Ka Lei Rose o Hawaii, Volume I, Number 4, 1 April 1898 — Page 4
4
He Moolelo Hoonnea
NO
ALI HIBA
KE AHIKANANA A ME KA LUA OLE O KE KOA O KA AINA KUPUA.
(He Nanea uo na buke Arabia mai.)
"Owau no kau, e hea mai ai,
E hea i ke kanaka,
E komo maloko,
E hanai ai, a hewa ae ka waha,
Eia no ka uku la o ke ALOHA."
ALI HIBA, oia ke kamaeu nona keia moolelo, ua hoea mai oia ma ke ano kino moo, a ma ia kino no oia i hoomaka mua ai i kana mau hana hoopahaohao a pau, a penei ke ano o kona hiki ana mai a lilo oia i mea kaao ia e ka poe puni kaao o na moolelo Arabia:
E noho ana kekahi mau elemakule maloko o kekahi ululaau o ka aina kupua i kapaia e na kanaka Arabia, "Ka Aina Kupua o ke Alii Pookolu," he wahi luahine ma ka inoa o Sina, a nana hoi he wahi kolopupu kane o Nuredane kona inoa. A o ka laua hana e loaa ai ko laua wahi ola, he kaleewa wahie ma ke kulanakauhale o ke Alii Pookolu i oleloia, ke kulanakauhale keleawe kanikani, a oia ke kulanakauhale Alii o ua aina la.
I kekahi la, ia Neredina i hoi mai ai me kekahi pu-a wahie a hiki i ko laua wahi pupupu hale, aia hoi oili mai ana he wahi moo i hulali ia kona kua me na apuupuu pohaku liilii e anaanapa ana me ke alohilohi. I ka ike ana aku o Sina i ua wahi moo la, ua hoooho ae la oia, "E, he wahi moo nani maoli ka hoi kela, he keu a kahi moo maikai,—ina no hoi he hiki ke hanai ia, ina la hoi na'u e hanai."
Ia wa no i lohe ia aku ai kekahi leo me he hanehane la mai ka moo mai: "E Sina, E Sina—he hiki no au ke hanai ia ina e ae ana oe e hanai ia'u. O kau ai e ai ai, o ka'u no ia, o kou wahi moe, malaila au e moe ai, a e malama hoi oe ia'u e like me kou malama ana i kekahi keiki i hanau ia mai kou puhaka aku, alaila, e ike auanei oe e hiki mai ana ka manawa e noho ai oe i Moiwahine no ka aina kupua, a o Nuredane hoi i Moi maluna o ia aupuni.
No keia mau olelo maikai a ua wahi moo nei, ua lilo ia i mea oluolu ia Sina a me Nuredane. Ia wa, ninau aku la o Sina, "Ea, ma ka inoa hea maua e kahea aku ai ia oe?"
"Ae," i pane mai ua wahi moo nei, "e kahea mai olua ia'u ma ka inoa ALI HIBA, a o ko'u inoa ia."
Ia manawa i lelele mai ai ua wahi moo nei a kau mai la iluna o na uha paluplau o Sina, a malaila oia i kuupau ae ai i na kiina mikioi o ke alohilohi ana o na pupu liilii maluna o kona kua, a ua like hoi ko lakou mau anapanapa ana me na hoku o ka lani, a o ka hapanui o na waihooluu, ua like me ko na momi anapanapa o ka moana wai o Inia.
No keia mau kiionohi ano e o ua wahi moo la, ua hoomaoe wale iho la o Sina me na huaolelo e i ana: "Ea, e Ali Hiba, he oiaio anei ua hanau ia mai oe malalo o na papaku panio o na kai hohonu o Inia, kahi i oleloia malaila e loaa ai na momi o na waihooluu like ole, no lakou hoi na huina anapanapa ke huiia me he anuenue la.
I keia wa i poha ae ai he leo mele nani me he hanehane la mai kahi moo mai, a puia ae la o loko o ka rumi o lakou e noho ana i ka eehia me keia mau huaolelo i puai ae mai kahi moo aku:
"E ka nani o Inia,
Kou pohaku onionio,
I kipapa ia me ka momi,
E kihea ia ana hoi,
E na hou kai-ina,
O na momi nani ou,
Ma kou papaku no,
I hanau ia ai au,
Iwaena o kou mau nani,
Ka nani kamahao—e."