Ka Leo o ka Lahui, Volume I, Number 14, 5 September 1889 — Ke Kulana. [ARTICLE]

Ke Kulana.

Aia ma ka ''Buletina" o ka Poalua iho nei, la 3 o Sept. ua kakau ia kekahi kukulu manao malalo o ke poo e kau ae la maluna e kekahi ilikea, malalo o ka inoa kapakapa "Country Man." E kokua ana i na olelo paipai i hoolaha akea mua

e kela wahi ilikeokeo maa ka "Hilo Record," a i hoopuka ia ma ka Buletina o ka la 21 o Augate i hala aku nei. E paipai ana hoi ia lakou ilikea a pau e hoomakaukau me na lako no ke kue mai ka i na enemi. Maloko hoi o ke kukulu manao nona ke poo e kau ae la maluna e hoike akea ana eia ka na kanaka Hawaii o Kula, Maui ke liuliu mai nei me na lako kaua, wahi ana, ua hai ia mai ka oia e kekahi ilikea kamaaina i maopopo pono i na ano o na Hawaii, he mau hana maikai ole ka ka na kanaka o Kula. A no ia mea, he mea pono ka e liuliu e lakou i ola honua; aka, ua kokoke loa mai ka ka pilikia. Kupanaha keia mau hana. A ma ka makou nana he paipai hewa maopopo keia a keia poe a hana mai nei, aka, he nani wale no nae ia ia lakou la ae. O ka hoohui ana anei o na makaainana Hawaii o Kula ia lakou iho iloko o kekahi ahahui kalai aupuni he kumu iho la ia e kapa aku ai he mau liuliu kipi ana kela? O ka imi akahele ana anei o ia mau Hawaii i ko lakou mau pono pili nohona upuni maloko o ke kumukanawai ka mea e hiki ai ke kapa ana aku he liuliu kipi ia? O ka hooikaika ana anei o kekahi poe Hawaii e hooholo ia ka noho'na manao lokahi like no keia Kau koho ae, ka mea e kapa mai ai na ilikea he mau hana kipi kela? Heaha na hana ino a na Hawaii i hana aku ai i keia poe haole a lakou e lili maka eleele loa nei i na Hawaii noho malie? O ka pahola ana aku anei a na Hawaii umauma akea i ua poe la ke kumu e lili loa ia nei na Hawaii? O keaha koe i na Hawaii a lakou e ku-e mau mai nei? Aole mea i @@@@ @@@@ lele aku me he aeko la i ka lewa; a aia ma na lima o ua poe haole la, a eia na Hawaii ke ku olohelohe nei. He wahi mea uuku loa koe i na Hawaii alaila, o ka lilo no ia o na Hawaii i kuewa maopopo malalo iho o ka malamalama o ka la. Oia hoi kahi kuleana koho balota, a he hakina no nae, ua nalinali ia a muumuu. Nolaila, e hiki ana anei i kekahi kanaka hanu ma na puka ihu, ke olelo mai he hewa na Hawaii ke hoohui ia lakou iho malalo o na kanawai, a ma ke alahele o ke kumukanawai no ka hana ana me ka maluhia i mea e paa ai keia lahui i kona kuleana oiaio, a e mau ai hoi o kona noho'na ma ke ano he lahui a ka mana kahikolu i manawalea mai ai? Ke manao i-o nei makou aole loa he hookahi koe wale no ka poe manao awahua. A ke aa nei makou i ka puana ae; aole loa ke Akua e ae mai e umiapuaa ia na hana manao maikai e na hana lili awahua. E ola o Hawaii i ke Akua.