Ka Lahui Hawaii, Volume III, Number 50, 13 December 1877 — Page 4
KA NUPEPA KA LAHUI HAWAII.
HONOLULU, DEKEMABA 13, 1877.
KOMI TE HOOPONOPONO NO KEIA AOAO.
LAIKI MAKUA, MRS. KELA A. GILIMANA,
M RS. ELENA MAKALE, MRS. J. M. KUKE.
OLELO PANE A KEKAHI KAUKA HAOLE I NA mea Ona.
"E ke Kauka," wahi a Mr. Makemake-e-inu-iki, "Manao anei oe he mea e poino ai ke inu liilii au i ka waiona i kela a me keia manawa?"
"Aole," wahi a ke Kauka me ke akahele, "aole au i manao e poino nui loa oe ke inu liilii i kela a me keia manawa; aka, ina aole oe e inu iki, aole oe e poino iki."
Ka Hoomana Oiaio.
O ka hoomana oiaio, he mea ia no na manawa a pau, a me na wahi a pau. Ulu mai ia mai na naau aloha.
He kanaka negero i loaa i kona ola ma ka humu ana i na kamaa. Aole he nani loa kana hana. Aole oia i akamai, aka, he paa kana hana. Olelo kekahi kanaka iaia, "E kuu makamaka, aia a pau kou humu kamaa ana ma ka honua nei, pehea kela ao mahope ? He manaolana anei kou no ke ao pomaikai?"
Pane aku oia, "E ka haku, he kanaka ilihune humu kamaa wale no au, aka, ke manao nei au i kuu wa e noho nei maanei, e nana mai ana ka Haku Maikai ia'u, a i ko'u wa humuhumu e humuhumu maikai, a i ka wa i hoopaa au i kekahi kuikui kamaa, aole ia he pepa; aka, he ili maikai."
Oia ke ano Kristiano oiaio. Aole ma ka Ekalesia wale no ka pono, aole ma ka olelo wale no; aka, ma na mea a pau a kakou e hana'i.
O ka hoomana oiaio, aole ma kela wahi, aole keia wahi; aka, ma kela a ma keia a ma na wahi e ae a pau.
He mea ia no ka la hoomalolo, e like me ka la pule;—me ke kuai a me ka hana e like me ka pule, me ka papaaina o kela a me keia la, e like me ka papaaina o ka Haku. W. H.
Na Laau Kaulana.
Aia no ma Amerika mamua aku nei, ekolu mau laau kaulana loa. Ke manao nei au, elua o laua ua hina ilalo; aka, o ke kolu ke ku nei, he laau elemakule. O keia laau e ku nei, aia no ia ma Cambride, Mass., a he laau elm nunui ia. Malalo o ia laau kahi a George Washington i lawe luna ai no na koa. Ke ku nei ia laau ma ke kula, me ka pa a puni, e hoomalu ia mai na mea e makemake ana e lawe aku i na lala, a e hana ino paha i ka laau.
Ma ke kumu o ka laau, ua kakia ia kekahi pepa, e hai mai ana i ka moolelo o ka laau.
O kekahi o keia mau laau ekolu, ua kapaia ha "Charter Oak," (Laau Oka Kumukanawai) ; ua ku ia laau ma Hartford, Conn.
Maloko o kekahi hakahaka o keia laau, ua huna ia ke Kumukanawai o ka mokuaina o Conetekuta. O keia Charter, he Kumukanawai i haawiia e ke 'Lii o Enelani i na kanaka e noho ana ma Amerika, e haawi ana ia lakou i kekahi mau pono a me kekahi mau pomaikai. Mahope makemake ke 'Lii e lawe aku i keia mau pomaikai, a i mea e hiki ai iaia ke hana pela, makemake oia e loaa keia Kumukanawai iloko o kona mau lima. Hele mai kekahi makai o ke 'Lii a kauoha i na kanaka e haawi i ke Kumukanawai iaia. I ke kamailio ana o na kanaka no ka haawi, a me kekahi mau mea e ae, ua po ka la, a ua laweia mai na kukui iloko. Ewaiho ana ke Kumukanawai maluna o ke pakaukau. I ka wa i ike oleia ai ua puhi ia na kukui, a mamua o ka ho-a hou ia ana e na kukui, ua nalowale ke Kumukanawai. O William Wardsworth, oia ke kanaka i hele malu iwaena o ka Ahakanaka a huna i kela palapala waiwai maloko o ka hakahaka o kekahi laau oka, i kahiko mamua o kela poe kanaka, a e ku ana iho nei e hooiaio i keia mau olelo.
Nolaila, o keia ke " Charter Oak," (Laau Oka Kumukanawai.) O ke kolu o na laau, he laau elm nui ma ke kula o Bosetona, aole au i ike i kona moolelo. Ua hina ia i kekahi makani ikaika elua makahiki i hala aku nei.
Ke Akua o ka poe makua ole.
"E waiho kau poe keiki makua ole me a'u," wahi a ka Haku i kona poe kanaka "He makua no ka poe makua ole, a he Lunakanawai no na wahine kanemake o ke Akua ma k na wahi hoano." Ua hoike pinepine ko kakou Haku aloha i kona kupaa ma ke kokua i ka poe pilikia.
Hana ikaika kekahi poe, hana ikaika loa lakou i ke dala e waiho no ka lakou mau keiki, a lilo ia i mea pomaikai ole no lakou ; hoolilo ke dala i mea e hewa ai na keiki.
Ua ike kakou i kekahi poe i hana pono i ka lakou mau hana a pau, a ao aku i ka lakou poe keiki ma na mea o ke Akua. Ua kahea ia lakou e haalele i ko lakou mau ohana, i ka wa aole waiwai e waiho aku no lakou; he pono wale no iloko o ka Makua Nui, ua waiho ia lakou iloko o kona mau lima, a ua hoike mai Oia ua oiaio kana mau olelo hoopomaikai. Aloha aku oia i ka poe i makau aku iaia, a i malama hoi i kona mau kanawai, a hiki aku i ke kuakahi a me ke kualua.
Heluhelu au no kekahi kahunapule ma ke komohana o Enelani, he mai ia a kokoke i ka make. Ua hana ikaika loa ia ; aka, aole ona waiwai. Ninau kekahi o kona mau makamaka no kona hana ana i kona palapala hooilina. Olelo ke kanaka e make ana, "Aole a'u mea e waiho mahope, eia wale no o kuu wahine a me na keiki, a ke waiho aku nei au ia lakou na kuu Makua ma ka Lani e malama." A make iho la ia me ka olioli. Olelo na kanaka, pehea la kela ohana ? Mahea la e loaa'i ia lakou ke dala e kuai i ka ai ? Ua ike ka Haku i na mea a pau.
He kanaka waiwai i inaina i keia kahunapule i kona wa e ola ana. I keia wa, hoeueu ka Haku iaia no keia ohana. Haawi oia i ke dala, a koi aku i na mea e ae e haawi, a hoolako pono ia lakou. Ua haawi ia he hale a he pahale i keia wahine kanemake, a nolaila, ua oi aku kona mau pomaikai o keia ola ana, mamua o ka wa e ola ana kana kane.
Ua ike aui kekahi ohana haole i waihoia ma Honolulu nei. Make ka makuahine. O ka makuakane he kanaka mai ia ma kahi mamao loa aku. Pule kela makuahine i ke Akua e malama i kana mau keiki.
He umikumamakahi na makahiki o ke keiki mua, a o ke ke keiki hope loa, he bebe ia. Olelo ka makuahine, "Hookahi wale no wahi no lakou, oia ke waiho io lakou me ke Akua !"
O kela mau keiki 5, ua waiho mehameha ia lakou, aka, aole mehameha. Hoouna ke Akua i na makamaka Kri stiano no kela mau keiki. Ua malama ponoia lakou, ua hoaahuia, ua hanai ia, a ua aoia, oi aku na pomaikai mamua o ka mea i hiki i ko lakou mau makua e hana'i no lakou. Ke noho nei kekahi o lakou ma keia mau mokupuni e hoomaikai i ka Makua nana i malama i na keiki makua ole, i haawi pono ia nana e malama.
KE ALAULA.
MOKUNA 36.
Ia Iesu e olelo ana i keia, ike ia aku la na kanaka he nui wale, e hele ana iloko o ke kihapai. O keia na kauwa a ka poe hewa maloko o Ierusalema. Aia ma ko lakou mau lima na pahikaua, na newa a me na ipukuki. Aia hoi o Iuda mamua o lakou, i hiki ai ke hoike aku i kahi o Iesu i noho ai. Aka, ua hele mai la o Iuda, me ke ano hoomaalea imua o Iesu, a honi mai la Iaia, me he mea la he aloha i kona Haku.
Ua ike no o Iesu i ka Iuda mea i manao ai e hana, a olelo aku la Oia, E ka makamaka, no ke aha la oe i hele mai nei maanei ? A no ke aha la hoi oe i honi mai ai Ia'u.
Aole o Iesu i holo e pee, aka, ua hele aku la no Oia imua o ka poe hewa, a olelo aku la, "Owai la ka oukou e imi nei?"
Olelo aku lakou, "O Iesu ka makou e imi nei."
Olelo aku la Oia, "Owau no Ia."
Iaia i olelo aku ai i keia, ua hoohina mai la ke Akua i na kanaka hewa a pau ilalo, ma ka honua. Alaila, ua hiki loa Iaia ke holo, aka, ua paa no Kona manao e noho, i make ai Oia no ka poe hewa.
Pau nui ae la ua poe hewa nei i ke ala iluna ; na ke Akua no i hoala mai ia lakou, aka, olelo aku la o Iesu ia lakou, "E lawe oukou Ia'u, aka, e hookuu aku i Ka'u poe haumana."
He aloha ko Iesu, ma Kona hoopoina ole ana i Kana mau haumana, a ua piha loa nae lakou i ka makau, a ua makemake hoi e kaawale aku ; aole lakou i makemake e noho a make pu me Iesu.
Aka, lalau ae la o Petero i kekahi pahikaua, a ooki aku la a moku ka pepeiao o kekahi o ua poe kanaka hewa nei. Ua makemake loa o Petero e hakaka; aka, olelo aku la o Iesu, e waiho aku i kau pahikaua, a mai hakaka hoi No'u nei. He mau tausani anela Ko'u e hiki ai ke hakaka No'u, ina Wau i makemake pela; aka, ua paa kuu manao e make, no ka mea, ua kauoha mai la Kuu Makua Ia'u e make Au.
Alaila hoopa aku la o Iesu i ka moku o ua kanaka la, a hoola aku la. Alaila, holo aku la o Petero a me na haumana e ae ma kahi e, a haalele mai la ia Iesu wale no iwaena o ka poe hewa. Lawe ae la lakou i na kaula, a nakii iho la i kona mau wawae a me na lima, a alakai aku la lakou Iaia ma Ierusalema, a ua hele aku la Oia me ka haahaa, me he keikihipa 'la.
KE KUA HAU.
O ka mahina keia o Dekemaba, a ua kapaia o ka wa hooilo. Aole kakou i ike i kekahi ano okoa nui maanei, eia wale no ua uliuli na aoao o na kuahiwi mamua o na wa i hala aku nei, a he huihui ka ea a maikai loa.
Aka, e nana i ke kii, a e ike pehea e makemake ai oukou i kekahi wa hooilo e like me keia. Ua hoomaka keia poe e hele ma kekahi wahi, aka, ua loohia lakou e ke kuahao ino loa. Ina he kaa holohonua ko lakou, aole nui ko lakou pilikia. Aka, he mea kaumaha loa no na lio e huki i keia kaa kaumaha iwaena o ka hau hohonu.
E nana e hele wawae ana na kanaka, e hoomama i ke kaumaha. Aka, e kokoke mai ana ka po, a ke makau nei au e pilikia loa ana lakou.
Make pinepine na kanaka iloko o na ino o keia ano. Ua uhi ka hau i ka honua, aole ikeia ke alanui, a hele na lio ma kahi e. Nui loa ke anu, a no ke ahi ole e hoomehana ia lakou, e pau ana lakou i ka make.
E manaolana kakou e hooikaika keia poe a loaa koke kekahi hale, kahi e hiki ia lakou e noho a hala keia ino, a malie mai.
PALAPALA A LAIKI MAKUA.
HELU 6.
O kekahi o na wahine i holo pu me makou maluna o na kaa ahi no kekahi mau la, ua noho oia ma Salt Lake, ke kulanakauhale o ka poe Moremona. Ua noho oia me kana kane ma ke kulanakauhale no ka nui o na makahiki ehiku, a ua ike pono oia i na ohana Moremona he nui wale. Ua ike oia i ka oiaio o na olelo weliweli a kakou i lohe ai no ke ano ino o ka Mamona.
O na keikikane o ke kulanakauhale e noho ana me ka hoomalu ole ia e ko lakou mau makuakane, ua makaukau lakou ma na hana hewa i ko lakou wa opiopio. Ua ino loa na po no ko lakou kamailio haumia, hoohiki ino ka inoa o ke Akua, a me ka walaau ma na alanui. Olelo keia wahine, me he mea la he inaina iwaena o na keiki o ka makua hookahi, a o na makuahine okoa, a he mea ino loa, a he mea mau na hakaka ma na home o lakou.
Ia wa, na ka makuahine wale no e malama i na keiki. Manao na makuahine moremona, he mea kupaianaha ke kokua ana o ke kane o keia wahine iaia i ka malama ana i ka laua keiki, a olelo pinepine iaia, "Aole e mau ana pela."
Eia no hoi kekahi : pau koke no ka maikai o na helehelena o na wahine moremona, a me ko lakou hoihoi, a pela iho iho no paha, ma ke ano o keia mea, e lawe aku i ke aloha a me ke kokua o na kane i ka lakou mau wahine. O ka ohana, kahi a keia wahine a me kana kane i hoolimalima i ko laua mau keena noho, he kane a he wahine, a me na keiki liilii eono. O ka makahiapo o na keiki he pilikia loa no ka mai. Loaa lakou i ke ola kupono ma ka hoolimalima ana i na keena, a ma ka hooholo ana o ke kane i ke kaa lio ; no ka mea, he kaa a he mau lio kana.
Manao ke kane e mare me kekahi kaikamahine opiopio ma kela wahi, a kuai aku oia i kona mau lio a me ke kaa, i loaa na dala no ka mare ana a haalele i ka wahine a me na keiki e malama ia lakou iho.
Olelo mai kela wahine, ua hana pinepine ia na hana o keia ano.
O ke ao ana ma na kula a me na home he ole loa no ia, a me he mea la, e hoi hope ana na kanaka moremona iloko o ka pouli pegana. A no ke aha hoi ?
Aole anei o ka noho maemae ana ma na home, a me na pomaikai e kahe ana mailaila mai, na mea e hookaawale i na aina Kristiano mai na aina Pegana? "Ua pono no i kela kane keia kane kana wahine iho, a ua pono no i kela wahine keia wahine kaha kane iho." Korineto 1,7:2. Oia kekahi o na pohaku kahua o na pomaikai ma kela aina keia aina o ka honua nei. LAIKI MAKUA.
No Christopher Columbus.
HELU 30.
I ka la 7 o Iulai, ku na moku o Columbus i ko lakou hoi ana ma kekahi awa ku moku maikai, ma ka waha o kekahi muliwai maikai. Pono i na kanaka maluna o na moku e hoomaha, a e loaa na mea ai. Aloha mai ke Lii o ka aina ia lakou, a lawe mai a mahuahua na hua ai, ka i-a, manu ku, a me ka ai.
I kekahi la ae, oia ka la Sabati, a kauoha ka Adimarala i ka hoomana hai pule maloko o kekahi ululaau. Malaila, pule lakou a himeni i na mele hoomaikai i ke Akua Manaloa, e like me ko lakou ano.
Kiai na kamaaina i na hana hoomakaukau, a ike lakou he ano kaumaha ka poe Paniolo i ka nana aku, a e malama ana lakou i kekahi hoomana. Hele mai ke Lii a me kekahi Ilikini elemakule, he kanawalu ka nui o kona mau makahiki, ia Columbus. Haawi ka elemakule iaia i kekahi kaula lei, a me kekahi mau hua ai maikai. A lawe ia na makana, lalau ka elemakule i kekahi lima o ka Adimarala, a lalau ke Lii i kekahi lima, a hele pu lakou i ka ululaau. Ua hahai ia lakou e na kamaaina he nui wale, a hoolohe lakou i na hana me ka noho malie. A pau ka hoomana, kamailio ka elemakule ia Columbus ma ka maheleolelo menei kana olelo i kakau ia e Mr. Irving:
"O keia mea au i hana iho nei he maikai, no ka mea, o ke ano ia o kou haawi ana i ka hoomaikai i kou Akua. Ua hai ia mai au, ua hele mai nei oe i keia mau aina me na kanaka he nui, a ua lanakila oe maluna o na aina he nui wale, e hoolaha ana i ka makau nui iwaena o na kanaka ; aka, mai haaheo wale oe no ia mea. E ike oe i ko makou manaoio, elua wahi e hele ai na uhane o kanaka mahope o ko lakou haalele ana i ke kino.
O kekahi, i kekahi wahi pouli, a haukai, a uhi ia e ka poeleele, i hoomakaukau ia no ka poe i hana pono ole i ko lakou mau hoakanaka. A o kekahi, oluolu a piha i ka pomaikai no ka poe hana pono, a hoolaha i ka maluhia ma ka honua nei. Ina hoi, he kanaka oe, a manao e make ana, a manaoio e uku ia kela kanaka keia kanaka, e like me kana mau hana, e malama i ole hoeha hewa oe i kekahi mea, aole hoi hana ino i ka poe hana ino ole ia oe."
Hoopalupalu keia olelo maikai i ka naau o ka Adimarala. Pane aku oia, aole oia i ike pela ka manao o kekahi o na Ilikini, a ua hauoli loa oia i ka lohe i na olelo o keia ano mai kekahi o lakou. Olelo oia, ua hoouna ia oia e na Lii e ao i ka hoomana oiaio, a ua kauoha ia oia e hoopio, a e hoopai i ka poe hewa, a me ka poe kolohe, a e hoopakele i ka poe pono mai ka poe hana ino. Makemake oia e hoopakele ia lakou mai na kanaka Carib, a hiki no i na kanaka pono a me na kanaka maluhia a pau e nana iaia he mea nana e kokua.
Olioli loa ka elemakule i na olelo a ka Adimarala. Hoopuiwa na maheleolelo iaia me ka hai ana no na mea ana i ike ai i kona wa e noho ana ma Sepania. Olelo oia no na kulanakauhale maikai loa, na halepule nani, na puali kanaka holo lio, na holoholona nui, ua ahaaina, a me ka hanohano o na 'Lii, ke Lii Ferdinand, a me ke Lii wahine Isabella.
Hoolohe na kamaaina a pau me ke kahaha nui, aka, o ka elemakule ka mea i makemake loa i ka lohe no ia mau mea. Manao oia ua kaahele nui oia. Ua hele oia i Jamaica, i Haty, a i Cuba, a i keia wa, elemakule oia, olioli no oia ke hele me Columbus i Europa, aka, hoole kana wahine a me na keiki iaia.
Ke Kulina.
O ke kulina, oia ka hua i kanu nui loa ia ma ka honua nei, koe nae ka laiki. Nui loa ka ulu ana o ke kulina ma na aina mehana loa o ka hapa wela loa o ka honua nei, ekolu hua ana iloko o ka makahiki hookahi; aka, no ka pokole loa o ka manawa kupono no ka ulu ana, ua oo pono i ka la wela o ka manawa kau pokole o Canada. A ma ke ano kupono no ke ola kino o ke kanaka aia no ke kulina malalo o ka huita, a mahope aku ka laiki iwaena o na mea ai kaulana. Ma Amerika Huipuia, ua kanuia na eka he 37,000,000 i ke kulina, a ua loaa na busela kulina he 013,000,000. Ua laweia mai Amerika aku a i Enelani na busela kulina 75,000,000, a o ka lilo no keia mau busela kulina, he $51,000,000. Ua kanu nuiia ke kulina ma India, i keia wa, ua ai ia e na kanaka ma na wahi a pau o ka honua nei. Ua kanu nuiia ke kulina ma Brazil, e manao ana he mea momona a malkai ke ai ia. Mahope mai o ka manawa wi ma Irelani i ka makahiki 1846, ua hoomaka ka ai ia mea ma Beritania.
HOIKE KULA SABATI.
HOI HOU, MAKAHIKI.
HELU 52. SABATI, DEK. 30, 1877.
PAUKU BAIBALA. I Na Lii 4:12:12—20.
12 ¶ Pela i hoi mai ai o Ieroboama a me ka poe kanaka a pau io Rehoboama la i ke kolu o ka la, e like me ka ke alii i hoomaopopo ai, i ka i ana mai. E hoi mai oukou io'u nei i ke kolu o ka la.
13 Hai mai la ke alii i kanaka me ka oolea, a ua haalele aku i ka olelo a ka poe kanaka kahiko, a lakou i haawi aku ai iaia;
14 A olelo mai la hoi ia lakou mamuli o ka olelo a na kanaka ui, i mai la, Ua hookaumaha ko'u makuakane i ka oukou auamo, aka, e hoouka hou aku au ma ka oukou auamo; ua hahau ko'u makuakane ia oukou me na huipa, aka, e hahau aku wau ia oukou me na moohueloawa.
15 Aole hoi i hoolohe ke alii i kanaka, no ka mea, no ka Haku mai no ia, i hooko mai oia i kana olelo a Iehova i olelo mai ai ma ka lima o Ahiia no Silo, ia Ieroboama ke keiki a Nebata.
16 ¶ A ike ae la ka Iseraela a pau, i ka hoolohe ole mai o ke alii ia lakou, olelo aku la ka poe kanaka i ke alii, e i ana, Heaha ko makou kueana iloko o Davida? aole hooilina iloko o ke keiki a Iese. I ko oukou mau halelewa, e ka Iseraela: ano hoi, e nana i kau ohana iho, e Davida. Pela i hoi ai ka Iseraela i ko lakou mau halelewa.
17 A o na mamo a Iseraela e noho ana ma na kulanakauhale o Davida, ua alii o Rehoboama maluna o lakou.
18 Alaila hoouna ae la o Rehoboama ia Adorama, ka lunaauhau, a hailuku ka Iseraela a pau iaia me na pohaku a make ia. Nolaila hele wikiwiki ae la o Rehoboama ke alii e ee i kona kaa, e holo i Ierusalema.
19 Pela i kipi ai ka Iseraela i ka ohana a Davida a hiki i keia al.
20 Eia kekahi, i ka lohe ana o ka Iseraela a pau ua hoi mai o Ieroboama, kii aku la lakou iaia e hele mai i ke anaina, a hooalii lakou iaia maluna o ka Iseraela a pau. Aohe mea i hahai i ka ohana a Davida, o ka Iuda wale no.
Pauku gula. "Aka, o ka Ierusalema maluna ka Haku wahine, oia ka makuahine o kakou a pau." Ga. 4:26
Mele. "Kuu Baibala." Hae Hoonani. Mele 16.
Kuu Baibala maikai wale, &c.
p 1 me ka 2.
Pule hoomaikai i ke Akua no ka makahiki i hala.
Mahele 1. Ko Iseraela haule ana.
Ehia hapaha i lilo ilaila? Hoomaka ia haule ana ma ke aha? I ke au owai? Ehia ohana i kipi? No ke aha? Owai ke alii mua o na ohana kipi?
Hapaha Mua.
Na Kane.—Hai mai i na kumuhana 11, na pauku baibala, me na pauku Gula.
1 Ka mokuahana o ke aupuni. I NaLii 12:12—20. P G I NaLli 12:8.
2 Na hewa o Ieroboama. I NaLii 12:25—33. P G I NaLii 14:16.
3 Omeri ma Ahaba I NaLii 16:23—34. P G 2Tim 3:13.
4 Elia ka Tirebite I NaLii 17:1—16. P G Ioba 5:20.
5 Elia me Ahaba. I NaLii 18:5—18. P G Iosua 7:25.
6 Elia me na kaula o Baala. I NaLii 18:19—29. P G p 21.
7 Elia me kana mooai. I NaLii 18:36—46. P G p 24
8 Elia ma Horeba. I NaLii 19:8—18. P G Ioba 23:6
9 Nabota. I NaLii 21:4—14. P G p 20.
10 Ko Elia laweia ana iluna. II NaLii 2:13—25 P G p 15.
Pauku Gula hapaha. Hal. 75:7.
Na manao pili. 1 E koho i mau hoa maikai. 2 Mai hoomaka e hana hewa. 3 Mai kuko i ka hai. 4 Malama i ka ke Akua olelo. 5 Paulele wiwo ole i ke Akua. 6 Mai kanalua. 7 Hele pu me ke Akua.
Mele. "Aole o'u makau." Hae Hoonani. Mele 29.
Aole o'u makau e hai no Iesu, &c.
P 1 me ka 4.
Hapaha Elua.
Na Wahine.—Hai mai i na kumuhana 12, na pauku baibala, me na pauku Gula.
1 Ka mahuahua ana o ka aila. 2 NaLii 4:1—7. P G 2Kor. 9:8.
2 Ke keiki Sunema. 2 NaLii 4:25—37. P G Mat. 15:28
3 Naamana ka Lepera. 2 NaLii 5:1—14 P G Hal. 51:7.
4 Gehazi ka Lepera. 2 NaLii 5:20—37. P G Sol. 15:27.
5 Elisai ma Dotana, 2 NaLii 6:8—18. P G p 16.
6 Ka wi ma Samaria 2 NaLii 7:12—20. P G Luka 18:27.
7 Iehu ke'lii. 2 NaLii 10:20—31. P G p 31.
8 Iona ma Nineva. Iona 3:1—10. P G Mat. 12:41.
9 Ka make o Elisai 2 NaLii 13:14—21. P G Heb. 11:4.
10 Ke kanikau o Amosa. Amosa 5:1—15. P G 1Oih.Lii 28:9.
11 Wanana no ka hoolaia. Hos. 14:1—9 P G Hos. 13:9.
12 Lawe pioia ka Iseraela. 2 NaLii 17:6—18. P G p 12.
Pauku Gula hapaha. Nahuma 1:3 hapa mua.
Ehia makahiki i hoomauia'i keia aupuni kipi? Owai ke'lii mua? Owai ke'lii hope? Ehia lakou a pau? 19 Heaha ke ano nui o lakou a pau? Nawai lakou i lawe pio aku? A i ka aina hea? No ke aha? He alii kipi ka mua, pela anei ke'lii hope? Ka wanana aha ka i hookoia?
Na manao pili. 1 Paulele i ke Akua i ka wa ilihune a kaumaha. 2 Mai makee waiwai. 3 Malama i ke Akua me ka naau. 4 Mihi i ka hewa. 5 Huli i ka haku a hilinai iaia. 6 Makau i ka hewa me kana uku.
Mele "Koa maikai." Hae Hoonani. Mele 28.
Koa maikai, koa mau ae, &c.
P 1 me ke 3.
Mahele 2. Ko Iseraela hoihoi ia mai. Aole o ka hoihoi kino ia keia, aka, o ka hoihoi uhane. Na hapaha hea ka i lilo i keia mahele? Ke kolu me ka ha.
Hapaha Ekolu.
Na Keiki.—Hai mai i na kumuhana 13, na pauku baibala, me na pauku Gula
1 Paulo ma Kupero. Oih. 13:1—13. P G p 12.
2 Paulo ma Anetioka. Oih. 13:26—41. P G p 32.
3 Huli ana i ko na aina e. Oih. 13:42—52. P G Mat 12:21.
4 Paulo ma Lusetera. Oih. 14:8—20. P G Ier. 10:10.
5 Haihai ia ka auamo. Oih. 15:22:31. P G Gal. 5:1.
6 Hele Paulo i Makedonia Oih. 16:1—15. P G 2Kor. 2:12.
7 Paulo me Sila iloko o ka halepaahao. Oih 16:22—34. P G Hal. 40:3.
8 Ko Tesaronike me ko Berea. Oih. 17:1—14. P G p 11.
9 Paulo ma Atenai. Oih 17:22—34. P G ITim. 2:5.
10 Paulo ma Korineto. Oih. 18:1—11. P G Rom. 12:11.
11 Paulo ma Epeso. Oih. 19;1—12 P G ITes 1;5.
12 Ka mana o ka olelo. Oih. 19;17—28. P G Heb. 4;12.
13 Paulo ma Mileto. Oih. 20;17—32. P G 2 Kor. 4;5.
Pauku Gula hapaha. Kol 3;23.
Na manao pili. 1 Mai hoolalau ia hai. 2. Hai no Iesu 3. Hoolohe pono. 4. E ikaika ma ka manaoio. 5 Halihali i ko Iesu auamo. 6. Hauoli mau 7. Huli i ka baibala. 8. Hoomana ia Iehova wale no. 9. Mai hoopalaleha. 10 Hele mau imua. 11 Haalele i na mea a pau no Iesu. 12. Hana mau no Iesu.
Mele. Make Iesu no'u. Hae Hoonani mele 20. He keiki hewa wale au, &c. p 1 me ka 2.
Hapaha Eha.
Ke Kula a pau.—Hai mai i na kumuhana 12, na pauku baibala, me na pauku Gula.
1 Paulo ma Kaisareia. Oih. 21:8—15. P G Oih. 20:24
2 Paulo ma Ierusalema. Oih. 21:27—39 P G Io. 15:20.
3 Paulo me na Iudaio paakiki. Oih. 22:17—30. P G Mat. 23:13.
4 Paulo imua o ka ahahookolokolo. Oih 23:1—11 P G Oih. 6:10.
5 Paulo imua o Pelika Oih. 24:10—25. P G p 25.
6 Paulo imua o Ageripa. Oih. 26:6—20 P G p 19
7 Ane hoohuliia. Oih 26:21—29. P G p 28.
8 Paulo iloko o ka ino. Oih 27:14—26. P G Hal. 56:3
9 Ka hoopakeleia ana. Oih. 27:33—44. P G Hal. 107:30
10 Paulo ma Melita. Oih. 28:1—10. P G Rom. 1:14.
11 Paulo ma Roma. Oih. 28:16—31. P G Rom. 1:15, 16.
12 Ka Paulo mau olelo hope. Oih. 2Tim 4:1—8 P G p 7.
Pauku Gula hapaha. Pil 3:8.
Ehia kaapuni ana o Pauli i kakauia maloko o Oihana? Mahea ka hoomaka ana, ke kaahele ana? Owai na hoahele? Heaha kana mau hana, kona mau pilikia? Mahea ka pau ana o ke kaahele ekolu? Mahea ka hoomaka ana o kona kaahele eha wahi a ka moolelo? Mahea ia kaahele? Heaha hoi na hana? Mahea i pau ai? Make oia pehea? No ke aha? Ma ka mak. ehia o Iesu? Ehia ona mau makahiki? Mahea oia i kanu ia'i?
Na manao pili. 1 Mai manao kapekepeke. 2 Mai makau. 3 Paio no ka oiaio. 4 Noho kuikahi. 5 Malama koke. 6 Lohe a hana. 7 Iesu ka Hoola. 8 Hai ia Iesu. 9 Kali no Iesu, no ka lei o ka pono.
Mele. "Kai a mau.'' Hae Hoonani. Mele 18.
Pule no ka makahiki e hiki mai ana.
Haawina no Ian. 6, 1878. 2 Oih Lii. 12; 1—12. Rehoboam.