Ka Leo o ka Lahui, Volume II, Number 397, 25 February 1892 — Page 3
| This text was transcribed by: | Hartwig Hermann |
| This work is dedicated to: | to marti and nahua |
KA LEO O KA LAHUI.
"E Mau ke Ea o ka Aina i ka Pono."
Aka ua lanakila keia lahui ma o ka lokomaikai o ke Akua. Ua lohe ia ka uwe o ka hoopono, na kanaka kakaikahi i hoeha ia ka naau no na hana pakaha, hookiekie, a aloha ole a na haole misionari, poe waiwai, i kokuaia e ka Moiwahine ma o ke alakai a Kamuela Paka a me kona mau hoe Kuhina, a me ka Ilamuku, ka poe e alakai hewa nei, a e houluulu nei i ka lokomaikai a me ka hoomanawanui o ka lehulehu ma keia mau hana lima nui a hookae i ka leo o na makaainana a me ko lakou mau Kuleana.
---
HAUOLI.
---
Ke haawi hou ae nei makou i ka mahalo i ko ke Akua lokomaikai i ke alakai i ka naau o ka poe hou i komo mamuli o ka ka lahui koho ana ma na oihana. Ua hookohu aku la ka Papa Alonui ia Wm. Kamaki i Luna Alanui, a ano ua komo pu aku la o Wm. McGunn i kakauolelo. Ma ko makou hoomaopopo iho he mau Hawaii kupono keia. He mau kanaka kuokoa, aloha aina, aloha lahui, a hoopono, me ka makaukau i ka hana a me ka ike i ka malama buke helu. He uuku wale no keia wahi kanawai a Makuika i hana ai, e koho ia na Papa Alanui e ka lahui, aka, ua hiki nae ke ike ia iho, ke hele la ka pono a me ke kaulike e like me ka makemake o ka hapanui.
No ka maopopo o keia mau loina kalaiaina i na alakai o ka lahui, ka poe e ku ana malalo o ka welo ana o ka hae o ka hae o ka Aoao Lahui Hawaii Liberala, nona hoi ke kahua kumuhana i hiki ole ke ke ia e ka poe naaauao, a i aponoia e ke ai holookoa, - he pono a he ku maole no i ka hookele naauao ana ma o ka pono, ma o ka leo o ka lahui, ke kumu o ke aupuni, nolaila, no makou i paakiki ai e hana ia na hana a pau e pili ana i ka pono o ka lehulehu, ma ke koho ana, a no ia mea, he kupono loa e hoopau ia keia Kumukanawai hou e ku nei a e hana hou ia i Kumukanawai hou e hiki ai ke koho ia na luna aupuni maiuna o ka makaukau, he naauao me ka hoopono, e like me ke koho ana a ka lahui e noho ana iloko o na palena o keia aina ma ke ano ha kuonoono.
---
NU HOU KULOKO.
---
Ua pani ia na Keena Oihana Aupuni ma ka Poalua nei, no ka make ana o ka Bihopa Heremano.
---
O ka lio i hoolahaia ma ka Pa Aupuni o Makiki, na hewa ke kau ana o ka mahina, o Maraki ka pololei.
---
Ua hala aku no ka Aina Pua ka Banako Naue, kela opau pua @oe o ke ana o Omaha, a me kona mau hoohele.
---
E hiki mai ana ka mokuahí Zanabesi keia wahi ma ka la 1 o Maraki, a e holo loa aku no hoi no Vikolia, Koomolewa.
---
E haawi ana na sela o ka mokukaua Penesacola, he mau paani polea hope ana, ma ka Haie Mele Hou, i ke ahiahi Poaono.
---
Ua puehu ke kuikahi, aole o Peresidena Harisona i ae e kakau i kona inoa, a ua make loa kela moo deragona ulaula a na ona mahiko.
Aloha wale.
---
Eia mai ka kakou milimili me na onoono a Liua.
---
O ka hoolewa o ka Bihopa o Olba i nehinei, ua oi aku ka naui mamua o kekahi alii o Hawaii nei.
---
Ua oleia ai inehinei, ua lilo ke Keena Elele ia J. F. Bowler, ke paipuna i haule iho nei i ka holo ana he hoa no ka Papa Alanui, no elima tausani dala.
---
Ua kuhihewaia ke kaa hele wale me elua lio eleele iloko o ka huahoolewa o ka Bihopa i make, no ke Kuhina Paka, ma ke ano kaa-moi. Nui kela, eia ka no ke kama'lii Tahiti, Kapelekea.
---
Ma ke kakahiaka Poalua nei, ua hoolei puupuu ae o Kahanui (paahao) me kekahi mau luna paahao, mawaho iho o ka puka pa hoki ae nei o ke aupuni, aole i maopopo ke kumu o keia hana.
---
A wahi a ka nupepa P. C. Advertiser, heaha aku la koe e pono @ kakou - he hoohui aina wale no ke kaona keia o ka aoao o Horner ma e kolo aku la ma Hilo Akau, no ka noho lunamakaainana.
---
O ka poe a pau e makemake ana e loaa ka "Ipukukui Uwila", e kauoha mai i ke keena o Ka Leo o ka Oiaio , i ike ia na mea huna pohihihi, o uwea mai hoi kau a o ka uwila aku hoi ka makou, nui kela.
---
Ma ke kakahiaka o nehinei, makai ae o Kaumakapili, ua hanauia mai na kekahi wahine Iapana he keikikane, nona ka loa he 14 iniha a he 3 iniha ke anawaena o ke poo, na like kona waha me ko ke aloiloi ke ike iho. Hoehaa no hoi na hana a ke Akua.
---
Ma ke ku ana mai o ka moku mahu Australia, ua loaa mai la ke kauoha i ka mokukaua Penesacola, e huli hoi aku no ka pa kaua o Mele Ailana, a e pani ia kona wahi e ka mokukaua Kapalakiko iloko o keia Awa i ka la pule ae nei Feb. 28, a e lawe ana oia i na leta.
---
Ua loaa mai i ke Kapena W. Freeman o ka mokuahi Malulani, he kea hoohanohano mai ke aupuni mai o Amerika, no ke kokua ana i na kanaka o ka moku pauahi Keoni P. West.
---
Kahea mai la o Sam ia Lala, E, auhea oe? Eia no. "Ua haule kakakou i keia la, koe nae ka Banako a Akiona. Laki kakou inehinei i i ke Kanapi." Ua lanakila ka poe mahope o "Kalakeokeo" i keia la. Pakalaki maoli ka hoi. Ua pau loa o mea i ke chefa i keia wa, no ka haule ana mai nei o ke Kuikahi haawi aina, a me na keneta manuahi o ka paono Ko-paa.
---
HOOLAHA PA AUPUNI.
E ike auanei na kanaka a pau, eia ma ka Pa Aupuni o Ma@iki nei kekahi mau lio helehewa. Lio w eleele, keokeo loihi ma ka ihu, hao kuni Z E hope hema, poahiahi ka hao ma ka aoao akau o ka a-i
O ka mea a mau mea nona keia lio, e pono e kii koke mai, a ina e hala na la he 15, e kuai kudala aku no au ke hiki aku i ka la 6 o Maraki 1892, hora 12 o ke awakea Poaono.
D. KAOAO.
Luna Pa Aupuni.
Feb. 22, 3tsd.
---
HE HOOLAHA I KE AKEA.
E ike auanei na ano lahui a pau e noho ana ma ke Aupuni Hawaii, mai na kane, wahine, a me na keiki; i loaa i na ma'i o kela a me keia ano, e nane mai i ko'u Keena hana, a na'u e hoopau aku i na ehaeha a ka ma'i maluna o oukou e na makamaka, he hiki ia'u ke lapaau i na ano ma'i a pau, ma'i iloko o ka opu, hu'i ke kino, aki iloko o ka iwi, eha o ke poo, ma'iwahine a pela aku. Mai hoololohe aku e na hoa, hele mai hookahi, hele mai elua, hele mai no a pau loa; he oluolu ka auhau, ke hui me ia ma na kukai olelo ana; ua makaukau wau e polama mai i na kono ana mai mai na, Mokupuni mai, me ka eleu a me ka hikiwawe loa, he makamaka a he hoaloh@ maikai no oukou e na Hawaii.
Owou iho no,
DR. LEONG KENG PONG.
Helu 40, Huina o na alanui Kamika me Hotele, Honolulu, Oahu. Aug. 31, 1y
---
HOOLAHA HOU
E ALA, E ALA.
B. F. Ehlers & Co-PAINAPA
Helu 99 Alanui Papu.
MA KA HALEKUAI O PAINAPA I KEIA MANAWA, UA HOEMI HOU IHO MAKOU I NA KUMUKUAI O NA LOLE WAHINE, KANE, ME KO KAMALII, MA KE KUMUKUAI MAKEPOPO LOA, NO KA MEA HEWA PILIKIA KEIA, NOLAILA KE KUMU O KA HOEMI NAAUPO ANA: -
Na Palule @2.50 he @1.50 wale no, a o na Palule @1.50, he @1.00 wale na. Ke ike mai la oukou i ka emi loa ana.
Kupalanaha maoli keia emi naaupo ana e hele koke mai, o nele auanei oukou.
B. F. EHLERS & CO
---
Na Paikini Hou
Na Paikini Hou
O NA ANO A PAU, E KINIKOHU AI O KE ANO AHIAHI, E
LOAA NO MA KAHI -
Chas. Fishels,
KIHI O ALANUI PAPU A ME HOTELE,
Ko makou halekuai hoopau nui, ma o MR. CHAS. J. FISHELS la, he mau waiwai hou loa ko makou, i loaa mai nei mai ka hikina mai, o na ano like ole he @ wale. Eia ma i o makou halekuai nei na paa lole e linohau ai o na Keonimana, a luhiehu o na Lede, na aulii o na Kamalii -
Na KINAMU Na ALAPIA
Na KALAKOA Malina Na KIHEI Silika
NANAHE o na ano he nui A pela wale aku.
E huea pau ia aku ana keia mau waiwai a pau imua ou, aole hoi o oe wale o na Lede kekahi, pau pu aku hoi me na keiki, nau e wae nou iho i na ano @i a kou puuwai, eia ka papa lohi o Apua la, ke anapa nei ka wai liula i Mana.
E hele mai i hookahi, e hele mai no a pau loa, mai ke @ a ka liilii.
Chas. J. Fishels.
350-tfd. Halekuai alakai o na kumukuai haahaa loa.
---
NA SILIKA WAILIULA!
Na Silika Aulii o na Lede !!
---
E NA KEONIMANA A ME NA LEDE, E MAKAUKAU, EIA
ka nani ke alohi nei i ka Papalohi o Maukele; a ma he mau okeni kau, e kipa mai ma ka HALEKUAI o
S. N. SACHS,
Ke Alakai o na Kumukuai emi o keia Taona.
Honolulu, Alanui Papu, Helu 104.
E HOOKO IA no kou makemake ke kipa mai oe io makou nei. Eia na SILIKA pahee o na ano like ole, he 60 keneta wale no ke kumukuai o ka I-a. Eia hou no na SILIKA i Miloia me na lopi huluhulu o Inia Komohana, e loaa no ia oe ma ke kumukai haahaa loa, he 75 keneta malalo o ke kumukuai mua.
Eia hou mai: Na SILIKA Aulii o Inia Hikina, he aulii, a he milolii ke nana iho, a he 50 keneta ke emi malalo o ke kumukuai mau; a he helu ekahi hoi o ka nani ke ike iho. Aole hoi o ia wale, eia iho na HULUHIPA o na kahakahana like ole, a pau no e wae e like me kou makemake, he 50 keneta no ka I-a. Na KINAMU pahee, i milaia me na lopi lilina, he 50 a 75 keneta o ka I-a.
O na Ano Aahu Aulii a Pau,
O na ano like ole, eia la ua ku ke ahua. Na AI-KALA. he elua paa no 25 keneta; a e loaa no hoi ia oe he 5 paa no $1.00, e ke ano a ka iini e lia ai. Eia hou na A-IKALA Aulii o Carolina Hema, i loaa mailoko mai o na lopi aulii o Marina, a i hanaia hoi me ka mikioi, he 15 keneta a hiki i ke 35 keneta.
Na SILIKA WAILIULA, he 35 a ke 50 keneta o ka I-a, he mau mea hou wale no. Na VELEVETA nani lua ole, he Omaomao, he Hauliuli, he Kalina, he Keokeo, he Haulaula.
Eia hoi na PAPALE hulu nani he lehulehu wale, e hoohuolu ai o na Lede maka onaona; na aulii hoi o no kama a kakou, eia ke alohi mai nei na papale like ole o na ano he lehulehu wale.
Na Palemai kane o luna, o na ano a pau, he 50 cts. o ka PALEMAI
a o ka oi loa aku i ko na wahi e ae.
Na PALEMAI wawae, o na ano a pau, na Palemai wawae huluhulu Canton, no 50 cts.; na Palemai wawae Jean mai ke 50 ahiki i ke 75 cts. o ka mea hookahi.
Na KAKINI o na kane, o na ano a pau, i loaa ole ma na wahi e ae, ke kuai nei makou he 2 paa no 25 cts.; aka, e hele mai a ike kumaka nou iho ke kuai nei makou he 5 paa no $1.00 he makepono loa.
Na Papale mauu o na kane, na Papale mauu o na kamalii, a me na Papale hulu o na ano a pau.
Na Paiki ili pahee e kohu ai ka huakai hele, a me na Eke paa lima a na Lede e hoomahie ai. A ina he makemake kou e ike i ka oiaio o ka makou, e kipa mai e ikemaka, oiai ke hoemi nei makou i ke kumukuai o keia mau waiwai, i loaa ke kowa kaawale no na waiwai hou e hoahu aku ai.
E na hoaloha, e kipa, e ike kumaka i ka nani o Aipo, he ole ka lohe pepeiao.
---: N. S. SACHS :---
373-dtf. 104 Alanui Paupu, Honolulu.
---
HOOLAHA NO KA MANAWA.
---
EGAN A & GUNN.
ALANUI PAPU, Na Hale Hou o BURUA MA, Helu 100.
MA A MAHOPE AKU O KA LA EKAHI O APERILA, E HOOKELE
ANA MAKOU I KA MAKOU I KA MAKOU KUAI A NA MA KE DALA KU IKE WALE NO.
Ua makemake makou e hookaa ia na bila e aie nei ia makou ma ia wa.
E hoomau ia aku no ko makou, kuai hoopau ana a hiki i ka la mua
o Aperila.
I loaa ai hoi he kowa kupono no na WAIWAI HOU o kela ano keia
ano he nui loa, i kupono hoi no ke
Kau e linohau ai:
---
Na Mikilima aulii,
Na Ribine hoohuelo,
Na Lei-a i, na Silika pahee,
Na Paa Lole Huluhulu pahee o na ano like ole,
Na Kasimea o na ano a pau,
Na Paku nanahe no na moe e hoopulelo ai,
Na pale puka-aniani a me na pale puka komo, e kinikohu ai ke nana aku.
Na Paa lole hoopumehana o na kama a kakou, hui pu hoi me ka panio
o na papale.
Na Papale Kapu,
Na Papale hulu,
Na Eke paa lima,
Na Paiki ili palua i kupono no ka holomoku,
Na A'ikala o na ano a pau,
Na Kakini hoopumehana, o na ano ho nui,
A PELA AKU, A PELA AKU.
HELE MAI HOOKAHI, HELE MAI ELUA, HELE MAI NO A
PAU LOA. E WAE OE NOU IHO, A KU I KE KOIIKOI,
ALAILA HIU AE, LAWE NO A LILO.
E hele mai e ike i nakuai hoohaule nui ana a makou e kukala @ aku nei i ke akea:
EGAN A ME GUNN:
ALANUI PAPU, HELU 100. 385-3wd.