Ka Leo o ka Lahui, Volume II, Number 642, 15 February 1893 — HE WEHI NO LILIULANI. [ARTICLE]

HE WEHI NO LILIULANI.

He mele he inoa nou Liliu Kuu Haku Lani kau i ka hanohano Eia oe ke haaheo nei Me ka manao koa o ka wiwo ole A o oe ka'u e kaena ae Puuwai hao kila a o Hawaii. Ua hilinai mai ko Ihiihi I ke kono aloha a Kou lahui E noi ae nei i ka Mana Lani E hoi e noho i ko Kalaunu A e welo hou ko hae Kalaunu Ma ka puo'a kapu ou e Kalani Eia makou ke noho nei Me ka manaolana poina ole Malalo o ka leo ou e Kalani I hai mai ai me ka hopo ole E hoi oukou a manaolana Me ka malama hoi i ka maluhia Ua hooko ia hoi ia kauoha Ia leo hanohano Ou e Kalani Eia makou ke noho nei Me ka malie hoi me ka nahenahe Ke haliu ae nei makou I ka Mana Kahikolu maluna loa Nana e kakoo i Ko aupuni A hoi e noho i Ko Kalaunu E ola o Liliu a mau loa Hoi hou e noho i Ko Kalaunu Ka puana o ko wehi ua lono ia Sila ia i paa ko Aupuni. Hakuia e S. P. K. Kipuwai