Ka Leo o ka Lahui, Volume I, Number 16, 4 May 1896 — Ua Hala. [ARTICLE]

Ua Hala.

Ma ka auwina la Poalima i hala, i lele loa ae ai ke aho o J. G. Hoapili, kekahi o na kamaaina kahiko o ka aina malalo o ka inoa kaukau alii i noho loihi ma ka apana o Kona no na makahiki lehulehu i hala hope ae. Ua piha kona mau makahiki i ke kanaonokumamakolu, he lunakawai oia no kona apana i hilinai nui ia, a ua komo iloko o ko kakou ahaolelo kanawai no kekahi mau kau. I ka hora 2 onehinei, i hoolewa ia ae ai kona kino no ka ilina o Kawaiahoa, a malaila ka Loio Kuhina W. O. Kamika ma ka aoao o ke aupuni , me ke keikialii Kalanianaole ma ka aoao o ka Moiwahine Kapiolani, a me ka Bana aupuni no ka hoohanohano me na leo mele no kona huakai hope loa.

O makou pu kekahi e komo aku nei iloko o na hoomanao poina ole me ka ohana o ke alii i hala, me ka lana o ka manao, e hooluolu ia mai ko lakou mau puuwai me na hoomanao no ka makua.