Ka Leo o ka Lahui, Volume I, Number 17, 10 September 1889 — He Opio Wiwo Ole. [ARTICLE]

He Opio Wiwo Ole.

I ka ike ana o kekahi wahi keiki opio o Spokane Falls. [Wailele o Spokane] ua pau ka uwapo alahao i ke ahi. A oiai he wahi keiki opiopio loa oia, eia nae ua hoopaanaau oia i ka olelo ia he hiki ke hoopaa ia ka holo ana o ke kaa ahi ina e hoikeike ia aku ka hae ulaula. Nolaila, ua hooholo iho la kona manao e hana oia e like me ia.

Oiai oia ma kela wahi mehameha ua ku nana iho la oia pehea la e loaa ai ona hae ulaula iaia. Aka, ua hoomanao koke ae la oia i kona paleili ulaula, a no ia mea, ua wehe koke ae la oia i kona wahi paleili, a me ia mea, ua hakii ae la ia i ua paleili ala ma kekahl apahu laau, a me ia mea, ua hoopakele aku la ia i na ola kino he tausani a keu. Ua lilo ua wahi keiki la i mea mahalo nui ia e na eepakeke o ke kaa ahi. A iwaena oia poe ua hele mai la kekahi kanaka aoo a lalau mai la i ka lima o ka opio a pane mai la: "Ma ou la i loaa ai ia'u keia hauoli ana; a nolaila he aie nui au i kou wiwo ole. Nolaila ma keia wa aku, e hele oe i ke kula a o kou mau makemake a pau e hoike i ke kumu kula nui o ke kula au e komo ai, e kauoha ae iaia, e kakau ae ma ko'u inoa W. C. Johnson, New York, a na'u e hoolawa i kou mau makemake a hiki i kou kanaka makua ana, a mau loa aku." Ua lilo kela keiki i loio naauao i keia la, a ke ai mau nei oia i ka maikai o kana mea i hana ai. Oia ka uku o ka wiwo ole ma na hana pono.