Ka Lei Rose o Hawaii, Volume I, Number 8, 1 June 1898 — Page 8
8
Ka Lei Loke o Hawaii
Ka hoa haihaiolelo no na home
Honolulu, Iune 1, 1898.
O ke Ola ka mea Maikai no na kanaka a pau.
[Hoomau ia .]
Ina o keia ae la na kumu kupono, a a oiaio maoli e haule ai ke kanaka i ke kulana o ka ilihune, alaila, pehea la kakou e hana ai? Eia ka makou e pane aku ai, O ka ai pakiko, o ka hoomakaulii i kahi loaa uuku, e koe ana o kela a me keia pule, a hoiliili malie, a hoahu ma ka Banako, a hookomo paha iloko o na hana, e hoohua mai ai ke dala iaia iho. O keia kekahi alanui hele maikai loa, a ke kane a me ka wahine e hoao ai e hana, a pela no hoi ma ne mea a pau o ka hoiliili malie ana ina hunahuna dala e hoomaka ana mai ka hapaumi (5 keneta) aku, ke kenikeni, ka umi-kumamalima keneta, ka iwakalua keneta, ka hapaha, ka hapalua, ka hookahi dala a pii aku iluna, he oki pau loa aku hoi ai, a penei ko makou manao ana, ina e hana ana kakou e like me ka makou e hoakaka nei, alaila, e kuai kela a me keia mea kane a wahine a ohana paha, i kela kini liilii, aia no ina hale hana piula haole, pake, a me ke Kepani, he kenikeni ko ke kini liilii a he hapaha ko ka mea nunui ao, ua hana puka ia o luna e hiki ole ai ia oe ke lalau me ko mau manamanalima, a ke o'eo'e ia hoi me ka pahi.
Alaila, hoomaka e hookomo e like no me kau i manao ai ua kupono, ina ma ka pa 5 keneta ko ka la a puni ka makahiki, alaila, ua like ia me 365 hapaumi. Ua like hoi ia me $3.65 keneta i malama ia, mai pau i ke kiola wale ia no. Eia hou, ina he kenikeni kai hoiliili ia a puni ka makahiki, alaila, ua like ia me na dala he $7.30 i malama maikai ia, mai puehu i kamakani, a pela hoi ina 15 keneta o ka la, alaila, ua like me $10.95 keneta i ka makahiki mai lu wale ia i ka makani a ohi i ka puahiohio, a pela aku e hoomaka ai, oia ko kakou wa e ike ihe ai, he puu nui no ka ko na huna huna liilii a kakou e uhauha wale nei ke hoiliili ia me ka malama pono ia, oia auanei ka wa a kakou e ike iho ai, i ka oiaio o keia mau mea a makou e kuhikuhi nei, a e alakai aku noi ia kakou. E hoao kakou no kako ponoi iho.
O kekahi mahele ano nui a makou e makemake nei e pono kakou e hoomahui, o ka waiho ina dala mahua ma kahi e malu ai, aole e pau i ka aihue ia, aole e pau i ke kii liilii wale ia, aole e haawi wale ia, aole e kii wale ia no ke kuko o ke kane a me ka wahine ina mea nani, a oiai ea, i ka wa e loaa ai ia mea he dala ia kakou i ke kanaka, ua like me ka wahine ui imua o ko ke kane mau mau maka, a o ke kane ui hoi imua o ko ka wahine mare mau maka, e nui ana na kuko iloko o ko kakou mau naau ia mea ae ia mea ae, nolaila, o kahi kupono wale no, ina he puu dala mahuahua, o ka waiho no iloko o ka Banako e like me ka Banako Hale Leta. A i ole ia, ina paha he hana kupono au i manao ai, a i hilinai pono loa ai paha, aole e hiki ke kolohe ia mai oe, alaila, e pono no e hookomo iloko o ia hana a mau hana paha, i kau mau dala, i mea hoohua mai ai ke dala i ke dala, e like paha me na hui mahiko, na hui mokuahi, na hui hoopukapuka a pela aku.