Ka Leo o ka Lahui, Volume II, Number 723, 11 July 1893 — He Moolelo Kaao NO KOOLAU, KE KAEAEA O NA Pali Nihoniho o Kalalau KA WELI O KAUAI O MANOKALANIPO. [ARTICLE]

He Moolelo Kaao NO KOOLAU,

KE KAEAEA O NA Pali Nihoniho o Kalalau KA WELI O KAUAI O MANOKALANIPO.

Ka Maka Uwila Nana i Oani ae i na Ihe Laumeki Kauila o Puukapele.

Ka Mea Nana i Lumai aku la me ka palanehe i na Elele Ahailono Ole a Lonomakua iloko o na Awawa o Hanakapiei a me Laniwai. O Ulumaihea (k) kai noho aku ia Kaula (w) hanau mai o Lehua (w) i noho aku oia ia Niihau [k] i hanau mai ai o Haena (w) i noho aku oia ia Lauaeomakana (k) hanau mai ai keia keiki o Koolauomano aka, ma ka hoopokole inoa ana, ua kapaia no o Koolau. O ke ano o keia inoa Koolau, he maka o ka La; he mea hoea mai ma ke kukulu Hikina, he kukulu makani, he kaomi ana mai o ka makani Moae; he noho ana o ka aina ua mau, ua pua Lookoolau a pela aku.

O kahi noho ana o Koolau, oia no o Haena ma Kauai; o kona wahi nae i hanau ai, aia iluna o ka piko o Maunahina. No kona hanau iluna o na pikomauna, ua maa oia i ka hele ana maluna o na pali nihoniho o Kauai. Ua oleloia hoi ma kona ano, a ma kona noho ana a me kona hele ana, he lua ole ka palanehe, ka mimo, ka mana, a me ke kohu ano mana akua lapu o ka poa. He hiki iaia ke noho iluna o na pali nihinihi o Kalalau, kulou mai la no, lalau na lima a huhuki i ke kalo o na loi kalo o lalo o Kalalu He hiki ia Koolau ke ku mai iluna o ka mauna o Waialeale, a kamakoi aku la i ka muliwai o Wailua, loaa no ka oopu hoihoi na ka makuahine ona i Haena: paina no me ka makuahine a maona ku no pii aku la ma ka pali o Haena; elua no kikoo ana o na wawae o Koolau noho ana i Kalalau.

I ke kaua ana o na Alii o Kauaai ma Kahoaea kela wahi e kaalo ae ai mawaena o Huleia e hele ai i Koloa; ua olelo ia e noho ana o Koolau iluna o Haupu; a ilalo o Huleia ka makuahine ona kahi i noho ai; I ka wa i holo ae ai o Koloa, he alii oia no Waimea mai, ua lalau aku la ko Koolau mau lima ia Koloa, a hapai mai la a hoonoho iaia iluna o kahi kiekie o ka puu o Haupu, pela oia i pakele ai mai ka lukuia ana e ko na paa enemi. O na wahi kiekie loa, na kualono a me na wahi nihinihi ko Koolau wahi e noho ai: a mamuli o kona hoi mau ana i Kalalau, ua kupono no ia me ke ano wehewehe ana o kona inoa Koolau.

Ko Koolau Ikeia Ana He Kanaka Koa. Ma ke kaua ana, a na Alii o Kauai ma kahakai o Kalihiwai mawaena o Mokulau a me Laamea ma ka hapa hope o ka Mahoemua, ua ike ia ko Koolau lele ana mai mailuna mai o ka pali o Haena, a hopu iho la i ua mau alii la a elua, a hookomo iho la iloko o ke eke lauhala a lawe aku la a kiola iluna o o ka mokupuni o Niihau; i ko laua nana ana ae, he okoa loa keia a nana aku la laua aia o Kauai i kahi mamao loa; a, aole e hiki ia laua ke au: moe iho la laua i na wahine o Niihau. A noho pu iho la i ka aina malihini a lilo ae la laua i mau hoaloha: a na laua mai na mamo e ola nei ma Niihau, nolaila mai ke Lii D. W. Pua e noho mai nei i Kapalama. Ua ikeia ma keia moolelo, mamuli o ka Koolau hana ana, ililo ai kela mau alii enemi i mau alii hoaloha ma ka aina malihini o Niihau, a ua aie nui hoi kakou i ka loaa ana mai o ke 'Lii luna he mamo i o loko mai o keia hana mana kaulana a Koolau Aole i pau.