Ka Leo o ka Lahui, Volume II, Number 293, 2 October 1891 — Page 3

KA LEO O KA LAHUI.

"E Mau ke Ea o ka Aina i ka Pono."

 

He Moolelo Nanea.

NO

De Atanani.

 

Ke Koa o ka Lio Olohe,

A I OLE

NAKIAIEKOLU O FARANI.

 

            Me keia mau kukai olelo pokole ana a ua mau kanaka koa la, haale le iho la ke koa opio i ka halealii o Bakinehama no ke awa kumoku, iloko o ko laua mau puili aloha ana lulu lima.

            Ua hoea aku ua koa opio nei o ka lio olohe no ke awa kumoku, a haawi aku la i ka palapala pasepota i ke kapena o ka moku kialua Seneda e like me na kuhikuhi ana mai a ke Duke iaia.

            Mahope iho o ka nana ana a ke kapena i ka palapala pasepota, haawi ae la oia i ke kauoha i kona mau kanaka, no ka huki ana ae i na pe’a a me ka heleuma, no ko lakou haalele ana iho ia Enelani no Sana Valeri.

            Aia i keia wa o ka moku o Atanani i haalele iho ai i ke awa, he 50 mau moku e ae e kali ana no ka loaa mai o ko lakou mau palapa la pasepota.

            Maluna o kekahi o ua mau moku la, e ku ana kekahi lede a ua koa la o ka lio olohe i hoomaopopo aku ai, o ka lede no ia ana i ike ai ma kahi kauhale o Muna, a nona hoi ka inoa a ua koa nei i lohe ai o ka Milede.

            Ua kaalo ae ka moku o ka opio me ka haaheo nui ma ka aoao o ke la poe, a no na hora pokole wale no haule hope aku la o Enelani, a eia lakou no ke kua ilikea o ke kowa o Dova e hele nei.

            Ma ka hora 9 o ke kakahiaka o kekahi la ae, ku aku la la lakou no kahi kahua hoolulu moku o Sana Valeri.

            Lele aku la ua koa opio la iuka a ma kekahi hoailona i haawi ia mai ai iaia e ke Duke o Bakinehama, ua hoolawa ia mai ia oia me kekahi lio, me ka ha’i pu ia mai o ka olelo iaia, e haalele iho oia no Balanagai a mai Balanagai no Nufe kakela.

            Ma keia mau kuhikuhi ana a ke kanaka o Sana Veleri, kau ae la ke koa opio maluna o ka lio me ka panai hope ana mai i keia mau hua olelo:

            E Mr. Keonimana, heaha la ko’u aie ie oe a’u e uku aku ai?

            Aole oe i aie ia’u no kekahi mea, o na mea a pau, ua pau mua no i ka hookaa e ia mamua, ano e hele ma kau huakai, a na ke Akua e hoopakele mai ia oe.

            Ua haawi mai ke koa opio i ke aloha i ke kanaka o Sana Valeri, alaila. Umoki iho la ia i kona mau seva ma ka aoao o kona lio no Nufe Kakela ka pahu hopu ma ke alahele aku o Balanagai.

            No ka hora hookahi, hoea aku la oia no Nufe kakela, a ua hoolako ia mai no hoi oia me ka lio e ke ka naka o Nufe kakela.

            Mamua ae o ka haalele ana iho o ua koa opio nei ia wahi, ua awala mua mai la ua kanaka nei me na ninau o ke kauoha:

            Heaha kou hua e komo ai iloko o Parisa?

            Hotele kiai, komopani o Desesarata, wahi a Atanani.

            A!  ua lawa, wahi a ke kanaka o Nufe kakele.

            Alaila, i ninau hou aku ai o Atanani, owai ka’u alahele e lawe ai ma keia huakai?

            O ke alahele o Ruena, wahi a ka pane; aka, ia oe e haalele iho ai i ke kulanakauhale nei, e haalele iho oe ma kou aoao akau, a ia oe e hoea aku ai ma kahi kauhale o Ese cuita, e hoomaha iki iho oe malaila.

            Malaila, e loaa hou no ia oe he hotele o Ecu de France kona inoa; a na kona ona ao auanei e hoolako mai ia oe me ka lio.

            O ka huaolelo pasepota mua no paha?

            Ae!

            Alaila, e aloha auanei e ka haku hotele.

            Ae, a e ukali ia nae kau huakai me ka palekana wahi a ka ona hotele i panai mai ai.

            E like me ke kuhikuhi ana a ke kanaka o Nufe kakela. Pela ua koa opio nei i lawe ae ai me ka puahi nei.

            A ma Esacuita, ua hoolako hou ia mai la oia me ka lio, a hoomau hou aku la oia i kona alahele no Po netoisa.

            Ma keia wahi i hoolawa hope ia mai ai oia me ka li@, no ka panina hope loa o kana huakai puahi o ka hoomaha ole, a ma ka hora 9 o ua po nei, aia oia e puahiohio ana ma ka pa o ka hale kakela o ka haku Terevila.

            Ae e ka mea heluhelu, ua hoea aku ua koa opio nei no ke kakela o ka haku kapena Terevila, nona ku loa mai Sana Valeri mai aneane e 60 legue iloko o 12 wale no hora.

            Ua apo ia mai ua koa opio nei e ke kapena me na lulu lima ana o ke aloha pumehana, alaila, hoolauna mua loa ae la laua ma ka pane ana mai o ke kapena i keia mau olelo:

            O kou puali ke ku kiai ana i ka halealii Louvre i keia po, nolaila, e hoomakaukau oe nou iho a hele aku no ke kahua iloko o ka puali.

            O keia lono i loaa mai la i ua koa opio nei, oia ka ua koa opio nei i haalele koke iho ai i ke kakela o ua kapena nei.

Aole i pau.

 

KALOA & WAINEE.

NA KAMANA HUI KUKULU HALE.

(Me ka uku haaha.)

            O na kauoha mai na mokupuni mai, e hoauna pololei mai i na mea no laua na inoa maluna ae a e loaa no maua i kela Hale Hou ma ke kihi o na Alanui Nuuanu me Kukui ma Honolulu.

            S. K. Kaloa. & Geo. Wainee. W-4ts Sept 11, 1891.

 

OLELO HOOLAHA.

            E ike auanei na kanaka a pau, eia ma ka pa aupuni a Makiki nei kekahi mau pipi hele hewa.  1; pipi keiki ke leele, aole kuni, O oki loihi mawaena o na pepeiao elue.  2, pipi keiki w ulaula, aole kuni, O oki loihi mawaena o na pepeiao elua.  3, pipi w ulaula kua keokeo, keokeo ka opu, hao kuni BS ak hope, hao kuni ano e uha mua ak, hao kuni ano e uha hope hema.  4, pipi w ulaula, keokeo ka lae, hao kuni BS ak hope, hao kuni ano e uha mua ak, hao kuni ano e uha hope hema.  5, pipi w keokeo, kikokiko eleele ma ka a-i, pela na wawae, hao kuni BS ak hope hao kuni ano e uha ak hao kuni ‘ano e ulia hope hema, elua oki malalo o ka pepeiao ak, ka hema.  6, pipi keiki k ulaula, hao kuni BS hope ak.  7, pipi keiki k puakea, haokuni BS hope ak.  O ka mea a mau mea nana keia mau pipi e kii koke mai o hala na la he 15, e kuai kudala aku no au, ke hiki aku i ka la 3 o Okatoba 1891, hora 12 awakea Poaono.

D. Kaoao.

Sept. 18. 283d3t.  Luna Pa Aupuni.

 

Kauka Yong Kam Pung.

(APANA)

 

Helu 53, Alanui Maunakea.

Ke Kauka Loea o ka Aina Pua!

 

Ua hiki ke hoola ia kela a me keia ano ma’i, mai ko na kane, wahine a me na keiki liilii.  O na ma’i ha-no ua hiki loa ia ke hoola ia me ka maalahi.  A o na ma’i e pili ana i ka maka pau pu ia i ke ola.  Ke hoike ia aku nei.  Eia ke ola ia nei, me ka oluolu pu o kahi auhau.  Ka poe pilikia hanau keiki a hele nui paha o ke koko, a paa a lohi paha ka hanau ana, paa paha o ka waiu, e hele nui mai i o’u nei.  E KIPA mai e ka poe i hooluu luu ia me na haawina pilihua a ka ma’i, a na’u oukou e hooluolu aku.

KAUKA YONG KAM PUNG.

Honolulu Sept. 2, 1891.  272-d3m

 

I KA LEHULEHU HAWII

Ke hooiaio aku nei ka mea nona ka inoa malalo, ua hoolaia ka’u wahine mai ka pilikia hoomailo a ka ma’i kokopaa, ka’u keiki elua makahiki hoi mai ka aneane loa ana e make i ka ma’i emi pu wale no o ke kino, oia hoi ka pilikia ai maloko o ke kino.  Mai ke ola ana o ka ma’i a hiki i keia la, aole i hoea hou mai na pilihua o ia ano.  Ke kono nei au i na makamaka Hawaii o’u e hele ae ia Kauka Apana (Yong Kam Pung) a e loaa no ka maha.  Mai kanalua ma na ano elua-oia ka oluolu o na pilikia ma’i a me ka haahaa o na auhau ana.

Me ka oiaio,

P. M. AEA.

 

KUAI HOOPAU NUI.

 

Mai keia manawa aku a hiki i ko Makou hoonee ana aku iloko o ko makou

 

HALEKUAI HOU

 

Ma ke Alanui Papu, - (NA HALE BURUA.

E hoolilo aku ana Makou i ko Makou waiwai a pau o na ano Lole:

 

NA LOLE NANI,

NA LOLE I HUMUIA.

KAPU A ME PAPALE

PAHU LOLE. A pela aku

 

No na Uku Hooemi Loa Nao.

Egan & Gunn.

ALANUI MOI kokoke i ke ALANUI PAPU.  tf-d.

 

Poino i ka Wai!

POINO I KA WAI:

            E hoomaka ana keia mawaena o keia la a me ka Poalua a hiki mai o keia pule ae me ka nana ole ia o na lilo.

N. S. SACHS.

263-dtf.  Honolulu.

 

HOOLAHA HOU

 

B. F. Ehlers & Co – PAINAPA

 

HELU 99 Alanul Papu.

            IA OUKOU E NA MAKAMAKA A ME NA HOALOHA, OIAI HOI, UA makaukau makou i ke kuai hoopoho aku i na lole o na Wahine, Kane a me na Kamalii, oiai, e hoi mai ana o B. F. EHLERS me na lole hou @@ keia mok@ mai a oia ke kumu o ko makou kuai hoopoho ana, i kaawale ai @a wahi no na LOLE HOU.

            E kipa mai e na makamaka, i hoopau ia ai ko oukou kanaloa no ka makou kuai hoopoho aku ia oukou. 

Owau me ka oiaio,

B. F. EHLERS & CO.