Ka Leo o ka Lahui, Volume II, Number 1021, 6 September 1894 — NU HOU KULOKO [ARTICLE]

NU HOU KULOKO

O ka poe i loaa na wai aniani ao!e o lakou pilikia. He mau la pa-maloo loa keia o kakou, nolaila, ua nele kakou i ka wai e inu ai. Ma ke kakahiaka o nehinei i mai ai he moku kaua Geremama a me ke Kaletona o Amerika. Ma na lono mai, eia aku he ekolu mau moku kaua Germania a ku mai; e pau ana keia poe moku i ka holo no Iapana a no Kina, e malama ai i ko lakou poe makaainana. He makepono ke dala lilo i keia hana eli wai, mamua o na dala he aneane $65,000, i lilo ai no ka Hale Makete a Kakina ma i kukulu iho nei, aole nae he pomaikai iki o ka lehulehu ma ia mea. Na ka Mokuahi Charleston i hoihoi mai ike kino wailua o ka Lani Kalakaua iloko o ka la 20 paha o Ianuari 1891. nolaila, he 3 makahiki a me 7 paha mahina kona nalo ana aku nei, akahi a hoea hou ia Honolulu nei. Ua kipu aloha mai na moku kaua Geremania me Amerika i ka hae o ke Aupuni Moi o Hawaii. ma kakahiaka Poakolu nei. Oia no ka hae kumu oka aina. O ka makou e pule nei, e mau kou welo ana e ka Hae Nani o Hawaii, a e hoomaikai mai no na aupuni au i noho hoaloha mua ai. Aloha no ka Hae Hawaii! Ua hoikeia ae ma ka Buletina o o ka Poalua nei, e haalele iho ana ka moku kaua Beritania Hyacinth ia Honolulu nei, a holo aku no ka Pae Aina o Nuuhiwa iloko o keia mau la; aka, ma ko makou hele ana aku e ninau i ka mea oiaio maoli, ua hai ia mai la; aole he oiaio o na mea i hoolahaia. Aole e haalele ana ka Hyacinth ia Honolulu nei. Ua lohe mai makou; ma ke ahiahi Poalima o kela pule aku nei, he nui ka ona a me ka haunaele ma kahi o Ailuene ma, ma uka o Kapalama. Hakaka kekahi poe pepehi ia kekahi wahine, e Stevens Mahaulu. Nui ka lulumi o na kanaka i ka meli wai-bia. Nui ka hooio o Acoi Mahaulu, Luna Helu Repubalika o Waialua:- E ake ana oia e hakaka me na kanaka a pau; aka, ua kiola ia oia i waho o ke alanui e kekahi Borabora, malaila no kekahi poe makai a mau luna Aupuni ia po. Nui no ka lapuwale.

Ke hoea mai nei na mokukaua o na Lahui e i o kakou nei, e no ka hoolako nanahu ana a holo aku no Iapana a me Kina iloko o keia kaua nui. Ma keia kaua i laweia mai nei na Aupuni o Kina a me Iapana e hiki ai i na Lahui naauao ke hoomakaleho aku, i ka maa noonoo kaua moana. No na makahiki loihi aneane 20 a oi, akahi no, a hoohanaia ka ikaika o na mokou-kaua-hao, i kapiliia ma na aupuni like ole o Europa oiai, o na mokukaua o keia mau aupuni a elua, ua hoolakoia mai no ia ma Enelani a me Geremania mai.