Ka Leo o ka Lahui, Volume II, Number 665, 20 March 1893 — O ka Manao Lokahi, No ke Aloha Aina. Oia no ke Kahua o ka Leo o ka Lahui e ake nui nei e hookoia!!! [ARTICLE]

O ka Manao Lokahi,

No ke Aloha Aina.

Oia no ke Kahua o ka Leo o ka Lahui e ake nui nei e hookoia!!!

O ko makou manaoio maoli, oia no ka hoohui lokahi ia o na manao Aloha Aina o na puuwai Hawaii Aloha Aina oiaio a pau loa; Aole e kaupaleia aku, aole e hehikuia, aole no hoi e hookaeia kekahi, mai na ikaika hakoko ana aku maluna o ka ninau hoohui aina. Aole makou i nana i ke kulana hanohano a kiekie paha o kekahi kanaka, aole hoi i ka haahaa loa a me ka hune nele i na pono lako o keia noho ana o kekahi kanaka, alaila, hookaawale ae ia laua, ina nae he like a pa ia ana a ko laua mau puuwai, no ke aloha i ko laua aina; hoole i ka hoohui aina ana.

Aohe o makou manao e lilo keia i mea e like ole ai na manao me ko ka Hawaii Holomua; aka, aole nae he mea pono e kapaia mai makou, he poe i hana i kekahi hana i manao waleia na makou i hana, me ko makou wahi lihi launa ole aku iloko o ia manao. He oi aku ka palekana a me ke kuokoa, ina ka Hawaii Holomua i hoopuka inoa ae, alaila, ua ike makou i kahi i pili ai o kana olelo a me kahi i pili ole ai. He mau hoaloha na poe Hawaii a pau, a ua ike pono ka nupepa Holomua i ko KA LEO noho hamau ana no ke kulana pili kino o kela a me keia kanaka Hawaii ponoi o ka aina, koe wale no, ma kahi e alakai lalau ana i ka manao no ka pono o ka Lahui. Ke hoike aku nei KA LEO i kona manao ikaika maluna o ka ninau ano nui hookahi wale no, ka ninau e ike ia ai ko kakou aloha i ko kakou aina hanau ponoi, ka home hoi o na puuwai aloha aina oiaio. Aia mau makou i na wa a pau no ke kupaa i ke aloha aina, aole hookae, aole kaupale, aole hookelakela, aole hooioi, aole hukihuki, aoie paonioni, aole hoomauhala, aole hoomokuahana, aole hoopiliwale, he oIe loa no. O ka makou e ake nei, e hanaia a e hookoia, oia no ka hoomau ana i ke Kuokoa o Hawaii: Aia a pau ia ninau, alaila, hooponopono aku oukou i na manao liiiii pilikino a oukou. Ke maopopo mai la anei i ka Holomua keia manao? KA LEO O KA LAHUI.