Ka Leo o ka Lahui, Volume I, Number 12, 3 September 1889 — He Leo Ku--o. [ARTICLE]

He Leo Ku--o.

Ma ka nana ana iho i ka nupepa P. C. Advertiser, o keia pule aku nei, la 30 9 Aug., eia oia, a i ole oia, o kekahi o ia poe, ke uwe ku-o mai nei no ka haule loa o na heluna o na hoahanau o na halepule ekalesia Kalavina. Mai ka Iwakalua tausani a oi, o ka nui o na hoahanau i ka wa i ululau ai na Hawaii mahope o ka pono a lakou i manao kuhihewa ai, mamuli o na ao hookamani ana a na elele o ka pono, a i keia mau la, eia ka heluna mawaena o ka elua a ekolu tausani. Aloha, a he kumu io no hoi e ku-o ai ka poe manaoio a me ka hookamani. Ua nui ia ka minamina o na hoahanau i ka maka o na naau kuko no ka mana Aupuni, i ka emi loa ana mai o na heluna hipa a na kahu hipa maitai e alakai aku ai ma ke alanui e hoopiha aku ai i ka heluna o ka poe koho balota no na anela. Nui ka minamina, a ua ku-o ia no, oiai o ka ekolu keia o ka paa ana o keia wahi aupuni momona maloko o ko lakou lima, a ina e @emo

hou aku no ka nele ana i na heluna nui o na hoahanau, auwe ka ono o ka puu, a me ke kahe o ka haae, i ke omo ia mai o keia wahi aupuni momona e hai. Eia ka ke pau nei ka nui o na kanaka ma ka hoomana Katolika a me ka Moremona, auwe kakou na hoahanau hookamani e, nui ka pilikia. No keia haule o na ekalesia, ua kuhi lalau aku nei na lima o keia poe no Dr. Anderson, ka hewa, no ka hoopau ana i ka Papa Amerika a me ka noho ana mai o na kahuna haole mai ka noho mana ana maluna o ka hoomana maanei nei, a hoonoho aku i ka Papa Hawaii me na kahu Hawaii ma na ekalesia. Ke hoino ia nei ka inoa o kela kanaka i mahaloia, oiai oia ua hoi a moe ma ka opu o ka honua, a aole, hoi ona leo pane mai, eia nae kona hoike i kona pololei a me ko lakou nei hoopunipuni a hookamani, ma ka uhiuhi ana i ka oiaio. Eia o Kawaiahao malalo o ka haole, a aia o Kaumakapili malalo o ka Hawaii aka, o Kawaiahao ka i mimino o laua, a eia ke hoomaloka mai nei na hoahanau. A ke oi loa aku nei ka hoowahawaha ia no ka hana hookamani maopopo o na makua misionari i keia wa. Aole na ke Katolika i kii mai, a na Moremona paha, aka, na ka iapuwale haalele loa no o na alakai ana.