Ka Leo o ka Lahui, Volume II, Number 227, 1 July 1891 — NU HOU KULOKO. [ARTICLE]

NU HOU KULOKO.

Ua makemake ia na lala a pau o ka Hui Hoonaauao Liliuokalani; mahele elua, e akoakoa ae ma Iolani Hale i ke kakahiaka Poalima, Iulai 3, 1891. Ma ke kauoha, 3t-d. MRS. LAHILAHI WEBB. E na hoaloha, na makamaka o ka ua Kukalahale nei, e noho ana hoi i ka moku o Kukuiawaa nei, ina e makemake oe e loaa ona puaa momona no ka la 4 o Iulai, aia kahi e loaa ai ia oe mauka o Kalihi, i kahi o Uilamama Kamaki; mai ka $3 dala a hiki i ka $7 o ka nunu hookahi. Kuukanahes ? mahea la ! O ka mokuahi Waialeale wale no ke holo aku ana no kona mau awa mau i keia kakahiaka. O ka la inehinei kekahi la kamailio nui ia e na kanaka, ma o na hana i ikemaka ia ma ka makahiki 1887. Heaha neia ou e palole mai ko waha i ko haʻi kuleana ? Noho malie no oe a kou pili, alaila, nuku pono ana hoi paha. Aole a kakou Atanani o keia kakahiaka; e hoomanawanui a hoopuka ia aku i ka la apopo, ke ole e molawa kahi keiki. Ono, momona, kuhikuhi a he mauu maoli no ka puu i ka iou a Uilama Kamaki i ka la inehinei, oi ai aku ka hoi a liliha. E heluhelu iho me ke akahele i ka manao nona ke poo e puka aku nei "He Kumu Poino," a e kaana nou iho i ka i ka iʻo o ia manao. He mau leta kekahi a na makamaka e paa ia nei e makou. no ke kumu, no ke kue ana e like me ko makou rula i hoolaha mau aku ai. He okoa ka uwa, he opulepule maoli no hoi keia o Kealoalii e noke mau nei i ka uwauwa. Hu ka aka ke hiki mai ua wahi maʻi nei ona ! Ua pupuhi aku ke oka i ke ahiahi o nehinei, no ke kai holuholu o Kahului, ke kamaeu "Kelaudine," a ua hele hoi a ohuohu pono kona oneki i na ohua. O na makai ia o ke kulanakauhale e hoomaamaa mai nei i ke ki pu pololei; a aohe hoi mea o lakou i malele loa aku mawaho o ka helu haahaa. Nani kela. Ua hiu Wilikoki no Kapalakiko i ka la inehinei, auwe e ka eha-toni e—o Adamu me Ewa e—ua puehu ka hulu la, ua lawe ka Auseteralia e kuikahi me Italia. E makaala ae e ka poe he mau pono wai ko oukou, a e uku hoi i na auhau wai, e like me ia i hoakaka ia e ka Luna Wai Nui ma kana hoolaha; a ina aole pela, e oki ia no ko oukou mau piula wai. Ke ole he mau keʻakeʻa, e haawi hou ana ka Hui Hooikaika Kino o Honolulu nei i ka lakou mau hana hoikeike, ma ka Hale Mele Hou, i ka po o ka la 9 o Iulai nei. A hiki mai no i keia la, aole i hoomaha ke Kaawai Helu 2, i ka pauma ana i ka wai o ka luawai aniani o Kamaki Kuea, no na paipu wai o ke kulanakauhale nei. Ma Ewa ana kekahi mau lealea Pokiulai, oia hoi, he mau heihei waapa, heihei waa a he mau heihei moku kekahi. E ike ia no na manawa holo o ke kaa ahi ma ka hale hoolulu o Kawili. O ka bana ana paha kahi ilaila !

He eha mau Hui Kinipopo e ulele ana ma keia Poaono, la 4 o Iulai, oia hoi na hui Honolulu a me Kamehameha, a me na hui o ka Hale Hana Hao Uniona a me ka hui elua o Kamehameha. O na hui mua elua, i ka auwina la ana laua e paani ai, a o na hui hope, i kakahiaka ana paha. Eia ke ohi hapuku ia mai nei ka balota o ka hoikeike a kela moho kaulana o ke ao nei i ke kuʻikuʻi puupuu John L. Sullivan, i ka po o ka la apopo; no ke ake nui ia e ike kana mau hana hookelakela. Ke hoea iʻo mai ia i o kakou nei ma ka mokuahi o ka la apopo. Ina aole i kakahiaka, alaila, i ka auwina la ana o ka la apopo e ku mai ai ka mokuahi "Mariposa" mai ka ipuka gula mai; a maluna mai ona e lohe hou mai ai kakou no na mea e pili ana i ka bila kanawai kopaa a Makinele. Maluna pu mai ana paha ona kela haole kaulana loa i ke kuʻikuʻi puupuu John L. Sullivan. Ke ikuwa mai nei na nupepa o na aina mamao, no na mea e pili ana i ke Keiki Alii Wale o Enelani, mamuli o kana mau hana pili waiwai. Ua hooi loa ia ae na kalai aupuni naauao ana a ua mana nui nei, a o na aoao kue aupuni a me ka noho alii o ua aupuni nei, ua oi loa ae ko lakou hookiekie a me ka lakou mau olelo hookano no neia hana hoohaahaa aina a ke Keikialii o Wale, a ke lawe ala lakou ia mau mea a pau i koo ikaika ma ko lakou aoao. Ua loaa mai ia makou he lono oiaio e pili ana i na ulia poino i loaa ia Mr. Palahu ma kuanalu ae nei o Keawalua. oia iho hoi keia: Ua holo aku oia i ka lawaiʻa i ka po Poaono aku nei, a oiai no oia e hoe ana i kona wahi waa me ka nanea, me ka manao ole ae, e loaa ana iaia ka poino, a iaia i kokoke aku ai ma ka aoao hikina hema o Keawalua, ua poʻi ia iho la oia e kekahi nalu nui, a au ana i ke kai. Ma kana hoomaopopo ana, me he la, ua poʻi ia oia e ka nalu mawaena o ka hora 9 a me 10 o ua po la, a ua pae mai oia no ka aina maloo i ka hora 4 o kakahiaka.