Ka Leo o ka Lahui, Volume I, Number 16, 9 September 1889 — Kupanaha no Paha. [ARTICLE]

Kupanaha no Paha.

O ka hoololi kumukanawai no ke kaupale ana aku i ke komo mai o na Pake iloko nei o ka aina; a me kekahi mau hooponopono e ae, he manu punua peepoli punahele loa ia na W. A. Kini iloko o kela kau Ahaolelo hoomeamea i hala. Ua olelo ia, oia no ka makua o ua manu punua 'la, a iloko o kona poli kahi i lolii hoiloli ia'i. Nana no i hoikeike ae i ua manu punua 'la ana imua o na hoa pahele a kia manu ona iloko o ka Ahaolelo, a o kona leo a me kona ikaika a pau, ua hookuu ia e kaheawai me ka hahana ma ka mahalo ana i ka nani a me ka pahee o ka hulu o kana manu punua; a i ka aneane ana mai o ka la e uniki ai o ka hula hea inoa o ua punua nei, ua ku ae la ua kahu hanai manu punua nei

a heo aku la no ka aina gula o Kaleponi, me ka nanakee iho i kana milimili a haalele ino iho la mahope nei e aeahaukae ai. I ka ike ana o ua manu nei ua haalele mai kona kahu iaia, ua kuehuehu ae la ia i kona hulu, hohola ae la i kona mau eheu, a lele palanehe malie aku la i ka lewa luna lilo, a nalo, a pau kona ike ia ana, koe wale iho no mahope nei kona meheu pakui honohono. Iloko o na la lehu wale mahope mai, aia no ua kahu manu punua la ke noho hiolani hoonanea mai la i ka aina o lakou haole, a i ka aneane ana mai nei i ke kau koho balota, ua huli hou mai na li'a, na kuko; na ilni a me na manao halialia a pau, a kau mai na maka no ka huli hoi hou i ka aina o ka "waiu a me ka meli," a ke hoao hou nei e hoolakalaka i manu punua hou, i kau ai ka Hon. i ka 1890. He wahi hiohiona kupaianaha a hoopahaohao ko keia kahu hanai manu, a ua noke wale makou i ka nalu a me ke kuekaa i ka noonoo, a aohe wahi mea a pau o ka pohihihi—e pau ana paha ka naluea o ka opu waihona ai—a o keia hoi he ole ka pau o ke kahaha. No ka mea, aia i ka manawa e paa ana ka manu iloko o ka poholima o ua Hon. nei, ua hoolakalaka oia a i ka aneane ana e laka, eia hoi, hookuu aku la e lele; a i ka ahiu hou ana, ke hoomaka hou nei e hoolakalaka. Heaha la ke ano o keia kahu hanai manu? He lealea paha ia i keia ano hana; a i ole, ua loaa paha he wahi okupe? Heaha hoi, aka, he oiaio—he nui na mea malu a me na mea pahaohao iloko o keia ola ana o ke kanaka.