Ka Leo o ka Lahui, Volume II, Number 238, 16 July 1891 — Page 1

KA LEO O KA LAHUI.

"E Mau ke Ea o ka Aina i ka Pono."

 

Buke II.           HONOLULU, IULAI 61, 1891.        Helu 238

 

He Moolelo Kaao

-NO-

KANA.

 

KE AHI KANANA - KA HIAPAIOLE - KA MOOPUNA A ULI - KA MEA NANA I HOOHIOLO O HAUPUKELE KA PUU KAUA I MOLOKAI.

 

            A ina laua e olelo aku i ke alii, aohe koa ikaika e hoea mai i ko kakou puu nei, ina e hoea mai, alaila, na kakou no ka lanakila ke kaua.

            A ina pela laua e olelo ai, aole laua e h@opaa ia i ke kaula, a pela laua i kuka olelo ai.

            I aku la o Mo-i, i kona kaikuahine ia Nuakea; he mau mea like wale no ia ia kaua ke hoike.

            Ina e hoike kaua i ka mea oiaio, alaila, e pilikia ana no laua, a ina hoi laua e hoike hoopunipuni ana; alaila i ka wa e hoea mai ai ke koa e kaua ia Kapepeekauila, a oia paha ka manawa a ke alii e olelo mai ai ia laua.

            Ua ike e no hoi paha olua i keia poino nui e hiki mai ana i o kakou nei, aole hoi olua i hoike mai i ka mea oiaio, a ua huna mai hoi olua ia'u, eia ka pilikia la, nolaila, e pono olua e koli ola ia.

            Ma keia mau noonoo ana o laua, ua hooholo like iho la laua, e hele aku no laua imua o ke alii ia kakahiaka, a hoike aku no i ke alii, e like me ko laua ike i ka mea oiaio, a i make no laua ma ko laua hoike ana i ka mea oiaio, he nani make ana no ia, ua hoike i ka mea pololei imua o ke alii.

            Nolaila, ua hoomakaukau iho la laua e hele aku imua o ke alii e hoike i ko laua ike a pau no na mea e pili ana no ke kaua.

            I ko laua hele ana a hui pu me ke alii, ua ninau mai la ke alii; pe hea ka olua hoike i keia wa, ua makaukau paha.

            Ae, ua makaukau e ke alii; ina e oluolu mai ana ka hanohano o ke alii i kana mau kauwa liilii nei, no ka hoike aku, alaila, e hoike aku no maua.

            Ae, ua makemake au e hoike mai olua.

            I aku la o Mo-i; o ka hoike no a ke akua ia'u i ka po mua, pela no oia i hoike hou mai ai no ua koa nei i keia po, a he oi loa aku keia i ko ka po mua.

            Oia ae la no ka'u hoike i keia wa, i lohe oe e ke alii, e aho paha e hoike mai kau kauwa wahine i kana ike, malia paha, ua okoa kana ike i ka'u i hoike aku nei imua ou e ke alii.

            Ina pela, e oluolu oe e Nuakea e hoike mai i kau ike, wahi a ke alii.

            I mai la o Nuakea; e ola ke alii, ma ko'u nana ana i na ouli o ka lani ma ke ahiahi onehinei, ua ike wau, ma ke kulana o na ao, he ao kaula, o ke poo o ua ao nei iluna pono o ka puu o kakou nei, a o kona hope, aole i ike ia aku.

            Ma keia ano ao; a makou a ka poe kilokilo, he ao okoa loa keia mai na ao i maa mau ia makou i ka nana ana.

            O ke@a koa, aohe he kino kanaka maoli, aka, he kino kaula k@ keia koa, ina e hiki mai ana, alaila, ua lilo kakou i mea ole iaia, e pa ana no nae paha ia kakou i ke ehu kakahiaka, aka nae, i ke ehu ahiahi, e pa ai kakou, aole o kakou ahailono, he moe puu kakou na ka make, oia ka'u hoike piha imua ou e ke alii.

            Nolaila, ua lilo ka hoike a na kahuna ma ka mea oiaio, i mea e hoo wela loa ai i ka manao huhu o ke alii, a pane mai la ua alii nei me ke ano piena penei:

            E hoi olua, a kakahiaka o ka la apopo e hele hou mai ai olua imua o'u nei, a ina e like no ka olua hoike me keia, alaila, e hauhoa ia olua i ke kaula a paa loa.

            E hoopaa ia olua ma kahi okoa, malaila olua e noho ai a hiki i ko olua make ana malalo o ka'u kauoha a ko olua haku.

            Nolaila, o ka lohe ko olua, a e hoi aku olua ma ko olua wahi, a e hoolohe olua i keia leo kauoha.

            Nolaila, ua hoi aku la laua, me ka naau kaumaha, aole nae laua i kaumaha no ko laua make, aka, e kaumaha ana laua, no ka luku ia o ka nui o na kanaka o luna o ka puu, o ka poe hoi i hana ole i ka hewa.

            O ko laua noonoo iloko o laua iho; ina no e make na mea i imi i ke kumu o ke ala ana mai o keia kaua, oia hoi, o ke alii no, a me kona koa; no ka mea, o ka lilo a na o ka makuahine o Kana, i ka aihue ia ana o kona makuahine, oia ke kumu i ala mai ai o keia kaua hope loa, mawaena o Kapepeekauila a me ke alii Keoloewa.

            Ina no o laua ke make, a koe mai la ka nui o na kanaka, o ka poe i ike ole mai i keia hewa i hana ia.

            E make ka mea hewa e pono ai, a e ola hoi ka poe hewa ole.

 

HE KUAI MAKEPONO.

            I keia la 13, e kuai aku ana na mea nona na inoa malalo iho i na waiwai o ko laua halekuai ma ke kumukuai makepono loa, i ike ole ia ka lua ma keia kaona.  No elua pule wale no, mamua o ko maua nee ana aku.  O na ano waiwai a pau, he mau waiwai hou loa, a me na ano paikini o kela a me keia ano o na keonimana.  Na hulu, na Papale, Papale kapu, na paikini o na Lede, i kinohinohi ia me na ano like ole.                       EGAN & GUNN.

July 13, 1891.  235-tfd.

 

He Moolelo Nanea.

NO

De Atanani.

 

Ke Koa o ka Lio Olohe,

- A I OLE -

NA KIAI EKOLU O FARANI.

            Alaila, owai ua kanaka la, e hai mai ?

            Pane aku la o Bonacio, he kanaka loihi ilikoi, a he kulana haaheo kona me ka hanohano.

            Ua loaa no anei paha ia oe kona inoa ?

            Aole e ka Monasiu, aka, ua hiki ia'u ke koho pololei iaia ina aia oia iwaena o na tausani kanaka.

            Ua hakumakuma iho la na helehelena o ke kanaka Basetile mamuli o keia mau olelo a Bonacio, me ka pane pu ana mai o ua kanaka la penei:

            Aha ! ua hiki ia oe ke koho pololei i ua kanaka la ea ?

            Ae, e like me ka'u i olelo iho nei, wahi a Bonacio.

            Ua lawa, ua lawa ko keia la, a no kahi wa hou aku ou e hoea hou mai ai ma keia keena, e kono ia aku ana oe e hoike mai no ua kanaka la nana i hoomahuka kau wahine.

            Pane aku la kahi Bonacio me ke ano haalulu penei:

            Ka ! aole au i hai aku nei ia oe ua kamaaina au iaia, ua hai aku nei au, ua ike au i kona ano, a e hiki no ia'u ke koho pololei aku i ua kanaka la.

            O keia mau olelo a Bonacio, aole loa ia i hoolohe ia mai e ke kanaka o Basetile, aka, o ka ua kanaka la i haawi ae ai ia manawa, oia no kona huli ana ae a kahea aku la i na koa kiai no ke kii ana i ke p o a lawe aku no kahi hoopaa.

            Emoole, aia ua Bonacio la e lawe ia ana e na koa me ka huli pu ana mai o ke aliikoa o ka manawa a ni nau mai la i kahi o ka paahao e hoopaa ia ai.

            Iloko o ka rumi pouli ! wahi a ka pane.

            Ua hoehaeha loa ia ka naau o kahi Bonacio iaia i lohe mai ai i na olelo a ke kanaka Basetile, a oia ka ua wahi Bonacio nei i namunamu iho ai iaia iho, ua hana anei kuu wahine i kekahi hewa karaima ino loa a'u e auamo aku ai i na ehaeha o kana mau hana, e kamailio oia e pono ai; a he keena pouli ka ko'u e hoopaa ia ai.

            Me keia mau olelo a Bonacio e namunamu ana iaia iho, noho ana oia iloko o ka rumi pouli a ke aloha ole, holo ae la ka laka ki a ka wiliki, ua oki oe e hokahoka ana.

            O ka ehaeha a me ke kaumaha o ka naau, oia na haawina e haawe ana iluna o ua Bonacio la, o ka ono o ka ai, ua mamao aku ia mai iaia aku, a o kona mau manaolana hau oli, aole ia me ia.

            Hala ae la ka po o keia noho ana o ua wahi Bonacio la iloko o ka rumi pouli, a ma ke kakahiaka o kekahi la ae, hoea aku la ma kona rumi ke kanaka kiai o Basetile, me kona ukali.

            Ua lele e ae ka hauli o ua wahi Bonacio la i ka wa a ka laka o kona puka i nakeke aku ai, a oia ka ua Bonacio nei i hoomanao ae ai e kii ia aku ana ia no kona kau ia aku iluna o ka ainana, aka i ka wa a ka leo o ke kanaka kiai i kamailio aku ai me ka oluolu o na olelo, akahi no a akakuu mai na manao pono ole iloko ona.

            Wahi a ke kanaka kiai e Monasiua Bonacio, no kou ola iho, ua makemake ia oe e hoike i ka mea oiaio wale no, a maluna oe o ka oiaio e kamailio ai me ka hoopunipuni ole, a e pakele no oe i ka inaina o ke Cadinela

            Pane mai la o Bonacio; e hai mai a ua makaukau au e hai aku i na mea a pau.

            Pane aku la ke kanaka kiai; no ka mua; auhea kau wahine ?

            Ka ! aole ka hoi au i hai aku ia oe ma ka la inehinei, ua kaili ia oia mai ia'u aku, wahi a Bonacio.

            Ae e ka Monasiua, aka, ma ka la iho la no hoi inehinei, ua pakele aku la oia.

            A-ha ! ua pakele aku ka oia, alai la, ina o kona pakele ana, aole paha ia he hewa no'u ?

            Pela io no e ka Monasiu, aka, heaha hoi kau hana, a me kou kuleana  ma ka rumi o kela wahi koa o ka puali kavalia o Kapena Deserata ?

            Ke koa hea keia e ka Monasiua ? wahi a Bonasio.

Aole i pau.

 

$10      MAKANA      $10

            E makana ia ana he umi dala i ka mea a mau mea paha e hoihoi mai ana i kuu lio i nalowale aku mai ko'u wahi e noho nei ma kauhale o na paahana alanui hou Pantalus, ma ke kua o Puowaina.  He lio ahinahina ka@e, i kuui ia ma ka uha hope akau C. K.     J. B. GRANT.

229-tf.

 

Na Hui Kinipopo.

Iune 13 Kamehameha vs Honolulu

  "    20 Hawaii                     vs Honolulu

  "    27 Kamehameha           vs Hawaii

Iulai  4 Kamehameha vs Honolulu

  "    11 Honolulu      vs Hawaii

  "    18 Kamehameha           vs Hawaii

  "    25 Kamehameha           vs Honolulu

Aug 1 Hawaii              vs Honolulu

  "    8 Kamehameha vs Hawaii

  "   15 Kamehameha            vs Honolulu

  "   22 Honolulu       vs Hawaii

  "   29 Kamehameha            vs Hawaii

 

OLELO HOOLAHA.

            Ua nalowale aku kuu Lio [w] hulupala lae kea loihi a he man wawae keokeo a pau kona eha, i kuni ole ia i ka hao, a e loaa no ka uku makana o $5.00.  E loaa no au ma kahi o T. C. Polikapa.

JNO H. POLIHALE.

Auwaiolimn, Honolulu, Apr. 30.        3ts-d.

 

Olelo Hoolaha.

            Ua makaukau ka mea nona Oinoa malalo iho, e hana i na Pua HAKU PUNA ELEELE a me ka pohaku e ae no na pa kupapau, a me na kahua kukulu kia-hoomanao.  O ka poe makemake e waiho mai i ka lakou mau kauoha me Ioane Akina

J. BOWLER.

Sept. 22, '90, d-ly *

 

H. P. K. Malulani.

            HE LOIO a he hookapeke olelo ma ke Kanawai.  E loaa @ mai ke kai hawanawana o Kawaihae e hoene a@ me ipo la, a Hamakua au i ka la'i o Kukaiau ma ke a@o o na pali.  E ohiia no hoi na aie me ke ku i ka eleu a me ka puahiohie                     Nov 8 '90, d-ly.

 

HOOLAHA KAI KONOHIKI.

            Ke pa leo aku nei ke Konohiki o Waialae, i kona mau hoaloha a me na hoaaina o kona Aina, ua hoolimalima aku oia i ke kai i keia manawa, a ua hookapu iho oia i ka @ee no@a iho, a nolaila, ke poloai aku nei oia e ike a hoomaopopo i keia leo la.       Owau no,

3ms-d. PAULO ISENBERG.

 

Ua Makemakeia

KEKAHI keikikane e hana ma kekahi hale kuai, he ohi i ke dala ka hana.  I ike i ka olelo a me ke kakau Beritania.  E ninau ma kahi o N. S SACHS,

104, Alanui Papu.       3t-d 227.

 

OLELO HOOLAHA.

            Ma keia, ke haawi nei au i ka mana ia George H McLane, e ohi i na aie a pau o ka poe aie i ka waiwai o George H. McLane o Nawiliwili, Kauai, a e haawi i na likiki ma ko'u inoa.

June 29, '91. 1wd.       K. PODEYN.

 

Hoolaha Hookapu.

            Ke hoike ia aku nei ka lohe i @a ano kanaka a pau loa.  Ua hookapu loa maua i ko maua mau Apana Aina ekolu i kapaia o Kalaheo, Kahal@a a me Puuoihala, no lakou na eka 202 e waiho la ma ka Paa, Kailua, Koolaupoko, Oahu, i hoolimalima ia e maua mai ia Keleau (w) mai.  Nolaila, ke papa loa ia aku nei na holoholona o kela a me keia ano, aole e hookuu wale ia maluna o ua mau Apana Aina la, a o  ka mea a mau mea paha e kue ana i keia , e hopu ia no e maua, a i ole ia, e ko mana mau hope paha, a e hooko ia e like me ke kuhikuhi a ke kanawai.  O na poe a pau e makemake ana e komo iloko o keia Hui, e pono lakou e hele mai e hui pu me Mrs. C. I. HIRAM, a i ole ia, me DAVID DAYTON, a i ole ia KUKA.

Owau no me ka haahaa

MRS. C. I. HIRAM.

Honolulu, Oahu, Oct. 8, 1890.           @me-d.