Ka Lei Momi, Volume I, Number 12, 23 October 1893 — Page 3

Ka Lei Momi.

HONOLULU, OAHU, POAKAHI, OKATOBA 23, 1893.     3

KA HUAKAI MAKAIKAI A

Kauka Talamage

I KA

AINA HOANO.

No keia pane oluolu a kona hoaaloha iaia, ua lilo ae la no ia he mea maikai iwaena o laua, a uhaele like aku la laua me ke kuikahi pu ana.

He oia mau no ke pohopoho o kahi a laua a hele nei, aka aole no ia he mea no laua e kuemi ai.

I ka aneane ana i ke ahiahi o ua la la, ua komo pono aku la laua iloko o ua punonohu laau la, a he wahi ano ahua iki ae nae hoi ia, a he apaapaa no hoi aohe pohopoho nui wale, a ke hoomau la no laua i ka hele ana a hoea wale no i kokahi ponaha akea iwaenakonu o ua ululaau la a malaila laua i ike aku ai i na koena helelei o na pa pohaku ula, a me kekahi mau paia o na hale i hiolo, a ua uhi paapu ia e ka maau e ulu ana.

Maluna o kekahi @hanuu papa pohaku i hana noeau ia, ua noho like iho.  la laua, a nana aku la ko laua mau maka mao a maanei me ka pane leo ole o kekahi i kekahi.

A li @ iu iki, ua nana aku la o Wedena i kona hoaaloha me ka i ana aku.

"Pahaohao hou anei oe e ka makamaka maikai ea?  Malia io no nae paha pela io no, aka e hoike mai me ke kanalua ole, a e hoakiaka no au ia oe me ko kanalua ole, a pela kana e pono ai ma keia huakai inoa."

"Pela no, aka, oiai au e nalu ae nei, a i kuu manao ana ae e oaka ae ko'u waha e ui aku ia oe no keia wahi maikai a kaua e ike pu ae la, aohe nae he wahi mea puka iki ae ka hoi o ka leo, a oia ka'u e au wale ae nei no la a hiki wale no i ko pane okoa ana mai la.--ke pahaohao io nei no au la."

Mahope iho o keia kamakamailo pokole ana a laua, ua hoopa aku la o Wedena i kona lima akau ma ka poohiwi hema o kona kokoolua, a pane aku la me ka malie:

"Eia kaua ma kahi i kapa ia o Ka Puu Hoano o Edema, kahi hoi i manao wale ia maanei nei o Iehova ke Akua i kahakaha ai i ke kii o ke kanaka mua loa maluna o ka lepo, aka o keia na koho lalau wale ana a ka poe Mahomeda, a he mea hiki ole e hooiaio ia.

"No ia mau koho lalau wale ana no pela, ua kukulu iho la kekahi poe o lakou malalo o kekahi kaukaualii koikoi i keia mau mea e ku poomuku nei, a pela no hoi me na hale, a oia no nae ke kamahao o keia mau hana i hookumu ia i kela wa loihi i hala loa aku la."

"Ina pela alaila, he mau lono paani wale no ia a'u e lohe nei mai ia oe mai, a he mau mea waiwai ole hoi e malama ia a hoolaha ia ae i ko ke ao nei.

"A ke manao nei au, o ko ke Akua hoomakaukau kupanaha ana i ke kihapai o Edena, a nona no hoi keia mau manamana muliwai i hoakaka maopopoia ma Kinohi, a he mea oiaio no hoi, e like me ka ulu ana ae o ka hewa i ke ao nei maanei mawaena o ka wahine a me ke diabolo, a i mea e hoomanao mau loa ia ai kona ahewa ikaika loa ana i ka hewa, ua anai loa aku la me ka huna loa ana i na nani a pau o ua kihapai la, a koe iho o ka lepo i uhi paapu ia e na mea ulu o kela a me keia ano.

"Aole nae au e kanalua ke i ae, maanei no o Edena, a o kona nani a me kona ihiihi a pau, e nele ana ko'u ike ana aku ia mau mea a pau, aka e aho no ia mamua o ka nele loa ana."

O ka manawa a laua e kamakamailio nei, o ka wa ia o aneane akiu ana e nalowale aku ka la ma kela huli o ka poepoe honua, a ke kau mai la ke anoano o ka liula.

Nolaila, ua pane koke aku la o Wedena ia Kauka Talmega i ka i ana aku.

"E pono kaua e huli hoi me ko kaua mau hoahele e kali mai la me ka maopopo ole ia lakou la eia kaua ianei kahi i noho ai, a lilo mai auanei paha ia i mea hoopilikia ia lakou la.'

No ke noi haahaa a kona hoaaloha, ua pane koke aku la no o Kauka Talamega me ka oluolu a me ka haahaa.

"Ae, he oiaio no ia, e hoi io aku kaua."  A hoi pu aku la no hoi laua a hoea i ko lakou kahua hoolulu, i na hora ahiahi a ka pouli e uhi pu ana maluna o ka aina, a e pioloke ana ko laua poe hoaaloha no laua, no ko laua nalowale honua ana.

Mahope iho o ke kuu pono ana o ka nae, ua hoomakaukau koke ia ae la ko lakou paina ahiahi, a emoole, ua akoakoa ae la lakou a pau me ka manao lokahi ma ka papaaina.

Ma ke kakahiaka nui o kekahi la ae, ua akoakoa ao la lakou ma ka paina kakahiaka.  I ka pau ana, ua malama koke ia no ke anaina pule ohana.

I ka pau ana o keia mau hana a pau, ua hoopuka ae la o Kauka Talamega i kona manao iwaena o kona mau hoahele.

"E noho he elua o kekahi mau mea elua o kakou, a e hele pu ke koena me maua ma ka hoohala ana i manawa oluolu ma na ululaau a me na kula palahalaha ma keia aina malihini a kanaka ole i noho ai.

"A he pono no hoi e lawe pu ia me ona mau wahi mea ai kupono e lawa ai ko kakou kamau ana ae i ke awakea, no ka mea, aole paha kakou e hoi koke mai ana a hiki wale i na hora o ke ahiahi ana.  ua ake nui hoi ko'u manao e halalo malie aku i na mea hou a pau o keia wahi mamua hoi o ko kakou haalele wale ana iho no me ke kakahele ana akiu imua."

No keia mau manao hoakaka o ua kauka noi, he mea o ka elioli o ka hapanui o lakou, a nana pono , no i wae ae he elua o lakou a hoonoho ia iho la me na holoholona o lakou a me na wahi opeope o lakou, a he 7 i hele pu me Kauka Talamega a me kona hoaaloha.

Ma ke ala e hiki aku ai i ke kahua o ka pakaua o Kusa ma ka aina o Elema, ma na kapa o ka muliwai o Ulai, ua kai aku la ka huakai hele wawae maluna o na wahi pohopoho a kawau no hoi me ke akahele.

Make Emoole.

Aloha oe---He wahi mea hou ka'u e pane aku nei imua o na kini puni heluhelu o kaua, a oia keia.

Ua make emole o Charles Belts me ka kaa ma'i ole.  Ua loaa kau kona kino e waiho ana maloko o ka auwai mauka pone o Honomanu, oia o Ulawini me Kolea i kekahi Iapana kiai auwai.  Ua ahai loa ia mai ka lohe i ka wahine a me na keiki a lohe o Wm Crook opio, a nana i hele me Thomes Eninsley opio e kii.  I ko laua hiki ana aku a loaa ke kino make e waiho mai ana iloko o ka auwai, hapaia a hiki iluna a lawe ia mai a ka hale o ke kiai auwai ma Waihimanamana.  Malaila i waiho ai a kii ia aku ma ka la 11 ae, ua eha ma ke poo.

Ua hiki ae ka Luna Makai, ke Kauka, ka Luna Nui o Puunene, ka Luna Makai o Makawao, a me ka Lunakanawai Apana, a me na poe e ae e ike iaia.  Ma ka la 10 kona make ana.

He ma-u wahi mea hou ia.

MOSES PAPAIAKEA.

Huelo, Oct. 12, 1893,

KA IPO ALOHA.

Auhea wale oe e kuu aloha,

Kuu hoa hooipo manuahi,

Ua ahi ua wela mai nei loko,

Na hana hooheno a ke aloha,

Nawai e ole ko'u aloha,

Ua alo ia aku ia kula loa,

He loa ka hele'na o ia kula,

A loaa ke onaona i ka home,

Onaona ke ala o ka Vahine,

Pine paa ia i ko puuwai,

Waiwai no oe ua alo ia,

Aohe ou kau e hemo ai,

He ui a he ninau keia,

Pehea la oe e kuu aloha,

Pane mai ko leo ku i ka nahe,

Kulu pakahi o'u waimaka.

Haina ia mai ana ka puana,

ehiku no pua kuu LEI MOMI.

KUPAOA KE ALA.

Nani wale no kuu ike ana,

I ka Pikake hulu nani,

A he manu leo nui walaau,

Ahai hele ana i ka lono.

Hui.

Kolonahe mai ana ka Moae,

Halihali mai ana i ke ala,

Moani kupaea i na moku,

Ke nu-ue ae la na manu,

Ua hiki no ke ala o ia pua,

Na'u no ia la e honi aku,

I moani aku e keonaona,

Waianuhea i na moku.

Akahi no a upu ka manao,

E lawe no au na'u i pua,

Pua nani ia no kuu home,

Vahine maka onaona.

PONE MOI.