Ka Leo o ka Lahui, Volume II, Number 883, 23 February 1894 — HE MOOLELO KAAO HAWAII NO LAUKAIEIE. Ke Kino Kamahao Iloko O KA Punohu Ua-koko. Ke Kahulileole'a o ke Kuluaumoe o na Pali o Waipio Hawaii. [ARTICLE]

HE MOOLELO KAAO HAWAII NO LAUKAIEIE.

Ke Kino Kamahao Iloko O KA Punohu Ua-koko.

Ke Kahulileole'a o ke Kuluaumoe o na Pali o Waipio Hawaii.

Unuhiia e Mose Manu no "KA LEO." Ka Papaaina hihiu a Kamohoalii, i lawelawe ia e na Pihi huhu o ka moana [mano]. Me kona hoomakaikai ana i na malihini i kona mokupuni. Kana makana i na malihini. Ua lawe pu mai oia me na limu ono a pau o Kaena me na paala kahakai o ka Paliakaholo, e huli kaua a nana ia Kulukapii ko Molokai kukini, ua hiki mua aku oia ma ke awa o Aikanaka, nona kahi e ku mau nei o Mokolii o Alaapaa ma Pukoo, manao ka mea kakau olioli ko Pukoo mau keonimana me ko laila mau lede ke himeni ae i keia mau lalani mele: "Ho ae ka ihu i Aikanaka, I komo pono aku i Alaapapa. Nana i ka nani o Punaula. Kela uluhala po i ka hinano." Oia na hala i kii ia aku la e Kulukapii, a make a lilo iaia nei, huli aku la keia no ke alo makani a komo aku la ma ke kowa mawaena o Peter Ailana (Mokuhooniki) me Punahoku me Pohakupili huli ma o aku o Halawa me na pali aku o Hahakaano me Papalana, hoea ma Wailau i na hala o Kapaliakahiwa nona hoi keia mele alii. "Maemae i ke kai ka pua o ka hala, Ua maewa wale i ka pali o ka hiwa." Mai laila aku keia a na opae o ke alapii o Wailau, a huli mai la no ka wai a Kane i o ai ma ke alo iho o ka malino a Moi ke kahuna mana me na oopu moe wai o Pelekunu a me Waikolu no na kalo palaii o laila me Kalawao. [kahi a ke kamalei aloha, he keiki a ka mea e kakau nei i keia moolelo e hiia mai la e ke ao melemele. A hala o Kalawao me Kalaupapa, hiki ma Nihoa, lilo ia mau hala

ua huli ae la ma keia aoao e nana ala ia Lanai, hului pau i na ia wawae o Hilu, oia hoi ka Puaakei'i. Ma keia huakai awiawi a na Niuhi noho makalae o Kahoolawe, ua pupuu lakou a hooleiloa, hiki ana me ka lakou mau mea a pau i kii ai ma na mokupuni. Ia lakou i hiki aku ai me na mea a pau, o na mea i koe, aole i mo'a, ua lilo ia i mea ole loa ia Hoolalekaimu, aole auanei oe e hoomanao iho e ka mea heluhelu, kai no hoi o Makanikeoe wale no ka makani puahiohio o ke kuluaumoe ka oi aku o ka eleu me ka awiwi, ko Hawaii kupueu hoi, ka mea nana i kaapuni na moku, eia no ka hoi keia poe wiliahiu o ka moana nui kai hohonu. I keia wa i hiki aku ai ua poe Pipi huhu nei o ke kai, ua pane koke mai la o Kealakoiula, ua makaukau auanei na mea ai? Ae, wahi a Hoolalekaimu i pane mai ai, i hea ka papaaina a na mulihini e ai ai? Pane o Kealakoiula, mawaena o ko kakou aina nei a me Maui; a mamuli o ka eleu piha o na elele o ke alii nona o Kahoolawe, ua hoea koke mai la na mano he nui wale, aole o kana mai, ua pani paa ia ka ili o kai e na mano a hiki i Molokini, a mai laila aku a hiki ma ke alo iho o Puuolai ma Maui, aole hoi e hiki ke nana iho i ka ili o ke kai; no ka pili loa o na mano, a mahope iho oia wa, ua olelo aku o Kealakoiula i kona haku alii, ua pau na mea a pau, o na malihini wale no koe o ka hele mai, i loa no a pau keia mau olelo, ua kono aku la ke kamaaina nana ka papaaina ia Makanikeoe ma, a ia lakou i hele mai ai a hiki ma ka aekai, ua hoolele ia ko lakou hauli e ka ula pu o ka ili o ke kai e na mano, me he kuina kapa paiula e hola ia ana i ka ilikai, a i ka hoomaka ana aku o na malihini e hele maluna o ke kua o na mano, me he la, aia no lakou iluna o ka aina paa kahi i hele ai, aole no hoi he wahi mea a onioni ae o ua poe mano nei. A ia lakou nei i hiki aku ai iwaena pono o ke anaina mano nui, aia malaila he ehiku mano oi loa aku o ka nui a me ka ula o ko lakou ili, me he uakoko-ula ala i ka moana. E kala mai e ka mea heluhelu a oili pulelo hou aku i keia pule ae. Aole i pau.