Ka Leo o ka Lahui, Volume II, Number 711, 23 May 1893 — Page 2
This text was transcribed by: | Toni Lynne Kaefferlein |
This work is dedicated to: | Andreas Krueger Happy Birthday |
KA LEO O KA LAHUI.
"E Mau ke Ea o ka Aina i ka Pono."
KA LEO O KA LAHUI
JOHN E. BUSH,
Lunahooponopono a me Puuku.
POALUA MEI 23, 1893
MAIKAI NO KE OLA.
He oluolu no ke ola o ka Moiwahine Liliuokalani. Nui ka poe misionari hoino Iaia i keia manawa, aka, i ka la e noho ana ke alii ma kahi o ka mana aupuni nui ko lakou hapai Iaia. Aole nea ia i lilo he mea manao ino no ke alii, a he mea e hiaa ai Kona po. E kiai ia Oia e na anela kiai o ka lani i lilo ai ke kuko ino o ka poe ma nao lapuwale i mea ole, oia ka makou pule.
Na Aina Leialii.
Ke ike nei makou eia ke hoolaia ia nei na mea i manao ia no na Aina Leialii. O keia mau ano, na mea a ka Moiwahine Liliuokalani i hookumu ai i na Aina Leialii, a i hoouna ia ai o Hon. C. P. Iaukea e hooko ma Hilo. E mahelehele ia ka aina leialii i home liilii no na Hawaii a me na poe nele e ae. He manao naauao no ko ka Moiwahine mai mua mai, koe wale no o ka palupalu o ka noonoo o na kanaka o ke alii i kaa na lakou ka hoohana ana aku. He minamina makou i ka haule o ka manawa e hele nei no ka hooko ana o ke Aliiwahine i kona mau manao maikai ke hiki hou mai i Kona manawa.- Ke kalokalo ae nei makou e hiki koke mai ia wa hauoli o ka aina a me ka lahui.
Hamau na Leo o ka Ewaewa.
Ma mua aku nei, nui ke kakani o na mahoe o Hana, na Iosepa ma, e pili ana i ka hoohui aina. He ku maoli no i ke aloha ke ano olalau o na manao o na mahoe mamuli o ke ake e hoohoihoi i na haku o laua, nana mai kahi apana palena, ma ka hakuepa ana, a me ka hoonuinui ana i ka holomua o ka hoohui aina ma Hawaii nei a ma Amerika Huipuia hoi. Eia ke poha mai nei ka malamalama o ka oiaio maluna o na mea a pau, e pili ana i ka manao o na Amerika no ka hoohui aina. Me he la ua ike pono ia ka make loa, o ka ninau hoohui aina ma Amerika Huipuia me ka ka ae ole e ka lahui Hawaii. Nui ka lauwili a me ka eepa o na hana a na mahoe o ke au hoomaemae a me ko ke Aupuni Kuikawa. Ua kupono loa e kalai ia na kii o keia mau eepa a na misionari a e kukuluia ma na aoao o ka nuku o Mamala, i ike pono ia ai ke koke o ka niho o kekahi Iuda a me ke keokeo o ka onohi maka o kekahi o na maiihini ke hoea mai i Hawaii nei.
ALOHA AINA.
KUE IA MA-I.
Ua ike iho makou ma ka nupepa Bulet@ni, ua kue ia aku o J. U. Kawainui mai ka noho jure ana ma ka hihia o C. A. Herring, oiai ma kona ano he lima kakau manao nupepa, ua hoolaha oia i kona manao. Aole nae he ike iho o ka eepa a ka aoao hoomaemae i ka mea pono, ku ae a haalele, ma ke ano manao maikai. Heaha la ke ano o keia ano kanaka?
HE MAU KANAKA ELEU.
Nui ko makou mahalo i na makai kapena haole e noho oihana nei, i ko lakou eleu a hooko pono i ka lakou hana. O na kanaka e kaulana nei ma ka makou hoomaopopo ana, oia no na Kapena Klemme, Queen, a me Schlemmer. Me he la, o ka oihana makai malalo o ka Ilamuku, ka oihana i hoohanaia ma ke ano hoopololei. Hookahi wale no mea i koe o ka hopuia o ka mea a mau mea paha nana i lawe na daimana o ke Kalaunu o na 'lii.
UA LIKE OLE NA MANAO
Ma na hoike o ka hana a ka Aha Kuka o ke Aupuni o ka hebedoma i hala, ua hookui ae la kekahi mau hoa kuonoono o ua aha la, ma ka ninau, he kuleana paha ko ka Aha Kuka e hoolohe ai i na makemake a me na kalele ana mai a ka Hui Hoohui Aina. Ua kakoo o Mr. Damon, he kupono e hoolohe ia, oiai ia poe [ka hui] e kokua ana e hoohui i ka aina Hawaii me Amerika. Kue hoi o Mr. Kikila Baraunu. He lohe wale no ko makou ia Kapena Wiltse o ka Bosetona aku nei i make, he hoohui aina o Kamu Damona, a he iwakalua anei a oi oia manao iloko ona. Ina he oiaio keia olelo a ke Kapena, i ano hooia ia mai e ka hoike o ka Aha Kuka o ke aupuni, alaila ua piha hookamani no kekahi poe haleo e noho nei me kakou. Ua ike iho la makou, ua hiki loa ia Damon, ke kamailio a kakoo ikaika e ae ia ka leo o kekahi poe hoohui aina e hoolohe ia, ma ka hooponopono ana o ke aupuni, me kona hele no nae e ike i ka Moiwahine me ke kau o ka Hae Hawaii ma kona umauma, wahi a ko makou lohe wale mai. He hookamani ke ano oia mau hana, a he hana hoohaule ana i ke kulana o ka mea e hana ana me ia, i ka manao o ka poe maikai. He mea keia e ao ai ia kakou e akahele loa ka hoolohe ana i ka manao a me ke alakai ana a na kanaka kuonoono a kakou e manao aku nei he poe noonoo hoopono a he kaulike.
He kanawalua ka nui o na iini opiuma i loaa aku iloko o ka pahulole o Miss. Nelson, kuene wahine o ka moku Auseteralia.
Ua hoopuka ae ka Peresidena o ka Hui a na Wahine o na Aina e mai: Ua kupono no i ka Ahahui ke kali a ka hooko ia ana o ko lakou menao@ laua no ka hoohui aina.
Ka Leta a Nordhoff.
E Hoike Ana i ka Loli o na manao Hoohui Aina o na Mahike.
E hoahu wale ana i ka hookani o ka leo uwe kue Lotere i ka Moiwahine. -Teregarapaia mai Kapalakiko aku i ka Nupepa New York Herald.
( Hoomauia).
Ua pahola ia keia mau olelo me ka hoomano, me ka manao lana i mea e haalele koke ai ka Moiwahine. He mea makehewa paha ke olelo ae, he hoopunipuni keia mau olelo hoopuiwa, aka, ma keia wahi kuono uuku o ka honua o na olelo lauahea ka mea e pae mau ana; a o ka poe maikai ma kekahi ano, aole lakou i kanalua i ka hoolaha hou ana aku i keia mau olelo hoonuinui i keia wa, ina ua ike ia he mea e ku ana i ko lakou manao kalaiaina.
KA BILA LOTERE KAULANA.
I hoike ano i ka mea hiki ke hana ia me ka maka hilahila ole e kekahi poe maikai ma kekahi ano, e hoike aku no au i ka moolelo o ka bila lotere kaulana. E pili ana i ua bila la, ua kekau aku o Mr. Stevens, ma kekahi leta i hoolaha ia ma ka la 18 o Ianuari, penei:
"Mahope koke o ka haalele ana o ka Bosetona a me a'u pu hoi ia Honolulu, ua hoolilo ae ka poe manao maikai ole, e noho poai ana i ka Moiwahine, i ua manawa la he wa e onou ai i ka bila kamahao loa e haawi ana i ka pono o ka lotere."
Iloko no oia palapala hookahi ua olelo hou oia i na hana kanawai lotere he hana kipe. Ua hoolilo no hoi ka poe hoohui aina a me ka poe o ke aupuni kuikawa i mea na lakou e kukala leo nui ai he mea inoino loa. O ka hewa o keia bila lotere a me ke ine o ka poe hanaino nana i naipai ka Moiwahine a me ka Ahaolelo i keia bana hewa loa, oia ka lakou i kukala leo nui ae ai he kumu a lakou i mauao ai he mea hiki ole loa ke loaa hou kekahi aupuni maikai malalo o ka Moiwahine.
Aole ana paha oe e manao io iki mai he oiaio, aka he mae oiaio maoli a he mea hoomakeaka no hoi, he mau palapala hoopii kekani i ka Ahaolelo a me ka Moiwahine e paipai ana, a e koi maoli ana no hoi e hooholo ia keia bila mamua o ka manawa o ka haalele ana o ka Bosetona a me Mr. Stevens e like me kana i olelo ai ma ua leta aia; a nolaila ua ane hiki ole ia ia ke ike a lohe mua ole i keia mau palapala hoopii, a e ike ole hoi i ka mea oiaio hou aku, au i ike ponoi ai, he mau palapala keia i kakau inoa ia e aneane ewalu haneri mau inoa a me kanaona, aneane haole wale no a pa@, a o aneane ua poe la a pau i keia la he poe hoohui aina wahakakani, a o kekahi maoli o lakou he poe lala no ke aupuni kuikawa a he poe paa oihana hoi malalo o ke aupuni.
Aka nae, o lakou a pau lea, pau pu me ke unu, ka poe e uwe nei i keia manawa, e like me keia Stivini, e kue ana i ka bila lotere, a e olelo ana ua maopopo loa he mea hiki ole kekahi aupuni kumukanawai mamuli o keia mau a no hana kaukanawai.
KEKAHI O KA POE HOOPII E AE IA KA LOTERE.
Iwaena o ka poe inoa o ka poe hoopii i ka Ahaolelo a i ka Moiwahine paha, e hooholo ia ka bila lotere a e lilo i kanawai, oia iho keia poe:
F.W. McChesney, kekahi hoa o ka Aha kuka o keia aupuni kuikawa.
Andrew Brown, hoa o ka Aha Kuka a Luna Auhau Wai malalo o ke Aupuni Kuikawa.
M. N. Sanders, ka Luna Kiai Awa i keia wa.
George McLeod. Luna Hookaa o na Puali Koa o ke aupuni kuikawa
C. W. Ziegler, Kapena o na koa o ke Aupuni Kuikawa.
J. D. Tregloan a me J. S. Martin na mea nana i na lole koa ma ka aelike me ke aupuni kuikawa.
L. C. Ables hoa o ke Komite Hooko o ka Hui Hoohui Aina.
W. Larsen, Luna Nui o na Makai.
NA KANAKA LOTERE MAALEA.
Aole no paha he waiwai ke pai hou aku i na inoa i koe. He lehulehu o na haole kalepa kuai liilii, kuai mea ai, kuai lole & c., aia ma keia palapala hoopii na inoa kahi i kau ai, a ua olelo ia mai au o ka hui limahana, i huli ae a pau he hoohui aina, ua komo kino aku lakou a aneane pau loa, no ka bila lotere, e like hoi me ka nui o na lala o ke aupuni kuikawa.
He mea oiaio he kumu no ko keia hana. Nui ka pilikia i keia wa maanei. Ua ike au i ka haole e pulumi ana i na alanui. Ua piha maalea no ka poe nana ka bila loteri, i ka haawi ana i hapa miliona dala no keia kuleana, e hoolilo ia no na hana aupuni o kela a me keia ano. Aole wale o keia wahi kuono uuku ke hoopuoho ia i na hoolilo hana ia ana o hapa miliona dala, aka, e puoho ana no na luna hana a me kukulu hana i kekahi wahi e like me Nu Ioka ia mau dala no ka hana aupuni. No ia mea ua paila iho lakou i na inoa o lakou ma ka palapala hoopii a ua hoomaka hoi e hoonakeke i na dala i manao wale ia iloko o ko lakou mau pakeke. Ina hoi ka Moiwahine i kaohi a kue aku i ka bila lotere he mea no e manao ia aku e uwalo ae ana no lakou e hoohui aina, ma ke kumu, aole ona hoomaopopo i ka pono o ka lehulehu.
Aka, aia iho la hoi mahea "ka poe aia manao maikai ole e poai apa i ka Moiwahine a Mr. Stivini e olelo nei? O kona mau hoaloha a me kona mau hoa hui maoli no ka pololei ana o hoahewa iho ai, ma ka pololei maoli. E ike mai hoi oe aole i kakau na poo o na hale kalepa nunui i keia mau palapala hoopii.
Hoomau ia aku ana.
He Manao Hoopono.
Penei kekahi manao oloko o kekahi manao pepa o ka nupepa Springfield, Ohio, "Ua manaoio makou i ke kuleana o ka lahui e nohe mana, a aole e hiki ia kakou ke ae i ka hoohui aina i Hawaii ke ole ka lahui kanaka oia aina, mamuli o ko lakou manao ponoi iho, e makemake ana. Aole e hiki ia kakou ke hehi wale i na pono o na lahui palupalu loa o ka honua nei, me ka ole o ko kakou hoohaahaa ia imua o ka maka o na hoaloha o ka noho kuokoa ana ma na wahi a pau o ka honua." Nani kela.
PAINA LUAU.
Ua haawi ia he paina hoolaulea e na Komite o ka Hui Aloha Aina a na Wahine no na Elele Komite Wahine o na Mokupuni i hiki mai nei ma Honolulu nei, ma ka home o Mrs. J. A. Cummins, (Kahalewai), Hope Peresidena o ka Hui ma Pawaa, ma ke awakea Poakahi nei, Mei 22, 1893.
Ua oluolu pu hoi i na keiki aloha aina oiaio o ka Bana Lahui Hawaii ka haawi ana aku i kekahi mau leo mele no ka hoonanea ana aku i ke anaina e luana a i lohe pono ai hoi na Elele Komite o na mokupuni i ka leo honehone o keia mau ohe hou.
Mahalo a nui ia oukou e ka Bana Lahui no@ ko oukou lokomaikai nui.
He maikai na luana ana o na hoa a pau, a ua hoohala ia ka manawa me ka piha hauoli o na Elele Komite a me na hoa e ae i hiki ae ma keia wahi paina.
HOOKAHI NO HAWAE I AU HUE KONA.
He olelo kahiko keia nou e ka lahui Hawaii, mai kou mau kupuna mai, a hoea mai ia kakou na pulapula, na ewe hanau ponoi hei@ o ko kakou aina makuahine ia'loha nui ia.
Ua kulumua kakou i ke ano o keia olelo, a ua maa hoi i ka puana a na moae he ko ka olelo akahiko, aole he mea e kaia ia ai.
Ma o keia mau mamala olelo ala, a poohoi o keia kukulu manao ana, e hoike aku ana makou i na ka hoaka a makou e ike nei; a oia keia
Ma ko kakou waha olelo KA LEO o ka la inehinei, ua hoolaha aku makou i ka leta a Mr. Nordhoff e pai ia ma ka N. N. G. H. e hoike ana ina mea a pau i hana ia mai maluna o kakou ka lahui Hawaii, ko kakou Aina Aloha, a me ke kakou Moiwahine Liliuokalani ia'loha nui ia. Ua ikeia, e keia Keoni@-