Ka Leo o ka Lahui, Volume I, Number 19, 12 September 1889 — Kela a me Keia. [ARTICLE]

Kela a me Keia.

Ma ke kakahiaka o ka la 17 o Augate, ua holapu ae ke ahi i ka mahele kalepa o ke kulanakauhale o Salema, ma Kaliponia, a ua hiki aku ke poho ma kahi o $50,000, a ua panihakahaka ia no $33,000. Ma ka la 23 iho nei, ua hookui ae na kaa alahao o ke ala o Balatimoa a me ko Ohio, ma kahi e kokoke ana ia Wheeling. He 6 poe i make loa, a he 23' i hoeha ia. Ua hoike ia ae, iloko o na makahiki 2 i kaa hope ae nei, ua hoopukapuka aku na Ona dala nui o Enelani ma na Aina e; i na $320, 000,000; a he $122,000,000 i hoouna ia ma Amerika, a o ke koena ma na aina e aku. Ua hoala ae kekahi poe wahine opio o Sana Lui, nona ka heluna o 2,500, he ahahui e kue loa ana i na Pake ma ka lawelawe ana i ka hana holoi lole ma ia kulanakauhale. Ua pahola ia ae ka lono e hooala ia ana he hui kuai buke nui ma New York nei me ke dala a kekahi pae waiwai nui o Enelani, a o ke kumulilo he $10,000. Ua hoike ae ka nupepa La o New York, ua hoala ia keia mea no ka manao o kekahi hui Pelekane e kuai a pau loa i na oihana hoolaha buke moolelo nui o New York a ma Cikago. Ma ka halawai hope i malama ia e ka hui kukui uwila Amereka ma Niagara ua hoike ae lakou eia ke ho-a ia nei ma Amereka he 237,017 ipukukui pi-o a he 2,704,768 ipukukui maoli. He kupanaha ka pii hikiwawe o keia oihana hoohoihoi ma keia Aupuni. Oiai me he la he 2 wale no makahikl i hala ae nei mai ka hoomaka ana o Edison a hooi ae i mea e pili ana i keia ano ipukukui, a ma keia la ua aneane 3,000,000 ipukukui e hoohana mau ia ana i kela a me keia po.