Ka Leo o ka Lahui, Volume II, Number 268, 28 August 1891 — Page 3
| This text was transcribed by: | Kelly Murray |
| This work is dedicated to: | Awaiaulu |
KA LEO O KA LAHUI.
"E Mau ke Ea o ka Aina i ka Pono."
No Manana ! No Manana !!
(REYMOND GROVE.).
Ma ka Poaono la 29 o Augate e malama ia ana he aha lealea ma ka ululaau o Manana, e pili 'la i ke alahao o hui Hooholo Kaaahi. Ua haawi ia keia malalo o na hookele ana a ka hui, i hookahi la iloko o ka malama i la hoolaulea a hoohala manawa a hoohala luhi o ka poe o ke kulanakauhale nei. Ke poloai ia aku nei na paahana o na hale hana, na pa-hana, na limahana o ka uwapo. Ua haawi ia keia no na Hawaii, i hiki ai ia lakou ke hele me na kane, wahine a me na keiki. He paina luau a he mau hoonanea a luana ana, a he hula haole no hoi ko ka poe hoihoi ia mea. He $1.00 ka uku pau o ke kaa no ka hele ana a hoi ana mai a me ka paina hookahi ana.
He hoao ana keia i mea e loaa ai kahi luana ana, a e hanu ai i na ea oluolu o ke kuahiwi. 265-d1w.
_____
Ma keia hope aku, aole e hoouna ia kekahi pepa ma ka owili kpakahi ke ole e uku mua ia mai, ke ola o ka pepa, ae hoolohe e na makamaka i keia no ka OIAIO, a me ka LEO, nele no ka uku ana mea nele no oukou i ke kukui ole.
Ma ke kauoha.
_____
He Moolelo Kaao NO KANA.
KE AHI KANANA - KA HIAPAIOLE - KA MOOPUNA A ULI - KA MEA NANA I HOOHIOLO O HAUPUKELE KA PUU KAUA I MOLOKAI.
Aka nae, aole e hiki ia lakou ke aua aku i na alii, e hookuu aku no e like me ko laua makemake, a i ike mai laua ua piliki ka lahui kanaka, a i ole o ka laua keiki, he mea hiki no hoi ia laua ke huli mai a kokua.
No ka mea, ina e hooholo ka manao o na alii no ka hele, a o ka hele no ia, he auwai ka manao o na alii, aia i kahi e kahe ai.
Ua hoi laua e noho pu me ka laua keiki i ke kuahiwi, oia no hoi o Kana, no ka mea, ua kokoke mai ko laua mau la palupalu.
A ma ia noho ana o laua me ia keiki, he oluolu no a he ku no hoi i ka maikai ia noho ana o laua.
Ua malama ia ko laua kino me ka maikai, a hiki i na la hapauea o ko laua mau la o ke ola ana ma keia ao.
A hiki i ko laua hookuu ana mai i na inea o keia ao, a pau hoi ko laua hanu ana i na ea oluolu o keia ao mauleule, a kuu aku la i ko laua mau kino no ka moe ana i ka moe kau a moe hooilo.
Ua noho iho la no hoi o Kana, e like me kona ano mau, ma ke ano kino kupua a hookala kupua, aohe mea nana i hoohaahaa iaia ma na ano a pau.
Ke noho la oia iuka me kona kahu hanai, oia no hoi o Uli.
Ma kekahi la, ua olelo aku la o Kana ia Uli kona kahu hanai penei:
E iho ana wau i kai o Hilo, e halawai pu wau me ko'u kaikuaana me Niheu, pehea aku nei la kona noho ana me na makaainana o na makua o maua.
O ke kauoha hope a na makua o maua iaia; e malama pono i ke kanaka nui a i ke kanaka iki.
Nolaila, ua manao wau e iho i ka la apopo, e hui me ko'u kaikuaana, a me na makaaianana o maua, i ninau pono aku wau i ko lakou pilikia o ka noho ana, a me ka ole.
Ina hoi he maikai, aole hoi ana olelo ana, o ko'u makemake ia, o ka noho me ke ano maikai, i ole hoi e lilo ka inoa i mea hoinoino ia e na makaainana, a ina hoi he pilikia e ae hoi kekahi o lakou, alaila, ha'u hoi ia e pulumi aku o lilo ia enemi i mea ole.
O ka noho like a oluolu, oia ka'u i ake ai, oiai ko'u mau la e noho ana ma keia ao, me ko'u hanau mua.
Pane mai la o Uli, aohe a'u mea e hoole aku ai i kou manao e kuu moopuna, e hana oe e like me kou manao he pono.
Nolaila, ua hooholo like ae la laua i ka wa a Kana e iho ai i kai o Hilo e huipu me kona hanau mua, nolaila, ua noho iho la laua ia koena o ka la, a hiki i ka poeleele ana, a haule aku laua nei hiamoe.
Ua hoi no hoi o Kana iloko o kona hale e moe ai, a o uli no hoi, aia no hoi oia iloko o kona hale kahi i noho ai.
Na ke ao ana ae o kekahi la, i ala like ae ai laua, a hoomakaukau iho la i ka laua mau mea ai, no ko laua paina ana a iho aku hoi o Kana no kai o Hilo ma ia kakahiaka, e like me na mea i hoike mua ia ae la maluna, ma kona iho ana e hui pu me kona hanau mua, oia kana i hooko ai.
Ua iho o Kana ma kona kino kanaka i hui pu oia me kona hanau mua, a me ko laua mau makaainana a halawai he kino a he kino, he maka a he maka.
A i kona hui io ana me kona kai kaina me Niheu, ua hoopiha ia ko laua mau puuwai me ke aloha walohia, a hu mai la ko laua aloha i na makua o laua, aohe hoi ka nana ana ae i na maka o na makua.
Aka, ua hala laua ma kela aoao, i ka pahu hopu o ko ke kanaka hopena o keia ola ana, a o na keiki wale no nei e hui aloha pu nei, me ka hookuu nui ana i na waimaka, e hoonuu i na lihilihi i na ukana a ke aloha e kipa mai ai.
Mahope o ka pau ana o ko laua hui aloha ana, ua kauoha ae la o Niheu i na kanaka e kalua mai i puaa, a e hele kekahi poe i ka lawaia, i ka i'a o na loko a me na kahawai o Hilo.
Ua hooko ia ia leo alii, no ka mea, ua hoea mai o Kana, ko lakou puukalahala o na la a ka enemi e kipa mai ai i o lakou la.
Ua holo ia lohe a puni o Hilo ho lookoa, no ka hiki ana mai o Kana e hui pu me Niheu, a me na makaainana.
Ua hiki loa aku la no hoi ia lohe no ko Kana hiki ana i kai o Hilo, a hala loa i Puna, i ka aina paia ala i ka hala.
_____
OLELO HOOLAHA.
Eia ma ka Pa Aupuni o Makiki nei kekahi mau lio helehewa, lio w eleele kiko keokeo ma ka lae, hao kuni ano-e hema hope, lio w eleele elua wawae keokeo hope, hookahi wawae keokeo o mua hema, hao ku ni ano e hema hope, hao kuni III ak. hope, kiko keokeo ma ka lae; lio w ulaula, elua wawae keokeo hope, keokeo loihi ma ka lae, hao Pak hope hao III hema hope; lio w ulaula, hauliuli keokeo loihi ma ka lae, eha wawae keokeo, he mau hao kuni ano e ma ka aoao o na a-i. O ka mea a mau mea nona keia mau lio, e pono e kii koke mai o hala na la he 13, e kuai kudala aku no au ke hiki aku i ka la 22 o Augate, 1891, hora 12 awakea Poaono.
David Kaoao. Luna Pa Aupuni.
256-dtf.
_____
Hoolaha Hookapu.
Ke hoike ia aku nei ka lohe i na ano kanaka a pau loa. Ua hookapu loa maua i ko maua mau Apana Aina ekolu i kapaia o Kalaheo, Kahaleula a me Puuoihala, no lakou na eka 202 e waiho la ma ka Paa, Kailua, Koolaupoko, Oahu, i hoolimalima ia e maua mai ia Keleau (w) mai. Nolaila, ke papa loa ia aku nei na holoholona o kela a me keia ano, aole e hookuu wale ia maluna o ua mau Apana Aina la, a o ka mea a mau mea paha e kue ana i keia, e hopu ia no e maua, a i ole ia, e ko maua mau hope paha, a e hooko ia e likeme ke kuhikuhi a ke kanawai. O na poe a pau e makemake ana e komo iloko o keia Hui, e pono lakou e hele mai e hui pu me Mrs C.I. HIRAM, a i ole ia, me DAVID DAYTON, a i ole ia KUKA.
Owau no me ka haahaa.
MRS. C. I HIRAM.
Honolulu, Oahu. Oct. 8, 1890. 3ms-d.
_____
OLELO HOOLAHA.
E ike auanei na kanaka a pau, eia ma ka Pa Aupuni o Makiki nei, kekahi lio hele hewa, hookahi lio k ahinahina, 1 wawae keokeo hope hema, hao kuni ano e ma ka aoao hema, hao kuni hou ma ka aoao akau hope, ekolu wawae ahinahina.
O ka mea a mau mea paha nona keia lio e pono e kii koke mai ina aole e kii koke mai a hala na la he 12, alaila, e kuai kudala aku no wau ma ka la 22 o Aug. M.H. 1891 awakea Poaono hola 12.
David Kaoao. Luna Pa Aupuni.
257 4ts-d*
_____
Aila Kuai
E LOAA NO MA KAHI O J.F. COLBURN
(KEONI KOLOBANA.)
Ma ke Kihi o na Alanui Nuuanu me Moi.
E loaa no no ke kumukuai haahaa loa o $2.50 o ka pahu. Hele mai hookahi, hele mai elua, hele mai no a pau.
Ko oukou hoaloha.
J.F. COLBURN.
Honolulu, Iulai 8, 1891. 232 dtf
_____
Hale Hana Wai Momona WAI-ANIANI
Sam Lad me John Graee na Ona.
Ka poe wale no na lakou e hana nei
NA WAI HOOMAEMAE KOKO KAULANA oia hoi ka SASEPARILA A ME KA WAI-HAO.
NA WAI MOMONA AWAPUHI, SASEPARILA, LEMI, WAI PIPII, SODA MAOLI, SIDA, KAMEPENA, & C.
Mutual 330-TELEPONA-Bell 298
_____
KUAI HOOPAU NUI.
Mai keia manawa aku a hiki i ko Makou hoonee ana aku iloko o ko makou
HALEKUAI HOU
Ma ke Alanui Papu, -(NA HALE BURUA.
E hoolilo aku ana Makou i ko Makou waiwai a pau o na ano Lole:
NA LOLE NANI,
NA LOLE I HUMUIA,
KAPU A ME PAPALE
PAHU LOLE, a pela aku
No na Uku Hooemi Loa Nae.
Egan & Gunn.
ALANUI MOI kokoke i ke ALANUI PAPU.
_____
HOOLAHA HOU
B.F. Ehlers & Co -PAINAPA.
HELU 99 Alanui Papu.
IA OUKOU E NA MAKAMAKA A ME NA HOALOHA, OIAI HOI UA makaukau mkou i ke kuai ana aku ia oukou i na lako lole wahine o na ano Stella a pau; oia hoi -
Na Silika hou Na Sateen hou
Na Mikilima hou Na lihilihi hou
Na Lihilihi keokeo hou Na Lihilihi kau lole hou
Na ano Mamalu hou loa Na Paku Pukaaniani
Na lole hou o na wahine Na lole o na keiki liilii.
Na lole o kela a me keia ano e loaa no ia oukou no na kumukuai haahaa loa.
E kipa mai e na makamaka, i hoopau ia ai ko oukou kanalua no ka makou kuai hoopoho aku ia oukou.
Owau me ka oiaio.
B.F. EHLERS & CO.
_____
Poino i ka Wai !
POINO I KA WAI !
E hoomaka ana keia mawaena o keia la a me ka Poalua a hiki mai o keia pule ae, me ka nana ole ia o na lilo.
N.S. SACHS. Honolulu
263-dtf.
_____
He Kuai Nui Hoopau aku.
E HOOMAKA ANA I KEIA
POAONO, AUGATE 1, 1891.
Ua Lilo ko makou Waiwai he mea Mohai wale !
Ua Hoemiia ke Kumukuai ilalo, aole i ko Makou Pono, aka nou no Papa Kumukuai no 30 La wale no:
200 paa lihilihi keokeo puka aniani $ .90
20 i-a Kalakoa maikai 1.00
12 keokeo 1 i-a laula 1.00
3 keokeo 1 i-a laula 1.00
159 kakini lakeke o na Kamalii (huluhulu .45
93 kakini ka'e waihooluu o na wahine .65
Huluhulu no na paa lole kupono, .25 keneta o ka i-a, e kuai no maku i keia mau la no 7 i-a no 1.00
Papale Kula o na Kamalii .25
Na Kawele nunui, 2 no .25
Kakini eleele maikai .25
Na Papale i kahiko maikai ia 2.50
E UMI HANA LOLE MALUNA, HOLOKU etc., HANA IA ME KA OLUOLU LOA. E HOOPAA AKU NO MAKOU NO NA KUMUKUAI MALUNA NO 30 L.A. NO KE DALA KUIKE WALE NO KEIA KUAI ANA.
C.J. FISHEL,
Ka makamua o na Hale lako o na Wahine, oia hoi ma alanui papu a me Hotele kahi i hanau ia ai na kuai hoopono a ano nu noi.