Ka Leo o ka Lahui, Volume II, Number 1060, 5 November 1894 — He Moolelo Kaulana NO OPERIA. Ka Eueu o Aitiopia A ME APERODITE Ka Mahina Piha o Iopa-Ka Oiwi nona ka Ui a me ka Nani, i oi aku i ko ALIOPE Ka Moiwahine o na I'a o ke Kai. [ARTICLE]

He Moolelo Kaulana NO OPERIA.

Ka Eueu o Aitiopia A ME APERODITE

Ka Mahina Piha o Iopa-Ka Oiwi nona ka Ui a me ka Nani, i oi aku i ko ALIOPE

Ka Moiwahine o na I'a o ke Kai.

Nolaila, aole au e naau luuluu aole hoi e hilahila, oiai ua ike no au o ka umikumamalima no keia o kou mau kupulau e hele nei o ka'u wale no ia oe e kuu keiki, e hunakele loa oe i keia mau mea apau iloko o ka hohonu lilo o kou puuwai, me ka hoomanao mau he no'a huna ia na kou makuahine, a he nane huna hoi na kaua. No kekahi mau minute li'u wale o ke kulou ana o ua Operia nei me kona mau waimaka e hiolo makawalu ana akahi no oia a pane mai me ka leo ehaeha--Ke ike nei au, owau ka kai aloha aole oe i aloha ia'u; no ka mea he pinepine loa na manawa a'u i ninau aku ai ia oe, e hahai mai ia'u i ke kumu nui o kou kanikau mau ana i ke ao ame ka po, me ka aahu mau ana hoi i kela mau hiohiona namalo ku ole i ka hoihoi; aka ua hahai mai oe ia'u i ka mea a'u e manao nei he lihilihi wale no ia, a o ka io maoli ua kaohi ia aku. Ina he oiaio, he mea huna kekahi au e hoomoamoa loihi nei iloko o kou puuwai a e hunakele nei hoi mai a'u aku, ke uwalo aku nei au ia oe me ka nui o ko'u mau waima ka, e ae mai ia'u e lohe ia mea, a i ole pela, pomaikai ka loihi aku o na la au e ike mai ai i kau Operia hookahi nei ma ke ano he mea ki- no ola. Me keia mau olelo uwe like hou iho la laua, a ma ka hope loa, hahai aku la ua Helepona nei i na mea apau imua o kana keiki e pili ana no kona kumakaia ia ana e kana kane e like me ka kaua i ike mua ae nei, a he mau mea hou no a

apau loa aole i lohe mua ia e ka kaua Operia Alaila, lawe aku la ua Helepona nei i kana keiki ma ka lima no ka heiau e pule ai, a pau ka pule ana hoi mai la laua elua no ko laua kakela ihu ana, no ke kakali ana no kekahi makahiki hou aku, a iloko oia manawa loihi, ua pili pono loa keia mau lalani mele ia Media "He nau la kamalii o Atene Ke kohi la i ke kukuna o ka la Pumehana waie ia aina." I ka puni ana o ka makahiki ho~ okahi mai kela la poina ole mai, a o ka umikumamalima hoi ia a oi o na makahiki o ka kakoa Operia lawe hou aku la kona makuahine iaia iluna no ua heiau la. me ke kauoha ana iaia e hele hou e hapai i na pohaku la e like me mamua: hoao hou iho la ua Operia nei i kona laki Aole i pau.