Ka Leo o ka Lahui, Volume II, Number 287, 24 September 1891 — Page 3

KA LEO O KA LAHUI.

"E Mau ke Ea o ka Aina i ka Pono."

 

HOOPONOPONO AUPUNI ANO HOU.

            Ua lohe mai makou, ua pau i ke a-na ia na Makai o ke kulanakauhale nei, a ua hoomaopopo ia ke kiekie, ke kaumaha, ke kiekie, na makahiki, kahi i hanau ai a pela aku. Eia ko makou lohe, ina o na makai i emi iho malalo o ka 160 paona, aole oia i kupono e noho makai. O ka makai i emi iho malalo o ka 6 me hapa kapuai ke kiekie, e hoopau ia oia a pela aku.

            O keia mau hooponopono ana a pau, na ka Ilamuku no ia; ua maikai no kela, ke kau like nae hoi ke ano o ka hana ana; aka hoi, a i kapakahi, ke i aku nei makou ma ka aoao o ka lahui, ua hewa loa, ua pono ole, a ua eepa maoli no na hooponopono aupuni ana o keia au. Oiai eoi, eia iloko o ka oihana makai i kupono ole no ia hana, oiai, ua poino ia kona mau lala hoonee, a he nawaliwali maoli no hoi, a he hiki ole ke hilinai ia, aku, aia oia iloko o ia oihana e kalele mai nei. Nolaila, e Mr. Ilamuku, e hookaulike ka pono, aole e nana ma ka ili, aka, ma ka hana e ike ia ai ka mea pono.

 

E Hawaii e, Imua Mai Hoi Hope.

            Ke aneane aku nei kakou e hoea i ka la hooili kaua kuokoa [la koho balota] oiai hoi, he eha wale no malama i koe, a hiki mai ua la nui hooweliweli la, oia hoi ka la e ike ia ai ke kanaka, he hoopono a he kuokoa, a he hoopili meaai ole hoi mamuli o na haku hana, na konohiki aina, a pela wale aku.

            Hawii no Hawaii, i hookahi puuwai, hookahi pana ana, hookahi hoi ma ka hana, a e apo hoi kakou ia kakou iho iloko o ka lokahi, oia auanei ka moto e loaa ai ia kakou ka lanakila i keia kau ae e hiki mai ana, e kapae aku i na manao lili pilikino, na hookuee ana, a me na epa wale ana o kela a me keia ano.

            E hele kakou a pau maluna o ke alanui pololei o ke kaulike, aole hoi maluna o ke ala o ka holokee, aka, maluna no ia o ke kuhikuhi ana a kou lunaikehala ponol iho, me ka hookikina ole ia mai e hai, oiai oia keu mana kaokoa a ke Akua i haawi mai ai.

            Eia ka aoao o ka poe waiwai, ke ake nei e lanakila lakou maluna ou e ke kanaka ilihune, i keia kau ae e hiki mai ana, a e hoolilo hoi ia kakou a pau i puu opala, i mea puhi wale ia e ka makani, a lilo i mea ole.

            He mea oiaio, ma ka waiwai a me ka hanohano, ua lanakila lakou, a ua hauoli hoi, aka, ma ka puniu, ua like wale no kakou a pau, ua hiki hoi i ka puniu ke hoopuhili ia i ua poe la, a lilo i mea ole, ina nae kakou a pau e lokahi ana, oiai hoi, o ka lokahi, oia ka ikaika, o ka mokuahana ana, oia ka poino, a oia ke kumu hoopilikia.

            Nolaila, e na hoa makaainana, mai Hawaii a Kauai, ka poe hoi i loaa na apono ana ma ke kanawai, no ke koho ana i na lunamakaainana a me na lii.

            E koho me ka manao aloha io ia iho, a me kou mea nana i hana, kou makuakane, kou makuahine, kau mau keiki, a me kou ohana.

 

            Ke hoike ia aku nei ka lohe i na poe lawe pepa a pau a Mr. Palao, ua hoopau ia kona lawe ana i ka nupepa "Ka Leo," a ua oki ia aku kona inoa mai na luna aku no keia pepa; nolaila, o ka poe i aie i keia pepa, e oluolu e hookaa mai ma keia keena. Ma ke Kauoha.

 

NUHOU KULOKO.

 

            E na Luna Lawe Pepa o ka LEO O KA LAHUI, ke hai ia aku nei ka lohe ia oukou, ina he mau helu koe o ka la 3 o Augate nei, oia hoi ka Poakahi mua, alaila e pono e hoi hoi mai i keia keena.

 

            Ke kauoha ia aku nei na iuna lawe nupepa a wau o KA LEO, e hoihoi mai i na pepa o ka la 11, 14, 15, 16, 17 o Sept. nei, ina he mau helu koe o keia mau la ia oukou. Ma ke Kauoha.

 

            He 80 ka nui o na ohua a ka mokuahi Aureteralia i lawe aku ai mai keia awa aku, i ka Poalua iho nei.

            Ua hoopaiia o James Powell he $10 a me na koina, no ka holonui i kona kaa a oi aku mamua o ke kanawai.

            Hauma-u ke kakahiaka o ka la inehinei, hu'ihu'i maikai nae ka makani, oluolu maikai ke kamahele, aole hoi e kikiao pau wale.

            He mau kulu pakaua eloelo ko ka po onehinei, e ole nae hoi ia, palekana ai na maka mai na huna lepo mai e kuehu ia ana e ka makani.

            Ua loaa ka wai o ka lua wai aniani o ke aupuni i eli ia iho nei e McCandless ma. He 805 kapuai ka hohonu o ka eli ia ana iho a loaa ka wai, a ke pipii nei me ka maikai.

            Ua hoike ae na kauka Pekekona a me Oliwa imua o ka lunakanawai o ka aha hoomalu me ka laua ike, ua lilo i'o no o Mr. D. Laiana i ka ma'i pupule, a ua hoihoi ia aku no ka halema'i pupule e lapaau ia'i.

            Maikai no hoi ka Aha Mele ma ka luakini o Kaumakapili i ka po Poalua nei; aka, o kela mau huaolelo moakaka nae e kau pono mai ana "Ua Laa ia Iehova." He okoa loa na mele i mele ia, aole hoi i ka Mea nona ka hale.

 

Haule! Haule!

$5.00 Makana $5.00 Makana.

            E HAAWI ia no keia uku makana i ka mea e hoihei mai ana i kekahi pale-noho ili noho paniolo i haule i ka piina ana mai o ka Nuku o Nuuanu. E hoihoi ia mai ma keia Keena ke loaa. 286 1w.

 

LEI PU-PU! LEI PU-PU!!

            Ua makemake ka Hui o Haka ma, i 100 Le-i Pu-pu i hakuia, mai ka elua a ekolu papa o ka lei hookahi. Ina o ka poe e loaa ana o keia mau lei, e hoike ae ia

            HAKA MA.

Hale Aiwaihau, alanui Hotele.

Sept. 23, 1891. 286-d3ts.

 

            I keia la ua hookohu ia kau o W. Von Gravemeyer Esq., i hoa no ka Papa Alanui o Hana, Mokupuni o Maui, ma kahi o P. M. Rooney i waiho mai.

            Eia na hoa o ua Papa la:

            DAVID CENTER—Luna Hoomalu.

            OSCAR

            W. VON. GRAVEMEYER.

            C. N. SPENCER.

            Kuhina Kalaiaina.

Keena Kalaiaina, Aug. 28, 1891. 3ts-d.

 

KALOA & WAINEE.

NA KAMANA HUI KUKULU HALE.

(Me ka uku haaha.)

            O na kauoha mai na mokupuni mai, e hoauna pololei mai i na mea no laua na inoa maluna ae, a e loaa no maua i kela Hale Hou ma ke kihi o na Alanui Nuuanu me Kukui ma Honolulu.

            S. K. Kaloa. & Geo. Wainee.

w-4ts Sept 11, 1891.

 

OLELO HOOLAHA.

            E ike auanei na kanaka a pau, eia ma ka pa aupuni o Makiki nei kekahi mau pipi hele hewa. 1, pipi keiki k eleele, aole kuni, O oki loihi mawaena o na pepeiao elua. 2, pipi keiki w ulaula, aole kuni, O oki loihi mawaena o na pepeiao elua. 3, pipi w ulaula kua keokeo, keokeo ka opu, hao kuni BS ak hope, hao kuni ano e uha mua ak, hao kuni ano e uha hope hema. 4, pipi w ulaula, keokeo ka lae, hao kuni BS ak hope, hao kuni ano e uha mua ak, hao kuni ano e uha hope hema. 5, pipi w keokeo, kikokiko eleele ma ka a-i, pela na wawae, hao kuni BS ak hope, hao kuni ano e uha ak. hao kuni ano e uha hope hema, elua oki malalo o ka pepeiao ak, ka hema. 6, pipi keiki k ulaula, hao kuni BS hope ak. 7, pipi keiki k puakea, haokuni BS hope ak. O ka mea a mau mea nana keia mau pipi e kii koke mai o hala na la he 15, e kuai kudala aku no au, ke hiki aku i ka la 3 o Okatoba 1891, hora 12 awakea Poaono.

            D. Kaoao.

Sept. 18. 283d3t. Luna Pa Aupuni.

 

Kauka Yong Kam Pung.

(APANA.)

Helu 53, Alanui Maunakea.

Ke Kauka Loea o ka

Aina Pua!

Ua hiki ke hoola ia kela a me keia ano ma'i, mai ko na kane, wahine a me na keiki liilii. O na ma'i ha-no ua hiki loa ia ke hoola ia me ka maalahi. A o na ma'i e pili ana i ka maka pau pu ia i ke ola. Ke hoike ia aku nei, eia ke ola ia nei, me ka oluolu pu o kahi auhau. Ka poe pilikia hanau keiki a hele nui paha o ke koko, a paa a lohi paha ka hanau ana, paa paha o ka waiu, e hele nui mai i o'u nei.

            E KIPA mai e ka poe i hooluuluu ia me na haawina pilihua a ka ma'i, a na'u oukou e hooluolu aku.

            KAUKA YONG KAM PUNG.

Honolulu Sept. 2, 1891. 272-d3m*

 

I KA LEHULEHU HAWII

            Ke hooiaio aku nei ka mea nona ka inoa malalo, ua hoolaia ka'u wahine mai ka pilikia hoomailo a ka ma'i kokopaa, ka'u keiki elua makahiki hoi mai ka aneane loa ana e make i ka ma'i emi pu wale no o ke kino, oia hoi ka pilikia ai maloko o ke kino. Mai ke ola ana o ka ma'i a hiki i keia la, aole i hoea hou mai na pilihua o ia ano. Ke kono nei au i na makamaka Hawaii o'u e hele ae ia Kauka Apana (Yong Kam Pung) a e loaa no ka maha. Mai kanalua ma na ano elua—oia ka oluolu o na pilikia ma'i a me ka haahaa o na auhau ana. Me ka oiaio,

            P. M. AEA.

 

KUAI HOOPAU NUI.

Mai keia manawa aku a hiki i ko Makou hoonee ana aku iloko o ko makou

HALEKUAI HOU

            Ma ke Alanui Papu,—(NA HALE BURUA.

E hoolilo aku ana Makou i ko Makou waiwai a pau o na ano Lole:

NA LOLE NANI,

NA LOLE I HUMUIA,

KAPU A ME PAPALE

PAHU LOLE, a pela aku

No na Uku Hooemi Loa Nae.

            Egan & Gunn.

ALANUI MOI kokoke i ke ALANUI PAPU. tf—d.

 

Poino i ka Wai!

POINO I KA WAI!

            E hoomaka ana keia mawaena o keia la a me ka Poalua a hiki mai o keia pule ae, me ka nana ole ia o na lilo.

            N. S. SACHS.

263-dtf. Honolulu.

 

HOOLAHA HOU

B. F. Ehlers & Co—PAINAPA.

HELU 99 Alanui Papu.

            IA OUKOU E NA MAKAMAKA A ME NA HOALOHA, OIAI HOI, UA makaukau makou i ke kuai hoopoho aku i na lole o na Wahine, Kane a me na Kamalii, oiai, e hoi mai ana o B. F. EHLERS me na lole hou ma kela moku mai a oia ke kumu o ko makou kuai hoopoho ana, i kaawale ai na wahi no na LOLE HOU.

            E kipa mai e na makamaka, i hoopau ia ai ko oukou kanalua no ka makou kuai hoopoho aku ia oukou. Owau me ka oiaio,

tf B. F. EHLERS & CO.