Ka Leo o ka Lahui, Volume II, Number 695, 1 May 1893 — Page 2
This text was transcribed by: | Arnold Hori |
This work is dedicated to: | Bishop Museum; Herbarium Pacificum |
KA LEO O KA LAHUI.
"E Mau ke Ea o ka Aina i ka Pono."
KA LEO O KA LAHUI
JOHN E. BUSH,
Lunahooponopono a me Puuku.
POAKAHI MEI 1, 1893
OLELO HOOLAHA.
Eia ma ke Keena o KA LEO O KA LAHUI kekahi mau Buke Inoa o ka Hui Hawaii Aloha Aina. He wa kupono keia o na Hawaii Ponoi e hoike i ko lakou Makee Kuokoa, ko lakou Aloha Aina, a Aloha Kuokoa.
MA KE KAUOHA.
J. K. KAULIA.
Kakauolelo o ka H. H. Aloha Aina.
HE MANAO AKEA I KA
LAHUI.
Mamuli o ko ka Hon. John E. Bush hoi ana mai nei, ka Ona ponoi o na Nupepa KA OIAIO a me KA LEO O KA LAHUI; Nolaila. mai keia la aku, ua wahiho aku au i ko'u noho Lunahooponopono ana, a me ka noho Puuku ana no ia mau pepa; O na kauoha nupepa a pau loa. na kakau manao ana a me na hookaa dala ana, a pela aku, e hoouna pololei ia mai ma ko Hon. Jno. E. Bush inoa.
JOSEPH NAWAHI,
Honolulu, May 27, 1893.
Kahea Halawai Aha Ele
Nui.
Ua hooholoia e ka Aha Hooko o "Ka Hui Hawaii Aloha Aina" a na kane; o ka Poakahi la 1st. o Mei, M. H. 1893, e hiki mai ana, oia ka a e malama ia ai ka halawai nui a ka Aha Ele a ka Lahui ma Honolulu nei.
Ua makemake ia na Elele o kela a me keia Apana e hiki mai ma Honolulu nei, i ka manawa i hoike ia ae la maluna.
J. A. CUMMINS.
Peresidena Hanohano
JOS. NAWAHI.
Peresidena.
Honolulu Aperila 12 1892
He Mau Puuwai Aloha Aina.
O ke aloha oia ke kanawai hemolele. Ua mahele l@. keia kanawai malalo o elua ano nui. "E aloha i kou Akua me kou naau a pau, a o ka lua e aloha i kou hoalauna." Ma keia kakou e ike ai o ke kanaka i oho ia e ke aloha, he keiki oia na ke Akua, a pela eia e mau ai ma ia kulana, mamuli o ko ke Akua lokomaikai a hiki i kona lanakila loa ana. He nui na ana o ke aloha e pii ana ke aloha o ke kanaka mai kekahi anuu a kekahi anuu aku, a pela a hiki wale i ka palena kiekie o ka aloha, a oia maoli ke aloha oiaio, oia hoi ke aloha hemolele--o ka haawi ana o ke kanaka i kona ola, aole wale no kona hoalauna aka no kona enemi pu kekahi Ke aloha iho ola ia o ke Akua, ka mea haawi i kana Keiki hala ole no ka poe e kue aku ana no iaia. He aloha Akua keia aloha hemolele, a aia a like ko kakou hemolele me kona hemolele alaila loaa ia haawina piha ia kakou. Aka, he paakiki ka loaa ana o keia haawina nana -- ke aloha i hoomaikai aku i ka poe e hanaino mai ana i ka mei nona ke aloha i makaukau me kona ola e haawi no ka pono o ka poe i aloha ole iaia,
Malalo mai o ke aloha hemolele, he nui na ano aloha, aka he aloha kanaka wale no ia. He aloha i owili ia no ka pono o ke kino iho, a no kekahi ohana o ke kino paha, a no kekahi mea i pili, e loaa ai kekahi pomaikai. O ke aloha i ka lahui kanaka oia kekahi aloha nui malalo o ke aloha ana i ke Akua. He elua keia mau aloha, aloha i ke Akua ka mua. aloha i kanaka ka lua, a o ka hooko ana i ke aloha, oia no ka hooko ana i ke kanawai o ke Akua. ke kanakwai o ke aloha, ke a-na o ka hemolele, ke a-na e ike ia ai ko ke ola mau loa, a me ko ka make mau loa.
Ke aloha kanaka hoi, he piha ia i ke kapekepeke; he hakina; he kumukuai ke ano mau oia, aloha. Aka, he ike ia no nae ke aloha makamae o ke kanaka i kekahi manawa ma kana hana. Pela no hoi makou i hoohalike iho ai i ke aloha lokahi o na kanaka o keia lahui i ko lakou aina. Ua like no ia me ka hooko ana i ke aloha i na makua, oiai o ko kakou mau makua mai ka honua mai laua. "E hoomaikai i kou makuakane a me kou makuahine, i loihi ai kou mau la maluna o ka aina a Iehova kou Akua i haawi mai ai ia oe." Nolaila, ke mahalo nui nei makou i ka hoale ana a ka Uhane Hemolele i keia lahui e kukulu i na Hui Aloha Aina a puni ka aina, me ko lakou hoouna ana mai i na Elele mai na pea o ka aina e hui ma kahi hookahi e kuka no ka pono o ko lakou makua-honua,--ke one hanau !
KE LOLI NEI.
Ke loli nei ka ikena e na haole ona mahiko i ko lakou pomaikai ole ke ko ke kuikahi panailike a lakou i hoolale a hana kikoi aku nei me Amerika Huipuia. I ko makou hoomaopopo ana i keia mea mai kinohi mai, aole i ku ike ke kanalua iloko o makou, he pomaikai nui ko na kanaka a pau o keia aina ma ka hoohui aina.
E like me ka pilikia o ka noho ana o na kanaka o Kaleponi, no ka piha wale a oi aku o na kanaka maloko o ia mokuaina mamua o ke kupono,. he mea i ilihia iho ma ia mokuaina mamuli o na hana hooulumahiehie kumu ole a ka poe Waiwai Kalepa i na aina nui i kua mua e lakou, pela no e hoopiha ia mai ai o Hawaii nei a oi aku mamua o ke kupono. He mea maopopo e piha ana ka aina nei i ke unu a me na aea baukae o na aina e, a o ka hope aku, he uluaoa mau o ko kakou noho ana; he powa, he pepehi kanaka, he hahaki kanawai na lapuwale no a pau e ulu nna waena o ka poe aea wale a molo wa i ka hana, a e ake ana e noho haukae a e ai palaualelo e like me keia e ike ia nei, e hoohoihoi ia nei e keia mau la o ko kakou noho ana malalo o na hookele ana a ke aupuni noho manawa.
E HOOPAU IA ANA.
He nui ka manao ia e hoopau i na koa e ke Aupuni Noho Manawa. Ua oloka waha o ka Waihona o Opealu, i ka pauma malo ia e na koa o ke au i ka hewahewa. Ua ike ia ke aneane aku nei e loaa ka haawina i hookau ia maluna o na koa o Asuria, he hou hewa a he luku aku kekahi i kekahi Aka, aole nae i akaki ka oiaio o keia, oiai ke lole lua nei nei no na hookele.
KA POE HOOPAU IA.
Ma ke ano o na mea e hana ia nei ma Hawaii, he mea maopopo loa ke mau ke ano o ke aupuni ma ka lima o na haole e like me keia a kakou e noho nei, aole e pau ka makahiki. he kakaikahi ka Hawaii e noho oihana ana. Eia no ke au. puni noho'na manawa, aole i akaka kona kulana i keia wa, aka, ke hoopau mau ia nei na Hawaii a me na haole i like oe ka manao me ko ka poe e noho nei e malama i ka pono o ka lehulehu. Ma keia mau hiohiona ka lahui Hawaii e ike iho ai, he ano ole na olelo makani a na misionari a me na hoohui aina e ae e kaena nei he pono nui ko na Hawaii ke loli ke aupuni. Ina ua hoohae ia ka Hawaii i keia manawa, e oi loa aku ana ia ano hana ke kuene pono iho keia poe iluna o ka mana aupuni, Aka, aole kakou e hopohopo no ka hopena a no ka loaa ana ia kakou o ka pono a me ke kaulike ma ka hoihoi hou ia ana mai o ka pono a me ke aupuni kahiko e ko kakou makamaka, ke aupuni Amerika. I hakalia wale no ia mea, a pau pono aku ka hoike a ke Komisina Blount. Ehia mea aloha, o ka poe e kumakaia nei i ko lakou one hanau, e hoole ana i ko lakou lahui ko lakou kuokoa, no kahi apana barena i kiloi ia mai me he ilio la. Nui ka hilihila i ka poe Hawaii i paa i ka oihana o ke kumukuai iho la, ia o ka hoohiki e hoolilo i ko lakou aina, a e noho pio aku mahope o hai.
NA PILI A KA POE PILI
WAIWAI.
He nui ka poe i pili dala ma na aoao o na ninau e pili nei ia Hawaii--ka hoi hou o ka Moiwahine Liliuokalani, ka hoohui aina a hoohui ole paha. Mamua aku nei. he oi ae ka aoao o ka hoohui --aina; aka ke emi mai nei ia poe, a he ane pio loa aku koe. He hookahi a makou pili i lohe ai, he $5000 ma ka aoao, ua paa keia pili ma ka hoihoi hou ia o ke kulana mua, a o kekahi aoao hoi he hoole. Ua pili mai kekahi haele malihini i ku mai maluna o ka mokumahu Austeralia a hoi aku la, he Lunahooponopono nupepa oia no kekahi nupepa koikoi demokarata o Nu Ioka, a he hoa launa no ka Peresidena Cleveland. He mau pili e ae no kekahi, o ka noi nae keia he hookahi keia malihini, a he eha haole kamaaina maanei aku.
NUI NO KA HOOPUNIPUNI.
He like a like ka Hoopunipuni o na wahi nupepa hoohui aina; ma na mea e pili ana i ko Dr. Bowne kuka kamailio ana me ka Moiwahine Liliuokalani, e like no me na hoopunipuni e pili ana i na olelo mawaena o ke Komite Aloha Aina o na wahine a me ke Komisina Blount.
O na poe nona na kukai olelo ana, ua hoike mai lakou i ka epa a me ka wahahee lapuwlae loa o na mea i hoopuka ia e na nupepa ako hoohui aina.
Oia no ko lakou ano, he wahahee
MAHAOI HILAHILA OLE!!!
O na Iosepa ma o Hana. he mau
kanaka mahaoi hilahila ole !
Ua hoolaha ae nei laua, he wahi maunu e hoopaa iho ai i ka makau hoohui aina a lakou, i mea e apo koke aku ai ka Lahi Hawaii. O ua maunu ekaeka nei, oia no na Aina Lei Alii.
Ke olelo nei laua, e pono e mahele liilii ia keia mau aina i mau Apana noho Homeliilii a e haawi mua ia i na poe Hawaii maoli?--Pela mai owai? No olua no ia mau aina o ka olua manao ana e haawi?-- Hilahila ole no hoi o Iosepa ma?--
Ua hoakaka pono ke kanawai i ka mea nona ia kuleana, oia no o Liliuokalani. aole o Iosepa mahaoi kui wini oi?
A oiai, ua hoolimalimaia kekahi o ia mau aina no na makahiki loihi, mai ka iwakalua a kanakolu paha mau makahiki, alaila, e kakali paha keia poe a olua e hoopunipuni nei a hiki i ke kualua a me ke kuakolu o na moopuna, alaila hehi na kapuai iluna o ka aina o Hamohamo?--
Heaha ke kumu o ko olua manao ana e hoopunipuni mai i ka Lahui? Ua manao anei olua he poe naaupo makou.
E hoolohe mai na pepeiao o Iosepa ma, a e kaakaa ae ko olua mau maka; o na poe Hawaii ponoi hewa ole iloko, o na wahi oihana Aupuni, oia ke pau mai nei i ke kipakuia no ke kumu hanohano, he aloha aina ! O ka olua hoi he hoonaaikola iho, i ka pau o na poo i ke okiia; Alaila, e manao hou mai no ka oukou i ka poe Hawaii e kokua aku ika hoohui aina? He lapuwale ka oukou hana.
Pau Kuhihewa
--IA--
KUPANIHI.
UA IKE I KA WAI PIPII A KA
PAO-O.
Ma ka Poaono aku la i aui aku la, i ka wa i o mai ai na kukuna o ka malamalama maluna o ua kakai puu o ka Uhiwai o Pauoa, o ka wa ia i uleu like aku ai na Lamahana o ka Papa-pai Uwila o KA LEO O KA LAHUI a me KA OIAIO no ka uka hui anu o Pauoa, e imi ana i ka oluolu o ke ola kino, iloko o keia mau la kikiki o ka Kau.
Ua haalele iho makou i ka wehi o ke Kaona ma ke kaa hapaumi o ka hora 67 A. M., a motio hoonee aku la no ka home noho o Peter Tahiti. I ka wa i haalele iho ai i ke kaa hapaumi ma ka huina o Pauoa me Nuuanu. e hoonee malihini ana i na kapuai wawae no ka uka waokele o ke kuahiwi.
I ka nana a me ka ani ana ae o na maka ma o a maapei. aia hoi e hoohahana iho ana na kakai pali ma kela a me keia aoao o ke kahawai, he kohu moa Paniolo ke kapakahi o na eheu.
Ma ka huli ana ae a nana i na mala ai e waiho kahelahela mai ana he hoihoi ka maka ke ike aku, a he hauoli hoi ko makou mau puuwai i ka ike aku i na kupa o keia wahi awawa nani, oluolu a maemae e hoopapau ana ma na hana e pono ai keia noho ana. E iho mai ana ko ko-uka poe me na hua ai o ke kuahiwi, na lau nahelehele a pela aku.
I ko makou hoea ana aku i ka home noho o Pika ka puuwai olu o ke kuahiwi, ike kamaaina heahea a me ka puuwai hamama, ua hoomanao ae la makou i keia mau wahi lalani mele a na 'lii:
Owau mai kau e hea mai ai
E hea i ke kanaka e komo maloko
E hanai ai a hewa ae ka waha
Eia no ka uku o ka leo
Ma keia wahi i kaa aku ai ke pailaka ana o na malihini malalo o ke kamaaina, aia ka ilina o Kupanihi. Ua hoau mua aku makou me ka wai pipii wai aniani o Punana-noio, e pipii ae ana malalo o ke kumu o ka hana, he huihui a maelele kona wai ke inu iho.
Mai laila aku, ua kamoe loa aku ko wakou alahele no Kuapnihi, e pii ana iluna o na puu, e iho ana ilale o na awawa, ua hele na wahi pauku kino a maluhiluhi. I ka hiki ana aku i kahi i kapaia o Kupanihi, he wahi papali pili wale aku no. Ua ikemaka i ka Aha Kuka a Kupanihi i ka po mamua iho, e hoole ana i ka Hoohui Aina, Nani no ka manao o kela kupueu. Ma keia uka ua hele a luluu i na hua ono o ke guava, a he ono ka puu.
Ua haalele aku ia uka, a hoi mai la no ka home o Pika, ua panee mai la ke kamaaina he papaaina i puia i ke ala. Mahalo nui ia Pika, welina i ka ohana.