Ka Lei Rose o Hawaii, Volume I, Number 9, 15 June 1898 — Page 13

Nuhou Kuwaho.
KIPAKU IA NA MOKU TOPIDO ME KA POINO.

Nu Ioka, Mei 31.—Ua loaa mai Port Antonio, Jamaica mai, ka moolelo o ke kaua mua loa mawaena o na moku o Comodoa Scheley o na Amerika a me na moku malalo o ka Adimarala Paniolo Cevera i ka waena konu po Sabati nei. He mau moku topido Sepania kai manao e holo mai e hoopoino i na moku Amerika, aka, ua kipaku hou ia aku no ihope me ka hikiwawe, a mama ana i ka holo mamuli o ka eleu o na keiki o ka mokukaua Texas. Ua puka malu mai na moku topido iwaho nei ma ka holo malie ana malalo o ka malu o ka papu Moro, a me na kakai pali i ka nuku o ke awa, ua holo mai la ua mau moku nei he 2 mile mai ke komohana mai, ike e ia mai la laua e ke 'lii ku wati maloko o ka ohenana, ia wa no i hoolei ia mai ai ka malamalama o na ipukukui uwila, a ia wa no hoi i eleu koke ae ai na sela e moe ana ma ka aoa o na pukuniahi. I ka anapa ana o ke kukui e hoike mai ana, ua ike ia mai la na moku Paniolo, ia wa, ua hookuu pau mai la na moku topido Paniolo i ko laua mama holo a pau me ka manao e hookui mai i na mokukaua "Brooklyn" a me ke "Texas" Mamua o ka luli ana ae o ko laua mau ihu, o na sela ma ka aoao hema o na moku, na ia poe i hanai aku i na huaale kila i ua mau moku Paniolo nei, a me na poka o na pu wili. Na ke kani ana o na pu o ke Texas, i hoopuiwa holookoa ae ina mea a pau o luna o na mokukaua Amerika. O kekahi mau moku, ua mamao iki aku ko lakou ku ana iwaho, ia wa koke no hoi i kani kapalili like ae ai na o-le o na moku, no ka manao maoli ia no, ke holo mai nei na moku o Adimarala Cevera e hoouka kaua maoli mai ina aumoku kaua o Adimarala Schley, i loaa ia lakou he wahi e pakele ai. I keia wa no i ki pu ia aku ai ua mau moku topido nei e na mokukaua Texas a me Brooklyn me ka weliweli nui, a ua oki oe e mama ana i ka holo ua mau wahi moku topido la.

LILO PIO KA MOKUKAUA SEPANIA ALFONSO 13

Kikako, Iune 1.—Ua loaa mai he lono uwea mai Lae Hayti mai, ua lilo pio mai ka moku kaua Paniolo Alfonso i kekahi o na mkou kaua Ukali St. Louis mahope o kona kiki pu ia ana he umikumahiku manawa.

POINO NA MOKU AMERIKA.

Iloko o keia kaua ana, ua ki ia mai la kekahi mau poka mai na moku Sepania mai, maluna o na moku kokua o Schley mamua o ke kaua ana, a ua nui ka poino. Wahi a kekekahi mau hoike, ua nui launa ole ka poino o na Paniolo, a o ka poino hoi o na Amerika, ua like pu no, ka poe i make a i eha.

E LILO AKU ANA PAHA I HANA NUI.

O na mea e pili ana i keia kaua o Amerika me Sepania, me he mea la e hele loa aku ana i ka hana nui, mamuli o na kuikahi malu mawaena o Farani a me Sepania, a mamuli hoi o na lono e noonoo ino wale ia aku nei, e paa ana o Farani ina mokupuni o Canary a me Ceuta.

HOAO KOKUA O GEREMANIA IA SEPANIA—Me KA PANE A ADIMARALA DEWEU.

                Manila, Mei 19.—Wahi a Adimarala Deweu i hoike ae ai i kona manao i ke Kanikela Geremania o Manila, he hana kue kanawai ka hoolako ana i na pualikoa Sepania i na lako ai mai na mana aupuni kuwaho aku, oiai ke kaua ne ku nei i keia manawa mawaena o Amerika me Sepania. Nolaila, ua hui aku la ua Kanikela Geremani anei me Kenerala Augasaki, ke aliikoa kiekie o na pualikoa Sepania o ka Paemoku Pilipine, a hooholo i kona manao ma ka hoolawa aku i na lako ai mai kekahi moku kalepa Geremania i ku mai i ke awa o Manila.
                Ua hoike hou aku ke Kanikela Geremania ia Adimarala Deweu, e hooko ana oia no ka pomaikai pili kalepa o kona mau hoa kanaka ma ka haawi ana aku ina lako ai no na pualikoa Sepania o Kenerala Augasaki. Ua hoike hou aku ua Kanikela nei me na huaolelo moakaka, ua makaukau oia no ka hoopae i na lako ai malalo o ka hookele a na mokukaua Geremania elua e ku ana iloko o ke awa, i ka manawa mua loa ana e haawi aku ai i kekahi kauoha no ia maluhia.
                Ua pane aku o Adimarala Deweu me keia mau huaolelo pokole: "O ka hoao ana o kela moku kalepa e hoolele i na lako ai no ka enemi imua o ko'u alo ponoi, a oiai hoi au e ku nei malalo o ka hooko kauoha mai ko'u aupuni mai iloko o keia kaikuono, e haawi koke no au ano iloko o kela minute i ke kukala kaua i ko'u mau aumoku me kela mau mokukaua Geremania, a na ka hopena e hoike moakaka mai i ko lakou kulana ikaika o ka hoomalu, owai la ke nohoalii maluna o ka lanakila no na waiwai kipe imua o ka enemi."