Ka Lei Momi, Volume I, Number 4, 28 August 1893 — Na Anoai oka Panalaau. [ARTICLE]

Na Anoai o ka Panalaau.

E oluolu oe e haawi mai i ke kauwahi kaawale o kou hiwahiwa no na wahi huaolelo e kau ae la maluna, i ike mau ai na makamaka o ko kaua lahui i na mea hou o ka aina i kau ia ka weli e na lahui like ole o ke ao nei, a me kona kulana i keia mau la. KULANA O KA AINA He maikai ke kulana o na aina nei i keia mau la, aohe hoi he ua aole pu hoi ka makani a me ke kai-koo, elike hoi me na la i hala ae nei, ka hana mau a ka ino, aka, iloko o keia mau la he keu aku a ka malie, oluolu maikai makou e noho nei. KE KULANA O NA MA'I O ke kulana o na ma'i ma keia aina oia kekahi mea kupaianaha loa, a penei e maopopo i ia kaua. Ina o kekahi poe i hele a kau maha na helehelena i keia ma'i hookae a ka lehulehu, a hoea mai i keia aina e ike no oe ua loli ae ko lakou ano, ua emi pu wale mai no hoi ka ma'i, a ina hoi he poe ano mama o na helehelena, a lwe ia mai no keia aina, e ike auanei oe i ka pii ino o ko lakou ma'i. O kekahi poe ma keia aina aole he manamana lima, oia hoi ka poe i kapaia he "pulua" a o kekahi poe hoi aohe o lakou manamana wawae, o ke kano wale no, o kekahi poe hoi aohe ike ia aku o na helehelena o ka ma'i maluna o lakou. KA PONO UAI O KA LEHULEHU O keia mea o ka wai, oia kekahi mea pilikia loa maanei, oiai ma kekahi wahi e loaa ana ka wai, ma kekahi wahi hoi, ua nele i ka wai mai ka hora 8 o ke kakahiaka a hiki i ka hora 4 o ke ahiahi. Ma kekahi wahi, aole he loaa o ka wai a po ka la; aka, ua palekana nae lakou mamuli o kekahi mau rula hooponopono i ka Oihana Wai i hoolaha ia, e kaupalena ana i ka wa hookahekahe wai no na mea kanu a mea e ae paha, mai ka hora 4 pm. a ka hora 6 am, pela i palekana ai ka poe makapehu wai. KA LAPAAU. O kekahi mea keia a kekahi poe e ake nui nei, oia hoi ka poe i hilinai i ka laau a Kauka Goto.

Eia he 30 poe ma'i e lapaau ia nei e Kauka Goto ma Goto's Hospital, ma lalo o ka noho luna ia ae e Mr. J. N. TravisUa ike au ma kekahi kolamu o kau Lei i kekahi mau mea e pili ana i na rula i hoolaha ia e ka Papa Ola e olelo ana na ka Luna Nui wale no i kakau i kela Rule a hoouna aku nei i ka Papa Ola e apono mai. He ike ole paha i ke poo e olelo ana, "He Kanawai Kahiko i Hooponopono ia he mau makahiki loihi i hala." Nolaila, ke noi aku nei au ia L. K. Makai e nana ma ke poo, mai hoolohe i na olelo ano ole. No na mea e pili ana i ka hopu ole ia o ka poe inu uala. Eia hoi ka'u, ua inu kahi poe i ka uala me ka maluhia aole he hoohaunaele e hiki ai ke hopu aku. Ua lawa paha kaua a no kahi wa aku hui hou kaua ma ke aiai o ke kanana. Eia no o A. K. Hutchson ke noho poo nei no ka Panalaau. Eia ke hana ia nei ka hale o ka mea nana e malama ka halekuai hou malalo o ka noho poo ana a B. Reid. Me oe ko'u welina, a i na keiki oniu hua metala ko'u aloha. GEO. KELIIMIHIHOPELOA. Kalaupapa, Augate 24, 1893.