Ka Leo o ka Lahui, Volume II, Number 716, 30 May 1893 — Page 1
| This text was transcribed by: | Beatrice Lawelawe Santiago |
| This work is dedicated to: | PuakeaN |
KA LEO O KA LAHUI.
"E Mau ke Ea o ka Aina i ka Pono."
Buke II. HONOLULU, MEI 30, 1893 Helu 716
____________________________
HE KANEA KAMAHAO.
---NO---
MAIKA
______________
KE KEIKI
Hapa Ilikini a Hawaii hoi.
__________
KE KANAKA MUA LOA NANA I PANA KE AKUA BEA A NO ILIKINI I MAKA'U LOA A1 -- A O KA WELI HOI O NA ILI KEOKEO -- A ME KA LUKU IA ANA O KELA HUI KEAKA A LI.
__________
Hoohauoli ia ka puuwai o na poe o Kaleponi i ke loaa o ka hui pepehi kanaka o Conegokena ma Pepehi mai @oino ia na ili keokeo. He $25,000,000, ka uku makana ke loaa o Maika. Kau hou ka weli i ko Kaleponi poe no ka eueu hapa Ilikini. 20 kue ia Maika 1. Aole oia he kanaka, he akua. Lele i ka pali kiekie me ka lio. He noho paipai ka hokua o ka lio ahiu no Maika. Hui o Maika me na Ilikini iloko o kekahi a-na nui. Mare hou o Maika. Lilo oia i moi. Hui ka makua me ke keiki. Ka luku ia ana o ka Hui Keaka a Li, ka loaa ana o kekahi keiki Hawaii oiaio opio ia Maika, ka ili poo o na ili keokeo ka mea e pii ai o kou kulana a me ka hopena o keia moolelo. Good-bye.
__________
Auhea oe e kuu keiki, a o ko makou akua hoi i hoomana aku ai, i kou wa i hoomaka ai e hele ma kau huakai, a haalele iho ai oe i kou mau kanaka ma kekahi awawa kipapali, kahi hoi au i hana ai i kekahi mea e hookaulana ai i kou inoa, ma o ko pepehi ana i kela bea pilikua hooweliweli a makou hoi i maka'u loa ai.
Ma ia wa mai makou i hoopolohai, no ka mokumokuahua o ko makou naau i ke aloha ia oe, me ko makou hooikaika ana e hui hou me oe ma keia ao, mamua o ko makou make e ana, i loaa ai ka hooilina o ko luhi i luhi ai, a oia ke kumu i papa ia ai o keia mau hua ai a nau e ai mua, alaila; noa ia makou, he nani no hoi ia, ua hiki mua iho nei no hoi oe, ua noa ae la no hoi paha ia oe, nolaila; e ai kakou, a me ko kakou mau makaainana, ma keia wahi i hooki iho ai ua 'lii nei i kana kamailio ana, a hoomaka iho la lakou e haupa i na mea i hoomakaukau ia iluna o ke pakaukau.
A e like no hoi me ko kakou ano, ka ai ole i kekahi mea ai i kuiuma mau ia kakou no kekahi manawa loihi, a peia ka ai hou ana, aohe e nele ka hoonuu ino, aia ka pono o ka piha aku o oloko, pela no hoi keia poe e hoonuu ino nei i na mea ai oluna o ke pakaukau, i ka pau ana o ka lakou paina ana, ua naue aku ia lakou mawaho o ka lanai e hoonanea wale ai no, aie nae i ka wa a na kukuna malamalama o ka la i kaili aku ai i kona nani nui, a halii paa mai ia hoi ka pouli i kona nani, he mea e ka hikilele o ka puuwai o ka kaua eueu, i kona wa i ike aku ai i kekahi mau mea malamalama ano e ana hoi i ike ole ai mamua e hoomalamalama ana ia loko o ua a-na nei, a no ka pau ole o kona pohihi i kahi o keia malamalama i hiki mai ai, ua ui aku la oia i kana aloha i ka i ana aku.
He keu maoli ke kupanaha o keia mau mea a'u e ike nei.
Heaha ia mau mea kupanaha au e ike nei e kuu aloha?
Heaha mai hoi kau, eia hoi kakou ilalo o kekahi a-na nui e noho nei, pehea la hoi i hiki ai i ka malamalama o ka la, ke hoomalamalama ia loko o keia a-na, a peia hoi keia malamalama i ano like me ka malamalama o ka mahina, pehea i hiki ai i ko laua malamalama ke hoomalamalama mai ia loko nei o ko kakou wahi?
Ae, he oiaio no ia ano e nina@ mai mai la, ua pohihi io no oe no keia mau mea ano e, aka nae; e kala mai oe ia'u, no kuu hahai mua ole aku ia oe i ka po nei.
Pehea no hoi au e ike ai, iloko wale no ka hoi kaua o ka rumi pouli kau o eha ka manao, a i lau kanaka i na wahi pokii o kaua, i na paha kaua i puka iwaho nei i ke ahiahi nei, i na paha ua ike au i keia mau mea kupanaha.
Ae, aole no he pohihi loa o kahi o keia malamalama i puka mai ai, i na paha oe i hakilo pono i ke ano o kela pohaku au i kuhihewa ai he pohaku i'o maoli, i na ua pau kou kuhihewa, no ka mea; aole kela he pohaku io maoli elike me kekahi ano pohaku e ae.
A heaha ka ike ano o kela pohaku?
He pohaku aniani hoonui ike, i hana maiau ia e kekahi mau kanaka o kuu makuakane, a i na wa a pau e noho ai o kekahi poe mahini iluna o ua pohaku la, he ahu wale loa oia i ko lalo nei poe, a i na he enemi ili keokoe ka mea e noho ana iluna o ua pohaku ala, o ka miki koke ia aku la no ia e pepehi a make, aohe e pakele.
Ae, akahi au a maopopo io, pela @ ka i hiki ai i ka malamalama o ka la me ka mahina, me na hoku liilii o ka lewa, ke hoomalamalama ia lalo nei okeia a-na.
E hoi paha kakou e hooluolu i keia koena po, wahi a ka makuakane i pane mai ai i kana mau keiki, a oia ka kana kaikamahine i pane aku ai.
Aohe o maua makehiamoe i keia manawa, hoi e aku no hoi oe e papa e hooluolu i kou luhi o ka pii ana aku nei i uka o ke kuahiwi, a aia no hoi a makehiamoe maua, no aku no hoi maua e hooluolu.
Nolaila, mai makehiamoe oe e kuu makamaka a uwila hou aku.
____________
HE MOOLELO KATLI@ PUUWAI
--NO--
MAT@FIRA
____________
Ka Hookolo Meheu Lua Ole
--ka--
Olali e na Alahele Hoopaha oha'o
--ka--
Punawai Kupua o Alemoni
--ka--
Huewai Ili Batenisa.
A Me Ka
Lunahina Maka Kupua.
________
He Moolelo Kupua no Arabia.
________
(Kaauia no Ka Leo.)
________
He maikai ka wai i kela wa, aohe aleale he halai laua malie wale no, me ka meha pu hoi o ke ano anoano ilihia ke halu iho ana maluna o ua moanawai la, aole lohe leo ia, a i owe wale no i na mapuna hoe alapine a ua kaikamahine ala o ke aupuni kupua o Debolo.
O kahi wawa hoi, aia oia ke holo la me ka pakika a pahee iluna o ka ili o ka wai me he makani hele huhu la i kau a mea o ka ikaika lua ole o na mapuna hoe a ke kaikamahine alii Hero Mineta,
Maanei e ka mea heluhelu e waiho iki kaua i ke kamailio ana no na opio e mahuka la, a e aui ae hoi kaua a nana aku i hope i ke kupua Debolo a me kona hiamoe hookalakupua.
Ua kamailio mua ae nei kaua no Mat@fira ma, aia @ua e lawelawe ana i ka hana a Debolo i haawi aku ai ia laua e hana, me kona manao paa, aohe kupua aohe hoi he mana e ae malalo iho ona, e hiki ke kaili ae i kana mau lawehala kauwa kuapaa mai kona mana aku oiai, ua ike no oia, oia wale no ka mana ma ia aupuni holookoa.
Aka, mamua ae o ka wehe ana mai o ka malamalama o ke ao, ua puiwa honua ae la oia i ke kaikamahine kauwa a Here Mineta, i ka hoala ana iho i ua Debolo la.
A i kona puoho ana ae, ua ninau ae la ua Debolo ia heaha keia?
Pane aku la ua haia wahine la, aole kuu haku alii.
Auwe! kupanaha maoli oe e hoopika mai nei i keia mau huaolelo, owai ke kupua e hiki ke lawe malu aku iaia mai kuu mana aku a'u i hikii ai a paa, aole paha oe i hiamoe i keia po, wahi a ua Debolo la.
Pane mai la ua haia wahine la, e manaoio mai oe i ka'u mea e hoike aku nei ia oe, oiai, ilaila aku nei au, o kela mau mea e hana mai la, he mau mea okoa wale no laua, aohe laua o kuu haku, o ke kane, he kane okoa wale no, me he mea la ua hoonoho ia laua i mau pani ma kahi o kuu alii, a o kuu alii me kela kanaka opio au i ike iho nei i keia la, ua mahuka aku laua.
E hele aku au e nana, akahi okoa ka hoi ko'u uluhua i kou noke mai i ke kamailio.
Ala ae la ua Debolo la ilune a hele aku la a ma ka puka, a kahea wale aku la no; ke hana mai nei no elua i ka hana?
Ae, wahi a na leo i pa-e mai ai, a lohe maopopo aku la no ua Debolo la o ka leo no ia o kana kaikamahine aohe he leo okoa.
Nolaila, huli ae la ua Debolo la a hoi aku la a haule hou aku la no hiamoe, me ka pane ana iho i kana iaia wahine penei:
O hoi e moe, ua manao kuhihewa loa no paha oe, he hapa ko'u mana, o kau hale ana mai nei o houpuupa ia'u aole no paha oe i hiamoe i ka ponei, ke kumu i olohewa ai kau mau olelo, ke hana mai la no oia i kana hana, ua lohe maopopo aku nei no au i kona leo -- ka leo hoi o kuu kaikamahine.
______________
KAUKA
Yong Kam Pung
[APANA.]
Helu 81 Alanui Maunakea.
________
KAUKA LOEA O KA AINA PUA
________
Ua hiki ke hoola ia kela a me keia ano ma'i, mai ko na kane, wahine a me ko na keiki liilii. O na mai ha -- po a me na ma'i e pili ana i ka maka, pau pu ia i ke ola. Ona ma'i koko inoino a me ka hooulu hou ana i na wahi poino o ka puui wai a me ke kino, e hoola ia no me ka maala@. Pela me na ma'i hu'i koko maloo, ua hiki ke hoola ia me ke oki ole. Ke hoike ia aku nei eia ke ola ianei me ka oluolu pu o kahi auhau.
E KIPA mai e ka poe hooluuluuia me na haawina pilihua ka ma'i, a na'u oukou e hooluolu uku.
KAUKA YONG KAM PUNG.
mar.29--2monsd.
______________
HUI ALAHAO A MAINA O OAHU.
Papa Manawa
Mai a Mahope o Okatoba 1, 1892
NA KAA
A. M. A. P.M. P.M.
Haalele ia Honolulu 6:15* 8:45 1:45 4:35
Hoea i Honouliuli 7:20* 9:57 2:57 5:35
Haalele ia " 7:30*10:13 3:45 5:42
Hoea i Honolulu 8:35*11:55 4:55 8:58 +
NO KULANAKAUHALE MOMI IHO.
Haalele ia Honolulu 5:10# P.M.
Hiki Kulanakauhale Momi 5:48#
Haalele ia " " 6:55* A.M.
+ Poaono wale no
* Koe ka Lapule
# Koe ka Poaono.
Sept. 28 tf-dly.
______________
OLELO HOOLAHA.
________
Oiai e kaawale aku aua au, [D. Keaweamahi] no Iapana, ke hoolaha ia aku nei na mea a pau, ua hookohu piha aku au ia S. K. Kane a me Henry Waterhouse, oia kou mau Hope oiaio no ka hooponopono ana i ko'u mau Waiwai paa a me na Waiwai Lewa a pau, a o ka poe a hau he mau Aie ko'u ia lakou, e waiho ae i ka lakou mau Bila ia laua, a o ka poe a pau e paa ana he mau waiwai no'u, e hoihoi ae ia laua.
D. Keaweamahi
May 15, 1893 2wk dly.
______________
Elia Kaululaau.
________
Kauka Hana Niho
________
Ua hiki ke huki ma Niho me ka eha ole iloko o ka manawa pokole loa. He loea @ noeau ma ka Hoopiha ana i ka niho me ke Gula Kala a noea e ae paha. He akamai lua ole i ka Hana ana i na Niho Kui o na ano a pau.
He Mikioi ka Holo@ ina Niho. He palanehe kona mau lima ma Kana mau mea Hana Niho o na ano Hou loa i @ mai nei. He oluolu no ke kuk@ ana no kona ukuhana.