Ka Leo o ka Lahui, Volume II, Number 686, 18 April 1893 — KA HAE AMERIKA. [ARTICLE]

KA HAE AMERIKA.

Ma ke kakahiaka Poaono nei, ua ike ia aku la kekahi Hae Amerika iluna o Puowaina e welo ana oia me ka hanohano nui, a o ka pou i kau ia ai, oia no kela apahu hao a ka poe Anaaina o ke Aupuni. I ka wa i ike ai ka lehulehu i keia mea kupanaha, ua nui na ninau ana, aka, aole he pane i loaa mai. I ka manawa i nee ae ai ka la e kokoke ana i ka hora 9 a oi, ua ike hou ia aku la aole ua Hae Amerika nei, a hapalua hora mahope iho, ua hoea mai la o Samuela K. Kaloa me ua Hae ala, a hoike mai la, o ka Hae keia iluna o Puowaina, a na'u i kii aku nei a huki ilalo.

Ua hoihoi aku oia i ua Hae ala a ke Keena o ka nupepa Hawaii Holomua. O ka loa o keia Hae, he 6 kapuai a o ka laula, aneane 3 kapuai, he Hae keia i humu maoli ia, a o ka ona ponoi nona keia Hae, aole i ike ia, owai la ia? Nui na mea hou o keia la, a nui no hoi ke pahaohao, aka, no ka Lahui Hawaii oiaio, aia no ia iloko o ke aheahe malie, me ka pi-o-o-ole. He malama mau no i ka maluhia ka ihiihi a me ke kapu o ke Aupuni alii o Hawaii. Nui ke aloha aina o na Hawaii oiaio.