Ka Leo o ka Lahui, Volume II, Number 986, 19 July 1894 — Ki Pu Weliweli ma Makalawena Kona Akau, Hawaii. [ARTICLE]

Ki Pu Weliweli ma Makalawena Kona Akau, Hawaii.

Ma ke ku ana mai o ka Malulani, ua loaa mai la ia makou kekahi nuhou ano nui, nona hoi ke poo e kau ae la maluna, ma o kekahi leta la mai kekahi makamaka mai a e hoike ana penei: Ma ka la 9 o Iulai, ua ki ia iho la o Keawe (k,) e Wile (k) i ka pu no elua manawa; aka, o ka mea laki nae, aole i ku o Keawe, oiai oia me kona kokoolua Kaumeleau. Ua loaa mai keia pu ia Wile mai a Maihui mai, me ko laua hele pu ana no hoi e ki ia Keawe, a no ke ku ole ana, ua hele aku la laua e hooweliweli iaia. O ke kumu o keia ki ia ana i ka pu, oia no ka lawe ia ana o ka lio o kona makuakane i make e Keawe. A o ka mea nana i kauoha e kii o Kapela, aka, aole nae oia i kauoha aku iaia e ki i ka pu ia Keawe. E ke aupuni a me na luna hooko o ke kanawai, e pono e huli koke aku i kela hana karaima. He onalunalu o Waikiki i ke kakahiaka o nehinei, a ua ho-o-kuku ia ae kekahi wae iluna, ilalo me he poo kolea la. I ka hora 10 a.m. o ka la apopo e puehu aku ai ka Malulani no kona mau awa maa mau no Maui a me Hawaii, o ka eleu no ka pono o haule a ua nei i ka hope waa. I ke kakahiaka nui o ka Poaono ae nei, e ka palulu mai ai ka lei lehua o Hilo: ka mokuahi Kinau, a e loaa mai ana ia kakou na mea hou o Hawaii a me Maui.