Ka Leo o ka Lahui, Volume II, Number 645, 20 February 1893 — HE WEHI NO KA LAHUI [ARTICLE]

HE WEHI NO KA LAHUI

He inoa keia no ka Lahui Na ewe hanau o ka aina Na pua na mamo na oiwi A ka I a ka Mahi me ka Palena E ala e lohe i ka welina Ka'u kanaenae no Hawaii Lahui malama i ka maluhia Kupaa i ka pono o ke Kalaunu Palekaua ia o ka manaoio Aohe kolopa nana e une Na pali kapu a o Kilauea Ua paa i ke ahi a ka Wahine I ke aiwaiwa o ke ao nei Nana e hooni puni ka honua Ike ia Hawaii a he moku nui I ke o i ana iho paa i ka mole Keehi kulana i Ainaike Ike ia kaua he hoa kanaka Hookahi puuwai o ke aloha Kakoo i kou one hanau Kihapai ia no Edena Ua piha i ka ono me ke kuhinia Nawai e ole a e makahehi Na manu Aiko o Kahiki mai I ka ike i ka nani e ka hemolele Aina o ka meli me ka waiu E kahe ana ia me ke aliali Me he wai hau ala no Helemona Kona mau kuahiwi a he kilakila He molale i ka maka ke ike aku Ka makani kupa hoi a he aheahe Kona mau kapakai a he malie Na ulu laau a he uliuli O kona mau pua e popohe ana A he waianuhea kona aala E poina ole ai ke hoomanao Ka leo o na manu e hoene ana Mukiki ana i ka pua lehua Ahe nani hiehie kona hiona He nohea me he manu Nunu ala Ka opua ua hoi ua haaheo O ke anuenue e pipio ana O ka oi no ia i ka'u ike Aole ona lua e like ai Kaena ana au me ka haaheoo No kuu aina i hanau ai He momi i loaa mailuna mai A he lei kaimana no ka lahui E ola kakou a pau loa Ma ka inoa o ka Haku Mana Loa Haina e ka wehi i kaulana He mele lahui no Hawaii. Hakuia no ke aloha aina Mrss, Kekoalohiwaikalani, Puahaulani Hale. Honolulu, Feb. 10. 1893. [Mamuli o ka niniu poahi o na manamanalima oko makou mau keiki ulele hua, ua haule hookahi laina o ke mele "Ka Wehi o ka Lahui," i hoopukaia i Feberuari 16, nolaila, ke awiwi nei makou i ka hookomo hou ana; a hoopuka hou aku, i ole ai e lilo i mea e hookananuha a ino ko makou makamaka nana i hoouna mai ia Wehi o ka Lahui, a e kala mai ia makou no ia mea. Oka pololei loa keia. L. H.] Ma keia la paha e ku mai ai ka mokuahi China mai Kapalakiko mai, no Iapana ame Kina. E loaa mai ana he mau mea pili i na Komisina o kakou e noho la ma Wasinetona; aole paha e loaa hui mai ana ma ia moku.