Ka Leo o ka Lahui, Volume II, Number 932, 2 May 1894 — HE MEA LANAKILA KA PONO O KA LAPUWALE KE HOOHOKA IA. [ARTICLE]

HE MEA LANAKILA KA PONO O KA LAPUWALE KE HOOHOKA IA.

I ka Nupepa Ka Oiaio: Welina kaua. Ma kekahi Sabati i hala, oiai na makaainana aloha Alii o keia Apana e halawai ana maloko o ko lakou Halepule ma Pulehuiki; ua hele mai la kekahi kanaka puuwai eleele nona ka inoa S. H. Aukai; a hoopuka aku la i keia mau huaolelo penei: E lohe oukou a pau, i na aole oukou e kakau ana i ko oukou

inoa no ka hoohiki kue i ko oukou Moi; alaila, e ki ia ana na Puaa a oukou i ka pu, e hopu pu ia ana me na holoholona, a o ko oukou mau Lio, e nakii ia ma ka puka o ka hale. I ka lohe ana o kela poe i keia mau olelo, ua hoole mai la lakou aole e kakau. A o kekahi kanaka i piha me ke aloha aina oiaio, nona ka inoa Kaluaai, ua pane mai la oia me ke kuoo: Ina e makemake e ki i ka'u mau puaa i ka pu, ki aku, oiai, aole o'u makemake e kumakaia ia'u iho a me ko'u aina hanau. Mamuli o keia manao paa, o na mea a pau, ua hoi aku la keia puuwai eleele me ka hoka loa. Ke ike mai la oukou e ka lehulehu i ka hana a keia wahi Iuda, i hoolimalima ia me na apana dala he kanakolu. Hookahi no ia kau i ka hano I ka makoikoi a Malalei Mai kukui o Piikea a hiki i Keahuaiwi, he hookahi no mea i kakau i kona inoa; aole elua, he oki loa aku hoi ke kolu, mawaho aku o keia, aole i ike ia. Ku mai ko kino paa i ka ole A he ole wale no kai ko waha I ka manawa i koi ia aku ai ka Loio kaulaoa John Kalama no ke kakau i kona inoa; a e noho i hoa no ka papa, ua ku ae la oia a hopu i kona papale, a hoi i kona hale, a pela pu no hoi me ka Lunakanawai. Mahalo ia olua e na keonimana. Kou Oiaio. J. WAILUALANI KAMAOLE. Aperila, 29, 1894.