Ka Leo o ka Lahui, Volume I, Number 12, 3 September 1889 — NU HOU O NA AINA E. [ARTICLE]

NU HOU O NA AINA E.

Ma ke ku ana mai o ka mokuahi Mariposa ma ke ahiahi Hoomalolo nei, ua loaa mai na hunahuna mea hou o na aina e a hikl i ka ia 26 o Augate, ma na mea pili i na kuee pili aupuni no ke kai o Behring, aole mau mea ano nui i hana ia iloko o keia mau la, koo wale no nae he elua mau moku i hopu pio ia, no Canada ua mau moku la, a ua ho-

pu ia e ka moku kiu "Rush" o ke aupuni o na Moku-aina Hui o Amerika. Ua ao aku no ke aupuni o Beritania i ko Canada aole make komohewa wale ma ke kai o Behring, a ina e hoopaakiki ana lakou alaila oia no na koikoi o ka lakou mau hana maluna no o lakou ponoi iho. Ua hoolewa ia ke kino kupapau o Ex. Lunakanawai Terry me ka maluhia; a ma na lono hope aia o Mrs. Sarah A. Terry ke noho la ma ka Hotele Leck ma ke kulanakauhale o Kapalakiko, a ua pani-ku loa oia iaia iho ka ike ana i na makamaka. He nui na hooia ana a ka hapanui o ka lehulehu ua pau na la waiwai o ko Terry ola ana aka, ua ahewa ia no nae o Hope Hamuku Weagle no kona hopuhopu ahulu loa i ka lawe ana i ke ola o Terry. Ua hopu ia o Judge Field, aka ua hookuu koke ia no nae ma o kekahi palapala noi hookuu kino, a e ninaninau ia ana ka hihia ma ka la 27 o Augate. O ka nui o ka waiwai io o Terry ua kohoia mawaena o $50,000 a me $200,000, aka aia nae malalo o na moraki koikoi. Ua hoopai ia o :John L. Sullivan he hookahi makahiki ma ka hale paahao me ka hana oolea; aka, ua hoohalahala hou ka lawehala imua o ka Aha Kiekie o Makekuteka, a ua hookuu ia malalo o ka bela ana he $1,000. Ua hopu pu ia no hoi o Kilrain ma Baltimore. Ua malama ia ae ma Kapalakiko he halawai no ka hoakea hou ana ae i ka oihana laina mokuahi o ka Pakipika a me ka laina waea olelo e na kanaka kalepa koikoi o Amerika nei. Ua waiho aku o Generela W. H. Dimond i kona kulana Komisina o na Paka mamuli o ka nui hewahewa o na hana i ili iho maluna ona e pili ana i ka (Mint) oihana hana dala o Amerika, nolaila, ua nele oia i ka manawa e hiki ai ke nana i kekahi hana e aku. Ua hoololi ia ka olelo hooholo e ahewa ana ia Mrs. Maybrick o Enelani e make, ma ka hoopaahao ana a pau ke ola; a oia no hoi ke hoikeike ia nei e noi hou aku no ka huikala loa i ka mea i ahewa ia. Ua hoihoi ia ae ka moi Malietoa, a eia oia ke noho nei ma kona ku- lana mau he Moi no Samoa, ua apo aku o Mataafa iaia me ke aloha pumehana, a o Tamasese hoi, ua nele oia i na kakoo ole. Ua haalele aku na Geremania i ko lakou mau akeakea wale ana ma Apia, a ua ae laelae ia aku o Malietoa e hana oia e like me kona makemake. Ma ka la 22 iho nei, ua hoopuka ae ke kakauolelo o ke kaua moana no na poe kapili moku no ke kapili ana he 3 mau manuwa hao no Amerika. O ka moku mua he 2,000 tona kona nui, a o kekahi mau moku iho he 3,000 tona pakahi. O ke kumu lilo o ka moku mua he $700,000 a o kekahi mau moku iho ma ka $1,000,000 pakahi. O na koho i waiho ia mai he $780,000 a he $1,225,000 nolaila, ua hoole ia aku na koho a pau. Ua hoao ae o Mr. Thompson, he kamaaina mua no Ilinoe, i ka hana ana i ke kopaa mai loko inai o ka Pulumi ko pake, a ua loaa iaia he 150 galani malakeke mailoko ae o hookahi eka i kanu ia me ua ko pake la, nolaila ua manao oia e kanu aku i 10 eka hou i keia makahiki ae. Ua manao paa no hoi oia e hana a kopaa puupuu i ua ko la mai loko ae o ke ko pake no kona ike ana he oihana puka loa kela ma Kanses a me Ilinoe. Ke laha nui loa nei ka ma'i le-

pera ma Kapalakiko. Ua lilo i hana nui na ka Papa Ola a me na kauka lapaau ka imi ana i na mea e hiki ai ke pale aku i keia ma'i weliweli. Eia maloko o ka hale ma'i he 10 ka nui o na poe i loohia maopopo me ka lepera, a eia ke pii mahuahua mau nei i kela a me keia la na mai lepera. Ua kauoha aku ka Papa Ola i kekahi poe e noho nei ma ka mahele o na pake [China Town] e haalele iho lakou ia mau wahi oiai he makemake ka Papa Ola e wawahi ia ia poe hale. Ua loaa aku kekahi haole keokeo i loohia me ka lepera, he kalaiwa kaa ka hana maa mau ia haole ma ke kulanakauhale o New York. Ua hooholo o Claus Spreckels ona miliona o ke kula o Kamaomao, a ona hoi o ka hale hoomaemae ko paa nui o Piladelepia, e papalua i na hale hoomaemae ko paa. O ka nui o na tona ko paa e hiki ana ke hoomaemae ia iloko o ka la hookahi, he eha miiiona tona i ka la, o ka like no keia hapai ana i ka hana, aia mawaena o $4,000,000 a me $5,000,000. Ua hoao ia mai nei ka holo o ka moku hao hou o Amerik "Charles-a ton" a ua ike ia he 19 mile iloko o ka hora. Ma Kapalakiko ae nei oia e kapili ia nei. Ua make mai nei o Lui Moleka, ke kaikuaana o Von. Moleka iloko o kona mau la kanikoo o 85 makahiki. Pakele ke Towela o Eiffel ma ke kulanakauhale o Parisa mai lilo i luahi na ka uwila, aka, ua manuhe'u no nae.