Ka Leo o ka Lahui, Volume II, Number 208, 4 June 1891 — Page 1

KA LEO O KA LAHUI.

"E Mau ke Ea o ka Aina i ka Pono."

Buke II.  HONOLULU. IUNE 4, 1891. Helu 208

 

He Moolelo Kaao

No ke

Kamaliiwahine Laulie.

A i ole

HE NANEA KAMAHAO NO KA HULU GULA O KIPERIANA.

He Kaao kahiko no Helene.

MOKUNA XI.

Nolaila e oluolu mai oe i ka'u noi, oiai ua makemake kuu uhane a me kuu puuwai i kau hookani ana, wahi hou a ke keikialii.

He makemake no au e hooko aku i kou makemake e koi mai nei, aka aole paha he mea hiki i keia manawa, oiai no kela nohea kaili puuwai e hookani ana i kana pila, wahi a ke keikialii o na mea kani i hoopauha aku ai.

Aole he pilikia oia mea, no ka mea ua hiki ia'u ke hooki koke i kana hookani ana i na manawa a pau a'u e makemake ai ke ae mai oe i ka'u noi.

Aoile i keia manawa, pela iki iho kau hoeueu mai a lalai pono ae ka makani, wahi a Opera.

Aka nae ua paakiki mai la no ke keikialii Adinia me ka hele ana e olelo i ka nohea Minoria e hoomaha iki no manawa, a e haawi i ka manawa no ka hookani pila malihini, a oiai o ua ui la he wainohia ia me ka waipahe. ua ae mai la ia me ka hauoli oiai na papahi lei minoaka e hekau ana maluna o kona mau papalina.

Ua meha ae la ke anaina holookoa iloke o kela manawa, ua hoomaha ko panau ana o na puapua o ka poe hulahula, a o na maka a pau o ke anaina iloko oia manawa aia maluna o ke keiki Opera, oiai laua e ku ana me ke keikialii Adinia.

E hoomalu ia oukou iho e o'u makaaainana no ka hoolohe ana i ke mele a kekahi oka'u mau malihini mai ke aupuni mai o Helene ma ke komohana aku nei o kakou.

Me keia mau huaolelo a ua moi nei imua o kona mau makaainana, ua halii paa koke iho la na eheu anoapo o ka maluhia ma na aoao a pau o ke anaina kanaka nui i akoakoa ae ma ke halealii ia la, oia hoi ina e haule kekahi kui-pine ilalo o ka papahele iloko oia manawa, e ohi ia no kona koele ana iluna o ka papahele.

Oiai na mea a pau e noho ana me na pepeiao i hele a hakahaka, lalau iho la o Opera i kana pila hapa a hoomaka ae la e hookani me ke kuu ana i ka nahe, auwe! aohe he mea like e hoohalike ai ai me ua Opera la.

Helupapa mai la oia maloko o kana pila i na hoku o ka lani e like me ko lakou nui a hilii pela no ke koikoi a me ka mama ana o ka leo o ka pila a ua limahei nei ma na mea kani.

Pau ia, hookani mai la oia i ke kani a kela a me keia ano manu like iloko o ka Paradise mamua aku o ka haule ana o ko kanaka mua a Alahe i hana ai iloko o ka hewa, aia hoi lelele ae la na mea a pau iluna me he manu la no ka hauoli, oiai na lima eleu e upo'ipo'i ana me he mau eheu la.

Aole he mea i pakele mai keia piha hauoli ae a hiki wale i ka pau ana oia-mele, hookani hou mai la oia i kahi a na uhane e hele aku ai mahope iho o ka make ana o ke kino, a iloko oia piha hauoli nui ua uwe iho la @kou a pau i ke aloha i ko lakou mau uhane mahope iho o ka wa e make ai ko lakou kino, a ua oleloia ma keia wahi, aohe he mea hiki ole i ua Opera nei ke hana ma kana pila hapa, oia hoi ina ia e makemake e hulahula ka poe e lohe ana i ke kani o kana pila, e hiki ana ia mea, a pela hoi me ka hoohaunaele ana i kekahi ohana, he mea liilii loa ia mea iaia ke manao oia e hana pela.

I ka pau ana o ke mele aloha o na uhane i ke kino, ua hookani hou mai la o Opera he mele laiwale, aia hoi ua hula ae la na makaainana a pau me ka mahiki ana ona wawae, a oiai ke keikialii Adinia a me kona mau makeainana e hula poniuniu ana me ka hiki ole ke hoo maha, ua huli mai la o Opera a olelo mai la ia Kolana ma e hoi lakou no ka moku, a me ka hoomau no i ka hookani ana i kana pila hapa kupanaha, huli ae la lakou a hoi aku la no ko lakou moku, me ka haalele ana i na mea a pau o ka halealii e hula nui ana no.

Hoi aku la na keikialii o Helene a hiki iluna o ko lakou moku, aka hi no a pau ka hulahula ana a ka poe o ka halealii, no ka mea akahi no a pio ka lakou lohe ana i ke kani o ka pila a Opera, nolaila us hau le iho la lakou ilalo e hoomaha ai me ka piha mauluulu a opa o na wawai i ka hookina i ka hula; e mahiki ana maanei, phua'u'ma o, aole o na keonimana wale no kai loaa i keia haawina; aka, o na lede pu kekahi.

 

HE ANAINA HOOMANA MA ARIONA HALE.

Ma na Lapule a pau, e hoomaka ana ke anaina haipule i ka hor 9 a hiki i ka hora 10:30 a.m., no na kanaka Hawaii, a ma ke ahiahi hora 7:30 p.m. no na haole, a me ka poe e makemake ana e hele.

Lunkahiko A. Haws.

 

HE MOOLELO KAAO.

No Na Hoahanu

KALOAIKANAKA.

O

HALEMANO.

NA WELI O KE AU KAHIKO, MAI NA 'LII A NA MAKAAINANA.

Ma keia mau olelo a ua kapena la, haalele mai la na hoaloha eha iaia, a lilo aku la i ke kiau a ka wawae, a o ua kapena la, huli hoi awiwi aku la oia no kona kakela.

Iaia i hoea aku ai no kona keena kakau iho la oia i kekahi palapala ia M'de la Teremoila, a hoouna aku la ma ka lima o kekahi o kana mau kauwa.

E koi aku aua ma ka hapa o ka puali aahu eleele, e kipaku loa ia aku na koa o ke Cadinela mailoko aku o na palena o kona hale hotele, oiai, ua hoala mau ae lakou i na ha na hoohaunaele am e ka hakaka mawaena o na koa o kona puali.

O keia palapala a ua kapena Terevila nei, ua panai ia mai la ia e na olelo pokole mai a Teremoila mai maloko o kana leta, a e heluhelu ia ua palapala pane la penei:

"I ke Kapena o ka Puali Kiai Aahu Eleele, Monasiua Terevila.

Ma ka panal ana aku no kau leta pili makamaka, ke kono aku nei au i kou hanohano e hiki kino mai ma ko'u hotele nei, ua hamama oia nou i na wa a pau. Teremoila."

I ka loaa ana mai o keia palapala ia kapena Terevila, haalele koke iho la ia i kona kakele, a hele pololei aku la no ka hotele Teremoila.

Ua lilo e aku ka hooauna ana o na kukai olelo mawaena o ua mau kanaka hanohano la ma ka aoao o kapena Terevila, ma ka pane ana aku penei:

E ka Monasiua, aole a'u mau mea nui i makemake ai e kamailio pu me oe, aka, he hookahi wale no, oia ka'u mau olelo ia oe maloko o ka'u palapala!

Alaila, e Monasiaa Kapena, aohe au pane no ia mea, a aohe hoi o'u kuleana no ia mea, aka, e ke kapena, no'u iho. ua maopopo ia'u, aia ke ko'iko'i o na ahewa a@ ma ka aoao o kou mau koa kiai, wahi a Teremoila me ka leo oolea.

Ua kuhihewa iki oe e kuu hoaloha,oiai, aole oe i hoomaopopo i ke ano o ka'u mau olelo maloko o ka'u leta ia oe? wahi a ke kapena.

Pane mai la o Teremoila: E ha'i mai oe e ke kapena, ma kahi hea la au i.kuhihewa ai?

Ma na hoike wahaheo ana a kou kanaka lawelawe kino! wahi a Terevila me ka leo nui.

Alaila e Monasiua Kapena, ua wahahee anei kou kanaka lawelawe, ma o kona hoike ana mai, ua hoeha @a o Berenajo ma kona lima akau, a aia he puka pahi ke alina ma kona akemama?

Alaila, aia anei ke kanaka poino iloko o ka pilikia kuhohonu lea?

Ae e ka Monasiua, he kulana kupilikii loa kona i keia wa?

He hiki no paha iaia ke kama ilio?

He hiki no, aka, aole nae i ka nui loa.

Ina pela e ka Monasiua Teremoila, e pono kaua e ike iaia ano? Ma ka inoa o na lani, e lilo oia i hoike no keia mau hana ma ka oiaio a me ka pololei.

Mamuli o keia mau olelo a ke ka pena, ua ku nana iki iho la o Teremoila, a huliu, ae mai la oia i ke kono a ke kapena, a ia wa laua i hele aku ai no ke keena moe o ke kanaka poino.

Ua hoea aku ua mau mea hano hano la ma ke keena a ke mea poino e moe ana iloko o kona mau @a lapu o ka ehaeha.

A i ka wa ana i ike mai ai ia laua, hoao ae la oia e ala ae iluna o kona wahi moe, aka, ua hiki ole oiai, aia ka nawaliwali ke holo puni ae la ma kona mau lala, a na ia mea i hoohaule hou aku iaia iluna o kona wahi moe ua pau ka ike.

Aka nae, ua hoi hou mai la oia i keia ola ana mamuli o ka hoea ana aku o ka haku Teremoila ma ka aoao o kona moe, a hoohainu aku la iaia kekahi kiaha paakai laau.

No kekahi mau minute, ua hoi hoi hou mai la na noonoo maikai ana me ko kanaka poino, a oiai, o kona mau minute i koe ma keia ao, ua kokoke loa mai ia i ka hopena; nolaila, me ka hookaulua ole, kona aku la ke kapena i ua kanaka poino la e hoike mai i ka moolele piha o ka loaa ana iaia o keia poino.

E like me ka makemake o ke kapena, pela ua kanaka la i hoike mai ai i na mea a pau, alaila, haawi aku la oia i na hoomaikai ana no ke kanaka poino, me ke aloha pu ana aku ia haku Teremoila, a oia no hoi kona wa i haalele iho ai i ka hotele Teremoila no kona kakela.

 

Na Hui Kinipope.

Mei 23             Kamehameah vs         Honolulu

Mei 30             Honolulu         vs         Hawaii

Iune  6             Kamehameah vs         Hawaii

Iune 13            Kamehameah vs         Honolulu

Iune 20            Hawaii             vs         Honolulu

Iune 27            Kamehameah vs         Hawaii

Iulai  4             Kamehameah vs         Honolulu

Iulai 11            Honolulu         vs         Hawaii

Iulai 18            Kamehameah vs         Hawaii

Iulai 25            Kamehameah vs         Honolulu

Aug  1             Hawaii             vs         Honolulu

Aug  8             Kamehameah vs         Hawaii

Aug 15                        Kamehameah vs         Honolulu

Aug 22                        Honolulu         vs         Hawaii

Aug 29                        Kamehameah vs         Hawaii

 

OLELO HOOLAHA.

Ua nalowale aku kuu Lio [w] hulupala lae kea loihi a he man wawae keokeo a pau kona eha, i kuni ole ia i ka hao, a e loaa no ka uku makane o $5.00. E loaa no au ma kalu o T. C. Polikapa.

JNO H. POLIHALE. Auwaiolimn, Honolulu, Apr. 30. 3ts-d.

 

Olelo Hoolaha.

Ua makaukau ka mea nona Oinoa malalo iho, e hana i na Pua HAKU PUNA ELEELE a me ka pohaku e ae no na pa kupapau. a me na kahua kukulu kia-hoomanao. O ka poe makemake e waiho mai i ka lakou mau kauoha me Ioane Akina.

J. BOWLER. Sept. 22, '90, d—ly*

 

H. P. K. Malulani.

HE LOIO a he hookapeke olelo ma ke Kanawai. E loaa no au mai ke kai hawanawana o Kawaihae e hoene ana me ipo la, a Hamakua au i ka la'i o Kukaiau ma ke alo ona pali. E ohiia no hoi na aie me ke ku i ka @@@ a me ka puahiohio.    @@@@@ 90. d-ly.

 

HOOLAHA KAI KONOHIKI.

Ke pa leo aku nei ke Konohiki o Waialae, i kona mau hoaloha a me na hoaaina o kona Aina, ua hoolimalima aku oia i ke kai i keia manawa, a ua hookapu iho oia i ka hee nona iho, a nolaila, ke poloai aku nei oia e ike a hoomaopopo i keia leo la. Owan no, 3ms-d.  PAULO ISENBERG.

 

HE KOKUA!

NO KA POE PILIKIA, E HELE AKU I KE KEENA O

R. W.WILIKOKI MA.

HE KOKUA ma ke KANAWAI, ano ka Hooponopono ana i na kuleana Aina a me na palena Aina. Ua makaukau oia e hana i na Palapala Kanawai o na ano a pau, a ua lawa oia no ka hana ana imua o na Aha Hookolokolo a pau o ke aupuni, ma o kona hoa, kekahi o na Loea Kaulana o keia mau la.

Keena Helu 15, Alanui Kaahumanu.  195-dly.

 

Hoolaha Hookapu.

Ke hoike ia aku nei ka lohe i pa ano kanaka a pau loa. Ua hookapu loa maua i ko maua mau Apana Aina ekolu i kapaia o Kalaheo, Kahaleula a me Puuoihala, no lakou na eka 202 e waihola ma ka Paa, Kailua, Koolaupoko, Oahu, i hoolimalima ia e mau mai ia Keleau (w) mai. Nolaila, kepapa loa ia aku nei na holoholona o kela a me keia ano, aole e hookuu wale ia maluna o ua mau Apana Aina la, a o ka mea a mau mea paha e kuo ana i keia, e hopu ia no e mana, a i ole ia, e ko maua mau hope paha, a e hooko ia e like me ke kuhikuhi a ke kanawai. O na poe a pau o makemake ana e komo iloko o keia Hui, o pono lakou e hele mai e hui pu me Mrs. C. I. HIRAM, a i ole ia, me DAVID @AYTON, a i ole ia KUKA. 

Owau no me ka haahaa, MRS. C. I HIRAM. Honolulu. Oahu. Oct. 8, 1890.  3me-d.