Ka Leo o ka Lahui, Volume II, Number 245, 27 July 1891 — Page 4
| This text was transcribed by: | Lyn Kuda |
| This work is dedicated to: | Awaiaulu |
KA LEO O KA LAHUI.
"E Mau ke Ea o ka Aina i ka Pono."
---
KA LEO.
---
John E. Bush.
Luna Hooponopono a me Puuku.
---
POAKAHI IULAI 27, 1891.
---
He Moolelo
No
KAMAPUAA.
KE KEIKI PUAA A KAHIKIULA ME HINA--KA MOOPUNA PUAA A KAMAUNUANIHO--KA HOA PAIO HOI O PELE, KA WAHINE O KA LUA I KILAUEA, A HALA LOA AKU I NA KUPUNA O KUKULU O KAHIKI.
---
O oe ia e Haunuu, e Haulani
E Haalokuloku
Ka Mano e ka I'a nui
E ui, e Uilani
Ko inoa puaa ia e o mai.
---
A ua koe elua mau waa a me ka ukana o ia mau waa, aole i hana ino ia e Kamapuaa.
O na waa he eono i pau ka ukana oloko, ua hoopihaia iho la eia me kona hanalepo a piha na umeke, a o na hu'ewai, ua hoopiha ia iho la me kona hanawai.
I ko na kanaka ala ana ae i ka wanaao, me ko lakou manao e holo no ia manawa, honi ae la lakou i ke pilo o ka hana lepo.
I ae la kekahi o lakou, he mea e hoi ka pilopilo o ka hanalepo, ua hana ino iho nei pana kekahi o kakou?
Ua hoole like mai la lakou, aohe i hana ino ia e kakou. aohe mea o kakou i ala mua ae nei.
I ko lakou hele ana aku iluna o na waa, ua ike koke lakou he hana lepo, ka mea i hoopihaia i na umeke, a he hanawai hoi kai hoopihaia i na hu'ewai, ua noke ia i ka ai na mea a pau, oluna o na waa eono, a ua koe ka puaa.
A he elua mau waa aole i hana no ia ko laua mau ukana, ua hooho ae la lakou, ua ola hou o Kamapuaa, a nana keia mau hana hookalakupua.
Ua ku mai nei hoi ka honono o ka hulu o ka puaa i na moku, a ua make hoi e Kamapuaa ia Pele, eia ka ua ola hou.
Ua kuka iho la na kanaka o ua mau waa nei, o na waa eono i pau ka lakou mea ai, e hoi hou ia mau waa iuka o Ewa, i mau mea ai hou na lakou, a o na waa ino i koe elua e holo mua no hoi ia.
Ke huli hoi ala keia poe no uka o Ewa, a o kekahi mau waa hoi, ke liuliu ala ia mau waa no ko laua holo ana aku.
I ua mau waa nei i kau aku ai o na kanaka, a holo aku la lakou e ku aku ana keia puaa, ma ka lae kahakai, e uwe aku ana.
I ka lohe ana o na kanaka i ka uwe leo puaa mahope o lakou, ua huli mai la ko lakou mau maka a nana i uka o ua ana nei e ku io aku ana keia puaa.
Ua hoohuli hou lakou i na waa e kii i ka puaa e hoouka mai, i ko lakou pae hou ano aku la iuka, ua lalau aku la lakou i ua puaa nei. a kau aku la iluna o na waa, a holo aku la lakou.
Ia lakou e holo nei, ua olelo ae la kekahi kanaka, he puaa momo nakeia a ua mau alii nei, he io ono ko keia puaa, no ka mea he puaa Olomea, mikomiko aku la ka io o keia puaa, ono ino.
I ua poe kanaka nei e olelo aku nei, ke nana maikai mai nei no na maka o ua puaa nei.
Aohe mea kau la e, kii mai e ai i ua poe kanaka nei, i ka wa a ko lakou nei mau waa e hookokoke aku nei i ka lae o Kepookala, o ka oili aku la no ia o ua puaa nei a kuho ana iloko o ke kai, o ka heo aku la no ia o ua puaa nei a pae ana iuka o ka aina, he loko ia wahi ana i pae aku ai.
Ua hoomaka aku la o Kamapuaa e pii iuka o Honouliuli, a hiki aku la keia i Honouliuli Loko, ike aku la keia i kekahi luahine e ohi mai ana i ka oha lana wai o loko o ka loi.
A ku ana keia ma hai o kela loi kalo a ua luahine nei o ohi ona lanawai nei.
A huli mai la ua wahine nei, a ike mai la i keia kanaka i ke ku aku ma kula.
Ua haawi mai la ka luahine i kona aloha i keia kanaka e ku aku nei, a pela no hoi o Kamapuaa i aloha aku ai, a i aku la keia, e aha ana oe?
E ohi wahi oha lanawai ae ana, i loaa ke ola, he noho wi ko ka aina wahi a ka pane.
A ike aku la o Kamapuaa i kekahi loi kalo, ua hele a oo, i aku la oia i ka wahine. o ka mea iho la ia e ohi, haalele ia aku hoi e oe ka loi kalo ua oo?
I mai la ka luahine, na ke alii ia loi kalo oo, aohe ia na ke kanaka e like me kaua.
I aku la o Kamapuaa, i loaa hoi paha ka ia alii i ke kanaka, na ke kanaka e hana aku a mo'a, a he ai wale iho no ka ke alii, na'u e kai aku ka ai a kaua.
I mai la ka luahine, e make auanei kaua i ke alii, aole ananei kaua e ai i ka ai ua make mua kaua i ke alii.
Kahaha, aole paha hoi he make ka ek alii, he ola hoi ka ke alii, he opu alii he opu aloha.
Nolaila e hoi mai kaua ma kula nei. a na'u e kai aku ka ai a kaua a nui.
I mai la o Kamaunuaniho, e make ana ka hoi au mamuli o kau mau hana, ehia ka hoi he wa a make kupapau iho, eia ka hoi e make e ana i ka aihue i ka ai a ke alii, aole no i ike mai o ka moopuna keia ana.
Ke uhuki 'la o Kamapuaa i ka ai o ua loi kalo ala a ke alii, me ko na ikaika nui, mai kahi aoao a kahi aoao, a lana ka wai a ua loi kalo ala.
Ke hoomau ala no o Kamaunuaniho i kona uwe ana, no ka make mai i ke alii.
Ua huihui ia ke kalo a pau o ua loi kalo ala e Kamapuaa, a i aku la i ka luahine.
Ua pau ka ai a kaua i ka huihui ia, a o ke kau wale aku no koe iluna ou.
Aole i pan.
---
I na Luna Lawe Pepa o Ka Leo o ka Lahui, ke ha'i ia'ku nei ka lohe ia oukou, ina he mau helu koe o ka la 3, 10, 20 o Aperila, a me ka la 5 o Mei nei. o ka nupepa Ka Leo, ke kauoha ia aku nei e hoihoi mai ma ke keena nei.
Ma ke kauoha.
---
Kuai Kudala
--o na--
Pa-Hale ma Kalihi, Honolulu, Oahu.
---
Ua loaa mai ke kauoha ia'u e kuai aku ma ke kuai kudala akea, ma ko'u Keena Kudala, ma Alanui Moiwanine, i ka POAKAHI IUNE 29, 1891, HORA 12 M. He 36 mau Paa aina Noho Nani, mawae na o alanui Moi me Beckley, he aneane hapaha mile ma Ewa aku o ke Kula Ka mehameha. Ua mahele ia keia mau apana ma kekahi ano, a me ka nunui ku pono e hiki ai ke k[x] mo mai iloko o ka li ma o kela a me keia mea ka loaa ana e like me ka makemake, kekahi home no lakou ponoi iho iloko e na palena mamao kupono i ka piko o na wahi hana o ke kulanakauhale.
Ke kulana a me na pono lehulehu e ae o keia mau apana aina, ua hiki ole ke hoohalike ia me na aina e ae o keia an[x] i kuai ia iloko o keia kulanakauhale i na makahiki i hala e aku.
o ke ano'o ka waiho ana o keia mau aina, ma ka waha aku o ke awawa o Kalihi ma ke kiekiena kupono, ua loaa mau ke ea oluolu maikai a me ka maikai mao li no o ka nohoana.
E huli ana keia mau aina pa-hale a pau i ke alanui Kalihi, he 55 kapuai, oia noi ke alanui oi aku o ke akea ma na wa hi e pili kokoke ana i ke kulanakauhale o Honolulu, a e holo ana hoi mai nianui Moi a puka i alanui Beckley.
Aia malalo iho o ekolu minute ke hele wawae aku a loaa keia mau apana aina mai kahi o ke alanui kaahao (Tramcar) e pau ai.
Ke wai. E hoomoe ia ana he paipu kumu wai, he 8 iniha ke ana-waena e hoomoe ia ma ke alanni Moi, mai na hoo moe ana paipu o ke aupuni, e hooia ana i ka lawa i ka wai. Ano e loaa no ka wai mai ka pa kula Kamehameha mai.
E ike ia no kekahi palapala kii aina o keia mau hale pa hale ma ko'u Keena kahi no hoi e loaa ai na hoike a makemake ia e ninau aku.
Ke ano o ke kuai ana. Hookahi hapa ma ke dala kuike, ke koena iloko o hookahi makahiki ma ka ukupanee o 9 kenelu pa-haneii i hoopaa ia ma ka molaki.
O na lilo e ka palapala kuai, me ka mea no ia e kuai ana i ka aina.
James E. Morgan. Luna Kudala.
Honolulu Mei 29, 1891. 241-dtf.
---
Na Lole Komo o ke Kau
Na LoLe Komo o ke Kau
---
NA LAKO HOU LOA a me NA ANO HOU LOA!
E weheia nei ma kahi o N.S. Sachs, 104 Alanui Papu Honolulu
Na Ano lihilihi o Kela a me Keia Ano.
---
HE KUAI MAKEPONO LOA KEIA.
Ua wehe ae nei makou i no ano LIHILIHI a pau i loaa pololei mai ia makou, mai na Hale Hana mai Europa mai, a nolaila, ua hiki ia makou ke kuai aku--
NO NA KUMUKU AE HAAHAA I KO KEKAHI MAU WAHI E AE.
Ua moakaka ke ano o na lau o ka lole, a ua pomaikai oe ke ike mua, mamua o ke kuai ana ma kahi e aku.
NA HOLOKU LIHILIHI no $4.50 o ka lole i kkuai ia no $6.50 a $7 mamua.
NA LOLE LIHILIHI NO KEIKI, e like ka laula me ko ka pelekoki, mai ke 60 keneta o ka i a a pii aku.
HE NUI NA ANO O NA LOLE KEOKEO, KINAMU, LATINA.
KINAMU LOLE, maka hou, he 8 i-a no ka $1.00.
NA LOLE MAIKAI PAPAMU a kakau loloa. 20 a 25 keneta o ka i-a.
NA LOLE oi loa aku o ka maikai he 25 keneta wale no ko ka i-a.
NA LOLE KIKOKIKO a me LAU, (Swiss) he omi loa,
NA PAA LOLE LIHILIHI iloko o na pahu, KEOKEO a KALAKOA, e kuai emi loa ia aku ana.
NA KAKINI ELEELE ADELINE.
Ina onkou e makemake i KAKINI ELEELE maikai, i KAKINI mae ole a kohu ole, e ninau no ke KAKINI ELEELE ADELINE, ua hanaia keia KAKINI no makou no keia Makeke, a ua hiki ia makou no keia Makeke, a ua hiki ia makou ke hooiaio aku i ko lakou maikai, ua lawa no na wahine, kaikamahine, a me na keiki.
---
Mai poina wale iho oukou i ka hele mai e ike i na ano Papale Italia hou no ke Kau, no mea, o na Papale Sila keokeo a eleele, i kahiko ia me na lipine no $1.25 $1.50 a me $2.00.
--AIA MA--
Ka Halekuai Kaulana, 104, Alanui Papu. Iulai 14, 1891. dtf. WEHI O NA LEDE.
---
Papale! Paple!! Papale!!!
---
E Loaa no / maanei na --Papale-- maikai o na / ano a pau
Na PAPALE i hoonani ia a hoonani ole ia.
I loaa ole ka lua ma keia Pae Aina, a no na la hoomanao Kulaia, e loaa no ia oe ma na kumukuai haahaa.
Ina oukou e kuai i na PAPALE ma ko makou halekuai nei, alaila, e loaa no ia oe ke kaulike.
Nolaila, e kipa mai io makou nei i hoopauia ko oukou kuhihewa
C.J. Fishel.
Mei, 19, 1891, 196 tf-d.
---
KUAI HOOPAU NUI.
---
Mai keia manawa ku a hiki i ko Makou hoonee ana aku iloko o ko makou
HALEKUAI HOU
Ma ke Alanui Papu, --(NA HALE BURUA.
E hoolilo aku ana Makou i ko Makou waiwai a pau o na ano Lole:
NA LOLE NANI,
NA LOLE I HULUIA,
KAPU A ME PAPALE
PAHU LOLE, a pela aku
No na Uku Hooemi Loa Nae. Egan & Gunn.
ALANUI MOI kokoke i ke ALANUI PAPU. tf-d.
---
HOOLAHA HOU
B.F. Ehlers & Co., --PAINAPA.
---
HELU 99, Alanul Papu.
IA OUKOU E NA MAKAMAKA A ME NA HOALOHA, OIAIHOI UA makaukau makou i ke kuai ana aku ia oukou i na lako lole wahine o ua ano [xxx] la a pau; oia hoi--
Na Silika hou ... Na Sateen hou
Na Mikilima hou ... Na Lihilihi hou
Ne Lihilhii keokeo hou ... Na Lihilihi kau lole hou
Na ano Mamalu hou loa ... Na Paku pukaaniani
Na lole hou o na wahine ... Na lole o na keiki liilii.
Na lole o kela a me keia ano e loaa no ia oukou no na kumukuai haahaa loa.
E kipa mai e na makamaka, i hoopau ia ai ko oukou kanalua no ka makou kuai hoopoho aku ia oukou.
owau me ka oiaio, B.F. EHLERS & CO.
tf