Ka Leo o ka Lahui, Volume II, Number 614, 30 December 1892 — Page 2
| This text was transcribed by: | Iasona Ellinwood |
| This work is dedicated to: | Nā hanauna e hiki mai ana |
KA LEO O KA LAHUI.
"E Mau ke Ea o ka Aina i ka Pono."
MA KE KAUOHA.
Ua hookohuia o Mr. Z. P. Kalokuokamaile, i keia la i Noteri no ka Lehulehu no ka Apana Hookolokolo Kaapuni Ekolu o ke Aupuni.
G. N. WILCOX,
Kuhina Kalaiaina.
Keena Kalaiaina, Dec. 19, 1892.
dec22 3tsd.
Ua hookohuia o Mr. Wm. H. Lowell a me Mr. Awa, i keia la, i mau Komisina o na Pa no ka Apana o Koolaupoko, Mokupuni o Oahu.
Eia me keia iho ka Papa
G. Barenaba,
Wm. H. Lowell,
Awa.
G. N. WILCOX,
Kuhina Kalaiaina.
Keena Kalaiaina, Dec. 19, 1892.
dec22 3tsd.
KUAI O KA AINA AUPUNI I KAPAIA O LAULA, KONA AKAU, HAWAII.
Ma ka Poalua, Iulai 10, 1893, ma ka hora 12 awakea, ma ke alo o ka Hale Aliiolani, e kuai kudala ia ai ka aina aupuni o "Laula" ma Holualoa Elua, Kona Akau, Hawaii, nona ka ili o 38 2-10 eka oi iki aku a emi iki mai paha.
UKU HOOKUMU. $ 100.
G. N. WILCOX.
Kuhina Kalaiaina.
Keena Kalaiaina Dec. 12, 1892.
dec13 3ts.
I kulike ai me ka Pauku 2 o ka Mokuna XXXV o na Kanawai o 1888, ua hookohu au i keia la ia Mr. Aarona, i Luna Pa Aupuni no ka Pa Aupuni ma Makanalua, Ka@ Mai Lepera, Molokai.
G. N. WILCOX,
Kuhina Kalaiaina.
Keena Kalaiaina, Dec. 5, 1892.
dec12 3ts
I kulike ai me ka Pauku 1 o ka Mokuna XXXV o na Kanawai o 1888, ua hookaawale au i kekahi pa no ka hoopaa ana i na holoholona helehewa ma ke Kahua Mai Lepera, Molokai, maluna o kekahi apana e waiho kokoke la i ka Ilina Kupapau o Makanalua, Molokai.
G. N. WILCOX.
Kuhina Kalaiaina.
Keena Kalaiaina, Dec. 5, 1892.
dec12 3ts.
Ua hookohuia o Chas. T. Gulick i Komisina o na Palapala Hoopaa no ka Paeaina Hawaii ma kahi o Jonathan Austin i make.
G. N. WILCOX,
Kuhina Kalaiaina.
Keena Kalaiaina Dec. 8, 1892.
dec12 3ts.
I keia la, ua hookohuia aku o J. Kamalenui, i hoa no ka Papa Alanui no ka Apana Koho o Waimea, Mokupuni o Kauai, i panihakahaka ma kahi o G. W. Malama i waiho mai.
G. N. WILCOX,
Kuhina Kalaiaina.
dec5 3tsd.
O ka poe apau he mau hao kuni ko lakau, e paa nei ma ka buke Aupuni, i ku i ke kanawai, ke kauoha io aku nei lakou, e hele a e ma ke Keena o ke Kuhiua kalaiaina, mai keia manawa aku, a hiki i ka la 1 o Iulai 1893, a ma na mokupuni eae, ma ke Keena o ka Makai Nui, no ke kope hou ana i na inoa.
G. N. WILCOX,
Kuhina Kalaiaina.
Keena Kalaiaina. Dec. 2, 1892.
dec5 3tsd-dly.
I keia la, ua hookohu ia aku o Mr. Iyon K Kakani, i Luna Pa Aupuni, no ka Pa Aupuni o Hana, Mokupuni o Maui i hope no C. Pololu, i waiho mai.
G. N. Wilcox,
Kuhina Kalaiaina
Keena Kalaiaina, Nov. 30, 1892.
dec5 3ts-dly.
I keia la, ua hookohu ia aku o S. W. Kekuewa Esq i Notari no ka lehulehu, no ka Mahele Ekolu o ke Aupuni Hawaii.
G. N. Wilcox.
Kuhina Kalaiaina
Keena Kalaiaina, Nov. 30, 1892.
dec5 3ts-dly.
I keia la, ua hookhu ia aku o Mr. MosesP apaiakea, i Luna Pa Aupuni, no ka Pa Aupuni o Huelo, Mokupuni o Maui, i hope no K. Honokaupu i waiho mai.
G. N. Wilcox.
Kuhina Kalaiaina.
Keena Kalaiaina, Nov. 30. 1892.
dec5 3ts-dly.
I keia la, ua hookohu ia aku o William E. Rowell, i Luna Nui no na Hana Hou, he hope ma kahi o Henry W. McIntosh i make.
G. N. WILCOX,
Kuhina Kalaiaina.
Keena Kalaiaina, Dec. 1, 1892.
dec2 3tsd.
Oiai ua haalele mai ka hapanui o ka Papa Luna Nana Koho Balota, no ka Mahele Ekolu, Apana o Hilo Hema, a oiai ua haiki ka manawa e hoopiha ai i ua hakahaka la, a e hooko ai i ka manao o ke kanawai mamua ae o ka la 29 o Novemaba, ka la i kuahaua ia e malama ia ana ke koho balota kuikawa ana no ka Lunamakaainana iloko o ia Apana, ke hoolaha ia aku nei ma keia ua hoopau ia ka olelo kuahaua i hoolaha ia aku mai keia Oihana aku malalo o ka la 4 Novemaba, 1892.
G. N. WILCOX,
Kuhina Kalaiaina.
Keena Kalaiaina. Nov, 21. 1892
nov21 3ts.
Mamuli o ke kaa ana o ka la 25 o Dekemaba, 1892, a me Ianuari 1 1893 i ka Lakapule, nolaila, o ka Poakahi Dekemaba la 26 1892, a me Ianuari 2, 1893, e malama ia ana ia mau la i mau la kulai aupuni. A o na Keena Oihana Aupuni o ke Aupuni, e pani ia no.
G. N. WILCOX
Kuhina Kalaiaina
Keena Kalaiaina.
Honolulu. Dec. 9, 1892. 3ts-dly.
I keia la, ua hookohuia aku o Keoki Kimokeo i hoa no ka Papa Alanui, no ka Apana Koho o Kau. Mokupuni o Hawaii, i panihakahaka ma kahi o G. W. Kaholokahiki i waiho mai.
G. N. WILCOX,
Kuhina Kalaiaina.
Keena Kalaiaina, Nov. 30, 1892.
dec5 3tsd.
KA LEO O KA LAHUI.
JNO. E. BUSH.
Lunahooponopono a me Puuku.
POALIMA, DEKEMABA 30, 1892.
HALAWAI MAKAAINANA NUI.
E malama ia ana he halawai makaainana nui i ke ahiahi Poalima, hora 7 p. m., ma ka Hale Paikau Kahiko.
Ua makemake ia na mea a pau e hele ae e lohe i ka leo o ka poe i aloha ia kakou Hawaii.
MA KE KAUOHA.
KA LA MAKAHIKI HOU.
I keia la, e hoopuka ia aku ai ka helu hope loa o keia makahiki o ka LEO O KA LAHUI, a e hoomaha iki hoi na keiki a ka hookumu ana o ka makahiki 1893. Ua elua makahiki a aneane me ka hapa ka hele mau ana aku o keia elele imua o ko oukou mau ipuka hale, e paa ana hoi ma kona kino i na momi e hanai ana i ke ola uhane o ke Kanaka, i ke alakai e ike ai oia i ka mea pono e hana ai, i ke alanui hoi e pono ai kona noho ana me ka ohana, e ola ai ke alii a e mau ai ke kuokoa o kona aina. Ua nui no na inea a makou i alo ai, i hoomanawanui ai, ma ka makou kalai ana, no ka pono o ka lahui, oiai makou ua lilo he enemi no ka poe e kue ana i ka mea e lawe ana i ka aoao o ka lahui
Aka, aole makou i kaniuhu i ko makou hoopii mau ia e na enemi no ko makou ala ana no ka aoao o ka lahui maluna o ke kumu hana i kukulu ia ma ka pono. He oiaio ua huli mai no na hoa, manao pono pilikino, a ua kue mai me ka hoino ia makou, aka, aole makou e hoomanao ana i ko lakou pouli, a me ko lakou kuhihewa a lawe ia mea, he kumu e hoomaau ai. Ua kilohi makou i ka makou mau mea i hana ai ma ka hana a me ka pono o ka lahui, a ua hoolilo makou i ka LEO O KA LAHUI a makou i kukulu a hoikaika hookahi ai, iloko o ka wanana a hoiloilo mau ia e make ana, me ka lana mau o ko makuo manao aole e make ana mamuli o ka hoino a me ke kuko a ka poe manao kekeue. Ua hala aku kekahi poe, ua pio kekahi mau nupepa i hoino a i hooiloilo mai e make ka LEO, aka eia no oia i keia la, e puana aku nei i kona ola maikai a me kona manaolana, e mau ana no kona lanakila iloko o na hoino ia no ka pono, a o kona ola hoi mai ka Makua mai no ia nana i hanai mai i ka manaolana mamuli o na manaoio i kana olelo, aole e nele ka hilinai aku ia ia. Eia ka LEO O KA LAHUI maluna oia kahua e ku nei, a ke kalokalo aku nei i na hoa e kuilima pu mai me ia, a me ia, ke noi nei makou i ke Akua e haawi mai ia kakou i keia makahiki hou i
KA HAUOLI MAKAHIKI HOU!
Aole i Kakauinoa ka Moi.
Ma ka la iho la inehinei, ua hoihoi mai ka Moi i ka bila 157A. me ke kakauinoa ole ia. Ma keia kakauinoa ole ana, ua haule hope ka manawa, a ua kue i ka pauku 48 o ke Kumukanawai. Ua hoike ae ka Loio Kuhina, oiai, ua hala na la he 10. Mamuli o keia, i na e hooholo ka elua hapakolu o na hoa o ka Hale kue i ka Mana Hooko, alaila, o ka Peresidena auanei o ka Ahaolelo, oia ka Mana Hooko elua nana e kakauinoa na kanawai i hoihoi hou ia mai i hala na la i kuhikuhiia malalo o keia Kumukanawai alunu mana a kaihi pomaikai o ka lahui Hawaii. O ka lua keia o na hoopahua ia ana o ka Mana Hooko e keia Kumukanawai; i ka 1888, o Kalakaua ka Moi, a o Kakela ka Moi-kui; i ka 1892 hoi, o Liliuokalani ka Moi, a o Walker ke Suletana. Hu no hoi ka aka i ke ano o na hooko ana a keia Kumukanawai.
AHAOLELO O 1892.
LA HANA 156.
Dec, 28, 1892.
Halawai ka hale elike me ka mau.
Na Palapala Hoopii.
Nawahi, he palapala hoopii mai Hilo mai, e noi ana, e hoomakaukau koke ia ke alanui e hiki ai ke loaa ke Kumukanawai Hou.
Palapala hoopii mai a Mr. Rose mai o Kaneohe, heluheluia a haawi ia ia J. E. Bush.
Komite mau.
Williams, ua pau i ke pai ia kekahi mau bila kanawai.
Na Olelo Hooholo.
Edmonds, olelo hooholo e noi ana e unuhi ia mai ka bila 91 e pili ana i ka oihana wai o Wailuku, i hana no ka Poaha, Dec.-29, pane ke Komite Hookolokolo, ua makaukau ka hoike, a e hoike mai ana lakou, hoihoi hou ia ka olelo hooholo.
Na Hana o ka La.
Bila 139, pauku 4, hana pau ole.
Pauku 4 kapae ia.
Pauku 50—7 holo.
Haawiia no ke kakakupoepoe, heluhelu ekolu ia i ka Poaha.
Bila 95, Kanawai Koho Elele, imua o ke Komite o ka Hale, A. Kauhi ma ka noho.
Noonooia ka bila imua o ke Komite o ka Hale, a hoopauia ke Komite, aole mea i hanaia.
Kamika, bila 91, no ka pono wai o Wailuku, waihoia a noonoo pu me ka bila.
Kuhina Waiwai he bila kanawai hou.
Hoopanee ka hale.
LA HANA 157.
Dec. 29, 1892.
Halawai ka Hale e like me ka mau
Hoike mai ke 'Lii Pua he 13 palapala hoopii i Kumukanawi Hou, 903 inoa, waihoia a noonoo pu me ka bila.
Na Olelo Hooholo.
Waipuilani, e noi ana e noho keia Hale i ka hora 7:30 o na ahiahi a pau, koe ka Poaono: aponoia.
Na hana o ka La.
Bila 95 imua o ke Komite o ka Hale, J. Nawahi ma ka noho.
Hoomaha ka hale.
Auina La.
J. Nawahi ma ka noho, noonoo ana no ke Kanawai Koho Elele.
Nui na kamailio ana o na hoa no keia kanawai.
Ninau ia ka apono ana i ka hoike a ka hapanui o ke Komite, a ua ike ia, he 21 e apono ana, a he 15 kue.
Hoopauia ke Komite, a hoike ia ka mea i hana ia, ma ke koho hou ana e apono a kue i ka bila, ua ike ia he 24 hoopanee loa i ka bila, a he 17 apono loa i ka bila, a he 9 i @huka, haalele noho, ma'i a pilikia paha; a eia iho ko lakou mau inoa malalo:
Eia ka poe kinai loa i ka bila:
Na Kuhina—Wilikoki, Robikana, Jones a me Kikila Baraunu; Na 'Lii Berger, Keoni Ina, Pikekona, Wiliama, Kauhane, J. M. Hona, Marsden, Iana, Ba auwina, Anderson, McBryde, Drier me Kanoa; na Lunamakaainana Waila, Kauhi, Kapahu, Iosepa me Kamika.
Ka poe aloha i ka lahui—Na 'Lii Pua, Keoni Kamaki, Maile, Hoapili, Cornwell: na Lunamakaainana Bipikane, Aki, Pua, Wilikoki, Buki Nawahi, Kaunamano, Kamauoha, Waipuilani, Nahinu, White a me Kanealii.