, a ua pii ae la hoi ko'u hooinaina. Aole loa e hiki ia'u ke hoopoina i ka hoomanao ana he powa oia: a ua hauoli nui hoi au, no ka haule wale ana o kana mau hana ino i hoolala ai, oiai ua ikeia e makou.
          Mahope iho o keia mau kamakamailio loihi oluolu ole, e hookaawaleia'i makou, me kuu nonoi ikaika aku hoi ia Padila, no kona ae mai no ka hele ana aku e ike i na lede, aka, he waiwai ole nae ia mau hooikaika ana aku ; me ke anoninoni no hoi, i loaa ai ia'u ka manawa e hoopuka aku ai he mau wahi huaolelo pokole ia Gonazaleza, me kuu hooia aku hoi iaia no ko'u hoomalu ponoia, a haawi aku la hoi i ko'u mahalo, no kona ae ana mai e makaala no oia no ko'u mau pono, a ke ulia ia ka loaa ana mai o kekahi haawina e hauoli ai, mai kekahi mai o na lede, e hoouna koke ae no oia i kekahi elele ia'u malalo no nae o kuu mau lilo ponoi.
          Ua hoohalaia e a'u ka manawa oia la a hiki i ke awakea me na noonoo oluolu ole.
          Oiai hoi o Ferenado e kamailio mai ana ia'u, no na mea hooweliweli hoi o ka ka po i hala aku. Hoike mai la oia, ua ukali ia aku no oia mahope o kela kino hoopahaohao, i ka manawa i peahi mai ai, oiai e naue ae ana, ua like no hoi ia me ka'u mea i koho mua ai.
          Aole au i makemake iki no kuu komo ana ma ke keena hoomana, wahi ana i pane mai ai, aka, oiai o ka pono wale no o ko'u hoolohe aku i na alakai ana a keia uhane pahaohao, ka mea nana i hookikina mai ia'u, e iho aku ilalo, ma kela ilina weliweli. Hele aku la no ua kino wailua nei, mawaenakonu o kekahi ahua pahu kupapau, a me he mea la, e alakai aku ana ia'u iloko o kekahi mau laau hihi, e luluu ana malalo iho o ka hale Kakela. Ia'u i aui ae ai ko'u nanaina ma ka aoao hema, ike aku la au i kekahi malamalama i oili ae, mailoko mai o ka houna, a ia manawa no hoi au i ike pu aku ai i kekahi wahine, me he mea la, ua hoea ae mai kekahi lua hamama mai, ua aahuia oia me ka aahu ano e loa.
          He wahine ka, wahi a'u i pane aku ai, he mea kupanaha loa ia! Pehea la kona ano ? Heaha ke kumu o kona hiki ana malaila ? maloko anei o kela mau lua kona wahi noho ?
          Aole i maopopo ia'u, wahi a Ferenado i pane mai ai. Ua hooho koke ae la no oia me ka leo nui i kuu wa i hoea aku ai. He hooho ana hoi me na leo wawalo i nakolo hele aku a puni kela mau wahi eehia, a ua hoonawaliwali loa ia mai la kuu noonoo. Nalowale hou iho la oia iloko o ka lua, a koe iho la owau wale no, iloko o ka pouli aaki.—A ke mau la no hoi ka nee akahele ana o ke kino wailua o Ferenadeza.
          Ua nalowale no kuu uhi ipukukui, iloko o ka manawa i  uluahewa ai kuu noonoo, aole no hoi i hiki ia'u ke hanu maikai ae no ke koo'u o ke ea, a no kuu ano makana maoli mai la no hoi, nolaila, ua haule iho au ilalo i ka honua.
          O ko maua kamallio ana ma keia mau mea, me na manao kaumaha wale no iloko o ka puuwai. Iwaena o ko maua wa e kamailio ana, hiki mai la kuu kauwa me na miula, a me ekolu mau kamaaina alakai, e hele pu ai me makou.
          Ua noho paa loa mai o Dona Padila, me makou, i loaa ole ai ia makou he manawa e pane leo aku ai i kaua mau kaikamahine. Hoomaopopo mai la oia i ka heluna o kuu mau alakai, a me he mea la aia iloko ona ke kanalua, pehea la makou e hoolawa ponoia ai me na mea hoopale aku no na hoopilikia mai.
          Kau aku la ka nanaina a ko'u mau kii onohi, ma-na puka aniani o ka hale maluna me ka manao e ike lihi aku hoi ia Vireginia, no ka manawa hope loa; aka aole loa i loaa ia'u ka pomaikai o ka ike hou ana aku iaia; a mahope iho o na hoomaikai hookamani ana mai a padila, no ko makou pomaikai, a me ka maluhia ma keia huakai hele, haalele iho la makou i ka hale Kakela o Monatilo, kahi hoi i loohia mau mai ai o na ulia poino lehulehu, a e silaia hoi ko makou mau ola na hana a me ka makou mau hooikaika ana, mai na ulia ae nana e kauo hou aku ia makou ilaila.
(Aole i pau.)

Moolelo o ka Ahahui Euanelio o Hawaii
HIKINA.

Halawai ka Ahahui Euanalio o Hawaii Hikina ma ka luakini o Haili, Hilo, i ka la 9 o Okatoba, M H 1877, hora 1 P M.
Noho ka Lunahoomalu mua ma ka noho. Eia na lala i hiki mai.
Ekalesia.  Kahu.  Elele.
Hakalau & Laupahoehoe  Rev. S. Kukahekahe  D. Kaawa
Onomea  Rev. J. H. Pahio  ———
Haili  " T. Coan  M. Puaa
Puula  " J. N. Kamoku  . K. Po
Kalapana & Opihikao  ———  J. Paakaula
Kapaliiuka  ———  ———
Lala mau, Rev. D. B. Lyman, Rev. P. Barenaba a me Dr. C. H. Wetmore.
Ma ka balota, ua kohoia o Rev. J. H. Pahio i Lunahoomalu, a o J. N. Kamoku i Kakauolelo.
Pule ka L. H. Koho ka L. H. i Komite Imi Kumuhana: oia na Rev. Coan, Forbes, a me Barenaba. Lilo ka hale i ka haipule i ka wa i kaawale ai ke Komite.
Hoike mai o Coan ka L. H. o ke Komite i na Kumuhana he 18. Ninauia a apono ko ka hale.
1 He 20 minute haipule i ka hoomaka ana a me ka hookuu ana i kela a me keia la.
Malama iho la ka Aha he 20 minute haipule.
Noi mai o Kamoku e lilo o Rev. A. O. Forbes i lala mau no keia Aha, apono ia.
Hapaiia ke Kumuhana 2, Hoike Kihapai.
Hoike mai o Kukahekahe no ka ekalesia o Hakalau me Laupahoehoe, he maikai na hana ma ke kihapai, aka, o ke ola kino o ke Kahu he nawaliwali.
Heluhelu mai o Coan i ka hoike kihapai o Haili. Ua uhau mai ke Akua i kekahi hapa o keia ekalesia i ka malama o Mei; aka, o na hana pono a me na kokua, he nee no imua.
Hoike waha mai o Forbes no ka ekalesia haole o Hilo, ua holo pono ka hana ma ia kihapai.
Hoike mai o Lyman no ke Kula Hanai o Hilo, he 50 haumana i keia wa.
Hoike mai o Kamoku no ka ekalesia o Puula, a o Paakaula no ka ekalesia hui o Kalapana me Opihikao. Ke pii nei na hana pono iluna.
Ma ke noi a Coan e hoopanee ka halawai apopo hora 9 A M, aponoia. Malamaia ka wa haipule.
La hana 2, Poakolu, Cct. 10.
Hui hou ka Aha e like me ka hoopanee ana. Pule ka L. H. Kaheaia na inoa. Heluheluia ka moolelo a aponoia. Malamaia he 20 minute haipule.
Hoike mai o Pahio no ke kihapai o Onomea, he mau no ka ulu o na hana pono. Kuka ka Aha no ka hiki ole mai o ke Kahu o ka ekalesia o Kapaliiuka; ua kohoia o Rev. P. Barenaba i komite e pane aku ia Rev. J. Kauhane.
Hapaiia ke Kumuhana 3, Heluhelu Haawina.
Heluhelu mai o Pahio i kona haawina. Pehea la e pule pono aku ai ke kanaka i ke Akua i mea e ola ai kona uhane?
Heluhelu mai o Layman i kona haawina. E wehewehe mai i ke ano o na wepa ehiku ma Hoik. 6.
Heluhelu mai o Kamoku i kona haawina. Pehea la e ulu hou ai na Oihana Misiona Kuwaho ma keia mua aku?
Heluhelu mai o Coan i kona haawina ma I Kor. 15:54.
Noi mai o Forbes e hoopanee ka halawal a ka 1 1/2 P M, aponoia. Hoopanee ia me ka pule a Lyman.
Noho ka Aha ma ka hora 1 1/2 P M. Kahea ia na inoa. Pule ka L. H.
Kumuhana 4, Komite Imi Haawina.
Koho ka L. H. ia komite Coan, Barenaba a me Puaa.
Kumuhana 5, Na Palapala Hoopii.
Kumuhana 6, Kula Kaikamahine o Kohala.
Ua kukaia, ua mahalo keia Aha no ka piha oia kula i na haumana. Ua hooholo ka Aha e kokua aku na ekalesia o keia Aha i ke Kula Kaikamahine o Kohala.
Kumuhana 7, Kula Kahunapule.
Ua kuka ka Aha no S. Kamakahiki, no ka ekalesia o Puula, me ka ninau ana ia ia. Ua apono ka Aha iaia e hele i ke Kula Kahunapule ma Honolulu.
Ma ka noi a Forbes, e palapala aku ka L. H. a me ke Kakauolelo i ke poo o ke Kula Kahuna, i ka apono ana o keia Aha ia S. Kamakahiki e hele a komo i ke Kula Kahuna.
Ua kohoia o Rev. T. Coan, Rev. A O Forbes. Rev. D B Lyman a me Rev. P Barenaba i komite e ninau i ka poe makemake e hele i ke Kula Kahunapule ma keia mua aku.
Kumuhana 8, Na Misiona. Kukaia.
Noi mai o Forbes e hoopanee ka halawai apopo hora 9 A M, aponoia.
Hoopaneeia me ka malama ana he 20 minute haipule.
La hana 3, Poaha, Oct. 11.
Halawai ka Aha ma ka hora 9 A M. Pule ka L. H. Kaheaia na inoa. Malama ia ka wa haipule. Heluheluia ka moolelo a aponoia.
Heluhelu mai o Forbes i kona haawina, Hoik. 21:1. Ua weheweheia me na manao maikai.
Kumu hana 9, Ke ano o ka Ekalesia o Hawaii nei.
Nui na mea i kuka ia.
Noi mai o Coan e hoopanee a ka hora 1 1/2 P M. Pule o Kaaia.
Halawai hou ka Aha ma ka hora i hoopaneeia ai. Pule ka L. H. Kahea ia na inoa.
Hapai hou ia ke Kumuhana 9.
Wehewehe nui na hoa, a ua kauoha ia na Kahu a me na hoahanau e kinai i na mea ino e ulu mai ana iloko o ke kihapai.
Kumuhana 10, Ua hua pono anei ka Mahinahou ma na Ekalesia o keia Aha?
Ua hua pono no ma kekahi mau kkalesia, a ma kekahi, aole no he holopono loa, nolaila, e kokua nui kakou i ka mahinahou.
Kumuhana 11, Hanai Kahu.
Ua pilikia kekahi mau kahu no ka hanai pololei ole ia. He pono i na ekalesia ke hanai pono i ke ola o ko lakou mau kahu.
Ma ke noi a L. H. e hoopanee ka halawai a ka hora 9 A M o ka la apopo. Pule o Dr. Wetmore.
La hana 4, Poalima, Oct. 12.
Halawai ka Aha ma ka hora 9 A M. Kaheaia na inoa. Malama ia ka wa haipule. Heluheluia ka moolelo o ka halawai i hala a aponoia.
Ma ke noi a Lyman, e nana pono ka Papa Hawaii a me na Ekalesia o Hawaii nei; a e noi nui aku i ke Akua no na Misiona o Fatuhiva a me Maikonisia. Aponoia.
Kumuhana 12, He mea pono anei e kokua na Kahunapule a me na hoahanau o na ekalesia e kinai i na hewa ma Hawaii nei?
Kuka nui na hoa.
Heluhelu mai o Coan i ka olelo hooholo.
Ke mahalo aku nei keia Aha i ka Loio Kuhina, na Ilamuku, na Lunakanawai a me ka poe a pau i ala mai e hooko i na kanawai pono o ke Aupuni, a ke manao nei na Lala o keia Aha, me na ekalesia, e kokua pu aku i na'lii a me na Luna Aupuni o ke Aupuni Hawaii ma ka lakou hana nui a kaumaha, i ka hoomalu ana i ka Lahui Hawaii.
E pule nui kakou i ke 'Lii o na 'Lii, e kokua nui mai ma keia hana e pono ai ka Lahui.
Kumuhana 13, E hiki anei ia kakou ke imi i na mea e ola'i na pake iwaena o kakou?
Ma ke kuka ana o ka Aha, eia ka mea i aponoia.
No ka hiki ana mai o na kanaka o Kina a nui ma ko makou aina, ke ae nei keia Aha, e noonoo a e hui aku me
ka poe lokomaikai o Kohala, a ma kahi e paha, e imi i na mea e pono ai, a e ola ai ko lakou mau uhane ma o Iesu la.
Ma ke noi a Coan e hoopanee a ka hora 1 1/2 P M. Pule o Coan.
Halawai ka Aha ma ka hora 1 1/2 P M. Kaheaia na inoa. Pule ka L. H.
Kumuhana 14, Na Ekalesia o keia Aha i nele i ke Kahu ole.
E huli no ka ekalesia i nele i ke Kahu ole i Kahu no lakou, a pela no me na lala o keia Aha.
Ua koho keia Aha ia Rev. D. Makuakane i mea nana e malama i ka ahaaina a ka Haku ma ka Ekalesia Huiia o Opihikao me Kalapana; a ina ua kaawale ole oia, na Kamoku e malama ia hana ma ua ekalesia Huiia la.
Kumuhana 15, Na Kula Sabati.
Ua holopono no na Kula Sabati ma kekahi mau kihapai, a ma kekahi ua emi. Nolaila, e makaala na Kahu ekalesia a me na Kahu Kula Sabati i ko lakou mau Kula Sabati iho.
Kumuhana 16, Ka nupepa KA LAHUI HAWAII, e hooikaika na kahu me na ekalesia e lawe nui i ka Lahui Hawaii ma keia makahiki ae.
Kumuhana 17, E malamaia ka pule mua o Ianuari a me ka Poaha ekolu o Feb. 1878 i wa haipule.
Kumuhana 18, Kahi a me ka manawa e hui hou ai keia aha.
E hoopaneeia ka halawai a hui hou ma Haili, Hilo, i ka Poalua elua o Apr. 1878.
Eia na Kumumanao.
Ua hoopaakiki anei o Iehova i ka naau o Parao; a ina pela nowai ka hewa? Puk. 7:3.  A. O. Forbes.
Solomona 10:12,  J. H. Pahio.
I Kor. 12:31,  T. Coan.
Sol. 28:13,  J. N. Kamoku.
I Tim. 6:10,  J. Paakaula.
Ua pono anei i na wahine, e haiolelo euanelio, ma na aha kane me na wahine, a lawe paha i ka oihana kahunapule?  D. B. Lyman.
O ka Barenaba, Kukahekahe a me Makuakane, o ka lakou mau haawina mua no.
T. Coan, P. Barenaba, M. Puaa na Komite.
Heluhelu mai ke Kakauolelo i ka moolelo a aponoia. Ma ke noi a Coan e hoopukaia ka moolelo o ka aha ma ka nupepa ka Lahui Hawaii. Aponoia.
Malama ka aha i ka wa haipule, a hookuu aku la.  J. N. KAMOKU.
Hilo, Oct. 17, 1877.  Kakauolelo.

HE AIE KOIKOI.

          Ua kamaaina mau ke kamailio ia no ka aie o ke kulanakauhale o Nu Ioka, a he mea ano hoolele oili, aka ua emi iho ia malalo o ka akahi hapakolu o ka aieo ke kulanakauhale o Parisa. Ina e hoopololeiia na huahelu ma ka papa kuhikuhi, alaila, o ka aie o Parisa a hiki i ka la 1 o Ianuari, $380,000,000 ma ka eiwa mau mahele aie kaawale.
          Mailoko mai hoi o keia, he 5 mau mahele aie i hiki aku ka huina dala i ka $20,000,000, malalo ia o na hooponopono aupuni Imeperiela, a o ke koena he $180,000,000, ua hoopaaia mai ka manawa o ke kaua o Geremania.
          O na hookaa ana no ka ukupanee, a me na hoolilo ana no na pono pili aupuni, ua hiki aku i ka $21,000,000 no ka makahiki, a o ka huina nui o na auhau i ohiia maluna o ka lahui he $54,000,000 o ka makahiki. I ka nana iho ua hewa i ka wai ka nui o keia heluna aie, aka, ma ke ala lokahi ana o ka lahui kanaka, ua lilo ka aie o Parisa i mea liilii loa.

KA ULU HOU ANA O NA HANA PONO MA POLOLU.

E KA LAHUI HAWAII: Aloha oe:—
          E oluolu oe e hookipa aku i keia wahi mea hou ma kekahi kowa kaawale o kou mau kolamu, i ike mai ai na tausani kanaka e lawe ana i kou kino lahilahi. Aia ma keia awaawa ke ulu hou nei na hana pono i keia manawa, oia ke kula Sabati a me ka halawai no hoi kekahi, aole pela mamua iloko o ka makahiki 1876 a me ka hapa o keia makahiki, a iloko o keia manawa ke ulu nei, i ka manawa mamua aole.
          Pule ia ka hale halawai, pomaikai ke hiki aku i ka elua hoahanau, alaila pule ia iho la, a i kekahi manawa, 1 wale no hoahanau, ai kekahi manawa mai aole he pule ia; a iloko o keia manawa, ua pule mau ia, ua hiki aku ka huina o na hoahanau i ka umi a oi, a ina e kula Sabati, ua hiki aku ka huina i ke 40 a oi, pela iho la makou e nee nei iloko o ka pono o ka Haku.
          Ua pau me ka mahalo i ka Luna Hooponopono a me na keiki ulele hua metala ko'u welina.
S. W. KAUHAA.
Pololu, Kohala Akau.